‘Te itearaa mai te hoê poe maitai roa’
‘Te itearaa mai te hoê poe maitai roa’
“Te mârôhia nei te basileia o te ao ra, e te titau nei te feia mârô ia noaa i te haru.”—MATAIO 11:12.
1, 2. (a) Eaha te huru maitai varavara ta Iesu i faahohoˈa i roto i te hoê o ta ˈna mau parabole o te Basileia? (b) Eaha ta Iesu i parau i roto i te parabole o te poe faufaa rahi?
TE VAI ra anei te tahi mea faufaa roa ino e horoa ˈi outou i ta outou mau taoˈa atoa aore ra e faarue ai outou i te taatoaraa o ta outou mau faufaa, ia noaa ia outou te reira? Noa ˈtu e te faahiti ra te taata i te pûpûraa ia ratou iho ia naea ia ratou te tahi fa—te moni, te roo, te mana aore ra te tiaraa—e mea varavara roa e itea ˈi i te hoê taata te tahi mea maitai roa a hinaaro ai oia e faarue i te mau mea atoa no te reira. Ua faahiti Iesu Mesia i teie huru maitai varavara e mea faahiahia râ i roto i te hoê o ta ˈna parabole haaferuri e rave rahi no nia i te Basileia o te Atua.
2 E parabole aore ra faahohoˈaraa teie ta Iesu i faaite i ta ˈna noa mau pǐpǐ, e pinepine hoi i te parauhia te parabole o te poe faufaa rahi. Teie ta Iesu i parau: “E au te basileia o te ao ra i te hoê taata hohoo [ratere] tei imi i te poe maitatai: e itea ihora ia ˈna te hoê poe maitai roa ra; haere atura hoo atura i te mau taoˈa atoa na ˈna ra, e ua hoo atura i taua poe ra.” (Mataio 13:36, 45, 46; MN) Eaha te haapiiraa ta Iesu i hinaaro ia huti mai te feia e faaroo ra ia ˈna na roto i teie faahohoˈaraa? E e nafea tatou e nehenehe ai e faufaahia i te mau parau a Iesu?
Te faufaa rahi o te mau poe
3. No te aha e mea faufaa roa ˈi te mau poe maitatai i te tau tahito ra?
3 Mai te tau tahito mai â, ua haafaufaa-rahi-hia te mau poe ei mau taoˈa faanehenehe. Te tapao ra te hoê papai e ia au i te taata papai Roma ra o Pline te Matahiapo, “i rotopu i te mau taoˈa faufaa roa ino, to nia roa ïa” te mau poe. Taa ê roa i te auro, te ario aore ra i te ofai maitatai e rave rahi, na te mau mea ora i faahotu mai i te mau poe. Ua ite-maitai-hia e e nehenehe vetahi mau tio e faataui i te mau taoˈa au ore—te mau huˈahuˈa ofai ei hiˈoraa—ei poe anaana ma te puohuhia e te mau tuhaa o te hoê taoˈa tei parauhia ei pǎrau. I te tau tahito, e ootihia te rahiraa o te mau poe maitatai roa i te miti Uteute, te ooa no Peresia, e i te moana Inidia—atea roa i te fenua o Iseraela. E mea papu e tera te tumu Iesu i parau ai no “te hoê taata hohoo ratere tei imi i te poe maitatai.” Ia itea mai te mau poe faufaa mau, e mea tia ia tutava rahi te hoê taata.
4. Eaha te haapiiraa tumu o ta Iesu parabole no nia i te taata hohoo ratere?
4 Mai te tau e te tau, e mea moni roa te mau poe maitatai, e au ra râ e e ere to ratou moni rahi te haapiiraa tumu o ta Iesu parabole. I roto i teie parabole, aita Iesu i faaau noa i te Basileia o te Atua i te hoê poe maitai roa; ua huti oia i te ara-maite-raa i nia i “te hoê taata hohoo ratere tei imi i te poe maitatai” e i ta ˈna i rave i muri iho ia itea mai te reira. Taa ê roa i te hoê fatu fare toa matauhia, e nehenehe e parauhia te hoê taata hohoo poe ratere ei taata îite i roto i te tapihooraa, hoê o te vai ra ia ˈna te mata aravihi aore ra te taa-ohie-raa titauhia no te ite i te nehenehe o te mau huru maitai e te itea ore o te faariro i te hoê poe ei mea faahiahia roa. E ite oia i te poe mau ia hiˈo oia i te reira e eita oia e vare i te mau poe haapaoraa ore aore ra haavare.
