Ei haerea hapa ore to oe
Ei haerea hapa ore to oe
“Area vau nei, te haere nei au ma te hapa ore.”—SALAMO 26:11.
1, 2. (a) No te aha e tuhaa faufaa ˈi te hapa ore o te hoê taata o te tumu parau o te mana arii o te Atua? (b) E nafea te mau mea ora maramarama i poietehia e faaite ai e te paturu ra ratou i to Iehova mana arii?
I TO Satani orure-hau-raa i te ô i Edene, ua mârô oia i te tumu parau rahi o te mana arii tia o te Atua i nia i te taatoaraa o ta ˈNa mau mea ora i poietehia. I muri rii aˈe, ua mârô oia e e tamau te taata i te tavini i te Atua mai te peu noa e e fanaˈo ratou i te mau maitai. (Ioba 1:9-11; 2:4) No reira te hapa ore o te taata i riro ai ei tuhaa faufaa o te tumu parau o te mana arii o Iehova.
2 Noa ˈtu e aita mau â te mana arii o te Atua i niuhia i nia i te hapa ore o ta ˈna mau mea ora i poietehia, e nehenehe râ te mau taata e te mau tamaiti varua a te Atua e faaite i to ratou tiaraa no nia i teie tumu parau. E nafea? Ma te maiti i te pee i te hoê haerea hapa ore aore ra eita. E riro ïa te hapa ore o te hoê taata ei niu e nehenehe ai oia e haavahia.
3. (a) Eaha ta Ioba e Davida i hinaaro ia hiˈopoa e ia haava Iehova? (b) Eaha te mau uiraa e hiti mai no nia i te hapa ore?
3 Ua na ô Ioba ma te tiaturi e: “E faito [Iehova] ia ˈu i roto i te faito tia ra, ia ite te Atua i te haavare ore no ˈu ra.” (Ioba 31:6) O te hapa ore ta te arii o Iseraela i tahito ra o Davida i ani ia Iehova ia hiˈopoa i to ˈna pureraa e: “Tei ia oe te parau [aore ra haava] ia ˈu, e Iehova; i haere noa na vau ma te haavare ore [aore ra hapa ore]: te tiaturi nei au ia Iehova, e ore au e pahee.” (Salamo 26:1) Auê te faufaa roa no tatou atoa ia haere ma te hapa ore! Eaha râ te hapa ore, e eaha te auraa e haere ma te hapa ore? Eaha te tauturu mai ia vai hapa ore noa?
‘I haere noa na vau ma te hapa ore’
4. Eaha te hapa ore?
4 Te auraa o te hapa ore, o te riroraa ïa ei taata piˈo ore, tia, parau-tia, e te hape ore. E ere noa râ te hapa ore i te raveraa i te mea tia. E maitai aore ra e rotahi morare o te aau paieti taatoa i te Atua te reira. Ua mârô Satani i te mau manaˈo turai o Ioba i to ˈna parauraa i te Atua e: “E nanao noa ˈtu na râ i to rima a rave atu ai i [to Ioba] ivi e te iˈo, e e faaino atu oia ia oe i mua i to aro i reira.” (Ioba 2:5) Hau atu â i te ohipa maitai, e titau te hapa ore i te manaˈo turai tano o te aau.
5. Eaha te faaite ra e eita te tapearaa i te hapa ore e titau mai ia riro ei taata tia roa?
5 Eita râ te tapearaa i te hapa ore e titau i te tia-roa-raa. E mea tia ore te arii ra o Davida e ua rave oia e rave rahi hape ino mau i te roaraa o to ˈna oraraa. Te faahiti ra râ te Bibilia ia ˈna mai te hoê taata o tei haere “ma te haapao maitai [aore ra hapa ore] o te aau.” (Te mau arii 1, 9:4) No te aha? No te mea ua hinaaro Davida ia Iehova. Ua pûpûhia to ˈna aau na te Atua. Ua faˈi oia ma te aau tae i ta ˈna mau hapa, ua farii i te aˈo, e ua faatitiaifaro i to ˈna mau haerea. Oia mau, te itehia ra to Davida hapa ore i roto i to ˈna paieti pûpûhia ma te aau taatoa e te hinaaro i to ˈna Atua ra o Iehova.—Deuteronomi 6:5, 6.
