O vai te faatia-faahou-hia?
O vai te faatia-faahou-hia?
“Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.”—IOANE 5:28, 29.
1. Eaha te parau faahiahia ta Mose i faaroo i te pu aihere e ama noa ra, e o vai tei haamanaˈo i teie mau parau i muri aˈe?
HAU atu i te 3 500 matahiti i teie nei, ua tupu te hoê ohipa maere roa. Te tiai ra Mose i te nǎnǎ mamoe a te patereareha ra o Ietero. Piri i te mouˈa Horeba, ua fa maira te melahi a Iehova ia Mose i roto i te auahi i ropu i te hoê pu aihere. “Ua hiˈo atura oia, e inaha, te ama ra te pu aihere i te ahi, e aore taua pu aihere ra i pau,” ta te aamu ïa o te Exodo e faatia ra. I reira râ, ua paraparau maira te hoê reo ia ˈna na roto i te pu aihere. “O vau te Atua o to mau metua na,” ta te reo ïa i faˈi, “o te Atua o Aberahama, e te Atua o Isaaka, e te Atua o Iakoba.” (Exodo 3:1-6) I muri aˈe, i te senekele matamua T.T., ua haamanaˈo te Tamaiti iho a te Atua ra o Iesu i taua mau parau ra.
2, 3. (a) Eaha te haamaitairaa e tiai maira ia Aberahama, Isaaka e ia Iakoba? (b) Eaha te mau uiraa e hiti mai?
2 Te tauaparau ra Iesu e vetahi mau Sadukea aita e tiaturi ra i te tia-faahou-raa. Ua faˈi Iesu e: “E faatia-faahou-hia te feia i pohe, ua faaite atoa mai hoi Mose ia ˈna i parau i te Fatu i fa mai i roto i te pu aihere ra, O te Atua o Aberahama, e te Atua no Isaaka, e te Atua no Iakoba. E ere hoi oia i te Atua no tei pohe, no tei ora râ, te ora anaˈe ra hoi tatou ia ˈna.” (Luka 20:27, 37, 38) Na roto i te faahitiraa i teie mau parau, ua haapapu Iesu, e i ta te Atua huru hiˈoraa, te ora noa ra o Aberahama, Isaaka e o Iakoba i pohe na ahia ˈtura maororaa i roto i to te Atua mehara. Mai ia Ioba, te tiai ra ratou ia hope to ratou “pue mahana i haapaohia,” to ratou taotoraa i roto i te pohe. (Ioba 14:14) I roto i te ao apî a te Atua, e faatia-faahou-hia ratou.
3 Eaha ïa no te mau miria taata ê atu tei pohe i te roaraa o te tuatapaparaa o te taata? E fanaˈo atoa anei ratou i te hoê tia-faahou-raa? Hou tatou e nehenehe ai e fanaˈo i te hoê pahonoraa e au no tera uiraa, e hiˈo anaˈe i roto i te Parau a te Atua, ihea te taata e haere ai ia pohe ratou.
Teihea te feia pohe?
4. (a) Ihea te taata e haere ai ia pohe ratou? (b) Eaha te shéol?
4 Te parau ra te Bibilia e ‘aita a te feia i pohe ra e parau itea.’ I te poheraa aita e haamauiuiraa i roto i te po auahi, aita e autâraa ma te tiai i roto i te rimepo, tera râ, e hoˈi noa te feia pohe i raro i te repo. No reira te Parau a te Atua e aˈo ai i te taata ora e: “O tei itea ia oe ta to rima e rave ra, a rave ma to puai atoa ra; aore hoi e ohipa, aore e imiraa, aore hoi e ite, aore hoi e paari, i te apoo [aore ra shéol] ta oe e haere na.” (Koheleta 9:5, 10; Genese 3:19) E mea matau-ore-hia e rave rahi te taˈo “shéol.” E taˈo Hebera te reira e mea papu ore te tumu. Te haapii ra te haapaoraa e rave rahi e te ora noa ra te feia pohe, ia au râ i ta te Parau a te Atua e faaite ra, ua pohe te feia i roto i te apoo [aore ra shéol], e aita e parau itea to ratou. Te taˈo shéol, o te menema ïa o te huitaata.
5, 6. I to ˈna poheraa, ua haere Iakoba ihea, e o vai ma to reira?