5, 6. (a) Eaha te mea faahiahia roa no nia i te taata hohoo i roto i ta Iesu parabole? (b) Eaha ta te parabole o te taoˈa moe e faaite ra no nia i te taata hohoo ratere?
5 E mea tia ia tapaohia te tahi atu mea no nia i teie taata hohoo taa ê. E numera na mua paha te hoê taata hohoo matauhia i te faufaa tapihoo o te poe no te ite ehia moni ta ˈna e aufau ia hoonahia oia. E feruri atoa paha oia e e hinaarohia anei teie huru poe ia nehenehe oia e hoo oioi atu. Te auraa, ta ˈna e anaanatae ra ia apî oioi o ˈna i nia i ta ˈna haamâuˈaraa, eiaha râ i te faturaa mai i te poe. E ere râ mai te reira no te taata hohoo i roto i ta Iesu parabole. Aita oia e anaanatae ra i te moni aore ra i te faufaa. Inaha, ua ineine oia i te faarue i “te mau taoˈa atoa na ˈna”—ta ˈna iho paha mau taoˈa e fenua—ia noaa ia ˈna ta ˈna i imi na.
6 No te rahiraa o te feia hohoo, e ere paha i te mea paari te huru raveraa a teie taata i roto i ta Iesu parabole. Eita roa ˈtu te hoê taata tapihoo maramarama e manaˈo e rave i teie huru tapihooraa atâta mau. E mea taa ê râ te manaˈo o te taata hohoo i roto i ta Iesu parabole no nia i te mau faufaa. Ta ˈna utua maitai, e ere te tahi hoonaraa i te pae moni, o te oaoaraa râ i te noaaraa ia ˈna te tahi mea faufaa hau ê. Ua faataa-maitai-hia te reira i roto i te hoê â huru faahohoˈaraa ta Iesu i horoa. Ua parau oia e: “E au â te basileia o te ao ra i te taoˈa moe i roto i te aua, e itea ihora e te hoê taata huna maite ihora, e no te oaoa i taua taoˈa ra, ua hoo atura i te mau taoˈa atoa na ˈna ra, e ua hoo atura i taua aua ra.” (Mataio 13:44) Oia, te oaoa no roto mai i te iteraa e te faturaa i te taoˈa faufaa ua navai ïa no te turai i teie taata ia faarue i te mau mea atoa na ˈna ra. Te vai ra anei te feia mai te reira te huru i teie mahana? Te vai ra anei te hoê taoˈa faufaa o te titau i tera huru haapaeraa?
Te feia o tei ite i te faufaa rahi
7. Mea nafea to Iesu faaiteraa e ua ite mau oia i te faufaa rahi o te Basileia?
7 I to Iesu faatiaraa i ta ˈna parabole, te parau ra oia no nia i “te basileia o te ao [aore ra o te raˈi].” O oia iho tei ite mau i te faufaa rahi o te Basileia. Te turu puai ra te mau Evanelia i te reira. I muri aˈe i to ˈna bapetizoraahia i te matahiti 29 T.T. “to Iesu haamataraa i te aˈo, i te na ôraa e, A tatarahapa, te fatata mai nei te basileia o te ao [aore ra o te raˈi].” I te roaraa o na matahiti e toru e te afa, e nahoa rahi ta ˈna i haapii atu no nia i te Basileia. Ua haere oia na te roaraa e te aanoraa o te fenua, “haere atura oia na roto i te mau oire e te mau oire rii atoa, i te poro haerea i te parau maitai ra i te basileia o te Atua.”—Mataio 4:17; Luka 8:1.