6, 7. Eaha ta te haereraa ma te hapa ore e titau ra?
6 Aita te hapa ore i taotiahia i te tahi tuhaa o te haerea o te taata, mai te paieti i te pae faaroo. E tuhaa te reira o to tatou oraraa taatoa. Ua ‘haere’ Davida ma te hapa ore. Te na ô ra te hoê buka (The New Interpreter’s Bible) e: “I roto i te ihoparau ‘haere,’ te vai ra te manaˈo o te ‘huru oraraa.’” No nia i te feia “haavare ore i te eˈa,” ua himene te fatu salamo e: “E ao to tei haapao i ta [te Atua] i faaite mai, o tei imi ia ˈna ma te aau atoa ra. Aore ratou i rave i te hara: ua haapao [aore ra haere] ratou i ta ˈna parau [aore ra na nia i to ˈna mau eˈa].” (Salamo 119:1-3) E titau te hapa ore i te imi-noa-raa e rave i to te Atua hinaaro e te haereraa na nia i to ˈna mau eˈa.
7 E titau te haereraa ma te hapa ore i te here taiva ore i te Atua, i roto atoa i te mau tupuraa au ore. Ia faaoromai tatou i te mau tamataraa, ia vai aueue ore noa tatou noa ˈtu te mau ati, aore ra ia patoi tatou i te mau faahemaraa o te ao paieti ore, e itehia ïa to tatou hapa ore. E ‘faaoaoa tatou i to Iehova aau’ no te mea e nehenehe ta ˈna e patoi i tei faaino mai ia ˈna. (Maseli 27:11) Ua tano ïa tatou i te faaoti-papu-raa mai ia Ioba: “E ore â vau e faarue i te parau mau [aore ra i to ˈu hapa ore] e pohe noa ˈtu vau.” (Ioba 27:5) E faaite te Salamo 26 eaha te tauturu mai ia haere ma te hapa ore.
“E perehahu mai oe i tau aau e tau manaˈo”
8. Eaha ta outou e haapii na roto i ta Davida taparuparuraa ia Iehova ia hiˈopoa i to ˈna aau e to ˈna manaˈo?
8 Ua pure Davida e: “E hiˈopoa mai oe, e tamata mai, e Iehova, e perehahu mai oe i tau aau e tau manaˈo.” (Salamo 26:2) Te taˈo Hebera i hurihia ei “manaˈo” i roto i teie irava, o te mau manaˈo e huru aau hohonu roa ˈˈe ïa o te taata. E te aau, o te ihotaata taatoa ïa—to ˈna manaˈo turai, huru aau e feruriraa. I to Davida aniraa ia Iehova ia hiˈopoa ia ˈna, ua pure oia e ia paheruhia e ia hiˈopoahia to ˈna mau manaˈo e huru aau hohonu roa ˈˈe.
9. E nafea Iehova e perehahu ai i to tatou aau e to tatou manaˈo?
9 Ua taparuparu Davida e ia perehahuhia to ˈna aau e to ˈna manaˈo. E nafea Iehova e perehahu ai i to tatou ihotaata? Ua himene Davida e: “E haamaitai â vau ia Iehova o tei haapii mai ia ˈu ra; te aˈo maira tau manaˈo aau ia ˈu i te rui.” (Salamo 16:7) Eaha te auraa? Ua tae roa ïa te aˈoraa a te Atua i roto i te mau tuhaa hohonu roa ˈˈe o Davida e ua vai noa i reira, i te aˈoraa i to ˈna mau manaˈo e huru aau hohonu roa ˈˈe. O tatou atoa ïa mai te peu e e feruri tatou ma te aau mehara i te aˈoraa ta tatou e fanaˈo maoti te Parau a te Atua, ta ˈna mau tia, e ta ˈna faanahonahoraa e vaiiho atu ai i te reira i roto roa ia tatou. E tauturu mai te pure-tamau-raa ia Iehova ia perehahu ia tatou mai teie ia haere ma te hapa ore.