5 I roto i te Bibilia, e ite tatou i te faahitiraa matamua o te taˈo “shéol” i roto i te Genese 37:35 (MN). I muri aˈe i to ˈna manaˈoraa e ua pohe ta ˈna tamaiti here o Iosepha, ua patoi te patereareha ra o Iakoba ia tamahanahanahia o ˈna, ma te faˈi e: “E reva roa vau i te apoo [aore ra shéol] ma te oto i tau tamaiti.” I te mea e ua tiaturi oia e ua pohe ta ˈna tamaiti, ua hinaaro Iakoba e pohe e e haere i te shéol. I muri aˈe, ua opua e iva tamarii a Iakoba e hopoi i ta ˈna tamaiti hopea, o Beniamina, i Aiphiti, ia ora mai ratou i te oˈe. Ua patoi râ Iakoba, ma te na ô e: “E ore tau tamaiti e tae i to outou tere; ua pohe hoi to ˈna mua ˈˈe, oia anaˈe tei toe iho nei: ia roohia-noa-hia oia i te ino i to outou na haerea, e tae roa tau upoo hinahina i raro i te apoo [aore ra shéol] ma te oto ia outou na.” (Genese 42:36, 38) Te taai ra teie na faahitiraa e piti i te pohe, eiaha i te tahi huru oraraa a muri aˈe, i te shéol râ.
6 Te faaite ra te aamu o te Genese e ua riro mai o Iosepha ei tiaau maa i Aiphiti. No reira ïa Iakoba i tere atu ai i reira no te hoê farereiraa oaoa e o Iosepha. I muri aˈe, parahi ihora Iakoba i taua fenua ra e tae roa ˈtu i to ˈna poheraa i te ruhiruhiaraa e 147 matahiti. Ia au i to ˈna hinaaro ia pohe oia, ua rave ihora ta ˈna mau tamarii i to ˈna pera e ua huna ˈtura i roto i te ana i Makapela i te fenua Kanaana. (Genese 47:28; 49:29-31; 50:12, 13) Ua hunahia ïa o Iakoba i pihai iho i to ˈna metua tane ra o Isaaka e i pihai iho i to ˈna tupuna tane ra o Aberahama.
“Amui-atoa-hia i to ratou mau metua”
7, 8. (a) Ua haere Aberahama ihea i to ˈna poheraa? A faataa. (b) Eaha te faaite ra e ua haere te tahi atu pae i te shéol i to ratou poheraa?
7 Na mua ˈtu, i to Iehova haapapuraa i ta ˈna faufaa e o Aberahama e i to ˈna fafauraa e faarahi i to ˈna huero, ua faaite oia i tei tupu i muri aˈe i nia ia Aberahama. Ua parau Iehova e: “E reva râ oe i ǒ to mau metua ra ma te hau; ia ruhiruhia roa oe e tanuhia ˈi.” (Genese 15:15) E ua tupu mau â te reira. Te parau ra te Genese 25:8 e: “Unuhi aˈera Aberahama, pohe roa aˈera i te ruhiruhiaraa ra, ua ruhiruhia roa te taata, ua rahi roa to ˈna matahiti, e amui-atoa-hia ˈtura oia i to ˈna ihora [aore ra to ˈna nunaa].” O vai ïa to ˈna ihora aore ra to ˈna nunaa? Te horoa ra te Genese 11:10-26 i te tapura iˈoa o to ˈna mau tupuna e tae roa ia Sema te tamaiti a Noa. No reira ua amui-atoa-hia ˈtu o Aberahama e te feia o tei taoto aˈena i roto i te shéol i to ˈna poheraa.
8 E ite-pinepine-hia teie parau “amui-atoa-hia ˈtura oia i to ˈna ihora” i roto i te mau Papai Hebera. Mea tano ïa ia faaoti e ua haere o Isemaela te tamaiti a Aberahama e o Aarona to Mose taeae i te shéol i to raua poheraa, e i reira raua e tiai ai i te hoê tia-faahou-raa. (Genese 25:17; Numera 20:23-29) Ua haere atoa ïa o Mose i te shéol noa ˈtu e aita hoê aˈe taata i ite e teihea to ˈna tanuraa. (Numera 27:13; Deuteronomi 34:5, 6) Hoê â huru no Iosua tei mono ia Mose ei aratai ia Iseraela, e to te reira ui taatoa, ua haere atoa ratou i te shéol i to ratou poheraa.—Te mau tavana 2:8-10.
9. (a) E nafea te Bibilia e faaite ai e te faahiti ra te taˈo Hebera “shéol” e te taˈo Heleni “hade” i te hoê â vahi? (b) Eaha te tiaturiraa o te feia i roto i te shéol, aore ra hade?