8. Eaha ta Iesu i rave no te faaite papu i ta te Basileia e faatupu?
8 Ma te rave i te semeio e rave rahi na te fenua—tae noa ˈtu te faaoraraa i te feia maˈi, te faaamuraa i tei poia, te avauraa ˈtu i te mataˈi e te are, e tae roa ˈtu i te faatiaraa i tei pohe—ua haapapu atoa Iesu i ta te Basileia o te Atua e faatupu. (Mataio 14:14-21; Mareko 4:37-39; Luka 7:11-17) I te pae hopea, ua faaite papu oia i to ˈna taiva ore i te Atua e i te Basileia na roto i te horoaraa i to ˈna ora ma te pohe ei maratiri i nia i te hoê pou haamauiuiraa. Mai te taata hohoo ratere, o tei horoa ma te aau tae i te mau mea atoa na ˈna no te “poe maitai roa,” ua ora e ua pohe Iesu no te Basileia.—Ioane 18:37.
9. Eaha te huru maitai varavara i itehia i rotopu i te mau pǐpǐ matamua a Iesu?
9 Aita noa Iesu i faaau i to ˈna iho oraraa i nia i te Basileia, ua haaputu atoa râ oia i te hoê pǔpǔ pǐpǐ iti. E mau taata atoa teie tei ite mau i te faufaa rahi o te Basileia. I rotopu ia ratou, te vai ra o Anederea, na mua ˈˈe e pǐpǐ o ˈna na Ioane Bapetizo. I to ˈna faarooraa i te faaiteraa a Ioane e o Iesu “te Arenio a te Atua,” oioi atura Anederea e te tahi atu pǐpǐ a Ioane, peneiaˈe hoê o te mau tamarii a Zebedaio tei pii-atoa-hia o Ioane, i te arataihia mai ia Iesu ra e i te riro ei feia tiaturi. Aita râ taua mau mea ra i faaea noa i reira. I reira iho, ua farerei atura Anederea i to ˈna tuaana ia Simona e ua na ô atura ia ˈna e: “Ua itea ia mâua te Mesia.” I muri iti noa ˈˈe, ua farii atoa o Simona (tei matauhia o Kepha aore ra o Petero) e oia atoa o Philipa e to ˈna hoa o Natanaela ia Iesu ei Mesia. I te mea mau, ua tae roa Natanaela i te parau atu ia Iesu e: “O te tamaiti oe a te Atua, o te Arii oe o Iseraela.”—Ioane 1:35-49.
Turaihia ia ohipa
10. Eaha ta te mau pǐpǐ i rave i to Iesu haereraa mai e piiraa ˈtu ia ratou maa taime i muri aˈe i to ˈna farerei-matamua-raa ia ratou?
10 E nehenehe e faaauhia te anaanatae rahi o Anederea, o Petero, o Ioane, e o vetahi ê i to ratou iteraa i te Mesia i to te taata hohoo ratere ia ˈna i ite i te poe maitai roa. Eaha ïa ta ratou e rave i teie nei? Aita te mau Evanelia e faaite rahi maira eaha mau na ta ratou i rave i muri iti noa ˈˈe i teie farereiraa matamua e o Iesu. E au ra e ua hoˈi te rahiraa o ratou i to ratou oraraa matau-noa-hia. Tera râ, mai te area ono avaˈe e fatata hoê matahiti i muri iho, ua haere faahou â Iesu e farerei ia Anederea, ia Petero, ia Ioane, e ia Iakobo te taeae o Ioane i ta ratou vahi ravaairaa i te miti no Galilea. * I te iteraa ˈtu Iesu ia ratou, ua parau atura oia e: “A pee mai ia ˈu, e faariro vau ia [outou] ei ravaai taata.” Eaha ïa ta ratou i rave? No nia ia Petero raua Anederea te na ô ra te aamu a Mataio e: “Faarue ihora raua i ta raua tau upeˈa i reira ra e ua pee atura ia ˈna.” E no Iakobo raua Ioane, te taio nei tatou e: “Faarue ihora raua i te bǒti i reira ra e to raua metua, pee atura ia ˈna.” Te na ô nei â te aamu a Luka e “faarue anaˈe ihora ratou e ua pee maira ia ˈna.”—Mataio 4:18-22; Luka 5:1-11.
