‘A haere na taua fenua nei’
‘A haere na taua fenua nei’
“A haere na te maoro o taua fenua nei, e na te aano.”—GENESE 13:17.
1. Eaha te faaueraa anaanatae ta te Atua i horoa ia Aberahama?
MEA au anei na outou e tere atu i te mataeinaa, peneiaˈe te hoê tere na nia i te pereoo i te hopea hebedoma? Mea au na te tahi atu e tere na nia i te pereoo tataahi no te faaetaeta i te tino e no te mataitai haere. Te vai ra râ te tahi o te maiti e haere avae noa no te haamatau maitai e no te mataitai i te hoê vahi ma te ore e ru. E pinepine e mau tere taime poto. A feruri na râ eaha to Aberahama huru i muri aˈe i to te Atua parauraa ia ˈna e: “A tia, a haere na te maoro o taua fenua nei, e na te aano; e horoa hoi au i teie no oe”!—Genese 13:17.
2. I muri aˈe i to ˈna faarueraa ia Aiphiti, ua haere Aberahama ihea?
2 A hiˈo na i te tupuraa o tera mau parau. Ua parahi Aberahama e ta ˈna vahine e te tahi atu i Aiphiti. Te faaite maira te Genese pene 13 e ua faarue ratou ia Aiphiti e ua afai i ta ratou nǎnǎ i “te pae apatoa i Kanaana ra [aore ra Négueb].” I muri aˈe, “ua haere noa” Aberahama “i to ˈna haerea, mai apatoa mai e Betela roa.” I te tupuraa te hoê fifi i rotopu i ta ˈna mau tiai puaa e a ta ˈna tamaiti fetii ra o Lota, itehia ˈtura e e mea tia ia imi raua toopiti i te mau vahi aihere no raua taitahi, ua vaiiho noa Aberahama ia Lota ia maiti na mua. Ua maiti Lota i te ‘vahi papu [aore ra mataeinaa] i Ioridana ra,’ te hoê peho ruperupe “mai te ô a Iehova ra,” e i muri aˈe ua parahi ihora i Sodoma. Ua parau te Atua ia Aberahama e: “A nânâ na i to mata i nia, i tena vahi ta oe e parahi na, a hiˈo i te pae i apatoerau, e te pae i apatoa, e te pae i te hitia o te râ, e te pae i te tooa o te râ.” Eita e ore, ua nehenehe Aberahama e ite i te tahi atu mau tuhaa o te fenua mai te hoê vahi teitei piri atu ia Betela. E ere râ tera anaˈe. Ua titau manihini te Atua ia ˈna ia ‘haere na taua fenua nei’ e ia haamatau i to ˈna natura e te mau tuhaa fenua.
3. No te aha e riro ai ei tautooraa ia faahohoˈa i te mau tere o Aberahama?
3 Noa ˈtu te atearaa o te haereraa o Aberahama hou a tapae ai i Heberona, ua matau mau aˈe oia i te Fenua tǎpǔhia i te rahiraa o tatou. A manaˈo na i te mau vahi i faahitihia i roto i teie aamu—Négueb, Betela, te vahi papu aore ra te mataeinaa i Ioridana, Sodoma, e Heberona. Mea fifi anei na outou ia faahohoˈa teihea tera mau vahi? No e rave rahi, e tautooraa te reira no te mea tau taata o te nunaa a Iehova tei mataitai i te mau vahi ta ratou i taio i roto i te Bibilia, ma te tere atu na te roaraa e na te aanoraa o te fenua. E tano râ ia anaanatae mau tatou i te ite i te mau vahi bibilia. No te aha?
4, 5. (a) E nafea te Maseli 18:15 e taai ai i te ite e te maramarama o te mau fenua bibilia? (b) Eaha ta Zephania pene 2 e faataa ra?
