E nehenehe anei te hoê taata e taui mau i te ao?

“E parau mai te taata veve e e hinaaro ratou na mua roa i te hau e te panoonoo ore—e i muri iho i te mau ravea no te haamaitai aˈe i to ratou oraraa. E hinaaro ratou i te mau faanahoraa parau-tia no te fenua e no te nunaa rau ia ore ta ratou mau tutavaraa ia haafifihia e te mana rahi o te mau fenua ona e te mau taiete ona.”

MEA na reira to te taata faatere i te hoê pu tauturu nunaa rau faataaraa i te mau tiaturiraa e hinaaro o te feia veve. Inaha, e nehenehe ta ˈna mau parau e faataa maitai i te hiaai o te feia atoa e faaruru nei i te mau ati e ohipa tano ore na te ao atoa. Te hinaaro roa ra ratou i te hoê ao hau e te panoonoo ore mau. E tupu mau anei tera huru ao? Te vai mau ra anei te hoê taata e mana e e aravihi to ˈna no te taui i te hoê ao parau-tia ore roa?

Te mau tutavaraa no te taui

Mea rahi te taata i tamata. Ei hiˈoraa, ua pûpû o Florence Nightingale, te hoê vahine Beretane no te senekele 19, i to ˈna oraraa no te utuutu ma te mâ e te aumihi i te feia maˈi. I to ˈna tau—hou te raau arai i te haapê e te raau aro i te manumanu ino—e ere te mau fare maˈi mai ta tatou e ite nei i teie mahana. Ia au i te hoê buka, “aita te mau utuutu i haapiihia, mea repo, mea inu e mea morare ore roa ratou.” Ua manuïa anei ta Florence Nightingale mau tutavaraa no te taui i te ao o te utuuturaa? E. Mea rahi atoa te taata hamani maitai e te miimii ore tei manuïa roa i te tauturu ia vetahi ê i roto e rave rahi tuhaa o te oraraa—te iteraa i te taio e te papai, te haapiiraa, te rapaauraa, te nohoraa, te mau porotarama o te maa, ei hiˈoraa. Ei faahopearaa, ua maitai rahi mai te oraraa o te mau mirioni taata riirii.

Eita râ ta tatou e nehenehe e tâuˈa ore i teie tupuraa peapea mau: Mea rahi roa te taata o te faaruru noa nei i te tamaˈi, te ohipa ino, te maˈi, te oˈe, e te tahi atu mau ati. Ia au i te hoê pu tauturu Irelane, “te haapohe nei te veve e 30 000 taata i te mau mahana atoa.” Te vai noa atoa nei i ǒ tatou te faatîtîraa, te fa a te taata reforomatio e rave rahi roa i tahito ra. “Mea rahi aˈe te tîtî e ora nei i teie mahana i te feia atoa i eiâhia mai Afirika mai i te tau o te tapihooraa tîtî na te moana Ataranitita,” ia au ïa i te Disposable People—New Slavery in the Global Economy.

Na te aha i haafifi i te mau tutavaraa a te taata no te taui roa e a muri noa ˈtu? Na te mana rahi anei o te feia ona e te feia faatere, aore ra na te tahi atu mea?

Haafifiraa i te tauiraa

Ia au i te Parau a te Atua, o te Diabolo ra o Satani te haafifiraa rahi i te mau tutavaraa atoa a te taata no te haamau i te hoê ao parau-tia mau. Te parau maira te aposetolo Ioane e “te vai noa nei to te ao atoa i raro aˈe i taua varua ino ra.” (Ioane 1, 5:19) Oia mau, i teie mahana, ‘te haavare nei Satani i to te ao atoa nei.’ (Apokalupo 12:9) E tae noa ˈtu i te taime e faaorehia ˈi to ˈna mana ino, te vai ra iho â te feia e faaruru i te ino e te parau-tia ore. Mea nafea teie tupuraa peapea i fa mai ai?