9 Tau senekele i muri aˈe, ua riro maira Davida ei arii no na opu 12 o Iseraela. I to ˈna poheraa, “taoto atura [oia] i ǒ tana mau metua atoa.” (Te mau arii 1, 2:10) Tei te shéol atoa anei oia? Ma te anaanatae mau, i te mahana Penetekose 33 T.T., ua faahiti te aposetolo Petero i te poheraa o Davida e ua rave i te Salamo 16:10 (MN): ‘E ore oe e vaiiho i tau [nephe i te shéol].’ I muri aˈe, i to ˈna faahitiraa e to roto noa o Davida i to ˈna menema, ua faaohipa Petero i teie mau parau no Iesu ma te faataa e “i ite atea noa [Davida] i te reira, i parau ai oia i te tia-faahou-raa o te Mesia ra, e eita [oia] e vaiihohia i hade, e eita to ˈna tino e vaiiho-noa-hia ia tahuti noa na. O taua Iesu nei â ta te Atua i faatia aˈenei i nia, o matou atoa nei hoi te ite.” (Ohipa 2:29-32) Ua faaohipa Petero i ǒ nei i te taˈo “hade,” e taˈo Heleni e au i te taˈo Hebera “shéol.” Hoê â ïa huru to te feia i parauhia tei roto i te hade e to te feia i parauhia tei roto i te shéol. Te taoto ra ratou a tiai noa ˈi i te hoê tia-faahou-raa.
Te vai ra anei te feia parau-tia ore i roto i te shéol?
10, 11. No te aha tatou e nehenehe ai e parau e e haere vetahi feia parau-tia ore i te shéol, aore ra i hade, i to ratou poheraa?
10 I muri aˈe i to Mose aratairaa i te nunaa Iseraela i rapaeau ia Aiphiti, ua tupu ihora te hoê orureraa hau i roto i te medebara. Ua parau Mose i te nunaa ia faataa ê ia ratou i te feia faahuehue—ia Kora, Datana e ia Abirama. E pohe taue ratou. Ua faataa Mose e: “Ia pohe noa teie nei mau taata mai te pohe o te taata atoa nei, e ia roohia ratou i te pohe maˈi, e mai te taata atoa e roohia i te pohe nei; aore ïa vau i tonohia mai e Iehova. E mea apî râ ta Iehova e rave i teie nei, ia hamǎmǎ te fenua nei i to ˈna vaha, e ia horomii ia ratou e pau ihora, e te mau taoˈa atoa na ratou ra; e topa ora noa ihora ratou i raro i te apoo [aore ra shéol] ra; e ite ïa outou i reira e ua faatiˈo teie nei mau taata ia Iehova.” (Numera 16:29, 30) No reira, a hamǎmǎ ˈi te fenua e a horomii ai ia ratou aore ra a pau ai ratou i te auahi mai ia Kora e na ati Levi e 250 i tia i to ˈna paeau, ua hope pauroa teie feia orure hau i te haere i te shéol aore ra i hade.—Numera 26:10.
11 Ua faautuahia o Simei, tei faaino i te arii ra o Davida, i te rima o Solomona tei mono ia Davida. “Eiaha oia ia parahi taata hara ore noa i ǒ na,” ta Davida i faaue, “e taata ite hoi oe, ua ite oe e rave ia ˈna ra; ia tae â tana upoo hinahina i te apoo [aore ra shéol] ma te toto.” Ua faaue Solomona ia Benaia e haapohe roa ia ˈna. (Te mau arii 1, 2:8, 9, 44-46) Te tahi atu taata ta Benaia i haapohe i te ˈoˈe, o Ioaba ïa, te raatira tahito o te nuu no Iseraela. Aita to ˈna upoo hinahina i “tae hau roa ˈtu i te apoo [aore ra shéol] ra.” (Te mau arii 1, 2:5, 6, 28-34) Te haapapu ra na hiˈoraa e piti i te parau mau o ta Davida himene faaurua e: “E hurihia te taata ino i te [shéol], e te mau fenua atoa aore i manaˈo i te Atua ra.”—Salamo 9:17; MN.