‘E vai na to hamani maitai i mua ia ˈu’
10. Eaha tei tauturu ia Davida ia faaau i te haerea i te parau mau na te Atua ra?
10 Ua na ô â Davida e: “E vai na to hamani maitai i mua i tau mata, e ua faaau vau i to ˈu haerea i te parau mau na oe ra.” (Salamo 26:3) Ua ite maitai Davida i te mau ohipa hamani maitai a te Atua, e ua feruriruri oia i te reira ma te aau mehara. “E haamaitai ia Iehova, e tau nephe,” ta ˈna ïa i himene, “e eiaha e haamoe i ta ˈna mau raveraa atoa.” Ma te haamanaˈo i te mau “raveraa” a te Atua, ua na ô â Davida e: “Te rave ra Iehova i te mau ohipa parau-tia e te mau faaotiraa haava no te feia atoa i hamani-ino-hia ra. Ua faaite oia i to ˈna mau eˈa ia Mose, e ta ˈna mau haaraa i te tamarii a Iseraela.” (Salamo 103:2, 6, 7; MN) Peneiaˈe ua haamanaˈo Davida i te hamani-ino-raahia te mau ati Iseraela e to Aiphiti i te tau o Mose. Mai te peu e tera iho â, ua haaputapû paha te feruriruriraa mea nafea to Iehova faaiteraa i te mau ravea faaoraraa ia Mose i te aau o Davida e ua haapuai i ta ˈna faaotiraa papu e faaau i te haerea i te parau mau na te Atua ra.
11. Eaha te nehenehe e tauturu mai ia haere ma te hapa ore?
11 E tauturu atoa mai te haapii-tamau-raa i te Parau a te Atua e te feruriruriraa i ta tatou e haapii ra i roto ia haere ma te hapa ore. Ei hiˈoraa, e faaitoito mau te haamanaˈoraa e ua horo ê Iosepha i te mau titauraa morare ore a te vahine a Potiphara ia tatou ia horo ê i terâ mau titauraa i ta tatou vahi raveraa ohipa, i te fare haapiiraa, aore ra i te tahi atu vahi. (Genese 39:7-12) Eaha ïa ia faahemahia tatou e te mau ravea no te ruperuperaa i te pae materia aore ra te tiaraa teitei e te mana i roto i teie nei ao? Te fanaˈo ra tatou i te hiˈoraa o Mose, o tei haapae i te mau mea hanahana o Aiphiti. (Hebera 11:24-26) Ma te feaa ore, e tauturu te haamanaˈoraa i te faaoromai o Ioba ia tatou ia haapuai i ta tatou faaotiraa papu e vai taiva ore noa ia Iehova noa ˈtu te maˈi e te mau ati. (Iakobo 5:11) Eaha ïa ia hamani-ino-hia tatou? Oia, e horoa mai te haamanaˈoraa i te tupuraa o Daniela i roto i te apoo o te mau liona i te itoito!—Daniela 6:16-22.
“Aore au i parahi i roto i te mau taata haapao ore i te parau”
12, 13. Teihea huru mau amuimuiraa e mea maitai ai ia ape tatou?
12 Ma te faahiti i te tahi atu râ tuhaa o tei haapuai i to ˈna hapa ore, teie ta Davida i parau: “Aore au i parahi i roto i te mau taata haapao ore i te parau, aore hoi i amui i roto i te feia haavare. E mea ino [aore ra riri] na ˈu ia parahi i ǒ te feia parau ino; e ore hoi au e parahi i roto i te feia paieti ore.” (Salamo 26:4, 5) Eita noa Davida e hinaaro e parahi i roto i te feia paieti ore. E mea riri na ˈna te mau amuimuiraa ino.