4 Te na ô ra te Parau a te Atua e: “Te noaa ra i te aau o te taata haapao ra te ite; e te faaroo ra te tariˈa o te taata paari i te ite ia noaa.” (Maseli 18:15) Te vai ra iho â te tahi mau tumu parau e nehenehe te taata e ite, o te ite mau râ no nia i te Atua ra o Iehova e ta ˈna mau haaraa te mea faufaa roa ˈˈe. Papu maitai, e mea faufaa roa ta tatou e taio ra i roto i te Bibilia no tera ite mau. (Timoteo 2, 3:16) A tapao na râ, e titauhia te maramarama. Oia hoi, te aravihi i te faahohonu i te tumu parau, i te haroaroa aore ra i te taa i te mau taairaa i rotopu i to ˈna mau tuhaa e te taatoaraa. E parau mau te reira no te mau vahi i faahitihia i roto i te Bibilia. Ei hiˈoraa, ua ite te rahiraa o tatou teihea o Aiphiti, i nia râ i teihea faito e taa ˈi ia tatou i te parau ra e ua haere maira Aberahama mai Aiphiti mai “i te pae apatoa i Kanaana ra [aore ra Négueb],” i muri aˈe i Betela, e i Heberona? Te taa ra anei ia outou te taairaa i rotopu i tera mau vahi?
5 Aore ra i roto i ta outou taioraa bibilia tamau, ua taio paha outou i te Zephania pene 2. Ua taio outou i roto i te mau iˈoa o te mau oire, taata, e fenua. Gaza, Asekelona, Asadoda, Ekerona, Sodoma, e Nineve oia atoa o Kanaana, Moabi, Amona, e o Asura, tei faahiti-pau-roa-hia i roto i te tera noa pene. Ua manuïa anei outou i te faahohoˈaraa i roto i to outou feruriraa i taua mau vahi ra i orahia na e te taata mau, taata i taaihia i te tupuraa o te parau tohu a te Atua?
6. No te aha te tahi mau Kerisetiano e haafaufaa ˈi i te mau hohoˈa fenua? (A hiˈo i te tumu parau tarenihia.)
6 Ua faufaa-rahi-hia e rave rahi piahi o te Parau a te Atua i te hiˈoraa i te mau hohoˈa fenua bibilia. Te na reira ra ratou, e ere no te mea e mea anaanatae roa te mau hohoˈa fenua, no te mea râ te taa ra ia ratou e maoti te faaohiparaa i te mau hohoˈa fenua e nehenehe ai ratou e faarahi i to ratou ite i te Parau a te Atua. E nehenehe atoa te mau hohoˈa fenua e tauturu ia ratou ia maramarama ˈtu â, ma te ite e nafea te mau mea ta ratou i ite aˈena e taai ai i te tahi atu haamaramaramaraa. A rave ai tatou i te tahi mau hiˈoraa, e hohonu atu â paha to outou mauruuru ia Iehova e e ite maitai aˈe outou i te mau aamu i roto i ta ˈna Parau.—A hiˈo i te tumu parau tarenihia i te api 12.
E titauhia ia taa i te atearaa ia maramarama ˈtu â outou
7, 8. (a) Eaha te ohipa maere ta Samasona i rave e taaihia ia Gaza? (b) Eaha te haamaramaramaraa o te faariro i te ohipa faahiahia a Samasona ei mea maere roa ˈtu â? (c) E nafea te ite e te maramarama o teie aamu e taaihia i to Samasona aamu e tauturu mai ai?
7 I roto i Te mau tavana 16:2, e nehenehe outou e taio no nia i te tavana ra o Samasona o tei parahi i Gaza. E ite-pinepine-hia te iˈoa Gaza i roto i te mau parau apî no teie tau, e manaˈo paha to outou no nia i te vahi tei reira o Samasona, i roto i te tuhaa fenua Philiseti, piri atu i te pae tahatai o te Mediteranea. A hiˈo na i teie nei i Te mau tavana 16:3: “Taoto ihora Samasona e tui aˈera te po; ua tia aˈera oia i nia i taua tuiraa po ra, ua rave ihora i na opani o te oire, ma te pou atoa e piti, e te teˈa atoa; ua tuu aˈera i nia i te tapono, haere atura, hopoi roa ˈtura i nia i te mouˈa i pihaiiho i te oire ra o Heberona.”
