Te tauaparau ra anei outou e te feia ta outou e here ra?

“MA TE peapea te iti noa ˈtu ra ta tatou ravea no te aparau i te feia i herehia,” ta te vea tahebedoma Polityka no Poronia ïa e faataa ra. I te Hau Amui no Marite, te manaˈohia ra e e rave noa te mau hoa faaipoipo e ono minuti i te mahana no te tauaparau te tahi i te tahi ma te ravea o te patu. Te manaˈo ra vetahi feia aravihi e e faahopearaa te afaraa o te mau faataa-ê-raa e faataaraa atoa o tera toparaa.

Eaha ïa no te tauaparauraa i rotopu i te mau metua e te mau tamarii? I te rahiraa o te taime, “e ere te tauaparauraa i rotopu i te mau metua e te mau tamarii i te tauaparauraa, e uiuiraa râ: Eaha te huru ta oe haapiiraa? Eaha te huru o to oe mau hoa?” ta te vea ïa i nia nei e tapao ra. “E nafea ta tatou mau tamarii e haapii ai i te faatupu i te huru aau o te auhoaraa?” ta tera vea ïa e ui ra.

I te mea e eita te mau ravea no te aparau maitai e tupu noa mai, e nafea tatou e nehenehe ai e haamaitai i ta tatou ravea no te tauaparau? Ua horoa mai te pǐpǐ Kerisetiano ra o Iakobo i teie aˈoraa faufaa: “Ia ru te taata atoa i te faaroo, ia haere maine i te parau, ia haere maine hoi i te riri.” (Iakobo 1:19) Oia, no te hoê tauaparauraa o te patu, e mea titauhia ia faaroo maitai tatou e eiaha e tǎpǔ ma te ru aore ra e faaoti oioi noa. A ape i te faahaparaa no te mea e nehenehe te reira e faataupupu ohie i te hoê tauaparauraa. Hau atu â, ua faaohipa Iesu i te mau uiraa aravihi, eiaha no te uiui, no te maimi râ eaha to roto i te aau o te feia e faaroo ra ia ˈna e no te haapuai i te mau taairaa i rotopu ia ratou.—Maseli 20:5; Mataio 16:13-17; 17:24-27.

Na roto i te faaohiparaa i te mau faaueraa tumu maitai i roto i te Bibilia, a rave i te taahiraa matamua no te tauaparau e no te aparau atu i te feia i herehia e outou. E nehenehe te reira e faatupu i te auhoaraa mahanahana o te poiherehia e rave rahi matahiti i te maoro—i te roaraa atoa o te hoê oraraa.