E ora tatou, eiaha i te ohipa anaˈe, i te maitai rahi râ

‘I ora outou i te faaroo e ere i to te ohipa, aita ˈtura o te taata nei e teoteoraa.’—EPHESIA 2:8, 9.

1. E nafea te mau Kerisetiano e taa ê ai i te rahiraa o te taata no nia i ta ratou iho mau manuïaraa, e no te aha?

 E TEOTEO rahi te taata i teie mahana i ta ratou iho mau manuïaraa, e pinepine ratou i te faateitei oioi ia ratou iho. E mea taa ê te mau Kerisetiano. E haavî ratou ia ratou iho eiaha e faarahi i ta ratou iho mau manuïaraa, e tae roa ˈtu i te mau ohipa i taaihia i te haamoriraa mau. A oaoa ˈi ratou i ta te nunaa o Iehova e faatupu ra ei pǔpǔ, eita ïa ratou e faarahi i ta ratou iho. Ua ite ratou e i roto i te taviniraa a Iehova, e mea faufaa roa ˈtu â te mau manaˈo turai tano i te mau manuïaraa a te taata. I te taata atoa i horoahia ˈtu te ô o te ora mure ore i te pae hopea, e noaa ia ˈna te reira, eiaha i ta ˈna iho mau manuïaraa, i te faaroo râ e no te maitai rahi o te Atua.—Luka 17:10; Ioane 3:16.

2, 3. Ua teoteo Paulo i te aha, e no te aha?

² Ua ite maitai te aposetolo Paulo i teie ohipa. I muri aˈe i to ˈna pureraa e toru taime ia iritihia “te hoê tara i roto i [to ˈna] tino,” ua noaa ia ˈna te pahonoraa a Iehova: “To ˈu nei maitai [rahi] atire ïa ta oe: ei te paruparu e taa maitai roa ˈi to ˈu puai.” Ma te farii haehaa i ta Iehova faaotiraa, ua parau Paulo e: “E teie nei, e mea oaoa ïa ia ˈu te arue i to ˈu nei paruparu, ia vai maite te puai o te Mesia i nia ia ˈu nei.” Ia hinaaro ïa tatou e pee i te huru haehaa o Paulo e tia ˈi.—Korinetia 2, 12:7-9.

³ Noa ˈtu e e mea faahiahia te mau ohipa  Kerisetiano ta Paulo i rave, ua farii oia e e ere maoti te tahi o ta ˈna mau ravea taa ê i manuïa ˈi oia. Ma te aau faahaihai, ua tapao oia e: “O vau nei â o tei iti roa ˈtu i tei iti roa i te feia moˈa atoa ra, tei horoahia mai taua maitai nei, ia parau haere au i ǒ te Etene i te maitai rahi hope ore a te Mesia ia imi ra.” (Ephesia 3:8) Aita oia e faaite ra i te huru teoteo i ǒ nei, aita atoa te ahaaha. “E patoi mai te Atua i te feia teoteo, e horoa mai râ i te maitai [rahi] i te feia haehaa.” (Iakobo 4:6; Petero 1, 5:5) Te pee ra anei tatou i te hiˈoraa o Paulo ma te hiˈo haehaa ia tatou iho, ei taeae iti roa ˈˈe i tei iti roa o to tatou mau taeae?

“Te manaˈo haamaitairaa ˈtu te tahi i te tahi”

4. No te aha i te tahi taime e mea fifi paha ˈi no tatou ia hiˈo ia vetahi ê ei mea hau aˈe ia tatou?

⁴ Ua aˈo te aposetolo Paulo i te mau Kerisetiano e: “Eiaha roa ei mea e ravehia ma te mârô e te teoteo faufaa ore ra; ei aau haehaa râ, i te manaˈo haamaitairaa ˈtu te tahi i te tahi eiaha ia ˈna iho.” (Philipi 2:3) E mea fifi paha te reira, mai te peu iho â râ e e hopoia ta tatou. Peneiaˈe e tupu mai te fifi no te mea te ohipa ra i nia i te tahi faito, te manaˈo tataˈu tei parare roa i roto i teie nei ao, i nia ia tatou. I te tamariiraa, ua haapiihia paha tatou ia tataˈu, e to tatou anei mau taeae e tuahine i te fare aore ra to tatou mau hoa i te fare haapiiraa. Peneiaˈe ua faaitoito-pinepine-hia tatou ia tutava no te hanahana ma te riro ei aito maona o te fare haapiiraa aore ra ei piahi numera hoê. Parau mau, e mea popou te rave-hope-raa i te tahi opuaraa tano. Tera râ, aita te mau Kerisetiano e na reira ra no te huti i te ara-maite-raa i nia ia ratou, area râ, no te fanaˈo-roa-raa i te ohipa e peneiaˈe no te haafanaˈo atoa ia vetahi ê. E nehenehe râ te hinaaro-noa-raa ia aruehia ei taata numera hoê e riro ei atâtaraa. E nafea ïa?

