Te ohipa—mea maitai aore ra mea ino?

“E ere to te taata nei maitai . . . ei maitai no ˈna i ta ˈna ra mau ohipa.”—Koheleta 2:24.

“ROHIROHI roa i te hopea o te hoê mahana ohipa.” Ia au i te hoê titorotororaa apî, mai teie ta te hoê i nia i te toru o te feia rave ohipa ia faataa pinepine roa i to ratou huru. E ere te reira i te mea maere i te hoê vahi te hepohepo ra te taata; e ohipa maoro ratou e e afai atu i te ohipa hau i te fare—i taua taime ra e mea varavara to ratou mau paoti ohipa i te haamauruuru.

Ua turai te matararaa mai o te hamaniraa faito rahi, e rave rahi feia rave ohipa ia manaˈo e e au ratou i te hoê tuhaa haihai roa i roto i te hoê faanahonahoraa ohipa rahi. E mea pinepine e ore roa te manaˈo opua e te manaˈo hamani. Parau mau, ua faaino te reira i te huru manaˈo o te taata no nia i te ohipa. E ore ohie noa te hinaaro e anaanatae roa ˈtu i te ohipa. E ore te hinaaro e haamaitai roa i te ohipa rimaî. E nehenehe tera mau faahopearaa e aratai i te au-ore-raa i te ohipa iho, ma te turai paha i te hoê taata ia inoino roa i ta ˈna ohipa.

E hiˈopoa anaˈe i to tatou huru manaˈo

Parau mau, eita tatou e nehenehe e tauiui noa i to tatou mau tupuraa. Eita anei râ outou e farii e e nehenehe noa tatou e faatitiaifaro i to tatou huru manaˈo i te ohipa? Mai te peu e e ite outou e te pee rii ra outou i te mau huru manaˈo au ore no nia i te ohipa, e mea maitai ia hiˈo outou i te manaˈo o te Atua e te mau faaueraa tumu no nia i tera tumu parau. (Koheleta 5:18) Ua ite e rave rahi e, i to ratou hiˈoraa i te reira, ua noaa mai ia ratou te tahi oaoaraa e mauruuru i roto i ta ratou ohipa.

O te Atua te rave ohipa rahi roa ˈˈe. E rave ohipa te Atua. Peneiaˈe aita tatou i manaˈo ia ˈna mai tera te huru, tera râ mea na reira oia i te faaite-matamua-raa mai ia ˈna iho i roto i te Bibilia. Te omua ra te faatiaraa o te Genese na roto i to Iehova hamaniraa i te raˈi e te fenua. (Genese 1:1) A feruri na i te mau toroa taa ê ta te Atua i amo i to ˈna ïa haamataraa i te poiete—papai hohoˈa, faanaho, îite, peni hohoˈa, aravihi i te maiti i te mau materia, faatupu ohipa, tuatapapa i te mau taoˈa, ihiora, tuatapapa animara, hamani porotarama, e ihireo, no te faahiti noa i te tahi.—Maseli 8:12, 22-31.

Eaha te huru o te ohipa a te Atua? Te parau ra te Bibilia e e mea “maitai,” e te “maitai roa.” (Genese 1:4, 31) Oia mau, ‘te parau hua nei te mau mea poietehia i te hanahana o te Atua,’ e e mea tia ia haamaitai atoa tatou ia ˈna!—Salamo 19:1; 148:1.

Aita râ te ohipa a te Atua i oti i te poieteraahia te mau raˈi e te fenua materia e na taata toopiti matamua. Ua parau ta Iehova tamaiti, o Iesu Mesia, e: “Te ohipa noa nei â tau Metua.” (Ioane 5:17) Oia, te tamau nei Iehova i te ohipa na roto i te aupururaa i ta ˈna mau mea ora poietehia, te haapaoraa i  ta ˈna mau mea i hamani, e te faaoraraa i to ˈna feia haamori haapao maitai. (Nehemia 9:6; Salamo 36:6; 145:15, 16) Te faaohipa atoa nei oia i te taata, ‘te mau hoa rave ohipa no te Atua,’ ei tauturu no te rave i te tahi mau ohipa.—Korinetia 1, 3:9.

