Te aratairaa paari no te mau hoa faaipoipo
Te aratairaa paari no te mau hoa faaipoipo
“E te mau vahine ra, e auraro outou i ta outou ihora mau tane, mai ta tatou i auraro i te Fatu ra. E te mau tane ra, e aroha outou i ta outou mau vahine.”—EPHESIA 5:22, 25.
1. Eaha te hiˈoraa tano no nia i te faaipoiporaa?
UA PARAU Iesu e te faaipoiporaa, o te taatiraa ïa te Atua i te hoê tane e te hoê vahine ia riro raua ei “hoê.” (Mataio 19:5, 6) E piti ïa taata mea taa ê to raua huru o te haapii ra i te anaanatae i te hoê â mea e o te haa amui ra no te hoê â fa. Te faaipoiporaa, e faanahoraa ïa no te oraraa taatoa, e ere i te hoê faaauraa poto o te nehenehe e faarue-noa-hia. I te fenua e rave rahi, e ere i te mea fifi ia faataa, i te hiˈoraa râ a te hoê Kerisetiano, e mea moˈa te taairaa o te faaipoiporaa. E hope te reira no te hoê noa tumu faufaa roa.—Mataio 19:9.
2. (a) Eaha te tauturu e vai ra no te mau hoa faaipoipo? (b) No te aha e mea faufaa ˈi ia tutava ia manuïa te hoê faaipoiporaa?
2 Ua parau te hoê vahine aˈo i te pae o te faaipoiporaa e: “Ua riro te hoê faaipoiporaa manuïa ei tupuraa o te tauiraa tamau, a faaite ai te reira i te mau tafifiraa apî, a faaruru ai i te mau fifi e fa mai, e a faaohipa ˈi i te mau ravea e vai ra i tera e tera tau o te oraraa.” No te mau hoa faaipoipo Kerisetiano, to roto i teie mau ravea te mau aˈoraa o te Bibilia, te tauturu a te mau hoa Kerisetiano, e te hoê taairaa piri e o Iehova na roto i te pure. E vai noa te hoê faaipoiporaa manuïa, e i te roaraa o te mau matahiti, e hopoi mai te reira i te oaoa e te mauruuru i te tane e te vahine. Te mea faufaa ˈtu â, e faahanahana te reira i te Atua ra o Iehova, te Tumu o te faaipoiporaa.—Genese 2:18, 21-24; Korinetia 1, 10:31; Ephesia 3:15; Tesalonia 1, 5:17.
A pee ia Iesu e ta ˈna amuiraa
3. (a) A haapoto i ta Paulo aˈoraa i te mau hoa faaipoipo. (b) Eaha te hiˈoraa maitai ta Iesu i vaiiho mai?
3 A piti tausani matahiti aˈenei, ua horoa te aposetolo Paulo i te aˈoraa paari i te mau hoa faaipoipo Kerisetiano i to ˈna papairaa e: “Mai te ekalesia [aore ra amuiraa] e auraro i te Mesia nei, ia na reira atoa te mau vahine i ta ratou iho mau tane i te mau mea atoa nei. E te mau tane ra, e aroha outou i ta outou mau vahine, mai te Mesia atoa i aroha i te ekalesia [aore ra amuiraa], e ua horoa ia ˈna iho ei taui.” (Ephesia 5:24, 25) Auê ïa faaauraa maitai te faahitihia ra i ǒ nei! Te pee ra te mau vahine Kerisetiano o te auraro haehaa ra i ta ratou mau tane i te amuiraa ma te farii e te haapao i te faaueraa tumu o te tiaraa upoo. Te faaite ra te mau tane faaroo o te tamau ra i te here i ta ratou mau vahine, i te mau taime au aore ra fifi, e te pee maite ra ratou i te hiˈoraa î i te here e te aupuru o te Mesia i te amuiraa.
