Te faaroo ra te taata “no roto i te mau parau atoa” i te parau apî maitai

‘E na ô na taata tino ahuru no roto i te mau parau atoa o te mau fenua ra, E haere atoa matou i ǒ na: ite aˈenei matou e, tei ia outou te Atua.’—ZEKARIA 8:23.

1. Mea nafea to Iehova horoaraa i te taime e te tupuraa maitai roa ˈˈe no te haamataraa o te pororaa i te mau taata nunaa e reo rau?

 UA TANO maitai te taime e te tupuraa. O te mahana Penetekose 33 T.T. ïa. Tau hebedoma na mua ˈtu, ua tairuru mai te mau ati Iuda e te mau peroseluto no 15 aˈe tuhaa fenua mai o te Hau emepera Roma e no te tahi atu vahi, i Ierusalema no te faatupu i te oroa Pasa. I taua mahana ra, tau tausani o ratou tei faaroo—eiaha ma te taa ore, mai te feia i Babela i tahito ra, ma te maramarama râ—i te mau taata mai ia ratou i î hoi i te varua moˈa i te pororaa i te parau apî maitai na roto e rave rahi reo e paraparauhia ra i roto i te hau emepera. (Ohipa 2:1-12, MN) Ua tapao taua taime ra i te haamauraa o te amuiraa Kerisetiano e te haamataraa o te hoê ohipa haapiiraa nunaa e reo rau o tei tamau noa e tae roa mai i teie mahana.

2. Mea nafea te taata e rave rau e faaroo ra i te ‘maereraa’ i te mau pǐpǐ a Iesu i te Penetekose 33 T.T.?

² E nehenehe paha te mau pǐpǐ a Iesu e paraparau i te reo Heleni, te reo matauhia i tera ra tau. Ua faaohipa atoa ratou i te Hebera, te reo e paraparauhia ra i te hiero. Tera râ, i taua mahana Penetekose ra, “ua maere” te taata e rave rau e faaroo ra ia ratou i to ratou paraparauraa na roto i te mau reo tumu o taua mau taata ra. Eaha te faahopearaa? Ua putapû te aau o te feia e faaroo ra i te pue parau mau faufaa roa na roto i to ratou reo tumu. I te hopea o te mahana, ua maraa roa te pǔpǔ iti o te mau pǐpǐ hau atu i te 3 000!—Ohipa 2:37-42.

3, 4. Mea nafea te ohipa pororaa i te parareraa a faarue ai te mau pǐpǐ ia Ierusalema, ia Iudea, e ia Galilea?

³ I muri rii noa ˈˈe i tera ohipa faufaa roa, ua tupu mai te mau hamani-ino-raa i Ierusalema, e ‘ua haere atura te feia i purara ê ra e haapii haere i te parau e ati noa ˈˈe te fenua.’ (Ohipa 8:1-4) Ei hiˈoraa, te taio ra tatou i roto i te Ohipa pene 8 no nia ia Philipa, e au ra e e taata poro evanelia e paraparau ra i te reo Heleni oia. Ua poro Philipa i to Samaria. Ua poro atoa oia i te hoê taata toroa Etiopia o tei farii i te poroi no nia i te Mesia.—Ohipa 6:1-5; 8:5-13, 26-40; 21:8, 9.

⁴ A haere ai te mau Kerisetiano e a imi ai ratou i te vahi faaearaa i rapae au aˈe i te mau otia o Ierusalema, o Iudea, e o Galilea, ua farerei ratou i te tahi atu nunaa e fifi i te pae o te reo. Ua poro paha vetahi o ratou i te mau ati Iuda anaˈe. Teie râ, te na ô ra te pǐpǐ ra o Luka e: “Te hoê pae taata o ratou ra no Kupero ïa, no Kurene, o tei parau atu ïa i te Heleni i to ratou taeraa ˈtu i Anetiohia, i te [faaiteraa i te parau apî maitai o] te Fatu ra ia Iesu.”—Ohipa 11:19-21; MN.