11. Eaha paha te tumu i pahono oioi ai te mau pǐpǐ i te piiraa a Iesu?
11 E faaotiraa ru noa anei teie i pahono-oioi-hia e te mau pǐpǐ? Eita roa ˈtu! Noa ˈtu e ua hoˈi atu ratou i te ohipa ravaairaa a to ratou utuafare i muri aˈe i to ratou farerei-matamua-raa ia Iesu, aita e feaaraa e ua putapû roa to ratou aau e to ratou feruriraa i ta ratou i ite e i faaroo i taua taime ra. I te mairiraa fatata hoê matahiti, e rave rahi ïa to ratou taime no te feruri maite i teie mau ohipa. I teie nei ua tae ïa i te taime no te rave i te hoê faaotiraa. E riro anei ratou mai te taata hohoo ratere ra te huru tei putapû roa te aau i te itearaa ia ˈna te poe moni rahi faito ore, mai ta Iesu i faataa ˈtu, ‘haere atura e oioi atura’ i te rave tei tia ia ˈna no te hoo mai i taua poe ra? E. Ua putapû roa to ratou aau i ta ratou i ite e i faaroo. Ua taa ia ratou e ua tae i te taime no te ohipa. No reira, mai ta te aamu e faaite maira, ma te haamarirau ore, ua faarue ratou i te mau mea atoa e ua riro mai ei pǐpǐ na Iesu.
12, 13. (a) Eaha ta te taata e rave rahi o tei faaroo ia Iesu i rave? (b) Eaha ta Iesu i parau no nia i ta ˈna mau pǐpǐ haapao maitai, e eaha te auraa o ta ˈna mau parau?
12 E mea taa ê mau teie mau pǐpǐ haapao maitai ia vera ma tei faahitihia i muri aˈe i roto i te mau Evanelia. E rave rahi o tei faaorahia e tei faaamuhia e Iesu o tei rave tamau noa râ i ta ratou iho mau ohipa. (Luka 17:17, 18; Ioane 6:26) Ua otohe atoa vetahi i to Iesu titau-manihini-raa ia ratou ia riro mai ei pǐpǐ na ˈna. (Luka 9:59-62) Ma te taa ê roa, no nia i te feia haapao maitai, ua parau Iesu i muri iho e: “Mai te itearaa mai o Ioane Bapetizo ra, e tae roa aˈenei i teie nei, te mârôhia nei te basileia o te ao ra, e te titau nei te feia mârô ia noaa i te haru.”—Mataio 11:12.
13 “Mârôhia” e “mârô”—eaha te auraa o teie mau parau? No nia i te ihoparau Heleni no reira mai teie mau taˈo, te parau ra te hoê buka (Vine’s Expository Dictionary of Old and New Testament Words) e: “Te horoa ra te ihoparau i te manaˈo no te tutava-puai-raa.” E no nia i teie irava, te parau ra te aivanaa Bibilia ra o Heinrich Meyer e: “Mea na reira te faataaraahia teie tutavaraa e aroraa ru e te puai roa ino i muri aˈe te fatataraa mai te basileia Mesia . . . Mea ru e te puai mau â teie anaanatae no nia i te basileia (e ere faahou ïa i te mea mǎrû e te tiai noa).” Mai te taata hohoo ratere, ua ite oioi teie tau taata i te mea faufaa mau, e ua faarue ratou ma te aau tae mau i te mau mea atoa na ratou no te Basileia.—Mataio 19:27, 28; Philipi 3:8.