4. E nafea te mau tane e nehenehe ai e pee i to Iesu hiˈoraa?
4 O te mau tane Kerisetiano te upoo o to ratou utuafare, e upoo atoa râ to ratou, o Iesu ïa. (Korinetia 1, 11:3) No reira, mai ia Iesu i aupuru i ta ˈna amuiraa, e aupuru atoa te mau tane i to ratou utuafare ma te here i te pae varua e i te pae tino, noa ˈtu e e titau te reira i te haapaeraa ia ratou iho. E tuu ratou i te maitai o to ratou utuafare na mua ˈˈe i to ratou iho mau hinaaro e hiaai. Ua parau Iesu e: “E te mau mea atoa ta outou i hinaaro ia vetahi ê ra, e na reira atoa ˈtu outou ia ratou.” (Mataio 7:12) E tano roa teie faaueraa tumu i roto i te faaipoiporaa. Ua faaite Paulo i te reira i to ˈna na ôraa e: ‘E aroha te mau tane i ta ratou iho mau vahine e tia ˈi mai ta ratou i aroha i to ratou iho tino ra. Aore roa e taata i riri i to ˈna iho tino, area e faaamu, e te faaherehere maite.’ (Ephesia 5:28, 29) E mea tia ia faaamu e ia faaherehere maite te hoê tane i ta ˈna vahine mai ia ˈna atoa e faaamu e e faaherehere maite ia ˈna iho.
5. E nafea te mau vahine e nehenehe ai e pee i te amuiraa Kerisetiano?
5 E pee te mau vahine o te haamori ra i te Atua i te amuiraa Kerisetiano. I to Iesu vairaa mai i te fenua nei, ua faarue ta ˈna mau pǐpǐ i ta ratou mau ohipa matamua ma te oaoa e ua pee ia ˈna. I muri aˈe i to ˈna poheraa, ua tamau ratou i te auraro ia ˈna, e i te roaraa fatata e 2 000 matahiti i mairi aˈenei, ua auraro noa te amuiraa Kerisetiano mau ia Iesu e ua pee i ta ˈna aratairaa i roto i te mau mea atoa. Eita atoa te mau vahine Kerisetiano e vahavaha i ta ratou mau tane aore ra e imi i te haafaufaa ore i te faanahoraa bibilia no nia i te tiaraa upoo i roto i te faaipoiporaa. Tera râ, e turu e e auraro ratou i ta ratou mau tane, e haa amui e o ratou, e faaitoito atu ai ia ratou. Ia haa te tane e te vahine atoa ma te here, e manuïa to raua faaipoiporaa e e ite atoa raua i te oaoa i roto i to raua taairaa.
A tamau i te parahi ia ratou ra
6. Eaha te aˈoraa ta Petero i horoa i te mau tane, e no te aha e mea faufaa ˈi te reira?
6 E aˈoraa atoa ta te aposetolo Petero no te mau hoa faaipoipo, e e parau puai mau ta ˈna no te mau tane. Ua parau oia e: “E parahi [i ta outou mau vahine] ra ma te ite, i te faaturaraa ˈtu i te vahine, i te farii paruparu ra, e ei fatu atoa hoi i te maitai ra i te ora; ia ore ta outou pure ia mairi.” (Petero 1, 3:7) Te taa-maitai-hia ra te faufaaraa o te aˈoraa a Petero i roto i te mau parau hopea o teie irava. Ia ore te hoê tane e faatura i ta ˈna vahine, e fifi ïa to ˈna taairaa e o Iehova. E mairi ta ˈna pure.
7. E nafea te hoê tane e faatura ˈi i ta ˈna vahine e tia ˈi?
7 E nafea ïa te mau tane e nehenehe ai e faatura i ta ratou mau vahine? Te faaturaraa i te hoê vahine, teie ïa te auraa, te hamani-maitai-raa ïa ia ˈna ma te here, te tura e te au. Teie huru hamani maitai i te hoê vahine e au ra ïa e e ohipa apî no te taata e rave rahi. Te papai ra te hoê aivanaa Heleni e: “I raro aˈe i te ture Roma, aita to te hoê vahine e tiaraa. Ia au i te ture e vai noa o ˈna mai te hoê tamarii rii ra te huru. . . . Tei raro aˈe roa o ˈna i te mana o ta ˈna tane, e i to ˈna hinaaro atoa.” Auê ïa taa-ê-raa rahi e te mau haapiiraa Kerisetiano! E faatura te tane Kerisetiano i ta ˈna vahine. Na te mau faaueraa tumu Kerisetiano e faatere i ta ˈna mau haaraa i nia i ta ˈna vahine, e ere na ta ˈna mau peu. Hau atu â, e parahi oia ia ˈna ra “ma te ite,” ma te haamanaˈo e e farii paruparu o ˈna.