8 Ma te feaa ore, e mea aano e mea teiaha te mau opani e pou o te pare mai ia Gaza. A feruri na ia outou e tamata ra i te amo i te reira! Ua na reira Samasona, ua tari râ oia te reira ihea e na teihea eˈa? Tei te pae tahatai o Gaza fatata i te faito o te miti. Teie râ, tei te hitia o te râ roa o Heberona e 900 metera i te teitei—e paiumaraa teitei te reira! Eita tatou e nehenehe e faataa i te vahi mau o “te mouˈa i pihaiiho i te oire o Heberona,” fatata râ e 60 kilometera te oire mai Gaza ˈtu—hau atu â tei te vahi teitei atu â! Eita anei te taaraa i te atearaa e horoa ra i te tahi hiˈoraa apî i te ohipa faahiahia a Samasona? E a haamanaˈo na no te aha Samasona i nehenehe ai e rave i tera mau ohipa—‘ua haere maira te varua o Iehova i nia iho ia ˈna.’ (Te mau tavana 14:6, 19; 15:14) Ei Kerisetiano no teie tau, eiaha tatou e tiaturi e e horoa mai te varua o te Atua i te hoê puai taa ê i te pae tino. E nehenehe râ taua noâ varua puai e faarahi i to tatou maramarama i te mau tumu parau hohonu pae varua e e haapuai ia tatou ia au i te taata i roto. (Korinetia 1, 2:10-16; 13:8; Ephesia 3:16; Kolosa 1:9, 10) Oia mau, ia maramarama tatou i te aamu o Samasona, ua papu ia tatou e e nehenehe te varua o te Atua e tauturu mai.
9, 10. (a) Eaha tei titauhia i roto i te upootiaraa a Gideona i nia i te mau ati Midiana? (b) E nafea to tatou ite i te pae teotarafia e tauturu ai ia tatou ia taa ˈtu â i tera aamu?
9 O te upootiaraa a Gideona i nia i to Midiana te tahi atu aamu i reira e mea faufaa ˈi te atearaa. Ua ite te rahiraa o te feia taio i te Bibilia e ua pau te hoê tahoêraa 135 000 feia haru fenua i te tavana ra o Gideona e to ˈna mau taata e 300—to Midiana, to Amaleka, e te tahi atu o tei puhapa i te vahi papu o Iezereela, piri atu i te aivi o More. Ua faaoto te mau taata o Gideona i te pu, ua haaparari i te mau auˈa no te faaite i ta ratou mau lamepa, e ua pii e: “O te ˈoˈe a Iehova, e ta Gideona.” Ua faaturorirori e ua haamǎtaˈu te reira i te mau enemi, e ua haamata ˈtura ratou i te taparahi ia ratou ratou iho. (Te mau tavana 6:33; 7:1-22) Tera noa anei tei tupu, te hoê ohipa ru i te po? A taio noa na i roto i Te mau tavana i te mau pene 7 e te 8. E ite outou e ua aro noa o Gideona. No nia i te vahi e rave rahi i faahitihia, eita e itehia vetahi i teie tau e te mau vairaa matauhia, aita paha ratou i nia i te mau hohoˈa fenua bibilia. E navai râ tei itehia e nehenehe ai tatou e apee i te mau haaraa a Gideona.
10 Ua aˈuaˈu Gideona i te toea o te mau nuu tahoê i Bete-sita e i muri iho i te pae apatoa ia Abele-mehola, piri atu i Ioridana. (Te mau tavana 7:22-25) Te na ô ra te aamu e: “Tae atura Gideona i Ioridana, e ua haere atura i te tahi paeau, oia, e na taata e toru hanere ia ˈna ra, ua pau te aho, te tipapa noa ra râ.” I muri aˈe i to ratou haereraa i te tahi paeau i Ioridana, ua aˈuaˈu te mau ati Iseraela i te mau enemi i te pae apatoa i Sukota e i Penuela, piri atu i Iaboka, i muri iho, na nia ihora i te mau aivi i Iogebeha (piri atu ia Amman no teie tau, i Ioridana). Ua fatata ïa e 80 kilometera o te aˈuaˈuraa e te aroraa. Ua haru e ua haapohe oia i na arii ati Midiana e piti, e hoˈi ihora i to ˈna oire, i Ophira, piri atu i te vahi i haamata ˈi te aroraa. (Te mau tavana 8:4-12, 21-27) Papu maitai, ua hau atu te ohipa faahiahia a Gideona e tau minuti faaotoraa pu, fariuriuraa lamepa, e te piiraa. E a manaˈo na e nafea te reira ia ohipa ˈtu â i nia i te parau o te mau taata o te faaroo: ‘E maoro hua ia parau vau ia Gideona e te tahi atu o tei faaetaetahia i te paruparuraa ra, aito roa ˈtura i te tamaˈi.’ (Hebera 11:32-34) E rohirohi atoa paha te mau Kerisetiano i te pae tino, e ere anei râ i te mea faufaa roa ia rave noa tatou i to te Atua hinaaro?—Korinetia 2, 4:1, 16; Galatia 6:9.