13 E o tatou? E patoi anei tatou i te amuimui atu i te mau taata haapao ore i te parau na roto i te mau porotarama afata teata, video, hohoˈa tavirihia, Internet, aore ra te tahi atu mau ravea? E faaatea ê mai anei tatou i te feia haavare? E haavare faahoa mai paha vetahi i te fare haapiiraa aore ra i ta tatou vahi raveraa ohipa no te tahi mau opuaraa piˈo. E hinaaro mau anei tatou e faatupu i te taairaa piri e te feia aita e faaau ra i te haerea i te parau mau na te Atua ra? Noa ˈtu e e parau ratou e aau haavare ore to ratou, e huna atoa te mau apotata i ta ratou opuaraa e faaatea ê mai ia tatou i te taviniraa ia Iehova. Eaha ïa mai te peu e e piti oraraa to vetahi i roto i te amuiraa Kerisetiano? Te huna atoa ra ratou i to ratou huru mau. Te tavini nei Jayson i teie nei ei tavini tauturu, e mau hoa to ˈna mai tera i to ˈna apîraa. Te parau ra oia no ratou e: “I te hoê mahana, ua na ô mai te hoê o ratou e: ‘E ere i te mea faufaa ta tatou e rave ra i teie nei no te mea ia tae mai te faanahonahoraa apî, e pohe noa tatou. Aita tatou i ite e ua ere tatou i te tahi mea.’ Ua faaara mai tera huru paraparau ia ˈu. Eita vau e hinaaro e pohe ia tae mai te faanahonahoraa apî.” Ua tâpû Jayson ma te paari i ta ˈna amuimuiraa e tera mau hoa. “Eiaha e vare,” ta te aposetolo Paulo ïa i faaara. “E ino te [peu faufaa] i te amuiraa iino.” (Korinetia 1, 15:33; MN) Auê te faufaa roa ia ape tatou i te mau amuimuiraa ino!
‘E taio vau i ta oe mau ohipa taa ê ra’
14, 15. E nafea tatou e nehenehe ai e ‘haaati i ta Iehova fata’?
14 Ua na ô faahou Davida e: “E horoi au i o ˈu pue rima i te hapa ore, a haaati atu ai au i to fata, e Iehova!” No te aha?“A faaite atu ai ma te reo haamaitai, e a taio ai i ta oe atoa ra mau ohipa taa ê ra.” (Salamo 26:6, 7) Ua hinaaro Davida ia vai mâ noa i te pae morare ia nehenehe oia e haamori ia Iehova e e faaite i to ˈna paieti i te Atua.
15 Ua riro te mau mea atoa i taaihia i te haamoriraa mau i roto i te sekene e i muri aˈe i roto i te hiero, ‘ei hohoˈa e ei huru o te mau mea o te raˈi ra.’ (Hebera 8:5; 9:23) Ua faahohoˈa te fata i te hinaaro o Iehova i te fariiraa i te tusia o Iesu Mesia ei taraehara no te huitaata. (Hebera 10:5-10) E horoi tatou i to tatou pue rima i te hapa ore “a haaati atu ai i ta [Iehova] fata” ma te faahotu i te faaroo i taua tusia ra.—Ioane 3:16-18.
16. E nafea tatou e faufaahia ˈi ia faaite tatou ia vetahi ê i ta te Atua mau ohipa taa ê?
16 Ia feruri tatou i te mau mea atoa ta te hoo e horoa mai, aita anei to tatou aau e î ra i te mauruuru ia Iehova e i ta ˈna Tamaiti fanau tahi? Ma to tatou aau mauruuru, e faaite anaˈe ïa ia vetahi ê i ta te Atua mau ohipa taa ê—mai te poieteraa o te taata i te ô i Edene e tae roa ˈtu ai i te faaapî-roa-raa i te mau mea atoa i roto i te ao apî a te Atua. (Genese 2:7; Ohipa 3:21) E auê parururaa pae varua no tatou te pororaa i te Basileia e te faariroraa i te taata ei pǐpǐ! (Mataio 24:14; 28:19, 20) E tauturu te haa-noa-raa i roto i te reira ia tatou ia tapea noa i to tatou tiaturiraa no te oraraa faahiahia no a muri aˈe, to tatou faaroo puai i te mau parau fafau a te Atua, e to tatou hinaaro oraora ia Iehova e i te taata-tupu.