“Te farii paruparu” mai teihea te huru?
8, 9. E nafea te mau vahine e aifaito ai i te mau tane?
8 I te na ôraa e e “farii paruparu” te vahine, aita Petero e manaˈo ra e mea paruparu aˈe te mau vahine i te mau tane i te pae feruriraa aore ra i te pae varua. Parau mau, e rave rahi tane Kerisetiano te fanaˈo ra i te mau haamaitairaa taa ê i roto i te amuiraa e aita te mau vahine e titau ra i te reira, e i roto i te utuafare te auraro ra te mau vahine i ta ratou mau tane. (Korinetia 1, 14:35; Timoteo 1, 2:12) E titauhia râ i te taatoaraa, te tane e te vahine, te hoê â faaroo, te hoê â faaoromai e te hoê â mau ture aveia morare teitei. E mai ta Petero i parau, e “fatu” te tane e te vahine faaipoipo atoa ‘i te maitai ra o te ora.’ No nia i te faaoraraa, ua aifaito raua i mua i te Atua ra o Iehova. (Galatia 3:28) Te papai ra Petero i te mau Kerisetiano faatavaihia o te senekele matamua. No reira, ua haamanaˈo ta ˈna mau parau i te mau tane Kerisetiano e ei ‘feia tufaa e te Mesia,’ hoê â tiaturiraa i te raˈi to ratou e ta ratou mau vahine. (Roma 8:17) I te hoê mahana, e ohipa ratou ei tahuˈa e ei arii i roto i te Basileia i te raˈi o te Atua!—Apokalupo 5:10.
9 Aita roa ˈtu te mau vahine Kerisetiano faatavaihia i haehaa aˈe i ta ratou mau tane Kerisetiano faatavaihia. E parau mau atoa te reira no te feia e tiaturi ra e ora i te fenua nei. Te horoi ra te mau tane e te mau vahine atoa o te “feia rahi roa” i to ratou ahu e ia teatea i roto i te toto o te Arenio. Te apiti ra te mau tane e te mau vahine atoa “i te rui e te ao” i te arueraa ia Iehova i te ao nei. (Apokalupo 7:9, 10, 14, 15) Te tiai ra te mau tane e te mau vahine atoa i “te tiamâ maitai o te tamarii a te Atua,” ia oaoa ratou i “te ora mau.” (Roma 8:21; Timoteo 1, 6:19, MN) Noa ˈtu e e melo faatavaihia aore ra e mamoe ê atu, te tavini amui ra te mau Kerisetiano atoa ia Iehova ei “hoê aˈe nǎnǎ” i raro aˈe ‘hoê tiai.’ (Ioane 10:16) E tumu puai mau teie e faaite ai te hoê tane e ta ˈna vahine Kerisetiano i te tura e au te tahi i te tahi!
10. I roto i teihea auraa e “farii paruparu” ai te mau vahine?
10 Mai teihea ïa te huru e “farii paruparu” ai te mau vahine? Te faahiti ra paha Petero i te mea e itehia ra, no te rahiraa, e mea poto aˈe te mau vahine e e mea iti aˈe to ratou puai pae tino i to te mau tane. Hau atu â, i roto i to tatou huru tia ore, e haafifi te ravea faahiahia e hapû e e fanau i te tamarii i to ratou tino. E roohia paha te mau vahine tei naea te matahiti no te fanau i te mau fifi tamau i te pae tino. Papu maitai, e hinaaro ratou ia aupuruhia e ia haapao-maitai-hia ratou ia farerei ratou i tera mau fifi aore ra i te rohirohi o te hapûraa e te fanauraa. E tauturu rahi te hoê tane o te faatura i ta ˈna vahine, ma te ite i te turu e hinaarohia ra e a ˈna, ia manuïa to raua faaipoiporaa.