5. Ia ore e haavîhia, e nehenehe te hoê manaˈo tataˈu e aratai ihea?

⁵ Ia ore e haavîhia, e nehenehe te manaˈo tataˈu aore ra miimii e turai i te hoê taata i te faatura ore aore ra i te ahaaha. E riro paha oia i te nounou i to vetahi ê aravihi e haamaitairaa taa ê. Te na ô ra te Maseli 28:22 e: “Te taata mata nounou taoˈa ra, te ru ra ïa ia rahi te taoˈa; aita râ oia i ite, e roohia mai oia e te veve.” E tamata atoa paha o ˈna ma te teoteo i te haru i te mau tiaraa te ore e tia ia ˈna. No te faatia i ta ˈna mau ohipa, e haamata paha o ˈna i te amuamu e i te faahapa ia vetahi ê—teie mau huru e mea tia ia ape te mau Kerisetiano. (Iakobo 3:14-16) E riro mau â o ˈna i te faatupu i te manaˈo o vau na mua.

6. E nafea te Bibilia e faaara ai i te manaˈo tataˈu?

⁶ No reira te Bibilia e aˈo ai i te mau Kerisetiano e: “Eiaha tatou e faateitei faufaa ore noa, i te faaoooraa te tahi i te tahi, e te feiiraa te tahi i te tahi.” (Galatia 5:26) Ua faahiti te aposetolo Ioane i te hoê hoa Kerisetiano o tei topa mau i roto i teie huru manaˈo. “I papai na vau i te  parau i te ekalesia [aore ra amuiraa] na,” ta Ioane ïa i parau, “o Dioterephe râ o tei faateitei ia ˈna iho i nia iho ia ratou ra, e ore oia e farii mai ia matou. E teie nei, i tae atu vau ra, eita e moe ia ˈu ta ˈna e rave ra, i te paraparau haereraa ia matou i te parau faaino ra.” E tupuraa peapea mau â teie no te hoê Kerisetiano ia topa ˈtu i roto!—Ioane 3, 9, 10.

7. E hinaaro te hoê Kerisetiano e ape i te aha i roto i te tataˈuraa o teie tau i te vahi ohiparaa?

⁷ Oia mau, e ere i te mea tano ia manaˈo e e nehenehe te hoê Kerisetiano e ape roa i te mau tataˈuraa taatoa. E titau paha ta ˈna ohipa, ei hiˈoraa, ia tataˈu i te pae o te faaravairaa faufaa e te tahi atu mau taata aore ra i te pae o te tapihooraa e hamani ra i te hoê â taoˈa aore ra i te pae o te pûpûraa i te hoê â mau ravea. I roto atoa râ i teie mau huru tupuraa, e hinaaro te hoê Kerisetiano e haapao i ta ˈna tapihooraa ma te manaˈo faatura, here e te haapao maitai. E faarue o ˈna i te mau peu tei opanihia e te ture aore ra tei ore e au i te Kerisetiano e e ape o ˈna i te riro mai ei taata matauhia na mua no to ˈna manaˈo tataˈu e te aroha ore. Eiaha o ˈna e manaˈo e no te riro ei numera hoê—noa ˈtu eaha te tapiraa—o te mea faufaa roa ˈˈe ïa i roto i te oraraa. Mai te peu e e parau mau te reira no te mau opuaraa i te pae o te toroa, ua hau atu ïa i te faufaa i te pae o te haamoriraa!

“Eiaha e faaau atu ia vetahi ê”

8, 9. (a) No te aha aita e tumu e tataˈu ai te mau matahiapo te tahi i te tahi? (b) No te aha te Petero 1, 4:10 e tano ai no te mau tavini taatoa a te Atua?

