Mea ora te parau a Iehova

Manaˈo faufaa o te buka a Iosua

I TE puhaparaa i te mau vahi papu o Moabi i te matahiti 1473 H.T.T., ua oaoa paha te mau Iseraela i te faarooraa i teie mau parau: “E o, e toru mahana toe e tae ai outou i te hoê pae Ioridana nei, e haere outou i nia i te fenua ta to outou Atua ta Iehova e horoa mai no outou na, ia noaa.” (Iosua 1:11) Ua fatata to ratou overe-haere-raa e 40 matahiti i te maoro i te medebara i te hope.

Hau rii atu e 20 matahiti i muri aˈe, e tia ˈtu te aratai ra o Iosua i ropu i te fenua o Kanaana e e parau oia i te feia paari o Iseraela e: “E inaha, ua tufa-kelero-hia e au teie nei mau fenua e toe nei no outou, ei parahiraa no to outou na mau opu, e te mau fenua atoa i pau ia ˈu mai Ioridana mai e tae roa aˈenei i te tai rahi i te tooa o te râ ra. E e hee ratou i to outou Atua ra ia Iehova i mua ia outou, e na ˈna ratou e tiavaru ê atu e moe atura ia outou; e e riro mai to ratou fenua ia outou, ta to outou Atua ra ta Iehova i parau mai ia outou na.”—Iosua 23:4, 5.

Papaihia e Iosua i te matahiti 1450 H.T.T., e faatiaraa au rahi te buka a Iosua no tei tupu i te roaraa o tera na matahiti e 22. A tia noa ˈi tatou i te uputa o te ao apî fafauhia, e au to tatou tupuraa i to te mau tamarii a Iseraela o tei ineine i te rave i te Fenua tǎpǔhia. Ma te anaanatae rahi, e hiˈopoa anaˈe ïa i te buka a Iosua.—Hebera 4:12.

“I TE VAHI ATEA I IERIKO RA”

(Iosua 1:1–5:15)

E fanaˈo mau Iosua i te hoê hopoia rahi ia parau Iehova ia ˈna e: “Ua pohe aˈenei tau tavini o Mose, e teie nei a tia i nia, a haere i te hoê pae Ioridana nei, o oe e teie nei mau taata atoa, i te fenua ta ˈu e horoa ˈtu na ratou ra, na te tamarii a Iseraela ra.” (Iosua 1:2) Ta Iosua hopoia, o te aratairaa ïa i te hoê nunaa tau mirioni taata i te Fenua tǎpǔhia. Ei faaineineraa, e tono oia e piti mânu i Ieriko—te oire e mea tia ia haru-na-mua-hia. I taua oire ra e faaea ˈi o Rahaba, te hoê vahine faaturi, o tei faaroo i te mau ohipa puai ta Iehova i faatupu no to ˈna nunaa. E paruru e e tauturu oia i na mânu e ei faahoˈiraa e fafau raua e e ora o ˈna.

I te hoˈiraa ˈtu na mânu, ua ineine Iosua e te nunaa i te tere e te haere i te tahi paeau o Ioridana. Noa ˈtu e e faaî te pape, eita te reira e haafifi ia ratou no te mea e haamaraa Iehova i te pape na uta mai te hoê patu, a vaiiho atu ai i te pape i raro ia tahe atu i te miti Avaava ra. I muri aˈe i te haereraa i te tahi paeau o Ioridana, e puhapa te mau Iseraela i Gilagala, piri atu ia Ieriko. E maha mahana i muri aˈe, i te ahiahi o te 14 no Abiba, e haapao ratou i te Pasa i te vahi atea i Ieriko ra. (Iosua 5:10) I te poipoi aˈe, e haamata ratou i te amu i te sitona o te fenua ra, e e ore te mâna. I roto i taua taime ra, e peritome Iosua i te mau tane atoa i fanauhia i te medebara.

Uiraa bibilia pahonohia:

2:4, 5—No te aha Rahaba e haavare ai i te mau taata o te arii e imi ra i na mânu? E paruru Rahaba i na mânu noa ˈtu e e nehenehe oia e pohe, no te mea ua faahotu oia i te faaroo ia Iehova. No reira, e ere i te faaheporaa ia faaite oia teihea na mânu i te mau taata e imi ra i te hamani ino i te nunaa o te Atua. (Mataio 7:6; 21:23-27; Ioane 7:3-10) Oia mau, “ua tiahia” Rahaba “i te ohipa,” tae noa ˈtu i te aratai-hape-raa i te mau taata o te arii.—Iakobo 2:24-26.