I roto i te hoê utuafare amaha i te pae faaroo
11. I roto i teihea auraa e nehenehe ai te hoê faaipoiporaa e manuïa noa ˈtu e e haapaoraa ê ta te tane e ta te vahine?
11 E nafea râ mai te peu e e manaˈo taa ê to na hoa faaipoipo i te pae faaroo, no te mea ua farii hoê o raua i te parau mau maa taime i muri aˈe i to raua faaipoiporaa? E nehenehe anei tera huru faaipoiporaa e manuïa? Mea rahi tei manuïa. E nehenehe te faaipoiporaa o te hoê tane e te hoê vahine ma te manaˈo taa ê i te pae faaroo e manuïa e e vai tamau, a hopoi mai ai i te oaoa. Hau atu â, i te aro o Iehova e mea tia noâ tera faaipoiporaa; e “hoê” noâ raua. No reira, te aˈohia ra te mau hoa faaipoipo Kerisetiano ia faaea noa i to ratou apiti tiaturi ore mai te peu e e tia i taua apiti ra. Mai te peu e te vai ra te tamarii, e faufaahia ïa ratou i te haapao maitai o te metua Kerisetiano.—Korinetia 1, 7:12-14.
12, 13. Ma te pee i te aˈoraa a Petero, e nafea te mau vahine Kerisetiano e nehenehe ai e tauturu i ta ratou mau tane tiaturi ore?
12 Ua faatae Petero i te mau aˈoraa maitai i te mau vahine Kerisetiano e ora ra i roto i te mau utuafare amaha i te pae faaroo. E tano atoa ta ˈna mau parau no te mau tane Kerisetiano i roto i te hoê â tupuraa. Te papai ra Petero e: “E te mau vahine, e auraro maite i ta outou mau tane ra; e aore te tahi pae i faaroo i te parau ra, ia noaa mai ratou i te haapao maitai o ta ratou mau vahine, eiaha ˈtu â te parau; i te hiˈoraa mai ratou i ta outou haapaoraa viivii ore i apiti-atoa-hia i te mǎtaˈu.”—Petero 1, 3:1, 2.
13 Mai te peu e e nehenehe te hoê vahine e faataa maitai i to ˈna faaroo i ta ˈna tane, e mea maitai ïa. Eaha râ mai te peu e eita te tane e hinaaro e faaroo? Na ˈna ïa tera faaotiraa. Te vai ra râ te ravea, i te mea e e horoa atoa te haerea Kerisetiano i te hoê faaiteraa puai. E rave rahi tane i te omuaraa o tei ore i anaanatae aore ra o tei patoi roa i te faaroo o ta ratou mau vahine, tei riro ei “feia [aau farii e tano] no te ora mure ore” i muri aˈe i to ratou iteraa i te haerea maitai o ta ratou mau vahine. (Ohipa 13:48; MN) Noa ˈtu e eita te hoê tane e farii i te parau mau, e nehenehe â oia e putapû roa i te haerea o ta ˈna vahine, ma te mau faahopearaa maitai i roto i te faaipoiporaa. Ua faˈi te hoê tane, e Ite no Iehova ta ˈna vahine, e eita roa ˈtu ta ˈna e nehenehe e ora ia au i ta ratou mau ture aveia teitei. Ua parau râ oia ia ˈna iho “te tane oaoa a te hoê vahine au maitai” e ma te mahanahana ua haapopou oia i ta ˈna vahine e to ˈna mau hoa Ite i roto i te hoê rata a te hoê vea.
