E fanaˈo noa anei tatou i te panaˈonaˈo ore mau?

TE HAUTI ra te mau tamarii ma te oaoa e to ratou mau metua î i te here—o vai te ore e au ia mataitai i taua hohoˈa ra? E mea panaˈonaˈo ore roa te mau tamarii i pihai iho i to ratou mau metua e haapao ra ia ratou. Tera râ, no te feia apî e rave rahi, e mea varavara tera huru tupuraa oaoa. Te tapitapi nei râ te tahi mau tamarii i te mau mahana atoa no te hoê vahi taotoraa i te po. Te vai ra anei te hoê tiaturiraa no taua mau tamarii fare ore ra e te tahi atu o te ora nei ma te panaˈonaˈo?

Noa ˈtu e e ia hiˈohia, aita paha e tiaturiraa to te tau no a muri aˈe, te horoa ra te Parau a te Atua i te tiaturiraa. Ua tohu te peropheta Isaia e e tae mai te mahana e ora ˈi te taatoaraa ma te panaˈonaˈo ore roa. Ua papai oia e: “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu.”—Isaia 65:21, 22.

Tera râ, e niu papu anei to tera tiaturiraa? Oia mau, eita hoi te taˈo “tiaturiraa” e faataa noa i te mea papu. Ei hiˈoraa, i Beresilia, e pinepine i te faaroohia te parau: “A esperança é a última que morre.” Te auraa mau, “Te tiaturiraa, o te ohipa hopea ïa o te mou.” E titau te reira ia tapea te taata e rave rahi i te tiaturiraa noa ˈtu e aita e niu mau faahou no te tiaturi. Mea taa ê râ te tiaturiraa ta te Atua ora e horoa mai. Ua papai te aposetolo Paulo e: “O tei faaroo atoa ia ˈna [te Atua] ra, e ore anaˈe ïa e haama.” (Roma 10:11) Te horoa maira te mau parau tohu bibilia o tei tupu aˈena i te tiaturiraa e e tupu iho â te tahi atu mau parau tǎpǔ atoa a te Atua ra o Iehova. Ia tupu tera mau parau tǎpǔ, e riro ïa te mau tupuraa o te turai i te mau tamarii ia ora i roto i te aroâ ei ohipa tahito.

Hoê â atoa i teie mahana, e nehenehe te aˈoraa maitai i roto i te Bibilia e tauturu i te feia aita e tiaturiraa ia haamaitai i to ratou oraraa e ia ite i te panaˈonaˈo ore mau. E nafea e nehenehe ai? E oaoa te mau Ite no Iehova o to outou vahi i te tauturu ia outou ia ite i te pahonoraa o teie uiraa.