Te mau ô o te faaoaoa i te Atua

E ERE teie i te hoê aamu nehenehe. Ua haru te arii vahine o Atalia i te terono o Iuda na roto i te ravea haavarevare e te taparahi-pohe-raa. Ma te manaˈo hape e ua pohe pauroa te taata aiˈa mau, ua faariro o ˈna ia ˈna iho ei arii vahine. Ma te itoito, ua huna te tahi atu vahine, te tamahine hui arii ra o Iehoseba, o tei hinaaro mau ia Iehova e ta ˈna Ture, i te hoê tamarii hui arii, te aiû ra o Ioasa. Ua huna o Iehoseba e ta ˈna tane, te tahuˈa rahi ra o Iehoiada, i te tamaiti aiˈa e ono matahiti i te maoro i to raua vahi i te hiero.—Te mau arii 2, 11:1-3.

I te taeraa to Ioasa e hitu matahiti, ua ineine te tahuˈa rahi ra o Iehoiada i te haamata i ta ˈna opuaraa e tatara i te arii vahine o tei parahi ma te tia ore i nia i te terono. Ua faaite o ˈna i te tamaiti ta ˈna i huna e ua faaterono atu ei taata aiˈa tia no te basileia. E ua afai te mau tiai o te arii i te arii vahine ino ra o Atalia i rapae i te mau vahi o te hiero e ua haapohe ia ˈna, e ua mǎrû maira e oaoa aˈera te nunaa. Na roto i ta raua mau ohipa, ua turu rahi o Iehoiada e o Iehoseba i te haamau-faahou-raa i te haamoriraa mau i te fenua ra o Iuda. Te mea faufaa roa ˈtu â râ, ua apiti raua i te tereraa tamau o te opu fetii hui arii ra o Davida, o tei aratai atu i te Mesia ra.—Te mau arii 2, 11:4-21.

Ua faatupu atoa te arii tei faaterono-apî-hia i te hoê ohipa faufaa o te faaoaoa i te Atua. E mea tia roa ia tataîhia te fare o Iehova. Aita noa te hinaaro mâha ore o Atalia e faatere o ˈna anaˈe i Iuda i faatupu i te tâuˈa-ore-raa i te hiero tera râ i te eiâraa atoa i reira. No reira ua faaoti o Ioasa e patu e e faaapî faahou i te hiero. Ma te haamarirau ore, ua faatae o ˈna i te hoê faaueraa e haaputu i te moni e hinaarohia no te faanaho faahou i te fare o Iehova. Ua parau o ˈna e: “Te mau moni moˈa ia hopoihia mai i roto i te fare o Iehova, te moni a te feia atoa i taiohia ra, e te moni i haapaohia na te taata atoa e aufau, e te moni atoa a te taata ia hinaaro i te hopoi mai i roto i te fare o Iehova, na te feia tahuˈa i haaputu mai, te taata atoa i te taua ra: a rave faahou ai i te mau vahi i parari i te fare nei, ia itea ˈtu taua mau vahi parari ra.”—Te mau arii 2, 12:4, 5.

Ua turu te nunaa ma te aau tae. Tera râ, aita te mau tahuˈa i rave roa ma te aau atoa i ta ratou ohipa e tataî i te hiero. No reira, ua faaoti te arii e na ˈna iho e haapao i tera tuhaa e ua faaue o ˈna ia tuu-roa-hia te mau ô atoa i roto i te hoê afata taa ê. Ua faaue o ˈna ia Iehoiada no tera ohipa, e te na ô ra te faatiaraa e: “Ua rave aˈera . . . Iehoiada tahuˈa i te tahi afata, e ua hou ihora i te tahi apoo i nia iho, ua tuu ihora i te pae fata, i te pae atau ia tomo mai i roto i te fare o Iehova, e ua tuu ihora te feia tahuˈa i tiai i te uputa ra i te moni atoa i hopoihia mai i roto i te fare o Iehova ra i roto. E ia hiˈo aˈera ratou e, ua rahi te moni i roto i taua afata ra, ua haere maira te papai parau a te arii e te tahuˈa rahi, ua taio ihora i te moni i noaa i roto i te fare o Iehova, e ua oomo ihora i roto i te mau pute. E oti aˈera taua moni ra i te  taiohia, ua tuu ihora ratou i te rima o te feia e rave i taua ohipa ra, o tei hiˈo i taua fare o Iehova ra; e pau aˈera ia ratou tei te utua na te mau tahuˈa tarai raau, e na te feia e patu, tei rave i te ohipa i taua fare o Iehova ra. E tei te mau tahuˈa e te tarai ofai; e tei te hoo raau hoi, e te ofai taraihia ra, ei tifai i te mau vahi i parari, e tei te mau mea atoa i hoohia ei tifai i taua fare ra.”—Te mau arii 2, 12:9-12.