Eaha to te taata manaˈo e huru?
11. Eaha te tere o te mau ati Iseraela na mua ˈˈe ratou a tapae ai i Kadesa e i muri aˈe?
11 E hiˈo paha vetahi i te mau hohoˈa fenua bibilia no te ite i te mau vahi, ia manaˈo outou e nehenehe anei râ tera mau hohoˈa fenua e haamaramarama i te feruriraa o te taata? A rave na ei hiˈoraa i te mau ati Iseraela o te reva ˈtu mai te mouˈa Sinai e i te Fenua tǎpǔhia. Ma te tahi mau tapearaa i roto i to ratou tere, ua tae atu ratou i te pae hopea i Kadesa (aore ra, Kadesa-barenea). Te faaite ra te Deuteronomi 1:2 e 11 mahana to teie tere, te hoê atearaa fatata e 270 kilometera. Mai reira, ua tono Mose 12 manu i te Fenua tǎpǔhia. (Numera 10:12, 33; 11:34, 35; 12:16; 13:1-3, 25, 26) Mai na te pae apatoerau te mau manu i te haereraa i Négueb, na Bere-seba paha, i muri iho na Heberona, e tapae atu ai i te mau otia i te pae apatoerau o te Fenua tǎpǔhia. (Numera 13:21-24) No te mea ua farii ratou i te faataaraa ino a na manu 10, ua overe haere te mau ati Iseraela e 40 matahiti i te maoro i roto i te medebara. (Numera 14:1-34) Eaha ta te reira e faaite ra no nia i to ratou faaroo e to ratou aau tae e tiaturi ia Iehova?—Deuteronomi 1:19-33; Salamo 78:22, 32-43; Iuda 5.
12. Eaha ta tatou e nehenehe e faaoti no nia i te faaroo o te mau ati Iseraela, e no te aha e mea maitai ai ia feruriruri tatou i te reira?
12 A feruri na i te reira ia au i te hiˈoraa teotarafia. Ahiri te mau ati Iseraela i faaroo e i pee i te aˈo a Iosua e a Kaleba, e tere atea anei ratou e tapae atu ai i te Fenua tǎpǔhia? Fatata 16 kilometera o Kadesa ia Bere-lahai-roi, i reira o Isaaka raua Rebeka e faaea ˈi. E iti aˈe e 95 kilometera i te atea ia Bere-seba, tei faahitihia mai te hiti i te pae apatoa o te Fenua tǎpǔhia. (Genese 24:62; 25:11; Samuela 2, 3:10) Ma te tere mai Aiphiti mai i te mouˈa Sinai, e i muri iho e 270 kilometera i Kadesa, mai te huru ra e tei te uputa ratou o te Fenua tǎpǔhia. I roto i to tatou tupuraa, tei te uputa tatou o te Paradaiso fenua i fafauhia. Eaha te haapiiraa no tatou? Ua taai te aposetolo Paulo i te tupuraa o te mau ati Iseraela i teie aˈoraa: “E teie nei, e rohi ïa tatou i te faaô i taua faaearaa ra, o te mairi noa ˈtu te hoê mai ia ratou i mairi i te faaroo ore ra.”—Hebera 3:16–4:11.
13, 14. (a) I roto i teihea tupuraa i rave ai to Gibeona i te hoê ravea papu? (b) Eaha ta te haerea a to Gibeona e faaite ra, e eaha ta tatou e haapii na roto i te reira?
