Ehia maororaa e nehenehe ai te taata e ora?

I TE 3 no Mati 1513, ua opua te taata maimi fenua Paniora ra o Juan Ponce de León i te hoê tere faahiahia. Mai Porto Rico mai, ua fano atura oia ma te tiaturi e tapae i te motu o Bimini. Ia au i te aai, ua imi oia i te hoê pape pihaa semeio, te Pu o te vai-apî-raa. Ua tapae atu râ oia i te fenua parauhia i teie nei, o Floride, i te mau Hau Amui. Parau mau, aita roa ˈtu oia i ite i tera pape pihaa feruri-noa-hia.

I teie mahana, eita te rahiraa o te taata e ora hau atu i te 70 aore ra 80 matahiti. Noa ˈtu e te tapura ra te Bibilia i te feia i ora maoro roa, te faahiti ra te hoê buka (Le livre Guinness des records 2002) i te matahiti o te taata paari roa ˈˈe i ora aˈenei, 122 matahiti e 164 mahana ïa. (Genese 5:3-32) Ua parau râ te taata haapao i te faatureraa morare o te toroa taote o John Harris e: “Te faaite ra te maimiraa apî i teie nei e e raeahia iho â te hoê totaiete eita te ruhiruhiaraa, tae noa ˈtu te pohe, e ape-faahou-hia.” Ua faahiti te tahi mau taata maimi o te senekele 21 i te parau ra “fatata roa eita e pohe faahou,” “te taotia-ore-raa o te oraraa o te taata mai teie nei e tae atu i 2099,” “te faarahiraa hopea ore o te mau taoˈa tahi,” e te tahi atu mau mea mai tera.

I roto i ta ˈna buka (The Dream of Eternal Life), te tapao ra o Mark Benecke e: “Fatata te mau taoˈa tahi atoa o te tino i te faaapîhia e rave rahi taime i te roaraa o te oraraa . . . I muri aˈe fatata e hitu matahiti, e taata apî mau tatou.” Eita râ te reira e tamau noa e a muri noa ˈtu no te mea e faaea te mau taoˈa tahi i te faarahi i muri aˈe i te hoê faito vahiraa i faaoti-ê-na-hia. Teie râ, ahiri e e ere mai te reira, “e nehenehe ïa te tino taata e tamau noa i te faaapî ia ˈna iho no te hoê taime maoro roa, mure ore atoa,” ta Benecke ïa e parau ra.

A feruri atoa na i te faahiahia rahi o te roro taata, o tei hau ê i te faaohiparaa atoa o ta tatou e nehenehe e rave i te roaraa o to tatou hoi oraraa poto. Ia au i te titionare (Encyclopædia Britannica), “e mau aravihi rahi aˈe [to te roro taata] i te mau mea atoa e nehenehe e ravehia i te roaraa o te oraraa o te hoê taata.” (Neneiraa 1976, buka 12, api 998) Te na ô ra te buka (Un cerveau pour apprendre) a David Sousa e: “Aita e otia to te roro no te haaputu i te mau haamaramaramaraa.”—Api 83, piti o te neneiraa, tiaraa fatu 2002.

No te aha eita e itehia i te feia maimi i te tumu mau o te pohe? E no te aha e aravihi rahi mau to te roro taata? Ua fanauhia paha tatou no te haapii noa e a muri noa ˈtu? No te aha tatou e nehenehe ai e feruri i te ora mure ore?

Te na ô ra te Bibilia e: “Ua tuu [te Atua] i te manaˈo i to teie nei ao i roto i to ratou aau; aita râ e taata i ite i te ohipa a te Atua mai te matamua mai e tae noa ˈtu i te hopea.” (Koheleta 3:11) Te faataa ra teie mau parau e ua tuu mai te Atua i roto ia tatou te manaˈo o te oraraa e a muri noa ˈtu. E haapii noa ïa tatou no nia i te Atua e ta ˈna mau ohipa. Ahiri tatou e ora na e mau miria e miria matahiti—oia, e a muri noa ˈtu—e nehenehe noa ïa tatou e haapii hau atu â no nia i te mau poieteraa faahiahia a te Atua.

Te faaite atoa ra te mau parau a Iesu Mesia e e nehenehe te taata e ora e a muri noa ˈtu. Ua parau oia e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) E o outou? E hinaaro anei outou e ora e a muri noa ˈtu?