E poroi ta te hoê Atua pae tahi ore na te taata atoa

5. Mea nafea te iteraahia to Iehova pae tahi ore i nia i te parau apî maitai?

⁵ Te tuati ra teie mau tupuraa i te mau eˈa o te Atua; aita to ˈna e huru pae tahi. I muri aˈe i to te aposetolo Petero tautururaahia e Iehova ia faatano i ta ˈna huru hiˈoraa i te taata o te mau nunaa, ua papai oia ma te mauruuru e: “Ua ite mau atura vau e ore te Atua e haapao i te huru o  te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35; Salamo 145:9) I to te aposetolo Paulo, te hoê taata hamani ino i te mau Kerisetiano na mua ˈˈe, faahitiraa e ‘e hinaaro te Atua i te taata atoa ia ora,’ ua haapapu â oia e aita roa ˈtu to te Atua e manaˈo oti noa. (Timoteo 1, 2:4) Te ite-maitai-hia ra to te Atua Poiete pae tahi ore no te mea te horoahia ra te tiaturiraa o te Basileia na te taata, tane aore ra vahine, no te mau iri, nunaa aore ra reo atoa.

6, 7. Teihea mau parau tohu bibilia i faaite atea i te parareraa nunaa e reo rau o te parau apî maitai?

⁶ Ua faaite-atea-hia teie parareraa nunaa rau ehia senekele na mua ˈtu. Ia au i te parau tohu a Daniela, “ua horoahia maira te mana, e te hinuhinu, e te basileia no [Iesu], ia auraro mai te taata atoa, e te mau fenua atoa, e te reo atoa ia ˈna.” (Daniela 7:14) Te faaite ra te neneiraahia teie vea na roto 151 reo e te opereraahia na te ao atoa nei ia nehenehe outou e taio no nia i te Basileia o Iehova, i te tupuraa o tera parau tohu bibilia.

⁷ Ua faaite atea te Bibilia i te hoê tau e faaroo ai te mau taata reo rau i to ˈna poroi faaora. Ei faataaraa e nafea te haamoriraa mau e faatae mai ai e rave rahi taata, ua tohu Zekaria e: “Ia tae i taua mau mahana ra, e haru mai ai na taata tino ahuru no roto i te mau parau atoa o te mau fenua ra, i te hiti ahu o te hoê ati Iuda [Kerisetiano faatavaihia i te varua, melo o ‘te Iseraela o te Atua’] ta ratou e haru, a na ô atu ai, E haere atoa matou i ǒ na: ite aˈenei matou e, tei ia outou te Atua.” (Zekaria 8:23; Galatia 6:16) E ei faatiaraa i ta ˈna i ite orama, ua parau te aposetolo Ioane e: “Inaha e feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa, i te tia-noa-raa i mua i te terono, e i mua i te Arenio.” (Apokalupo 7:9) Ua ite tatou e te tupu nei iho â teie mau parau tohu!

Pororaa i te mau huru taata atoa

8. Teihea tupuraa mau o teie tau e titauhia ra i te mau faatanoraa i roto i ta tatou ohipa pororaa?

⁸ I teie mahana, te rahi noa ˈtura te taata e faarue ra i to ratou iho fenua. Ua avari te tahoêraa i te ao atoa nei i te hoê tau apî o te haereraa e faaea i te fenua ê. Ua haere te taata e rave rahi no te mau vahi tamaˈi e tuhaa fenua i topatari i te pae faaravairaa faufaa i te mau vahi papu atu â, ma te imi i te hoê huru oraraa panoonoo ore i te pae materia. I te fenua e rave rahi, no te tae-rahi-raa mai te feia ěê e te feia horo ê, ua aratai te reira i te haamauraahia te mau pǔpǔ taata reo ê. Ei hiˈoraa, i Filelane, te paraparauhia ra 120 tiahapa reo; i Auteralia, e 200 tiahapa ïa. I roto i te hoê noa oire i te Hau Amui—i San Diego—e nehenehe e faaroo 100 tiahapa reo!

