Ua “rahi” anei ta outou “taoˈa i te Atua ra”?

I ROTOPU i te parabole haaferuri e rave rahi ta Iesu Mesia i horoa, te vai ra hoê no nia i te hoê fatu fenua ona. Ei tutavaraa i te fanaˈo i te hoê oraraa papu no a muri aˈe no ˈna iho, ua opua te fatu fenua e patu i te mau fare vairaa maa rarahi. I roto râ i ta Iesu faahohoˈaraa, ua parauhia te taata ra ‘e maamaa.’ (Luka 12:16-21; MN) Te faaohipa atoa ra e rave rahi huriraa Bibilia i te taˈo “maamaa.” No te aha teie parau teimaha?

E au ra e aita te Atua i roto i te mau opuaraa a teie taata ona; aita atoa oia i tiaturi i te Atua no te faahotu-maitai-raa o te fenua. (Mataio 5:45) Ua faaahaaha râ oia e: “E tau [nephe], e taoˈa rahi ta oe ua pue i te vairaa no te mau matahiti a muri nei e rave rahi; e faaea maite, e amu, e inu, e ia rearea maite.” Oia, ua manaˈo oia e e riro te faahopearaa o ta ˈna mau tutavaraa mai “te aua teitei ra.”—Maseli 18:11.

Ei faaararaa no nia i teie huru feruriraa faateitei, ua papai te pǐpǐ ra o Iakobo e: “E teie nei, o outou o tei parau e, E haere tatou auanei, e ananahi, i roto i te oire ra o mea, a hoo ai e ia hoê aˈe matahiti i te hooraa, e noaa ˈtu te taoˈa: outou hoi o tei ore i ite i te mau mea e tupu ananahi. Eaha hoi to outou oraraa nei? e au auahi ïa, no vaivai aˈe e maoro iti aˈera, mou atura.”—Iakobo 4:13, 14.

E parau mau tera, ua parauhia i te taata ona i roto i ta Iesu parabole e: “E tera ra maamaa e! ei teie nei â rui e tiihia mai ai to oe [nephe], na vaiihora tena na mau taoˈa i haaputuhia e oe na?” Mai te au auahi o te mou, e pohe te taata ona hou oia e nehenehe ai e ite i te tupuraa o ta ˈna mau moemoeâ. Te haroaroa ra anei tatou i te haapiiraa? Ua parau Iesu e: “O te huru ïa o te taata i haaputu i te taoˈa na ˈna iho, e aita i rahi ta ˈna taoˈa i te Atua ra.” Ua “rahi” anei ta outou “taoˈa i te Atua ra”?