Ua pahono te nunaa ma te aau atoa. Ua faatia-faahou-hia te fare haamoriraa a Iehova a nehenehe atu ai ta ˈna haamoriraa e tamau ma te tura. No reira, ua faaohipa-maitai-hia te mau ô moni atoa. Ua rave papu te arii ra o Ioasa i te reira!

I teie mahana, te haapao maite ra te faanahonahoraa ite-mata-hia a Iehova e ia faaohipa-maitai-hia te mau ô moni atoa no te faahaere i te haamoriraa a Iehova i mua, e ua pahono te mau Kerisetiano mau mai te mau Iseraela no tahito ra—oia hoi ma te aau atoa. Peneiaˈe e to roto atoa outou i te mau taata o tei faahaere i te mau faufaa a te Basileia i mua i te roaraa o te matahiti taviniraa i mahemo. E hiˈo anaˈe i te tahi o te mau ravea i faaohipahia ˈi ta outou mau ô.

NENEIRAA

I te ao atoa nei, ua neneihia te mau papai i muri nei no te haapiiraa e te opereraa:

• Api parau: 440 995 740

• Buka: 47 490 247

• Buka iti: 6 834 740

• Buka rairai: 167 854 462

• Tarena: 5 405 955

• Vea: 1 179 266 348

• Video: 3 168 611

E neneihia i Afirika, Marite apatoerau, no ropu, e apatoa, Asia, Europa, e te mau nunaa o te mau motu no Patitifa—19 ïa rahiraa fenua.

“O Katelyn May to ˈu iˈoa. E vau matahiti to ˈu. E 28 tara Marite ta ˈu, e te hinaaro nei au ia farii outou i te reira no te tauturu i te aufau i te mau matini neneiraa. To outou tuahine iti o Katelyn.”

“E putuputuraa utuafare ta matou no nia i te mau matini neneiraa apî. Ua faaoti ta mâua na tamarii, 11 e e 9 matahiti, i te rave i te moni ta raua i haaputu no te horoa ei ô. Te oaoa nei mâua i te hapono i ta raua ô e ta mâua atoa.”

 PATURAA

Teie te tahi mau ohipa paturaa i ravehia no te turu i te mau ohipa a te mau Ite no Iehova:

• Piha a te Basileia i te mau fenua navai ore te ravea: 2 180

• Piha tairururaa: 15

• Amaa: 10

• Rima tauturu nunaa rau i roto i te taviniraa taime taatoa: 2 342

“I teie hopea hebedoma e tupu ai ta matou putuputuraa matamua i roto i ta matou Piha apî a te Basileia. Te oaoa roa nei matou i te fanaˈo i te hoê vahi au no te arue i to tatou Metua, te Atua ra o Iehova. Te haamauruuru nei matou ia Iehova e ia outou no te haapaoraa mai i to matou mau hinaaro ma te patu atu â i te mau Piha a te Basileia. Oia mau, e mea faufaa roa ta matou Piha a te Basileia no te feia tapiri.”—Tireni.

“Te mauruuru roa nei te mau taeae e te mau tuahine i te tauturu i horoahia mai e te faanahonahoraa a Iehova. E tae roa mai i teie mahana, te paraparau noa ra matou no nia i te taime faahiahia ta matou i fanaˈo e te pǔpǔ o te paturaa.”—Moldavie.