14. E nafea te mau tane e nehenehe ai e tauturu i ta ratou mau vahine tiaturi ore?
14 Hoê â huru no te mau tane Kerisetiano o tei faaohipa i te mau faaueraa tumu o te mau parau a Petero, ua taui ta ratou mau vahine maoti to ratou haerea. Ua tapao te mau vahine tiaturi ore e te amo ra ta ratou mau tane i te hopoia, ma te faaea i te haamâuˈa i te moni i te puhipuhiraa i te avaava, te inu-hua-raa i te ava, e te pereraa moni e ma te ore e tuhi faahou. Ua haamatau te tahi o tera mau hoa faaipoipo i te tahi atu mau melo o te amuiraa Kerisetiano. Ua maere roa ratou i te autaeaeraa Kerisetiano î i te here, e ua haafatata ˈtu te mea ta ratou i ite i rotopu i te mau taeae ia ratou ia Iehova ra.—Ioane 13:34, 35.
‘Te taata moe o te aau’
15, 16. Teihea huru haerea o te hoê vahine Kerisetiano e nehenehe e faataui i ta ˈna tane tiaturi ore?
15 Teihea huru haerea e nehenehe e faataui i te hoê tane? O te haerea iho â ïa e faaitehia ra e te mau vahine Kerisetiano. Te na ô ra Petero e: “To outou unauna, eiaha o te unauna rapae au anaˈe ra, i te rouru firi ra, e te tatuaraa i te auro ra, e te ahuraa i te ahu ra; o te taata moe râ o te aau ra te faaunauna, i te mea tahuti ore ra, o te aau mǎrû e te mamahu, o te mea taoˈa rahi ïa i mua i te aro o te Atua. I na reira hoi te mau vahine moˈa i tiaturi i te Atua i te faaunauna ia ratou iho i tahito ra, ma te auraro maite i ta ratou iho mau tane; mai ia Sara i faaroo ia Aberahama i te parauraa ˈtu ia ˈna e e fatu; ei tamahine anaˈe hoi outou na ˈna, ia haapao maitai outou, e aore roa i hitimaue i te mǎtaˈu ra.”—Petero 1, 3:3-6.
16 Te aˈo ra Petero i te hoê vahine Kerisetiano eiaha e tiaturi i te huru rapae au. E mea tia râ ia vaiiho oia i ta ˈna tane ia ite i te faahopearaa o te mau haapiiraa bibilia i nia i to ˈna huru o roto mai. A vaiiho ia ˈna ia ite i te huru taata apî e ohipa ra. Peneiaˈe e ite o ˈna i te taa-ê-raa o te reira e te huru taata tahito matauhia o ta ˈna vahine. (Ephesia 4:22-24) E ite papu ïa o ˈna e e mea haamǎrû e te au maitai “te aau mǎrû e te mamahu” o ta ˈna vahine. Eita noa tera huru aau e faaoaoa i te hoê tane, e ‘mea taoˈa rahi atoa râ i mua i te aro o te Atua.’—Kolosa 3:12.
17. Mea nafea to Sara riroraa ei hiˈoraa maitai no te mau vahine Kerisetiano?
17 Ua faahitihia o Sara ei hiˈoraa, e e hiˈoraa faufaa mau â oia no te mau vahine Kerisetiano e tane tiaturi anei ta ratou aore ra eita. Ua faariro iho â Sara ia Aberahama ei upoo no ˈna. I roto atoa i to ˈna aau, ua parau oia ia ˈna to ˈna “fatu.” (Genese 18:12) Aita râ te reira i haafaufaa ore ia Sara. Ua riro mau oia ei vahine puai i te pae varua ma to ˈna iho faaroo papu ia Iehova. Oia mau, to roto oia i te ‘nahoa rahi ite’ e e nehenehe to ratou hiˈoraa o te faaroo e turai ia tatou ia ‘horo tamau maite i te hororaa i mua ia tatou nei.’ (Hebera 11:11; 12:1) E ere i te faahaehaaraa no te hoê vahine Kerisetiano te riroraa mai ia Sara.