12. O vai o Ahitophela, e ua haere oia ihea i to ˈna poheraa?
12 E taata aˈo iho o Ahitophela no Davida. Ua haafaufaahia ta ˈna aˈoraa mai te huru ra e no ǒ roa mai ia Iehova iho. (Samuela 2, 16:23) Ma te peapea, ua riro maira teie tavini tiaturihia ei taata haavare e ua apiti atu i te hoê orureraa hau arataihia e Abasaloma te tamaiti a Davida. E au ra e te manaˈo ra Davida i to ˈna taivaraa i to ˈna papairaa e: “Ahiri . . . e enemi tei faaino mai ia ˈu ra, e tia ia ˈu ia faaoromai i te reira; ahiri ei taata i tairoiro mai ia ˈu, tei tia mai e rave ia ˈu ra, e tia ïa ia ˈu ia tapuni ia ˈna.” Ua na ô â o Davida e: “E roohia-noa-hia mai ratou e te pohe; e reva ora noa ratou i raro i [shéol] ra, e hara rahi hoi tei roto i to ratou mau parahiraa.” (Salamo 55:12-15; MN) I to ratou poheraa, ua haere Ahitophela e to ˈna mau hoa i te shéol.
O vai ma to roto i te gehena?
13. No te aha Iuda i parauhia ˈi “te tamaiti o te pohe ra”?
13 A faaau i te ohipa i tupu i nia ia Davida i tei faaruruhia e te Davida Rahi ra o Iesu. Ua riro mai hoê o na tino aposetolo 12 a te Mesia, o Iuda Isakariota, ei taata haavare mai ia Ahitophela. E mea ino roa ˈtu â te ohipa haavare a Iuda i ta Ahitophela. Ua faaino Iuda i te Tamaiti fanau tahi a te Atua. I roto i te hoê pure i te hopea o ta ˈna taviniraa i te fenua nei, ua parau te Tamaiti a te Atua no nia i ta ˈna mau pǐpǐ e: “I tau parahiraa i te ao nei e ratou atoa ra, na ˈu ïa ratou i tiai i to iˈoa na; i ta oe i ho mai no ˈu ra, ua tiaihia ïa e au, e aore roa te hoê i moe, maori râ o te tamaiti o te pohe ra, ia tupu te parau i papaihia ra.” (Ioane 17:12) Ma te faahiti i ǒ nei ia Iuda mai “te tamaiti o te pohe ra,” ua faaite Iesu e i te poheraa o Iuda, aita e tiaturiraa o te tia-faahou-raa no ˈna. Aita oia i roto i te mehara o te Atua. Ua haere o ˈna, eiaha i te shéol, i gehena râ. Eaha ïa te gehena?
14. Te faahohoˈa ra te gehena i te aha?
14 Ua faautua Iesu i te mau aratai haapaoraa o to ˈna ra tau no te mea ua faaino ratou i ta ratou pǐpǐ taitahi “ei tamaiti no te po [aore ra gehena].” (Mataio 23:15) I tahito râ, ua matau te taata i te Peho no Hinoma, te hoê vahi faarueraa pehu i reira e hurihia ˈi te tino pohe o te feia taparahi taata tei ore e tia ia hunahia ma te au. Na mua ˈtu, ua faahiti o Iesu iho i te gehena i roto i ta ˈna Aˈoraa i nia i te mouˈa. (Mataio 5:29, 30) E mea maramarama maitai to ˈna auraa taipe no te feia e faaroo maira. Te faahohoˈa ra te gehena i te haamou-roa-raa e aita e tiaturiraa o te hoê tia-faahou-raa. Taa ê atu ia Iuda Isakariota i to Iesu tau, ua haere anei te tahi atu mau taata i gehena i to ratou poheraa e eiaha râ i te shéol, aore ra i hade?
15, 16. I te poheraa, o vai ma tei haere i gehena, e no te aha ratou i haere ai i reira?
15 Ua poietehia na taata matamua Adamu raua o Eva ma te tia roa. Ua opua mau raua e rave i te hara. Ua tuuhia te ora mure ore aore ra te pohe i mua ia raua. Ua faaroo ore raua i te Atua e ua tia ˈtu raua i te paeau o Satani. I to raua poheraa aita ïa to raua e tiaturiraa e fanaˈo i te tusia taraehara a te Mesia. Ua haere râ raua i gehena.
16 Ua taparahi pohe o Kaina, te matahiapo a Adamu i to ˈna teina ra o Abela e mai reira mai ua ora oia mai te hoê oere. Te faataa ra te aposetolo Ioane ia Kaina mai te hoê “no taua varua ino ra.” (Ioane 1, 3:12) Mea tano ia manaˈo e mai to ˈna mau metua, i to ˈna poheraa ua haere oia i gehena. (Mataio 23:33, 35) E tupuraa taa ê mau â teie i to te taata parau-tia ra o Abela! “No te faaroo i maitai roa ˈi ta Abela tusia i pûpû i te Atua i ta Kaina; i parauhia mai ai oia e, e taata parau-tia, o te Atua i faatia mai i taua taoˈa horoa na ˈna ra,” ta Paulo ïa i faataa, a na ô faahou ai e “e teie nei, pohe noâ oia, te parau noa mairâ ïa.” (Hebera 11:4) Oia, tei roto Abela i te shéol ma te tiai i te hoê tia-faahou-raa.