13 Te itehia ra te tahi haerea ê—te tahi o te tiaturi ra i te Atua no te rave i to ˈna hinaaro—i roto i te tupuraa bibilia o to Gibeona. I muri aˈe i to Iosua aratairaa i te mau ati Iseraela i te tahi atu pae o Ioridana i te fenua ta te Atua i tǎpǔ i te utuafare o Aberahama, ua tae i te taime e tiavaru ai i to Kanaana. (Deuteronomi 7:1-3) To roto atoa to Gibeona. Ua faatahuri te mau ati Iseraela ia Ieriko e ia Ai e ua puhapa i pihai mai ia Gilagala. Aita to Gibeona i hinaaro i te pohe mai to Kanaana ino, tono aˈera ratou i te mau tia ia Iosua ra i Gilagala. Ua haavarevare ratou e no rapaeau mai ratou i te tuhaa fenua o Kanaana ia nehenehe ratou e faatupu i te faaauraa auhoa e te mau Hebera.
14 Ua parau tera mau tia e: “Mai te fenua roa mai to mau tavini nei, no te iˈoa o to Atua ra o Iehova.” (Iosua 9:3-9) E au ra e ua haapapu to ratou ahu e maa e no te fenua atea mai ratou, fatata e 30 kilometera mau râ o Gibeona mai Gilagala ˈtu. Ma te tiaturi, ua faatupu Iosua e ta ˈna mau raatira i te faaauraa auhoa e o Gibeona e te mau oire i pihai mai i taaihia ia Gibeona. Ua riro noa anei te ravea paari a te taata no Gibeona ei ravea e ape ai i te haamouraa? Aita, ua faaite te reira i te hoê hinaaro e fanaˈo i te farii maitai a te Atua o Iseraela. Ua farii Iehova i to Gibeona e ua riro ratou “ei papai vahie i taua mahana ra, e ei tii pape na te amuiraa atoa ra, e no te fata a Iehova” ma te tâpû i te vahie no te fata o te tusia. (Iosua 9:11-27) Ua tamau to Gibeona i te faaite i te hoê aau tae no te rave i te mau ohipa haehaa i roto i te taviniraa a Iehova. Peneiaˈe, te vai ra vetahi o ratou i rotopu i te mau Netinimi tei hoˈi mai Babulonia mai e tei patu faahou i te hiero. (Ezera 2:1, 2, 43-54; 8:20) E nehenehe tatou e pee i to ratou haerea na roto i te tutavaraa ia vai hau noa e te Atua e ia amo ma te aau tae i te mau hopoia haehaa i roto i ta ˈna taviniraa.
Haapaeraa ia tatou iho
15. No te aha e mea maitai ai ia anaanatae tatou i te teotarafia no nia i te mau Papai Heleni Kerisetiano?
15 Te vai ra te teotarafia o te mau fenua bibilia i roto i te mau aamu i roto i te mau Papai Heleni Kerisetiano, mai te mau tere e te taviniraa a Iesu e a te aposetolo Paulo. (Mareko 1:38; 7:24, 31; 10:1; Luka 8:1; 13:22; Korinetia 2, 11:25, 26) I roto i te mau aamu i muri nei, a tamata na i te feruri i ta tera mau tere e titau ra.
16. Mea nafea te mau Kerisetiano i Berea i te faaiteraa i to ratou mauruuru ia Paulo?
16 No nia i te pitiraa o to ˈna tere mitionare (reni vareau i nia i te hohoˈa fenua), ua tae atu Paulo i Philipi, e tuhaa o Heleni i teie nei. Ua poro oia i reira, ua tapeahia e ua tuuhia, e haere atura i Tesalonia. (Ohipa 16:6–17:1) I to te mau ati Iuda faahuehueraa, ua faaitoito te mau taeae no Tesalonia ia Paulo ia haere i Berea, fatata e 65 kilometera i te atea. Ua manuïa ta Paulo taviniraa i Berea, ua haere maira râ te mau ati Iuda e faahuehue i te huiraatira. No reira, “ua tuu atura te mau taeae ia Paulo i reira ra e faahua haere oia na tai,” e “te feia i aratai ia Paulo ra, aratai atura ratou ia ˈna i Ateno.” (Ohipa 17:5-15) E au ra e ua ineine vetahi o te taui apî i te faaroo i te haere na raro e 40 kilometera i te miti Égée, i te aufau i te tere na nia i te hoê pahi, e i te fano e 500 kilometera. E mea atâta tera tere, ua farii râ te mau taeae i tera mau fifi e no reira ua horoa rahi i to ratou taime no teie tia ratere a te Atua.