E nehenehe te ohipa e riro ei mea maitai. Aita anei te Bibilia e parau ra e mea ino te ohipa? E nehenehe paha te Genese 3:17-19 e turai ia manaˈo e ua faautua te Atua ia Adamu raua Eva no to raua orureraa i te hau ma te tuu i te hopoia o te ohipa i nia ia raua. A faahapa ˈi oia i tera na taata matamua, ua parau te Atua ia Adamu e: “E amu oe i ta oe maa ma te hou i nia i to rae, e hoˈi noa ˈtu oe i raro i te repo.” E faahaparaa rahi anei tera i te ohipa?

Eita. Area râ, no to Adamu raua Eva taivaraa, eita ïa te faarahiraa o te Paradaiso i Edene e tupu i te reira taime. Ua faainohia te repo e te Atua. Ua titauhia ˈtura te hou e te haa rahi ia noaa i te hoê taata te maa no roto mai i te repo.—Roma 8:20, 21.

Aita te Bibilia e faataa ra i te ohipa mai te hoê mea ino, te faaite ra râ e e mea maitai te reira e mea tia ia poiherehia. Mai tei faaitehia i nia nei, e rave ohipa rahi te Atua iho. Ia ˈna i hamani i te taata ma to ˈna huru, ua horoa Iehova na ratou i te ravea e te mana e aupuru i ta ˈna mau mea i poiete i nia i te fenua. (Genese 1:26, 28; 2:15) Ua horoahia taua ohipa ra hou te Atua a faahiti ai i te mau parau i papaihia i roto i te Genese 3:19. Ahiri e mea ino te ohipa, eita roa ˈtu ïa Iehova e faaitoito i te taata ia rave i te reira. E rave rahi na ohipa ta Noa e to ˈna utuafare i rave na mua ˈˈe e i muri aˈe i te Diluvi. I te tau Kerisetiano, ua faaitoito-atoa-hia te mau pǐpǐ a Iesu ia rave i te ohipa.—Tesalonia 1, 4:11.

Ua ite râ tatou paatoa e e nehenehe te ohipa e riro ei mea teimaha i teie mahana. Te hepohepo,  te atâtaraa, te haumani, te inoino, te tataˈuraa, te taviriraa, e te parau-tia ore, o te tahi noa ïa ‘tataramoa e motuu’ i taaihia i te reira. E ere râ te ohipa iho i te mea ino. I roto i te Koheleta 3:13, te faataa ra te Bibilia i te ohipa e te mau hotu o te reira mai te hoê ô no ǒ mai i te Atua ra.—A hiˈo i te tumu parau tarenihia “Te faarururaa i te hepohepo taaihia i te ohipa.”

E nehenehe outou e faahanahana i te Atua maoti ta outou ohipa. I haapopou-noa-hia na te huru maitai e te maitai-roa-raa i te vahi raveraa ohipa. O te huru maitai hoê o te mau tuhaa faufaa o te manaˈo bibilia no nia i te ohipa. E rave te Atua iho i ta ˈna ohipa ma te maitai roa. Ua horoa mai oia i te aravihi e te ravea e te hinaaro ra oia ia faaohipa maitai tatou i te reira. Ei hiˈoraa, i te roaraa o te hamaniraa o te sekene i Iseraela i tahito ra, ua faaî Iehova i te mau taata mai ia Bezaleela e ia Aholiaba i te haapao maitai, te paari, e te ite, ia nehenehe ratou e rave i te mau ohipa rimaî e te faufaa taa maitai. (Exodo 31:1-11) E tapao faaite ïa e ua anaanatae taa ê te Atua i te tereraa, te ite, te hohoˈa, e te tahi atu mau mea no nia i ta ratou ohipa.