Ua apiti vetahi ê i te maimiraa
14. Mea nafea to Iesu faaineineraa i te mau aposetolo no te ohipa pororaa i te Basileia, e eaha te faahopearaa?
14 A tamau ai Iesu i ta ˈna taviniraa, ua faaineine e ua tauturu oia ia vetahi ê ia naea ia ratou te Basileia. Na mua roa, ua maiti oia 12 taata i rotopu i ta ˈna mau pǐpǐ ma te faataa ia ratou ei aposetolo, aore ra tei tonohia e a ˈna. Ua horoa Iesu i te mau faaueraa taa maitai na ratou e nafea ia rave i ta ratou taviniraa e te mau faaararaa atoa no nia i te mau haafifiraa e tamataraa te tiai maira ia ratou. (Mataio 10:1-42; Luka 6:12-16) I na matahiti e piti aore ra hau atu i muri mai, ua pee ratou ia Iesu i roto i to ˈna mau tere pororaa e ati aˈe te fenua, ma te fanaˈo i te hoê taairaa piri e o ˈna. Ua faaroo ratou i ta ˈna mau parau, ua mataitai i ta ˈna mau ohipa mana, e ua ite ratou i to ˈna iho hiˈoraa. (Mataio 13:16, 17) Aita e feaaraa, ua putapû roa ratou i teie mau mea atoa, e mai te taata hohoo ratere ra te huru, ua tae roa ratou i te imi i te Basileia ma te itoito rahi e ma te aau atoa.
15. Ia au i ta Iesu i parau, eaha te tumu mau ta ˈna mau pǐpǐ e oaoa ˈi?
15 Hau atu â i na aposetolo 12, “ua haapao atura te Fatu [ra o Iesu] i e hitu ahuru, e tatoopiti atura i te tonoraa ia ratou na mua ia ˈna, i te mau oire e te mau vahi atoa ta ˈna i opua ra e e haere atoa oia i reira.” Ua faaite atoa oia ia ratou no nia i te mau ati e tamataraa i mua e ua haapii ia ratou ia parau i te taata e: “Te fatata maira te basileia o te Atua ia outou nei.” (Luka 10:1-12) I to na tino 70 hoˈiraa mai, ua î roa ratou i te oaoa e ua faaite atura ia Iesu e: “E te Fatu, ua vi atoa te mau demoni ia matou i to iˈoa na.” Peneiaˈe râ i to ratou maere, ua faaite Iesu i te oaoa hau atu e vai ra a muri aˈe no to ratou itoito rahi no te Basileia. Ua na ô oia e: “Eiaha . . . e oaoa i te mea ua vi te mau varua ino ia outou; e oaoa râ i to outou iˈoa i papaihia i nia i te raˈi ra.”—Luka 10:17, 20.
16, 17. (a) Eaha ta Iesu i parau i ta ˈna mau aposetolo haapao maitai i te po hopea a vai ai oia i pihai iho ia ratou? (b) Eaha te oaoa e te haapapuraa ta te mau parau a Iesu i hopoi na te mau aposetolo?
16 I te po hopea a vai ai Iesu i pihai iho i ta ˈna mau aposetolo, i te 14 no Nisana 33 T.T., ua haamau atura oia i tei parauhia te Amuraa maa a te Fatu e ua faaue oia ia ratou ia haamanaˈo i tera oroa. I te roaraa o taua po ra, ua parau Iesu i na aposetolo 11 e toe ra: “O outou te feia e tia i pihai iho ia ˈu i tau mau atiraa nei. E mai tau Metua i haapao i te tahi basileia no ˈu ra; ua haapao atoa vau ia outou; ia amu atoa outou e ia inu hoi i ta ˈu ra amuraa maa i to ˈu ra basileia, e ia parahi i nia i te terono i te haavaraa i na opu tino ahuru ma piti o Iseraela ra.”—Luka 22:19, 20, 28-30.
17 Eaha râ paha to ratou aau i te oaoa e te mauruuru i to te mau aposetolo faarooraa i teie mau parau a Iesu! Ua pûpûhia ˈtu no ratou te hanahana e te haamaitairaa hau ê ta te taata atoa e nehenehe e fanaˈo. (Mataio 7:13, 14; Petero 1, 2:9) Mai teie taata hohoo ratere, ua faarue rahi ratou no te pee ia Iesu i te imiraa i te Basileia. I teie nei, ua papu ia ratou e e ere roa ˈtu i te mea faufaa ore te mau haapaeraa ta ratou i rave na.