18. Eaha te mau faaueraa tumu e mea tia ˈi ia haamanaˈo i roto i te hoê utuafare amaha?
18 I roto i te hoê utuafare amaha i te pae faaroo, o te tane noa te upoo. Mai te peu e o ˈna te taata tiaturi, e faatura o ˈna i te mau tiaturiraa a ta ˈna vahine ma te ore e ofati i to ˈna iho faaroo. Mai te peu e o te vahine te taata tiaturi, eita atoa o ˈna e ofati i to ˈna iho faaroo. (Ohipa 5:29) Eita râ o ˈna e aa ˈtu i te tiaraa upoo o ta ˈna tane. E faatura o ˈna i to ˈna tiaraa e e vai noa o ˈna i raro aˈe ‘i te ture a tana tane.’—Roma 7:2.
Te aratairaa paari o te Bibilia
19. Eaha te tahi mau faateimaharaa e haafifi nei i te mau taairaa o te faaipoiporaa, e nafea râ e nehenehe ai e faaruru atu?
19 I teie tau, e rave rahi mea te nehenehe e faateimaha i te taairaa o te faaipoiporaa. Aita vetahi mau tane e amo ra i ta ratou mau hopoia. Aita vetahi mau vahine e farii ra i te tiaraa upoo o ta ratou mau tane. I roto i te tahi mau faaipoiporaa, te rave-ino-hia ra te hoa faaipoipo e to ˈna apiti. No te mau Kerisetiano, e nehenehe te fifi i te pae moni, te huru taata tia ore, e te huru feruriraa o te ao nei e to ˈna morare ore e te haapiˈoraa i te mau faufaa e tamata i to ratou taiva ore. Tera râ, te fanaˈo ra te mau tane e te mau vahine Kerisetiano o te pee ra i te mau faaueraa tumu bibilia, noa ˈtu eaha to ratou huru tupuraa, i te haamaitairaa a Iehova. Noa ˈtu e hoê noa hoa faaipoipo teie e faaohipa nei i te mau faaueraa tumu bibilia, e mea maitai aˈe i te ore roa. Hau atu â, te here ra e te tauturu ra Iehova i ta ˈna mau tavini o te haapao maitai noa ra i ta ratou euhe o te faaipoiporaa noa ˈtu te mau tupuraa fifi. Eita iho â o ˈna e haamoe i to ratou taiva ore.—Salamo 18:25; Hebera 6:10; Petero 1, 3:12.
20. Eaha te aˈoraa a Petero no te mau Kerisetiano atoa?
20 I muri aˈe i to te aposetolo Petero aˈoraa ˈtu i te mau tane e te mau vahine faaipoipo, ua faaoti oia na roto i teie mau parau faaitoito mahanahana: “E teie nei, ei aau tahi to outou atoa, i te aroha-atoa-raa, ei aroha taeae ra, ei aau mǎrû, ei aau taua; eiaha e tahoo atu i te ino i te ino, e te faaino i te faaino, ei mea ê râ, ei haamaitai ta outou; ua itea hoi e o te mea ïa i parauhia ˈi outou ia noaa ia outou te maitai.” (Petero 1, 3:8, 9) E aˈoraa paari mau teie no te taatoaraa, no te mau hoa faaipoipo iho â râ!
Te haamanaˈo ra anei outou?
• E nafea te mau tane Kerisetiano e pee ai ia Iesu?
• E nafea te mau vahine Kerisetiano e pee ai i te amuiraa?
• E nafea te mau tane e nehenehe ai e faatura i ta ratou mau vahine?
• Eaha te haerea maitai aˈe no te hoê vahine Kerisetiano e tane tiaturi ore ta ˈna?
[Uiraa haapiiraa]
[Hohoˈa i te api 24]
E here e e aupuru te hoê tane Kerisetiano i ta ˈna vahine
E faatura te hoê vahine Kerisetiano i ta ˈna tane
[Hohoˈa i te api 25]
Taa ê atu i te ture Roma, te titau ra te mau haapiiraa Kerisetiano ia faatura te hoê tane i ta ˈna vahine
[Hohoˈa i te api 27]
Ua faariro Sara ia Aberahama ei fatu no ˈna