Ua fanaˈo to tatou na metua matamua, o Adamu raua o Eva, i te hoê fenua tei opuahia no te riro ei nohoraa paradaiso tia roa no te fetii taata taatoa—te hoê ao “maitai roa.” (Genese 1:31)  Mea nafea te mau mea i te tauiraa? O Satani te tumu. Ua mârô oia i te tiaraa o te Atua e haamau i te mau ture e titauhia ia pee te mau tane e vahine. Ua faahua parau oia e mea tia ore ta te Atua huru faatereraa. Ua turai oia ia Adamu e ia Eva ia maiti i te faatere ia raua iho, a nehenehe atu ai raua e faaoti no raua iho eaha te mea maitai e eaha te mea ino. (Genese 3:1-6) Ua horoa mai te reira i te piti o te haafifiraa i te mau tutavaraa a te taata no te haamau i te hoê ao parau-tia—te hara e te huru tia ore.—Roma 5:12.

No te aha i faatiahia ˈi?

‘No te aha râ te Atua i vaiiho ai i te hara e te huru tia ore ia tupu mai?’ ta vetahi paha ïa e ui. ‘No te aha oia i ore ai i faaohipa i to ˈna mana otia ore no te haamou i na orure hau e no te haamata apî faahou?’ Ia hiˈohia, e au ra e e ravea ohie. E faahiti râ te faaohiparaa i te mana i te mau uiraa hoata ore. E ere anei i te parau mau e o te faaohipa-hua-raa i te mana te tumu rahi e autâ ˈi te feia veve e te haavîhia o te ao? Eita anei te feruriraa o te feia aau tia e feaa ia faaohipa te hoê taata haavî i te mana no te haapohe i te feia atoa o te patoi i ta ˈna mau faatureraa?

No te haapapu i te feia aau tia e eita Oia e faaohipa i te mana ma te haavî, ua maiti te Atua i te vaiiho ia Satani e te mau taata orure hau ia haa ma te haapae i te mau ture e faaueraa tumu a te Atua—no te hoê noa tau taotiahia. Na te tau e haapapu e ta te Atua anaˈe te huru faatereraa maitai. E faaite atoa te reira e no to tatou maitai i tuu mai ai oia i te mau taotiaraa. Inaha, ua faaite ê na mai te mau faahopearaa peapea o te orureraa i te faatereraa a te Atua, i te reira. E ua haapapu te reira e e tano roa te Atua i te faaohipa i to ˈna mana rahi no te faaore i te ino atoa i te taime ta ˈna e maiti. E ua fatata roa.—Genese 18:23-32; Deuteronomi 32:4; Salamo 37:9, 10, 38.

Hou te Atua e ohipa mai ai, ua mau tatou i roto i te hoê ao parau-tia ore, ‘a uuru e a mauiui tahi ai tatou.’ (Roma 8:22) Noa ˈtu eaha ta tatou e rave no te taui i te mau mea, eita e tia ia tatou ia haamou ia Satani, eita atoa e tia ia tatou ia faaore roa i te huru tia ore, te tumu o te mau mauiui atoa ta tatou e faaruru nei. Aita ta tatou e ravea no te tataî i te mau faahopearaa o te hara i tutuuhia mai e Adamu.—Salamo 49:7-9.

Na Iesu Mesia e taui e a muri noa ˈtu

Te auraa anei e aita roa ˈtu iho â ïa e ravea? Eita roa ˈtu. E taata mana aˈe i te taata nei tei horoahia te hopoia e rave i te hoê tauiraa tamau. O vai ïa? O Iesu Mesia. Ua faataahia oia i roto i te Bibilia ei Tumu o te ora o te fetii taata.—Ohipa 5:31, MN.

Te tiai nei oia i “te taime faataahia” e te Atua no te ohipa mai. (Apokalupo 11:18, MN) Eaha mau â ta ˈna e rave? E ‘faatia faahou oia i te mau mea atoa ta te Atua i parau mai i te vaha o te mau peropheta moˈa atoa no ˈna mai te matamua mai â o teie nei ao.’ (Ohipa 3:21) Ei hiˈoraa, e ‘faaora Iesu i tei veve e ua tiaoro mai, e tei ati e aita o ˈna e tauturu. E faaora oia ia ratou i te [faaheporaa] e te rave ino.’ (Salamo 72:12-16; MN) Na roto ia Iesu Mesia, te fafau ra te Atua e e “faaore oia i te tamaˈi e tae roa aˈenei i te hopea fenua!” (Salamo 46:9) “E ore hoi to reira [e ora ra i nia i to ˈna fenua tamâhia] e parau e, Ua paruparu vau i te maˈi,” ta ˈna ïa e fafau ra. E fanaˈo faahou te matapo, te tariˈa turi, te pirioi—te feia maˈi atoa—i te ea tia roa. (Isaia 33:24; 35:5, 6; Apokalupo 21:3, 4) E haamaitaihia te feia atoa i pohe i tahito ra. Te fafau ra oia e e faahoˈi mai oia i te ora i te feia i faaruru i te parau-tia ore e te faaheporaa.—Ioane 5:28, 29.