E faahopearaa hohonu to te reira i nia i ta tatou huru hiˈoraa i to tatou iho aravihi e ta tatou mau peu i te pae ohipa. E tauturu te reira ia tatou ia hiˈo i tera mau mea ei ô no ǒ mai i te Atua ra, eiaha hoi tatou e haafaufaa ore. No reira te mau Kerisetiano i aˈohia ˈi ia rave i ta ratou ohipa mai te huru ra e te haava ra te Atua iho i to ratou aravihi: “E ta outou mau mea atoa e rave ra, e rave ma te aau atoa mai te mea e e na te Fatu [ra o Iehova], eiaha na te taata.” (Kolosa 3:23) Te faauehia ra te mau tavini a te Atua ia rave maite i te ohipa, e au atu â ïa te mau hoa ohipa e te tahi atu i te poroi Kerisetiano.—A hiˈo i te tumu parau tarenihia “Te faaohiparaa i te mau faaueraa tumu bibilia i te vahi raveraa ohipa.”

No reira ˈtura, mea maitai ia ui tatou ia tatou iho te rave maitai ra anei tatou i ta tatou ohipa. E mauruuru anei te Atua i ta tatou ohipa? Te mauruuru roa ra anei tatou i ta tatou huru raveraa i ta tatou mau ohipa i faataahia? Mai te peu e aita, e tano ia haamaitai atu tatou.—Maseli 10:4; 22:29.

Ia faito noa te ohipa e te ea pae varua. Mea maitai ia rave puai i te ohipa, te vai ra râ te tahi atu tuhaa faufaa no te ite i te oaoa i roto i te ohipa e te  oraraa. O te ea pae varua ïa. Teie te faaotiraa a te arii Solomona, tei rave puai na i te ohipa e tei fatu i te mau taoˈa atoa e te oraraa fanaˈo: “O te Atua te mǎtaˈu atu, e haapao hoi i ta ˈna parau; o ta te taata atoa ïa [hopoia] e ati noa ˈˈe.”—Koheleta 12:13; MN.

Te taa maitai ra ia tatou e mea tia ia hiˈopoa tatou i te hinaaro o te Atua i roto i ta tatou mau mea atoa e rave. Te haa ra anei tatou ia au i to ˈna hinaaro aore ra aita? Te tutava ra anei tatou i te faaoaoa i te Atua aore ra ia tatou iho? Ia ore tatou e rave i te hinaaro o te Atua, e faaruru tatou i te pae hopea i te hepohepo, te moemoe, e te ereraa.

Ua parau o Steven Berglas i te mau ona tei rohirohi roa ia ‘imi i te hoê fa ta ratou e maamaa roa e ia faaô roa i roto i to ratou oraraa.’ Aita ˈtu e fa hoona aˈe maori râ te taviniraa i Tei horoa mai i te aravihi e te ravea no te rave i te ohipa faufaa rahi. E mauruuru iho â tatou i te raveraa i te ohipa o te faaoaoa i to tatou Atua Poiete. No Iesu, e ohipa maitai, te oaoa e te tamǎrû ta Iehova i faaue ia ˈna e rave, e au ïa i te maa. (Ioane 4:34; 5:36) A haamanaˈo atoa e te titau manihini maira te Atua, te rave ohipa rahi roa ˈˈe, ia tatou ia riro ei “hoa rave ohipa” no ˈna.—Korinetia 1, 3:9.

E faaineine te haamoriraa i te Atua e te paariraa i te pae varua ia tatou no te ohipa e te hopoia hoona. I te mea e e pinepine te vahi raveraa ohipa i te î i te faaheporaa, te mârôraa, e te titauraa, e nehenehe to tatou faaroo tei aˈa maitai e to tatou ea pae varua e horoa mai i te puai hinaaro-rahi-hia a tutava ˈi tatou i te riro ei rave ohipa aore ra ei paoti maitai aˈe. I te tahi aˈe pae, e nehenehe te mau tupuraa mau o te oraraa i roto i teie nei ao paieti ore e faaara mai i te mau tuhaa e mea tia ia haapuai tatou i te faaroo.—Korinetia 1, 16:13, 14.