⁸ Te faataahia ra te huru e mea titauhia i te mau Kerisetiano i roto i ta ratou haamoriraa na roto i teie mau parau faauruhia: “E hiˈopoa maite na . . . te taata atoa i ta ˈna ihora ohipa, e riro tana oaoaraa ia ˈna iho i reira, eiaha [e faaau atu] ia vetahi ê.” (Galatia 6:4; MN) Te mau matahiapo o te amuiraa, tei ite e aita e tataˈuraa i rotopu te tahi i te tahi, e rave amui ratou e e haa hoê ïa ratou mai te hoê tino ra te huru. E oaoa ratou i te turu ta ratou taitahi e nehenehe e rave no te maitai taatoa o te amuiraa. No reira e ape ratou i te tataˈuraa o te faahuehue e e horoa ratou i te hiˈoraa maitai roa o te auhoêraa no te toea o te amuiraa.

⁹ No to ratou faito matahiti, te mea ta ratou i ora na, aore ra to ratou aravihi iho, e ohipa maitai aˈe paha vetahi matahiapo i te tahi atu, aore ra e haroaroaraa rahi aˈe paha to ratou. Ei faahopearaa, e mea taa ê te mau hopoia a te mau matahiapo i roto i te faanahonahoraa a Iehova. Eita ratou e faaau ia ratou te tahi i te tahi, e haamanaˈo râ ratou i teie aˈoraa: “E horoa te taata atoa i te maitai no te tahi mai tei noaa mai ia ˈna ra, mai te tiaau maitai i te maitai [rahi] huru rau a te Atua ra.” (Petero 1, 4:10) E tano hoi teie irava no te mau tavini taatoa a Iehova, ia au i te tahi huru faito, ua noaa pauroa ia ratou te ô o te ite mau e te fanaˈo ra ratou paatoa i te haamaitairaa taa ê o te faaiteraa i roto i te taviniraa Kerisetiano.

10. E nafea noa ta tatou taviniraa moˈa e fariihia ˈi e Iehova?

¹⁰ Mea au na Iehova ta tatou taviniraa moˈa  mai te peu noa e ua ravehia te reira ma te here e te paieti, eiaha râ no te faateitei ia tatou iho i nia ˈˈe ia vetahi ê. E mea faufaa roa ïa ia noaa te hoê hiˈoraa faito noa no nia i ta tatou ohipa tururaa i te haamoriraa mau. I te mea e eita te hoê noa ˈˈe taata e nehenehe e haava maitai i to te tahi atu mau manaˈo turai, o Iehova te “paheru i te aau nei.” (Maseli 24:12; Samuela 1, 16:7) No reira, e mea maitai ia ui tatou ia tatou iho i te tahi taime, ‘Eaha te manaˈo e turai ra ia ˈu ia rave i te mau ohipa o te faaroo?’—Salamo 24:3, 4; Mataio 5:8.

Te hiˈoraa tano no nia i ta tatou ohipa

11. Eaha te mau uiraa no nia i ta tatou ohipa i roto i te taviniraa te tia ia hiˈopoahia ma te tano noa?

¹¹ Mai te peu e e mea faufaa roa te manaˈo turai no te fanaˈo i te farii maitai a Iehova, i nia ïa i teihea faito e mea tia ˈi ia ara tatou i ta tatou mau ohipa o te faaroo? Ia haa noa ˈi tatou i roto i ta tatou taviniraa ma te manaˈo turai tano, e mea faufaa mau anei ia tapao i ta tatou e rave ra aore ra ehia rahiraa ohipa? E mau uiraa tano noa teie, i te mea e aita tatou e hinaaro ra e tuu i te mau numera na nia ˈˈe i te mau ohipa o te faaroo aore ra e vaiiho i te hoê tapura maitai ia riro mai ei haapeapearaa rahi i roto i ta tatou taviniraa Kerisetiano?

12, 13. (a) Eaha te tahi mau tumu e tapaohia ˈi ta tatou taviniraa? (b) Eaha te tahi mau tumu e oaoa ˈi tatou ia hiˈohia te tapura taatoa o ta tatou ohipa pororaa?