Eita Iesu Mesia e rave i te hoê tauiraa pae tahi e te taime poto. E faaore roa oia i te mau haafifiraa atoa i te hoê ao parau-tia mau. E faaore oia i te hara e te huru tia ore e e haamou oia i te Diabolo ra o Satani e te feia atoa e pee i to ˈna haerea orure hau. (Apokalupo 19:19, 20; 20:1-3, 10) Eita te ati e te mauiui ta te Atua i faatia no te hoê taime ‘e papiti mai i te tupuraa.’ (Nahuma 1:9) Tera ta Iesu i manaˈo i to ˈna haapiiraa mai ia pure ia tae mai te Basileia o te Atua e ia haapaohia to te Atua hinaaro “i te fenua nei, mai tei te ao atoa na.”—Mataio 6:10.

E na ô paha outou, ‘Aita anei râ Iesu iho i parau e “e vai noa te taata rii i ǒ tatou nei”? E ere anei te auraa e e tupu noa te parau-tia ore e te veve?’ (Mataio 26:11, MN) Oia, ua parau iho â  Iesu e e vai noa mai te taata rii. Ia au râ i te huru tupuraa o ta ˈna parau e te mau parau fafau o te Parau a te Atua, e vai noa te taata rii a vai noa ˈi teie nei faanahoraa o te mau mea. Ua ite oia e aita e taata e tia ia faaore i te veve e te parau-tia ore i roto i te ao nei. Ua ite atoa oia e na ˈna e taui i tera mau mea atoa. Ua fatata oia i te haamau i te hoê faanahoraa apî o te mau mea—“te raˈi apî e te fenua apî” aita e mauiui, e maˈi, e veve, e e pohe i reira.—Petero 2, 3:13; Apokalupo 21:1.

‘Eiaha e haamairi i te hamani maitai’

Te auraa anei e aita e faufaa ia rave i tei maraa ia tatou no te tauturu ia vetahi ê? Eita roa ˈtu. Te faaitoito maira te Bibilia ia tauturu ia vetahi ê ia faaruru ratou i te mau fifi e te mau tupuraa ahoaho. “Eiaha oe e tapea i te maitai i te taata e au ia ˈna ia hopoi ra, tei to rima taua maitai ra ia hopoi,” ta Solomona ïa, arii no tahito ra, i papai. (Maseli 3:27) “Area te hamani maitai, e te horoa, eiaha roa ïa e haamairihia,” te faaitoitoraa ïa a te aposetolo Paulo.—Hebera 13:16.

Ua faaitoito mai Iesu Mesia iho ia rave i tei maraa ia tatou no te tauturu ia vetahi ê. Ua faahiti oia i te faahohoˈaraa o te hoê taata Samaria tei ite atu i te hoê taata tei taparahihia e tei eiâhia. Ua parau Iesu e “aroha ˈtura” te taata Samaria e faaohipa ˈtura i ta ˈna iho faufaa no te vehî i te pepe o te taata taparahihia e no te tauturu ia ˈna ia afaro mai. (Luka 10:29-37) Aita tera taata Samaria aumihi i taui i te ao, ua taui râ oia i te oraraa o te tahi atu taata. E nehenehe tatou e na reira atoa.

Tera râ, e nehenehe ta Iesu Mesia e rave hau atu â i te tauturu i te taata. E nehenehe mau â ta ˈna e taui i te ao, e ua fatata roa oia i te na reira. Ia na reira oia, e tia i te feia i faaruru i te mau tupuraa parau-tia ore o teie tau ia haamaitai i to ratou oraraa e ia fanaˈo i te hau e te panoonoo ore mau.—Salamo 4:8; 37:10, 11.

A tiai ai tatou i taua tupuraa ra, eiaha tatou e taiâ i te rave i tei maraa ia tatou, i te pae varua e i te pae materia atoa, no te “hamani maitai” i te feia atoa e faaruru nei i te hoê ao parau-tia ore.—Galatia 6:10.

[Hohoˈa i te api 6]

E hamani maitai te mau pǐpǐ a te Mesia ia vetahi ê