Te hoê tia-faahou-raa “matamua” e “te mea maitai roa”
17. (a) I teie ‘taime hopea,’ o vai te haere i te shéol? (b) Eaha te mau tiaturiraa no te feia i roto i te shéol e no te feia i roto i te gehena?
17 E ui maere e rave rahi o te taio i teie haamaramaramaraa no nia i te tupuraa o te feia e pohe i te roaraa o teie ‘taime hopea.’ (Daniela 8:19) Te faataa ra te Apokalupo pene 6 i te hororaa o na puaahorofenua e maha i taua anotau ra. Ma te anaanatae, ua parauhia te hopea o Pohe, e ua apitihia oia e Hade. No reira, te rahiraa tei pohe no te mau ati i faatupuhia e tei nia iho to mua ˈtu puaahorofenua e hope i roto ia Hade, i reira ratou e tiai ai i te hoê tia-faahou-raa i roto i te ao apî a te Atua. (Apokalupo 6:8) Eaha ïa te mau tiaturiraa no te feia i roto i te shéol (hade) e no te feia i roto i te gehena? Ma te haapoto noa, e tia-faahou-raa to te feia i roto i te shéol, e e haamouraa mure ore—aita ïa e oraraa faahou—to te feia i roto i te gehena.
18. Eaha ta te tiaturiraa o “te tia-faahou-raa matamua” e pûpû ra?
18 Ua papai te aposetolo Ioane e: “E ao to ˈna, e te moˈa, to te noaa ia ˈna te tia-faahou-raa matamua ra; e ore roa te piti o te pohe e tiaia noa mai i te reira: e riro râ ratou ei tahuˈa na te Atua e na te Mesia, e e hau to ratou ia ˈna ra e ia hoê tausani i te matahiti.” E fanaˈo te feia o te riro ei arii apiti e te Mesia i “te tia-faahou-raa matamua,” tera râ eaha te tiaturiraa e vai ra no te toea o te huitaata?—Apokalupo 20:6.
19. E nafea te tahi pae e fanaˈo ai i ‘te hoê tia-faahou-raa maitai roa’?
19 Mai te mau mahana mai â o te mau tavini a te Atua ra ia Elia e ia Elisaia, ua faaora-faahou-hia te taata na roto i te semeio o te tia-faahou-raa. “E i noaa faahou hoi ta te mau vahine tamarii pohe, i faaora-faahou-hia ïa,” ta Paulo ïa i faatia, “e te tahi pae i haamauiuihia ïa, aore i rave i te ora, ia noaa ia ratou te ora faahou, te mea maitai roa ra.” Oia, ua tiai ru teie feia hapa ore i te hoê tia-faahou-raa o te horoa mai na ratou, eiaha noa tau matahiti a pohe atu ai, teie râ te tiaturiraa o te ora mure ore! Papu maitai, e ‘tia-faahou-raa maitai roa’ te reira.—Hebera 11:35.
20. E hiˈopoa te tumu parau i muri nei i te aha?
20 Mai te peu e e pohe tatou ma te haapao maitai hou Iehova e haamou ai i teie faanahoraa ino, te vai ra ïa te tiaturiraa papu o te hoê ‘tia-faahou-raa maitai roa,’ maitai roa no te mea o te ora mure ore to mua. Ua fafau Iesu e: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.” (Ioane 5:28, 29) E hiˈopoa â ta tatou tumu parau i muri nei i te tumu o te tia-faahou-raa. E faaite mai te reira e nafea te tiaturiraa o te tia-faahou-raa e haapuai ai ia tatou ia riro mai ei feia hapa ore e e tauturu ai ia tatou ia faatupu i te feruriraa haapae.
Te haamanaˈo ra anei outou?
• No te aha Iehova i faataahia ˈi mai te Atua “no tei ora”?
• Mai te aha te huru o te feia i roto i te shéol?
• Eaha te mau tiaturiraa no te feia i roto i te gehena?
• Nafea te tahi atu pae e fanaˈo ai i ‘te hoê tia-faahou-raa maitai roa’?
[Uiraa haapiiraa]
[Hohoˈa i te api 21]
Mai ia Aberahama, e tiai tei haere i te shéol i te hoê tia-faahou-raa
[Hohoˈa i te api 22]
No te aha Adamu e o Eva, Kaina, e o Iuda Isakariota e haere ai i gehena?