‘Ua hinaaro vau i te vahi moˈa ra o to fare’
17, 18. Eaha to tatou huru i mua i te mau putuputuraa Kerisetiano?
17 Ua riro te sekene, e to ˈna fata no te mau tusia, ei pu o te haamoriraa a Iehova i Iseraela. Ei faaiteraa i to ˈna hinaaro i tera vahi, ua pure Davida e: “Ua hinaaro vau, e Iehova, i te vahi moˈa ra o to fare, e te vairaa o te sekene o to oe ra hanahana.”—Salamo 26:8.
18 Mea au anei na tatou e putuputu i te mau vahi i reira tatou e haapii ai no nia ia Iehova? E pu o te haamoriraa mau i roto i te tuhaa oire te mau Piha a te Basileia atoa e ta ˈna porotarama tamau o te haapiiraa pae varua. Hau atu â, te fanaˈo ra tatou i te mau tairururaa mataeinaa tamatahiti, haaati, e mahana taa ê. E vauvauhia te “mau parau” a Iehova i roto i tera mau putuputuraa. Mai te peu e e haapii tatou i te ‘hinaaro rahi i te reira,’ e hinaaro ru tatou e haere i te mau putuputuraa e e haapao maite tatou ia tae anaˈe i ǒ. (Salamo 119:167) Auê te mahanahana roa ia parahi i pihai iho i te mau hoa faaroo o te anaanatae ra i to tatou iho maitai e o te tauturu mai ia tamau noa i te haere ma te hapa ore!—Hebera 10:24, 25.
‘Eiaha e amuihia to ˈu ora’
19. Aita Davida i hinaaro ia itehia oia i roto i teihea mau hara?
19 I te mea e ua ite maite Davida i te mau faahopearaa o te fariu-ê-raa i te faaauraa i te haerea i te parau mau na te Atua ra, ua taparuparu oia e: “Eiaha e amui-atoa-hia [tau nephe] i to te feia rave hara, e to ˈu ora atoa nei i to te feia toto ra: e te vai ra te peu taiata i roto i to ratou rima; ua î hoi to ratou rima atau i te tarahu haapiˈo ra.” (Salamo 26:9, 10; MN) Aita Davida i hinaaro ia taiohia oia i rotopu i te feia paieti ore tei hara i te peu taiata aore ra te tarahu haapiˈo.
20, 21. Eaha te nehenehe e aratai ia tatou na te eˈa o te paieti ore?
20 Ua î roa te ao i teie tau i te mau ohipa morare ore. Te paturu ra te afata teata, te mau vea e hohoˈa teata i te peu taiata—“te faaturi, te poreneia, te mau peu faufau ra.” (Galatia 5:19) Ua riro vetahi ei tîtî na te mau hohoˈa faufau, o te aratai pinepine i te haerea morare ore. Mea ohie iho â râ tera mau mana ia ohipa i nia i te feia apî. I roto i te tahi mau fenua, e peu matauhia te haamatauraa, e te faahepohia ra te mau taurearea ia tiaturi e e mea tia ia haamatau ratou. Mea rahi te feia apî o te haamatau ra, noa ˈtu e e mea apî roa ratou no te faaipoipo. No te haamâha i to ratou mau hiaai i te pae taatiraa o te tupu ra i roto ia ratou, eita e maoro e topa ratou i roto i te haerea morare ore a rave atu ai i te poreneia.
