Uiraa a te feia taio

Te auraa anei o te parau “peneiaˈe” i roto i te Zephania 2:3 e eita te mau tavini a te Atua e nehenehe e papu i te fanaˈoraa i te ora mure ore?

Te taiohia ra i roto i teie irava e: “E imi ia Iehova, e te feia i haehaa i nia i te fenua nei, o tei faatupu i te parau au na ˈna ra; e imi i te parau-tia, e imi i te haehaa: peneiaˈe outou o te faatapunihia ia tae i te mahana e riri ai Iehova ra.” No te aha teie irava e parau ai e “peneiaˈe”?

No te taa e nafea Iehova e haapao ai i to ˈna feia taiva ore i Aramagedo, e tauturu te haamanaˈoraa i ta te Bibilia e haapii ra no nia i ta te Atua e rave no te feia o te pohe hou tera taime haavaraa. E ite vetahi i te tia-faahou-raa no te ora ma te pohe ore ei varua i nia i te raˈi, area te tahi atu, e faatia-faahou-hia ïa ratou i nia i te fenua ma te tiaturiraa e ora e a muri noa ˈtu i roto i te Paradaiso. (Ioane 5:28, 29; Korinetia 1, 15:53, 54) Mai te peu e e haamanaˈo e e haamaitai Iehova i to ˈna feia taiva ore o te pohe hou Aramagedo, mea papu ïa e e na reira atoa oia i nia i ta ˈna mau tavini o te ora noa ra i te mahana o to ˈna riri.

E mea faaitoito atoa te mau parau faaurua a te aposetolo Petero. Ua papai oia e: ‘Ua faaora ihora te Atua ia Noa te taata i aˈo i te parau-tia ra, o te toovau ïa i te feia i faaorahia ra, a hopoi mai ai oia i te diluvi i teie nei ao paieti ore ra; e faariro atura i na oire ra o Sodoma e Gomora ei rehu auahi, huri tumu atura ia ratou i te faahaparaa ˈtu, e faaora ˈtura ia Lota parau-tia ra. Ua ite maori Iehova i te faaora i te feia paieti i roto i te ati ra, e te tapea i te feia parau-tia ore e ia tae i te mahana haavaraa, ia pohe.’ (Petero 2, 2:5-9) Noa ˈtu e ua haamou Iehova i te feia iino no te tau tahito ra, ua faaora oia ia Noa raua o Lota o tei tavini ia ˈna ma te taiva ore. E faaora atoa Iehova i te feia paieti ia haamou oia i te feia iino i Aramagedo. “E feia rahi roa” te mau taata parau-tia o te ora ˈtu.—Apokalupo 7:9, 14.

E au ra ïa e aita te Zephania 2:3 e faaohipa ra i te parau “peneiaˈe” no te tahi papu-ore-raa o te neheneheraa te Atua e paruru i te feia ta ˈna e farii ra. Tera râ, e faatapunihia paha te hoê taata i te mahana riri o Iehova ia haamata noa o ˈna i te imi i te parau-tia e te haehaa. E tupu te parururaa ia tamau te taata i te imi i te haehaa e te parau-tia.—Zephania 2:3.

[Hohoˈa i te api 7]

‘Ua ite maori Iehova i te faaora i te feia paieti i roto i te ati’