Te tau e riro ai te ohipa ei mea maitai

E nehenehe te feia e rave puai ra i te ohipa no te tavini i te Atua e tiai ru i te tau e haamau faahou ai oia i te Paradaiso e e î ai te fenua taatoa i te ohipa hoona. Ua faaite atea Isaia, te hoê peropheta a Iehova, i taua oraraa ra: “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu . . . E vai taiata te aho o to ˈu ra feia i maitihia i to te mau mea ta ratou i hamani.”—Isaia 65:21-23.

Auê ïa ohipa maitai to reira e! Na roto i te haapiiraa eaha te hinaaro o te Atua ia outou e te haaraa ia au i te reira, ia tia atoa outou i rotopu i te feia haamaitaihia o Iehova e ‘ia rave noa outou i te maitai no ta outou ra ohipa.’—Koheleta 3:13.

[Parau iti faaôhia i te api 7]

O te Atua te rave ohipa rahi roa ˈˈe: Genese 1:1, 4, 31; Ioane 5:17

[Parau iti faaôhia i te api 7]

E nehenehe te ohipa e riro ei mea maitai: Genese 1:28; 2:15; Tesalonia 1, 4:11

[Parau iti faaôhia i te api 7]

E nehenehe outou e faahanahana i te Atua maoti ta outou ohipa: Exodo 31:1-11; Kolosa 3:23

[Parau iti faaôhia i te api 7]

Ia faito noa te ohipa e te ea pae varua: Koheleta 12:13; Korinetia 1, 3:9

[Tumu parau tarenihia i te api 5]

TE FAARURURAA I TE HEPOHEPO TAAIHIA I TE OHIPA

Ua faataa te feia rave ohipa i te pae utuuturaa maˈi i te hepohepo no te ohipa ei ati ohipa. E nehenehe te reira e faatupu i te mau aai o te vairaa maa e te hepohepo e e aratai atoa i te haapoheraa ia ˈna iho. E taˈo ta te mau Tapone e faaohipa no te reira—karoshi, “te pohe no te haa-rahi-raa.”

E rave rau tumu taaihia i te ohipa o te nehenehe e faatupu i te hepohepo. Te vai ra te tauiraa o te mau hora aore ra te huru ohiparaa, te fifi e te paoti, te tauiraa i roto i te mau hopoia aore ra te huru o te ohipa, te faatuhaaraa, e te tihatiraa. No te faaruru i tera hepohepo, e tamata vetahi i te ape i te reira ma te taui i te ohipa aore ra te vahi raveraa. E tamata te tahi atu i te haavî i tera hepohepo, no te ite noa e te tupu ra te reira i roto i te tahi atu tuhaa o te oraraa, te mea matau-roa ˈˈe-hia te utuafare. E horuhoru atoa te aau o vetahi, a hepohepo atu ai ratou.

Ua faaineine-maitai-hia te mau Kerisetiano no te faaruru i te hepohepo taaihia i te ohipa. Te horoa ra te Bibilia e rave rahi faaueraa tumu faufaa roa o te nehenehe e turu ia tatou i te mau taime fifi ma te faahopearaa maitai i nia i to tatou ea pae varua e te maitai o to tatou aau. Ei hiˈoraa, ua parau Iesu e: “Eiaha e tapitapi i to ananahi ra, na ananahi hoi e tapitapi i ta ˈna iho. O te mahana o to ˈna iho ino atire ïa.” Te faaitoitoraa e horoahia ra i ǒ nei, o te haapaoraa ïa i te mau fifi o te mahana iho, eiaha to ananahi. Eita ïa tatou e faarahi ê i to tatou mau fifi, no te haamaraa noa i te hepohepo.—Mataio 6:25-34.

E mea faufaa roa ia tiaturi te mau Kerisetiano i te puai o te Atua, eiaha i to ratou iho. Ia ite tatou e eita ta tatou e nehenehe faahou e faaoromai, e nehenehe te Atua e horoa mai i te hau e te oaoa i roto i to tatou aau, e e pûpû mai i te paari no te faaruru i te mau fifi atoa. “Ia itoito outou i te Fatu, e i to ˈna ra puai rahi,” ta te aposetolo Paulo ïa i papai.—Ephesia 6:10; Philipi 4:7.