5:14, 15—O vai te “raatira o te nuu a Iehova”? Te raatira o te haere mai e haapuai ia Iosua a haamata ˈi te haruraa i te Fenua tǎpǔhia, aita ˈtu ïa maori râ “te Logo”—o Iesu Mesia hou oia a riro ai ei taata. (Ioane 1:1; Daniela 10:13) Mea mahanahana mau ia fanaˈo i te haapapuraa e tei pihai iho Iesu Mesia faahanahanahia i te nunaa o te Atua i teie mahana a aro ai ratou i te pae varua!

Haapiiraa no tatou:

1:7-9. Mea faufaa roa te taioraa bibilia i te mau mahana atoa, te feruriruri-tamau-raa i ta te reira  e parau ra, e te faaohiparaa i ta tatou e haapii ra no te manuïa i roto i te mau tutavaraa pae varua.

1:11. Te ani ra Iosua i te nunaa ia faaineine i ta ratou maa e te tahi mau mea faufaa e eiaha e tiai faatau noa ia horoa mai te Atua i te reira. Ta Iesu aˈoraa eiaha e tapitapi i te mau mea faufaa o te oraraa, e ta ˈna parau fafau “e amui-atoa-hia mai taua mau mea ra ia outou,” e ere ïa i te auraa e eiaha tatou e tutava i te haamâha i to tatou mau hinaaro.—Mataio 6:25, 33.

2:4-13. I muri aˈe i te faarooraa i te mau ohipa rarahi a Iehova e te taaraa e e anotau fifi roa, e faaoti Rahaba e paturu i to ˈNa feia haamori. Mai te peu e e mea maoro outou i te haapiiraa i te Bibilia e te taaraa e te ora nei tatou i te “anotau hopea,” eiaha anei ïa outou e faaoti i te tavini i te Atua?—Timoteo 2, 3:1.

3:15. I te mea e e mea maitai te parau faataa a na mânu i tonohia i Ieriko, e ohipa oioi Iosua, ma te ore e tiai ia iti mai te pape i Ioridana. No nia  i te mau ohipa i taaihia i te haamoriraa mau, e mea tia ia ohipa tatou ma te itoito eiaha râ ia faataime a tiai ai i te hoê taime au aˈe.

4:4-8, 20-24. E riro na ofai 12 i ravehia i roto i te pape o Ioridana ei haamanaˈoraa no Iseraela. E riro atoa te mau ohipa faaoraraa a Iehova i to ˈna nunaa no teie tau i to ˈna mau enemi ei haamanaˈoraa e tei pihai iho oia ia ratou.

E TAMAU NOA TE HARURAA

(Iosua 6:1–12:24)

“Ua opani-roa-hia” te oire o Ieriko “e ati noa ˈˈe . . . , aore roa e taata e tae i rapae, aore hoi e taata i tae i roto.” (Iosua 6:1) E nafea te oire e haruhia ˈi? E horoa Iehova ia Iosua i te ravea. Eita e maoro, e hiˈa te mau patu e e mou te oire. O Rahaba e to ˈna utuafare anaˈe te ora ˈtu.

To muri iho haruraa, o te oire arii ïa o Ai. Ua horoa na mânu i te parau faataa e e mea iti te feia e faaea ra i taua oire ra, no reira eita e titauhia ia rahi te taata no te haru atu. Ua horo ê râ fatata e 3 000 faehau i tonohia no te aro i te oire i mua i to Ai. Te tumu? Aita Iehova i pihai iho i te mau Iseraela. Ua hara Akana o te opu o Iuda a haruhia ˈi o Ieriko. I muri aˈe i te faatitiaifaroraa i te tupuraa, e aro Iosua ia Ai. I te mea e ua pau te mau Iseraela i te hoê taime, e hinaaro rahi te arii o Ai e aro ia ratou. E faaohipa râ Iosua i te hoê ravea paari o te ohipa i nia i to Ai tiaturi rahi roa ia ratou iho, a haru atu ai Iosua i te oire.

‘E oire rahi Gibeona, rahi aˈe ia Ai, e e taata aito anaˈe to reira.’ (Iosua 10:2) I to ratou râ faarooraa i te upootiaraa a Iseraela i nia ia Ieriko e ia Ai, e haavarevare to Gibeona ia Iosua ma te rave i te hoê faaauraa o te hau e o ratou. E hiˈo te mau nunaa e haaati ra i teie taivaraa ei fifi no ratou. E faatupu e pae o to ratou mau arii i te hoê parau faaau e e aro ia Gibeona. E faaora Iseraela i to Gibeona e pau roa ˈtu ai te mau enemi. I raro aˈe i te aratairaa a Iosua, e haru atoa Iseraela i te mau oire i te mau pae apatoa e tooa o te râ, e e pau atoa te mau arii no apatoerau tei amui. E 31 arii i te pae tooa o te râ o Ioridana te pau.