21 Aita te feia paari i paruruhia i te mau mana iino. E mau tapao o te hoê ereraa i te hapa ore te mau ohipa tapihoo tia ore e te mau faaotiraa niuhia i nia i te mau manaˈo turai miimii. E faaatea ê mai te haereraa na te mau eˈa o teie nei ao ia tatou ia Iehova. ‘E riaria anaˈe i te ino e e hinaaro anaˈe i te maitai’ e e tamau anaˈe i te haere ma te hapa ore.—Amosa 5:15.
“E faaora oe ia ˈu, e aroha mai hoi ia ˈu”
22-24. (a) Eaha te faaitoitoraa ta outou e ite ra i roto i te mau parau hopea o te Salamo 26? (b) Eaha te marei e tauaparauhia i roto i te tumu parau i muri nei?
22 Ua faaoti Davida i ta ˈna parau i te Atua, ma te na ô e: “Area vau nei, te haere nei au ma te hapa ore. E faaora oe ia ˈu, e aroha mai hoi ia ˈu. Te taahi nei tau avae i te vahi papu; e haamaitai â vau ia Iehova i roto i te mau amuiraa ra.” (Salamo 26:11, 12) Ua taai-roa-hia ta Davida faaotiraa papu e tapea i to ˈna hapa ore i ta ˈna taparuparuraa no te faaoraraa. Auê te reira i te faaitoito e! Noa ˈtu to tatou tiaraa taata hara, e tauturu mai Iehova mai te peu e e faaoti papu tatou e haere ma te hapa ore.
23 Ia faaite to tatou huru oraraa e te faatura ra e te haafaufaa ra tatou i te mana arii o te Atua i roto i te mau tuhaa atoa o to tatou oraraa. E nehenehe tatou taitahi e ani ia Iehova na roto i te pure ia hiˈopoa e ia perehahu i to tatou mau manaˈo e huru aau hohonu roa ˈˈe. E nehenehe tatou e haamanaˈo noa i ta ˈna parau mau ma te haapii maitai i ta ˈna Parau. No reira, e ape anaˈe ïa i te mau amuimuiraa ino, e haamaitai anaˈe râ ia Iehova i roto i te mau amuiraa. Ia apiti tatou ma te itoito rahi i te ohipa pororaa i te Basileia e te faariroraa i te taata ei pǐpǐ, ma te ore roa ˈtu e faatia i teie nei ao ia haafifi i to tatou mau taairaa faufaa roa e te Atua. A rave ai tatou i te mau mea maitai roa ˈˈe no te haere ma te hapa ore, e nehenehe tatou e tiaturi e e hamani maitai Iehova ia tatou.
24 I te mea e e titau ra te hapa ore i te mau tuhaa atoa o te oraraa, e mea tia ia ite maite tatou i te hoê marei pohe—te inu-hua-raa i te ava. E tauaparauhia te reira i roto i te tumu parau i muri nei.
Te haamanaˈo ra anei outou?
• No te aha e mea tia ˈi ia haavahia te mau mea ora maramarama i poietehia i nia i te niu o to ratou hapa ore?
• Eaha te hapa ore, e eaha ta te haereraa ma te hapa ore e titau ra?
• Eaha te tauturu mai ia haere ma te hapa ore?
• No te tapea i te hapa ore, e mea tia ia ite maite e ia ape tatou i teihea mau ati?
[Uiraa haapiiraa]
[Hohoˈa i te api 21]
Tei mua anei i to outou mata te mau ohipa hamani maitai a Iehova?
[Hohoˈa i te api 21]
Te ani tamau ra anei oe ia Iehova ia hiˈopoa i to oe mau manaˈo hohonu roa ˈˈe?
[Hohoˈa i te api 23]
E faaoaoa to tatou tapearaa i te hapa ore i mua i te mau tamataraa i to Iehova aau
[Hohoˈa i te api 25]
Te haafaufaa ra anei outou i te mau faanahoraa a Iehova no te tauturu ia outou ia haere ma te hapa ore?