¹² A tapao na eaha ta te buka Organisés pour faire la volonté de Jéhovah e parau ra: “Mea anaanatae na te mau pǐpǐ matamua a Iesu Mesia i te tapaoraa i te maraaraa te ohipa pororaa. (Mareko 6:30) Te parau maira te buka bibilia o te Ohipa e fatata 120 taata i reira i te niniiraahia te varua moˈa i nia i te mau pǐpǐ i te Penetekose. Aita i maoro ua maraa te numera o te mau pǐpǐ i nia i te 3 000 e i muri iho e 5 000 ïa. . . . (Ohipa 1:15; 2:5-11, 41, 47; 4:4; 6:7) Ua faaitoito mau te parau apî o teie mau maraaraa i te mau pǐpǐ!” No te hoê â tumu, te tutava ra te mau Ite no Iehova o teie tau i te tapao ma te tano i te mau ohipa i ravehia i te ao atoa nei ei faatupuraa i ta Iesu parau: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14) Te faaite ra teie mau tapura i te hoê hiˈoraa o te ohipa i rave-mau-hia i te ao nei. Te faaite nei ratou ihea e hinaarohia ˈi te tauturu e teihea huru papai e  ehia rahiraa o te reira e titauhia ra no te faahaere i te ohipa pororaa i mua.

¹³ No reira, e tauturu te tapaoraa i ta tatou ohipa pororaa ia tatou ia rave i te faaueraa e poro i te parau apî maitai o te Basileia ma te manuïa ˈtu â. I te tahi atu pae, aita anei tatou i itoito mai i to tatou faarooraa i te ohipa e ravehia ra e to tatou mau taeae i te tahi atu mau vahi o te ao nei? E î tatou i te oaoa i te mau parau apî no nia i te maraaraa e te parareraa i te fenua nei, e turai ia tatou ia faarahi atu â i ta tatou taviniraa, e e haapapu ia tatou i te haamaitairaa a Iehova. E mea oaoa ia ite e to roto ta tatou iho tapura i te tapura o te ao atoa nei! E mea nainai ta tatou tapura ia faaauhia i te numera taatoa o te ao atoa nei, tera râ te ite maira Iehova i te reira. (Mareko 12:42, 43) A haamanaˈo, ahiri e aita ta oe tapura, eita ïa e oti te tapura taatoa.

14. Taa ê atu i te pororaa e te haapiiraa, eaha to roto i ta tatou haamoriraa ia Iehova?

¹⁴ Oia mau, eita e itehia i nia i ta ˈna tapura e rave rahi mea ta te mau Ite taitahi e rave ra no te amo i ta ˈna hopoia ei tavini pûpûhia na Iehova. Ei hiˈoraa, eita e tapaohia i nia i te tapura ta ˈna iho haapiiraa bibilia tamau, te taeraa ˈtu e te apitiraa ˈtu i roto i te mau putuputuraa Kerisetiano, te mau ohipa no te amuiraa, te tauturu e hinaarohia ra e te mau hoa faaroo, te patururaa i te ohipa a te Basileia i te ao nei i te pae moni, e te vai ra ˈtu â. E mea faufaa hoi ta tatou tapura taviniraa no te tautururaa ia itoito rahi noa tatou i roto i te pororaa e eiaha tatou ia haaparuparu, e mea tia ia tapea tatou i te reira i nia i te parahiraa mau. Eiaha te reira ia hiˈohia mai te hoê parau mana aore ra te hoê buka ratere i te pae varua o te faaoti e ua maitihia tatou no te ora mure ore.

‘Te itoito rahi i te mau ohipa maitatai’

15. Noa ˈtu e eita i te ohipa anaˈe e nehenehe ai tatou e ora, no te aha e mea titauhia ˈi te reira?

¹⁵ Papu maitai, noa ˈtu e eita i te ohipa anaˈe e nehenehe ai tatou e ora, e mea titauhia râ te reira. No reira e parauhia ˈi te mau Kerisetiano “ei taata mau no ˈna iho, e te itoito [rahi] i te mau ohipa maitatai” e i faaitoitohia ˈi ratou ia ‘haapao maite â te tahi i te tahi, a faaaraara ˈtu ai ia rahi te aroha, o te rave i te mau ohipa maitatai.’ (Tito 2:14; Hebera 10:24) Te mea faufaa ˈtu â, te parau noa ra te tahi atu taata papai bibilia, o Iakobo e: “Mai te tino nei hoi ia ore te varua ra, e mea pohe ïa, oia atoa te faaroo aore e ohipa ra, e mea pohe atoa ïa.”—Iakobo 2:26.