Uiraa bibilia pahonohia:

10:13—E nafea tera ohipa faahiahia e tupu ai? “Te vai atura anei te hoê mea e ore e tia ia Iehova,” te Atua Poiete i te mau raˈi e te fenua? (Genese 18:14) Mai te peu e e hinaaro oia, e nehenehe Iehova e hauti i te tereraa o te fenua ia mau noa te mahana e te avaˈe ia au i te hoê taata mataitai o te fenua nei. Aore ra e nehenehe oia e vaiiho noa i te tereraa o te fenua e te avaˈe, a tioi atu ai te mau hihi no ǒ mai i te mahana e te avaˈe ra na roto i te hoê ravea ia tamau noa te maramarama no ǒ mai i teie na tiarama i te anaana mai. Noa ˈtu eaha te tupuraa, “aore roa e mahana e au i te reira mahana” i roto i te tuatapaparaa o te taata.—Iosua 10:14.

10:13—Eaha te buka a Iasera? Ua faahiti-faahou-hia te buka i roto i te Samuela 2, 1:18 no nia i te hoê pehepehe o tei parauhia “te fana”—te hoê himene otoraa i te arii o Iseraela ra o Saula e ta ˈna tamaiti ra o Ionatana. E haapueraa himene e pehepehe paha te buka no nia i te pae tuatapaparaa, e ua matau-maitai-hia paha i rotopu i te mau ati Hebera.

Haapiiraa no tatou:

6:26; 9:22, 23. Ua tupu te katara ta Iosua i faahiti na i te tau o te haamouraa o Ieriko fatata e 500 matahiti i muri aˈe. (Te mau arii 1, 16:34) E tupu mau ta Noa katara i nia i to ˈna mootua o Kanaana ia riro mai to Gibeona ei rave ohipa. (Genese 9:25, 26) E tupu noa iho â ta Iehova parau.

7:20-25. E hiˈo paha vetahi i te eiâraa a Akana ei hapa haihai, peneiaˈe ma te na ô e eita te reira e haafifi ia vetahi ê. Tera atoa paha to ratou manaˈo i te mau eiâraa e hapa haihai i te ture bibilia. Ia riro râ tatou mai ia Iosua i roto i ta tatou faaotiraa aueue ore e patoi i te mau faaheporaa e rave i te mau ohipa opanihia e te ture aore ra morare ore e tia ˈi.

9:15, 26, 27. E mea tia ia haapao maitai tatou i ta tatou mau parau faaau e ia tapea i ta tatou parau.

E AMO IOSUA I TA ˈNA OHIPA RAHI HOPEA

(Iosua 13:1–24:33)

E ruhiruhia oia i teie nei—fatata e 90 matahiti—e e haamata Iosua i te tufa i te fenua. E ohipa iti rahi mau! Ua fanaˈo aˈena te mau opu o Reubena e o Gada e te opu vaehaa o Manase i ta ratou tufaa  i te pae hitia o te râ o Ioridana. E horoahia i teie nei na te toea o te mau opu te tufaa i te pae tooa o te râ ma te tufa kelero.

Tei Silo te sekene i roto i te tuhaa fenua o Epheraima. E horoahia te oire o Heberona na Kaleba, e e fanaˈo Iosua ia Timenata-sera. E horoahia na te ati Levi e 48 oire, to roto atoa na oire haapuraa e 6. I to ratou hoˈiraa ˈtu i to ratou tufaa i te pae hitia o te râ o Ioridana, e faatia te feia tamaˈi o Reubena, o Gada, e te opu vaehaa o Manase i te hoê fata “rahi, e vaiiho noa mai ia hiˈo ra.” (Iosua 22:10) E hiˈo te mau opu i tooa o te râ o Ioridana i te reira ei ohipa taivaraa, e e fatata roa te mau opu i te tamaˈi, e maoti râ te tauaparauraa maitai e apehia ˈi te haamaniiraa toto.