17. Eaha ta tatou e nehenehe e taa maitai aˈe ia maramarama iho â tatou i te atearaa i rotopu ia Mileto e ia Ephesia?
17 No nia i te toruraa o to ˈna tere (reni matie i nia i te hohoˈa fenua), ua tae atu Paulo i te uahu o Mileto. Ua tono oia e tii i te mau peresibutero o te amuiraa no Ephesia e 50 kilometera i te atea. A feruri na i tera mau matahiapo o tei vaiiho i te tahi atu mau ohipa no te haere ia Paulo ra. Ua oaoa paha ratou i te paraparauraa no nia i te putuputuraa e fatata maira a haere ai ratou na raro. I muri aˈe i te putuputuraa e o Paulo e te faarooraa ia ˈna ia pure, “oto anaˈe ihora ratou atoa, tauahi maira i nia i te aˈî o Paulo ua hôˈi maira ia ˈna.” E “ua aratai atura ia ˈna i te pahi” no te fano atu i Ierusalema. (Ohipa 20:14-38) E mea rahi roa ta ratou mea e feruri e e paraparau a hoˈi ai ratou i Ephesia. Aita anei outou e maere no te mauruuru ta ratou i faaite na roto i te haere-atea-raa mai na raro no te farerei i te hoê tavini ratere o te nehenehe e haamaramarama e e faaitoito ia ratou? Te ite ra anei outou i te tahi mea i roto i teie aamu ta outou e nehenehe e faaohipa i roto i to outou oraraa e feruriraa?
A ite i te Fenua tǎpǔhia e i te mea e tiai maira
18. E faaoti papu tatou ia aha no nia i te mau vahi bibilia?
18 Te faaite ra te mau hiˈoraa i faahitihia aˈenei i te faufaaraa ia matau maitai i te fenua ta te Atua i horoa na i te mau ati Iseraela e tera te mea faufaa roa i roto i te aamu bibilia e rave rahi. (E nehenehe tatou faaano i to tatou hiˈoraa ma te ite i te mau fenua e haaati ra e vai ra i roto i te mau aamu bibilia.) A faahohonu ai tatou i to tatou ite e maramarama i te Fenua tǎpǔhia iho â ra, e mea maitai ia haamanaˈo tatou i te hoê titauraa faufaa roa tei titauhia i te mau ati Iseraela ia raea no te haere e no te fanaˈo i te fenua o “te û e te meli.” Oia hoi, e mǎtaˈu ia Iehova e e haapao i ta ˈna mau parau.—Deuteronomi 6:1, 2; 27:3.
19. Eaha na paradaiso e piti e au ia haapao maite noa tatou?
19 Oia atoa i teie mahana, e mea tia ia rave tatou i ta tatou tuhaa, te mǎtaˈuraa ia Iehova e te peeraa i to ˈna mau eˈa. I te na reiraraa, e haamaitai e e faaunauna tatou i te paradaiso pae varua e vai ra i teie nei i roto i te amuiraa Kerisetiano na te ao atoa nei. E maramarama ˈtu â tatou i to ˈna mau tuhaa e haamaitairaa. E e ite tatou e e mea rahi atu â te mau haamaitairaa. Ua aratai Iosua i te mau ati Iseraela i te tahi pae o Ioridana i te hoê fenua hotu e te maitai. I teie nei e tumu papu ta tatou no te tiai ru ma te tiaturi i te Paradaiso pae tino, te fenua maitai i mua ia tatou.
Te haamanaˈo ra anei outou?
• No te aha e mea maitai ai ia hinaaro tatou e faarahi i to tatou ite e maramarama i te mau fenua bibilia?
• Teihea tuhaa teotarafia i roto i teie tumu parau o tei haamaramarama taa ê ia outou?
• Eaha te haapiiraa tei haamaramarama roa ˈtu â ia outou a ite atu â ˈi outou no nia i te teotarafia i faahitihia i roto i te tahi mau tupuraa?
[Uiraa haapiiraa]
[Tumu parau tarenihia/Hohoˈa i te api 12]
‘Voyez le bon pays’
I te mau tairururaa i 2003 e 2004, ua fanaˈo te mau Ite no Iehova ma te oaoa i te buka rairai ‘Voyez le bon pays.’ Ua î teie papai apî, neneihia i roto fatata e 80 reo, i te mau hohoˈa fenua peni rau e tapura o te faaite ra i te mau tuhaa fenua ê o te ao bibilia, te Fenua tǎpǔhia iho â râ i te roaraa o te mau area tau e rave rau.