I te pae hopea, e nehenehe te mau tupuraa ahoaho atoa e faatupu i te mau faahopearaa maitai. E nehenehe te mau ati e haafariu ia tatou i nia ia Iehova, a imi ai e a tiaturi ai ia ˈna. E tauturu atoa ia tatou ia faaitoito i te atuatu i te huru taata Kerisetiano e i te aravihi no te tapea tamau a faahepohia ˈi ra. Te aˈo maira Paulo ia tatou e: “Te oaoa atoa nei . . . tatou i te mau ati nei; ua ite hoi tatou e, na te pohe e faatupu i te faaoromai; e na te faaoromai e faatupu i te ite; na te ite e faatupu i te tiai.”—Roma 5:3, 4.

No reira, e nehenehe te hepohepo atoa e riro ei ravea faaitoitoraa no te paari mai i te pae varua eiaha râ ei tumu no te ahoaho e te oto.

[Tumu parau tarenihia i te api 6]

TE FAAOHIPARAA I TE MAU FAAUERAA TUMU BIBILIA I TE VAHI RAVERAA OHIPA

E nehenehe te mau hoa ohipa e te tahi atu e anaanatae i te poroi bibilia maoti te huru e te haerea o te hoê Kerisetiano. I roto i ta ˈna rata ia Tito, te aˈo ra te aposetolo Paulo i te feia i roto i te hoê tupuraa e au i to te feia rave ohipa e “faaroo i to ratou ra mau [raatira], e haamauruuru atu i te mau mea atoa ra; eiaha e patoi atu i te reo; eiaha e rave huna noa i te taoˈa, ei haapao maitai roa ra, ia nehenehe te parau a te Atua a to tatou Ora ra ia ratou i te mau mea atoa ra.”—Tito 2:9, 10.

Ei hiˈoraa, e rave anaˈe i ta te hoê taata tapihoo i papai i te pu rahi a te mau Ite no Iehova: “Te papai atu nei au no te ani i te faatiaraa no te tihepu i te mau Ite no Iehova. E hinaaro vau e tihepu ia ratou no te mea ua papu ia ˈu e e feia haavare ore, te aau rotahi, e te tiaturihia ratou, e eita ratou e eiâ ia ˈu. O te mau Ite no Iehova anaˈe te feia ta ˈu e tiaturi mau nei. A tauturu mai na ia ˈu.”

E Kerisetiano o Kyle o te ohipa ra ei taata farii i roto i te hoê fare haapiiraa e ere na te hau. No te hoê peapea i tupu, ua faaino te hoê hoa ohipa ia ˈna i mua i te tahi mau piahi. “Ua ara vau ia ore te iˈoa o Iehova ia faainohia,” ta Kyle ïa e haamanaˈo ra. I na mahana e pae i muri aˈe, ua feruri maite o Kyle e nafea oia e nehenehe ai e faaohipa i te mau faaueraa tumu bibilia. Te itehia ra te hoê i roto i te Roma 12:18: “Peneiaˈe o te tia ra, e parahi hau noa outou i roto i te taata atoa nei.” Ua hapono oia i te hoê rata na roto i te roro uira i to ˈna hoa ohipa e ua tatarahapa no te fifi e vai ra i rotopu ia raua. Ua titau manihini o Kyle i to ˈna hoa ohipa ia faaea mai i muri aˈe i te ohipa no te faatitiaifaro i te peapea. I to raua na reiraraa, ua mǎrû mai te hoa o Kyle e ua ite i te paari o te raveraa a Kyle. Ua parau oia ia Kyle e, “E tumu paha to teie huru raveraa e ta oe haapaoraa” e ua tauahi mahanahana oia ia ˈna i to raua aroharaa no te taoto. Eaha ta Kyle faaotiraa? “Eita roa ˈtu tatou e hape ia faaohipa tatou i te mau faaueraa tumu bibilia.”

[Faaiteraa i te fatu o te hohoˈa i te api 7]

Fenua: hohoˈa NASA