I muri aˈe i to Iosua faaearaa maa taime i Timenata-sera, e pii oia i te feia paari, te mau upoo, tavana, e te feia toroa o Iseraela e e aˈo oia ia ratou ia faaitoito e ia vai taiva ore noa ia Iehova. I muri aˈe, e haaputuputu Iosua i te mau opu atoa o Iseraela i Sekema. I reira, e haamanaˈo faahou oia i te mau haaraa a Iehova mai te tau mai o Aberahama, e e aˈo faahou oia ia ratou ia ‘mǎtaˈu ia Iehova e ia haamori ia ˈna ma te haavare ore e ma te parau mau.’ E turaihia te nunaa ia pahono e: “E haamori matou i to matou Atua ia Iehova, e to ˈna te reo ta matou e faaroo.” (Iosua 24:14, 15, 24) I muri aˈe i teie mau mea, e pohe Iosua i te 110raa o to ˈna matahiti.

Uiraa bibilia pahonohia:

13:1—Aita anei te reira e faahape ra i tei parauhia i roto i te Iosua 11:23? Aita, no te mea e piti tuhaa to te haruraa i te Fenua tǎpǔhia: te tuhaa matamua, ua haapau te tamaˈi a te nunaa e 31 arii o te fenua o Kanaana, a hiˈa ˈtu ai o Kanaana, e te piti o te tuhaa, o te haruraa ïa i te fenua taatoa na roto i te mau ohipa a te opu fetii e te taata taitahi. (Iosua 17:14-18; 18:3) Noa ˈtu e aita te mau Iseraela i tiavaru pauroa i to Kanaana i rotopu ia ratou, aita mau te feia i ora mai i haamǎtaˈu i te panoonoo ore o Iseraela. (Iosua 16:10; 17:12) Te na ô ra te Iosua 21:44 e: “Ua horoa mai Iehova i te hau no ratou e ati noa ˈˈe.”

24:2—E taata haamori idolo anei Tera, te metua tane o Aberahama? I te omuaraa e ere Tera i te hoê taata haamori i te Atua ra o Iehova. Ua haamori paha oia i te atua avaˈe ra o Sin—e atua matauhia i Ura. Ia au i te taˈere ati Iuda, e taata hamani idolo atoa paha o Tera. I to Aberahama faarueraa ia Ura ia au i te faaueraa a te Atua, ua apee Tera ia ˈna i Harana.—Genese 11:31.

Haapiiraa no tatou:

14:10-13. Noa ˈtu e e 85 matahiti to ˈna, e ani Kaleba i te hopoia fifi e tiahi i te taata i rapaeau i te tuhaa fenua o Heberona. Te faaeahia ra tera vahi e te ati Anaka—e tiapai taata ratou. Ma te tauturu a Iehova, e manuïa teie taata tamaˈi aravihi, e e riro Heberona ei oire haapuraa. (Iosua 15:13-19; 21:11-13) Te faaitoito maira to Kaleba hiˈoraa eiaha tatou e ape i te mau hopoia teotaratia fifi.

22:9-12, 21-33. E mea tia ia haapao maitai tatou eiaha e haava hape noa i te mau manaˈo turai o vetahi ê.

‘Aore roa te hoê i ore i te tia’

I to ˈna ruhiruhiaraa, e parau Iosua i te feia haapao hopoia o Iseraela e: “Aore roa te hoê o te mau mea maitatai ta to outou Atua ta Iehova i parau ai ia outou ra i ore i te tia; ua hope roa i te tupu ia outou.” (Iosua 23:14) Te faahohoˈa maitai roa ra te aamu o Iosua i te reira!

Ua papai te aposetolo Paulo e: “Te mau parau atoa . . . i papaihia i mutaa ihora, i papaihia ïa ia ite tatou; ia noaa to tatou tiairaa, i te faaoromai e te mahanahana o te parau i papaihia ra.” (Roma 15:4) E papu ia tatou e aita i hape to tatou tiaturiraa i te mau parau fafau a te Atua. Aore roa te hoê parau fafau e ore i te tia, e tupu pauroa râ.

[Hohoˈa fenua i te api 18]

(Hiˈo i te papai)

Ua haruhia te fenua i raro aˈe i te aratairaa a Iosua

BASANA

GILEADA

ARABA

NÉGUEB

Anavai Ioridana

Miti Avaava

Pape o Iaboka

Pape o Aranona

Hazora

Madona

Lasarona

Simerona

Iokeneama

Dora

Megido

Kedesa

Taanaka

Hephera

Tireza

Apheka

Tapua

Betela

Ai

Gilagala

Ieriko

Gezera

Ierusalema

Makeda

Iaremuta

Adulama

Libena

Lakisa

Egelona

Heberona

Debira

Arada

[Hohoˈa i te api 18]

Ua aˈo Iosua ia Iseraela ia “mǎtaˈu ia Iehova e ia tavini ia ˈna”