“Aita i maoro aˈenei, ua faatupu mâua ta ˈu vahine i te 35raa matahiti o to mâua faaipoiporaa. Ua tamata mâua i te faaoti eaha ta mâua e nehenehe e rave no tera tupuraa, e ua faaoti mâua e faahoˈi i te tahi mea ia Iehova ra e ta ˈna faanahonahoraa, no te mea aita anaˈe ta ratou tauturu, eita paha mâua e manuïa i roto i to mâua faaipoiporaa. E hinaaro mâua e horoa ˈtu i teie moni ia faaohipahia no te patu i te hoê Piha a te Basileia i te mau fenua ravai ore.”

“Aita i maoro aˈenei, ua fanaˈo vau i te hoê tufaa, e i te mea e e mea iti roa te mau mea ta ˈu e ‘hinaaro’ no ˈu iho e te mau mea e ‘titauhia’ no ˈu, e hinaaro vau e horoa ˈtu i teie moni no te tauturu i te patu i te mau Piha a te Basileia hinaaro-rahi-roa-hia i te fenua e rave rahi.”

 OHIPA TAUTURU I ROTO I TE ATI

I teie mau mahana hopea, e pinepine te mau ati i te tairi ma te ore e faaara. E rave rahi Ite no Iehova o te tuu i te mau ô hau ia tauturuhia to ratou mau taeae i te mau vahi i atihia. Ei haamanaˈoraa, e faaohipahia te mau ô no te ohipa tauturu i roto i te ati i roto i te ohipa na te ao nei. Teie te tahi mau vahi i reira te mau Ite no Iehova i te tautururaa i te feia i roohia i te ati:

• Afirika

• Asia

• Te mau fenua Antilles

• Te mau motu no Patitifa

“Te hinaaro nei mâua ta ˈu tane e haamauruuru maitai ia outou i te haponoraa mai i te mau taihaa no te tutava i te tauturu i te tataî i te ino i te tupuraa te mau mataˈi rorofai. Ua nehenehe mâua e tapunu faahou i to mâua fare. Mauruuru maitai ia outou i te pahono-oioi-raa mai.”

“O Connor to ˈu iˈoa, e 11 matahiti to ˈu. Ia ˈu i ite i te ohipa i tupu a tairi ai te “tsunami,” ua hinaaro vau e tauturu. Te tiaturi nei au e e tauturu teie mea i to ˈu mau taeae e tuahine.”

 TAVINI TAA Ê TAIME TAATOA

E rave rahi Kerisetiano e tavini nei i roto i te ohipa pororaa aore ra i te mau Betela ma te taime taatoa. Na te mau ô horoa noa e turu ra i te tahi mau rima tauturu taime taatoa, e te vai ra te mau:

• Mitionare: 2 635

• Tiaau ratere: 5 325

• Melo o te Betela: 20 092

“I te mea e eita ta ˈu e nehenehe e tavini i te Betela i teie nei [te hoê tamaroa e pae matahiti], e hinaaro vau e hapono atu i teie ô ma te here rahi. Ia rahi mai au, e haere au i te Betela no te rave puai i te ohipa.”

Te ohipa haaparareraa i te haapiiraa bibilia

Ua faaue Iesu Mesia i ta ˈna mau pǐpǐ ia “faariro i te mau fenua atoa ei pǐpǐ.” (Mataio 28:19) No te auraro i ta ˈna mau parau, te ohipa roa nei te mau Ite no Iehova no te poro e te haapii i te poroi o te Bibilia i roto e 235 fenua. Te nenei nei e te opere nei ratou i te mau papai bibilia na roto e 413 reo.

Oia mau, te ô faufaa roa ˈˈe ta te hoê Kerisetiano e nehenehe e faaohipa no te tauturu i te taata e rave rahi aˈe ia haapii no nia i te Atua e ta ˈNa mau opuaraa, o to ˈna ïa taime. Ua horoa rahi te mau Ite no Iehova i to ratou taime e to ratou itoito no te tauturu i to ratou taata-tupu. Ua horoa atoa ratou ma te pipiri ore i te ô moni, e ua tauturu ta ratou mau ô atoa, na roto i te hoê aore ra te tahi atu ravea, i te faaite i te iˈoa o Iehova e ta ˈna mau opuaraa na te fenua atoa nei. Ia tamau Iehova i te haamaitai i tera mau tutavaraa no te tauturu i te tahi atu ia haapii atu â no nia ia ˈna. (Maseli 19:17) E faaoaoa tera hinaaro e tauturu ia Iehova!—Hebera 13:15, 16.