18. O vai ma te fanaˈo atoa i te Basileia hau atu â i na aposetolo 11 ra?
18 E ere o te mau aposetolo anaˈe i pihai iho ia Iesu i taua po ra, tei fanaˈo i te Basileia. E opuaraa na Iehova ia faaô 144 000 taata i roto i te faufaa no te Basileia ei arii apiti e o Iesu Mesia i roto i te Basileia hanahana i te raˈi ra. Hau atu â, ua ite orama te aposetolo Ioane i te “feia rahi roa, e ore roa e pau ia taio, . . . i te tia-noa-raa i mua i te terono, e i mua i te Arenio, . . . i te na ôraa e, Tei to tatou Atua te ora, tei parahi i nia iho i te terono ra, e tei te Arenio.” E melo huiraatira teie i te fenua nei no te Basileia. *—Apokalupo 7:9, 10; 14:1, 4.
19, 20. (a) Eaha te ravea e vai ra i mua i te mau taata o te mau nunaa atoa? (b) Eaha te uiraa e hiˈopoahia i roto i te tumu parau i muri nei?
19 Hou rii Iesu a maue ai i nia i te raˈi, ua faaue oia i ta ˈna mau pǐpǐ haapao maitai e: “E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [varua moˈa]; ma te haapii atu ia ratou i te haapao i te mau mea atoa ta ˈu i parau atu ia outou na: e inaha, tei pihai atoa iho vau ia outou, [i te mau mahana atoa] e tae noa ˈtu i te hopea o teie nei ao.” (Mataio 28:19, 20; MN) No reira, e riro mai te taata o te mau nunaa atoa ei pǐpǐ na Iesu Mesia. E horoa atoa ratou i to ratou aau no te Basileia—no te haamaitairaa i nia i te raˈi anei aore ra i te fenua nei—mai ta te taata hohoo ratere i rave no te poe maitatai.
20 Te faaite ra te mau parau a Iesu e e ravehia te ohipa e faariro i te taata ei pǐpǐ e tae roa ˈtu i “te hopea o teie nei ao.” No reira, i to tatou nei tau, te vai noa ra anei te feia mai te taata hohoo ratere te huru, o te hinaaro mau e horoa i ta ratou mau taoˈa atoa i te imiraa i te Basileia o te Atua? E hiˈopoahia teie uiraa i roto i te tumu parau i muri nei.
[Nota i raro i te api]
^ Ua pee paha o Ioane, te tamaiti a Zebedaio, ia Iesu e ua ite mata roa ˈtu paha oia vetahi o te mau mea ta ˈna i rave i muri aˈe i to ratou farerei-matamua-raa, no reira Ioane i nehenehe ai e papai i te reira ma te oraora maitai i roto i ta ˈna Evanelia. (Ioane, pene 2-5) Tera râ, ua hoˈi atu oia i te ohipa ravaairaa a to ˈna utuafare maa taime hou Iesu i titau ai ia ˈna.
^ No te mau haamaramaramaraa hau, a hiˈo i te pene 10 o te buka Te ite e aratai i te ora mure ore, neneihia e te mau Ite no Iehova.
E nehenehe anei outou e faataa?
• Eaha te haapiiraa tumu o te parabole o te taata hohoo ratere?
• Mea nafea to Iesu faaiteraa i to ˈna ite mau i te faufaa rahi o te Basileia?
• Na te aha i turai ia Anederea, ia Petero, ia Ioane e ia vetahi ê ia pahono oioi i to Iesu piiraa ˈtu ia ratou?
• Eaha te ravea faahiahia roa e vai ra i mua i te mau taata o te mau nunaa atoa?
[Uiraa haapiiraa]
[Hohoˈa i te api 14]
‘Faarue anaˈe ihora ratou e ua pee maira ia Iesu’
[Hohoˈa i te api 16]
Hou to ˈna maueraa i nia i te raˈi, ua faaue Iesu i ta ˈna mau pǐpǐ ia faariro i te taata ei pǐpǐ