Te faataa ra te mau tumu parau e apiti ra i te mau hohoˈa fenua taa maitai maoti te numera o te mau api i papai-meumeu-hia, mai teie. Mai te peu e te vai ra ta outou teie buka rairai apî, a rave i te taime no te haamatau maitai i te mau tuhaa taa ê o te nehenehe e tauturu ia outou ia faahohonu i to outou ite e maramarama i te Parau a te Atua.
(1) E tatararaa to roto e rave rahi hohoˈa fenua aore ra tumu parau tarenihia o te faataa i te mau tapao taa ê i nia i te hohoˈa fenua. (2) To roto te hoê faito i te rahiraa hohoˈa fenua na roto i te mile e kilometera o te tauturu ia outou ia taa i te faito e te atearaa. (3) E pinepine te faaite ra te hoê ohe i te pae apatoerau, o te aratai ia outou. (4) E pinepine e ua penihia te mau hohoˈa fenua ei faaiteraa i te teiteiraa. (5) I te hiti, e mau leta/e mau numera paha to te hoê hohoˈa fenua ta outou e nehenehe e ite ei faanahoraa reni ia nehenehe outou e faaohipa no te ite i te mau oire aore ra iˈoa. (6) I nia i na faahororaa e piti api o te iˈoa o te mau vahi, e nehenehe outou e ite i te numera o te api papai-meumeu-hia, e pinepine i te apitihia mai e te faanahoraa reni o te vahi, mai teie E2. I muri aˈe outou e faaohipa ai i teie mau tuhaa tau taime, e maere paha outou e tauturu mau te reira no te faarahi i to outou ite e no te faahohonu i to outou maramarama o te Bibilia.
[Tapura/Hohoˈa fenua i te mau api 14, 15]
TAPURA O TE MAU TUHAA FENUA NATURA
(Hiˈo i te papai)
A. Pae miti o te Miti Rahi
B. Vahi papu i te pae tooa o te râ o Ioridana
1. Vahi papu o Asera
2. Tâpû fenua ǒaǒa i te pae miti o Dora
3. Fenua faaamuraa animara o Sarona
4. Vahi papu o Philiseti
5. Peho no ropu mai hitia o te râ ˈtu e i tooa o te râ
a. Vahi papu o Megido
b. Peho o Iezereela
C. Fenua mouˈa i te pae tooa o te râ o Ioridana
1. Aivi no Galilea
2. Aivi no Karemela
3. Aivi no Samaria
4. Shéphéla (aivi nainai)
5. Fenua mouˈa o Iuda
6. Medebara no Iuda
7. Négueb
8. Medebara no Parana
D. Araba (Rift Valley)
1. Peho o Houlé
2. Tuhaa fenua o te miti no Galilea
3. Peho o Ioridana
4. Miti Avaava (miti Pohe)
5. Araba (i te pae apatoa o te miti Avaava)
E. Mouˈa/Vahi papu teitei i te pae hitia o te râ o Ioridana
1. Basana
2. Gileada
3. Amona e Moabi
4. Vahi teitei o Edoma
F. Mouˈa no Lebanona
[Hohoˈa fenua]
Mouˈa Heremona
More
Abele-mehola
Sukota
Jogebeha
Betela
Gilagala
Gibeona
Ierusalema
Heberona
Gaza
Bere-seba
Sodoma?
Kadesa
[Hohoˈa fenua/Hohoˈa i te api 13]
(Hiˈo i te papai)
KANAANA
Megido
GILEADA
Dotana
Sekema
Betela (Luza)
Ai
Ierusalema (Salema)
Betelehema (Epherata)
Mamera
Heberona (Makapela)
Gerara
Bere-seba
Sodoma?
NÉGUEB
Rehobota?
[Mouˈa]
Moria
[Vahi Pape]
Miti Avaava
[Anavai]
Ioridana
[Hohoˈa]
Ua haere Aberahama na taua fenua nei
[Hohoˈa fenua i te api 16]
(Hiˈo i te papai)
Teroa
SAMOTERAIA
Neapoli
Philipi
Amephipoli
Tesalonia
Berea
Ateno
Korinetia
Ephesia
Mileto
RODA