[Tumu parau tarenihia i te mau api 29-31]

Ravea huru rau no te horoa

Ô NO TE TURU I TE OHIPA NA TE AO ATOA NEI

Mea rahi o te tuu nei i te hiti aore ra o te faataa nei i roto i ta ratou tapura faufaa i te tahi moni no te tuu atu i roto i te mau afata ô tei papaihia i nia iho “Offrandes pour l’œuvre mondiale—Matthieu 24:14” (Afata ô no te ohipa na te ao atoa nei—Mataio 24:14).

I te mau avaˈe atoa, e hapono te mau amuiraa i te moni no roto mai i taua mau afata ra i te piha ohipa a te mau Ite no Iehova fatata roa ˈˈe. E nehenehe atoa e hapono roa ˈtu i te hoê parau moni ei ô i te Betela. E mea tia ia papai i te hoê rata o te haponohia e taua mau ô ra no te faaite e e ô horoa noa tera.

PARAU FAAAU NO TE HOROA TARAHU I TE MONI

Ia au i te tahi mau faanahoraa taa ê, e nehenehe te hoê taata e horoa tarahu i te moni aita e apî i nia iho na te hoê taatiraa e faaohipahia ra e te Betela i ǒ tatou nei.

TE TAHI ATU Â MAU RAVEA NO TE TURU I TE HAAMORIRAA

Ua rau te ravea no te horoa i te mau ô no te turu i te ohipa a te Basileia na te ao atoa nei.

Parau faaau parururaa i te ora: E nehenehe e faataa e na te hoê taatiraa faaroo aore ra te hoê taatiraa o te turu i te hoê haamoriraa i te pae moni, e fanaˈo i te hoê parau faaau parururaa i te ora.

Afata moni: E nehenehe te mau ô e faataehia i roto i te afata moni a te hoê taatiraa o te turu i te hoê haamoriraa aore ra te hoê taatiraa tauturu.

Faufaa maraa ore: I te tahi mau fenua, e nehenehe e horoa i te mau faufaa maraa ore ei ô na te mau taatiraa faatia-tamau-hia. E mea tia ia faaara ˈtu i te piha ohipa a te amaa hou e horoa ˈi i te mau faufaa maraa ore atoa ei ô.

Parau tutuu: E nehenehe te mau faufaa maraa ore aore ra te moni e tutuuhia na te hoê taatiraa o te turu i te hoê haamoriraa maoti te hoê parau tutuu haapapu-tamau-hia.

Hou e papai ai i te hoê parau tutuu, e mea tia ia hiˈo maitai te taata tutuu i te tuhaa o ta ˈna mau faufaa ta ˈna e nehenehe e faaohipa mai ta ˈna e hinaaro. Mea titauhia ia afai te taata i ta ˈna parau tutuu i te hoê notera, mai te peu iho â râ e na ˈna iho i papai i te parau tutuu taatoa.

Mea titauhia ia feruri te taata horoa i te mau ravea rau e turu ai oia i te ohipa a te Basileia i te pae moni. I te mea e mea ê te hoê huru tupuraa i te tahi, mea titauhia paha ia ani i te mau haamaramaramaraa i te hoê notera aore ra te hoê taata aˈo aravihi. E nehenehe atoa e taniuniu aore ra e papai i te piha ohipa a ta outou amaa o te nehenehe e horoa mai i te mau haamaramaramaraa faufaa no nia i te tutuu e te tute i te pae o te mau horoaraa e te mau ô tauturu.

No te tahi atu â mau haamaramaramaraa no nia ia Porinetia Farani, a papai atu i te Association “Les Témoins de Jéhovah,” B.P. 7715, 98719 Taravao, aore ra a taniuniu atu i te 54 70 00.

[Faaiteraa i te fatu o te hohoˈa i te api 28]

Video Fidèles: Staline: U.S. Army photo