16. Eaha te mea faufaa roa ˈtu â i te ohipa, e mea tia râ ia ara tatou i te aha?

¹⁶ Noa ˈtu e e mea faufaa paha te mau ohipa maitatai iho, e mea faufaa roa ˈtu â te mau manaˈo turai no te raveraa i te reira. Mea paari ïa ia hiˈopoa tatou i to tatou mau manaˈo turai i tera taime i tera taime. I te mea e, eita hoi te hoê noa ˈˈe taata e nehenehe e ite maitai i to vetahi ê mau manaˈo turai, tera râ, e mea tia ia ara tatou i te haava ia vetahi ê. “O vai hoi oe na a faahapa ˈi [aore ra haava ˈi] i to vetahi ê ra tavini?” tei uihia maira, e teie te pahonoraa papu: “Tei to ˈna ra fatu to ˈna mau e to ˈna hiˈa.” (Roma 14:4) E haava o Iehova te Fatu o te taatoaraa, e o te Mesia ra o Iesu te Haava ta ˈna i nomino, ia tatou, eiaha i nia i te niu o ta  tatou anaˈe mau ohipa, na nia atoa râ i to tatou mau manaˈo turai, ta tatou mau ravea, to tatou here, e to tatou paieti. O Iehova raua Iesu Mesia anaˈe te nehenehe e haava maitai mai te peu e ua rave tatou i te ohipa tei faauehia i te mau Kerisetiano ia rave, ia au i te mau parau a te aposetolo Paulo: “E faaitoito ia vai maite â oe i mua i te aro o te Atua ma te itehia mai, ei rave ohipa aita e haamaraa, e te tia hoi i te tufa i te parau mau ra.”—Timoteo 2, 2:15; Petero 2, 1:10; 3:14.

17. A faaitoito hua ˈi tatou, no te aha e mea tia ˈi ia haamanaˈo tatou i te Iakobo 3:17?

¹⁷ E manaˈo tano noa to Iehova i roto i ta ˈna e hinaaro ra ia tatou. Ia au i te Iakobo 3:17, i rotopu i te tahi atu mau mea, ‘e mea mǎrû [aore ra tano noa] te paari no nia maira.’ E ere anei e haerea paari te reira, e oia atoa e manuïaraa mau, no tatou ia pee ia Iehova i roto i teie tuhaa? Eiaha ïa tatou e tamata i te haamau i te mau tiairaa tano ore e eita e nehenehe no tatou iho aore ra no to tatou mau taeae.

18. Eaha ta tatou e nehenehe e tiai ru mai te peu e e manaˈo faito noa to tatou no nia i ta tatou mau ohipa e to Iehova maitai rahi?

¹⁸ A tapea noa ˈi tatou i te hoê manaˈo faito noa no nia i ta tatou mau ohipa o te faaroo e to Iehova maitai rahi, e oaoa noa ïa tatou, o te hoê hoi tapao e faataa ê nei i te mau tavini mau a Iehova. (Isaia 65:13, 14) E nehenehe tatou e oaoa i te mau haamaitairaa ta Iehova e ninii maira i nia i to ˈna nunaa taatoa, ma te ore e tâuˈa i te rahiraa o ta tatou iho e nehenehe e rave. Ma te tamau “i te pure, i te aniraa ˈtu ma te haamaitai,” e taˈu tatou i te Atua no te tauturu ia tatou ia faaitoito hua. E ma te feaa ore, “na te hau o te Atua, o tei hau ê atu i te ite taata nei, e faaitoito mai i to [tatou] aau, e to [tatou] manaˈo i te Mesia nei ia Iesu.” (Philipi 4:4-7) Oia mau, e nehenehe tatou e tamahanahanahia e e faaitoitohia i te iteraa e e nehenehe tatou e ora, eiaha i te ohipa anaˈe, i te maitai rahi râ o Iehova!

E nehenehe anei outou e faataa e no te aha te mau Kerisetiano

• e haavî ai ia ratou eiaha e teoteo i ta ratou iho mau manuïaraa?

• e haapae ai i te manaˈo tataˈu?

• e tapao ai i ta ratou ohipa Kerisetiano i roto i te pororaa?

• e ore ai e haava i to ratou mau hoa Kerisetiano?

[Uiraa haapiiraa]

[Hohoˈa i te api 23]

‘To ˈu nei maitai rahi atire ïa ta oe’

[Hohoˈa i te mau api 24, 25]

E oaoa te mau matahiapo i te turu ta ratou taitahi e nehenehe e rave no te maitai o te amuiraa

[Hohoˈa i te mau api 26, 27]

Ahiri e aita ta oe tapura, eita ïa e oti te tapura taatoa