9. E nafea tatou ia hiˈo i te taata o ta tatou tuhaa fenua o te paraparau ra i te reo ê e tia ˈi?

⁹ Ei tavini Kerisetiano, te hiˈo ra anei tatou i te mau taata e paraparau ra i te reo ê mai te hoê haafifiraa no ta tatou taviniraa? Eita roa ˈtu! E hiˈo râ tatou i te vairaa mai o teie mau taata mai te hoê faaaanoraa hinaarohia o ta tatou tuhaa fenua taviniraa—‘te mau aua teatea no te auhune.’ (Ioane 4:35) E tutava tatou i te haapao i te mau taata e ite ra i to ratou veve i te pae varua, noa ˈtu eaha to ratou nunaa aore ra reo. (Mataio 5:3, MN) Ei faahopearaa, te rahi noa ˈtura te mau taata o “te mau reo atoa” o te riro mai ei pǐpǐ a te Mesia i te matahiti taitahi. (Apokalupo 14:6) Ei hiˈoraa, i Atete 2004 ra, ua porohia i Heremani na roto fatata e 40 reo. I taua taime ra, i Auteralia, ua porohia te parau apî maitai na roto fatata e 30 reo, 18 hoi i na matahiti hoê ahuru aˈenei. I Heleni, ua poro te mau Ite no Iehova i te mau taata na roto fatata e 20 reo ê. Na te ao atoa nei, te paraparau ra fatata e 80 % o te mau Ite no Iehova i te hoê reo ê atu i te reo Beretane, te reo nunaa rau o teie tau.

10. Eaha te tuhaa a te taata poro taitahi i roto i te faariroraa i te taata o “te mau fenua atoa” ei pǐpǐ?

¹⁰ Oia mau, te haapaohia ra ta Iesu faaueraa “e faariro i te mau fenua atoa ei pǐpǐ”! (Mataio 28:19) Ei farii-ru-raa i tera faaueraa, te ohipa ra te mau Ite no Iehova i roto e 235 fenua, ma te opere i te mau papai na roto e 400 tiahapa reo. Noa ˈtu e te horoa ra te faanahonahoraa a Iehova i te mau papai hinaarohia no te poro i te mau taata, e mea tia ia faaitoito te taata poro  taitahi i te Basileia i te faaite i te poroi bibilia i “te taata atoa” na roto i te reo ta ratou e nehenehe e taa roa ˈˈe. (Ioane 1:7) E tauturu teie tutavaraa tahoêhia tau mirioni taata o te mau pǔpǔ reo rau ia fanaˈo i te evanelia. (Roma 10:14, 15) Oia, e tuhaa faufaa roa ta tatou taitahi!

Faaûraa i te fifi

11, 12. (a) Eaha paha te mau fifi e faaruruhia ra, e e nafea te varua moˈa e tauturu ai? (b) No te aha te pororaa i te taata na roto i to ratou reo tumu e tauturu pinepine ai?

¹¹ I teie mahana, e hinaaro e rave rahi taata poro i te Basileia e haapii i te tahi atu â reo, eiaha râ ratou e tiaturi e fanaˈo i te mau ô semeio a te varua o te Atua no te paraparau i te tahi atu reo. (Korinetia 1, 13:8) E ohipa rahi te haapiiraa i te hoê reo apî. E mea tia paha ia faatano te feia atoa e paraparau aˈena ra i te piti o te reo i to ratou feruriraa e ta ratou huru raveraa ia anaanatae te feia e paraparau ra i tera reo i te poroi bibilia, mea taa ê râ to ratou oraraa e taˈere. No reira, e pinepine e mea huru mamahu atoa te feia ěê apî; no te taa i to ratou huru feruriraa, e titauhia ïa ia tutava ˈtu â.

¹² Te ohipa noa râ te varua moˈa i rotopu i te mau tavini a Iehova i roto i ta ratou mau tutavaraa e tauturu i te taata e paraparau ra i te tahi atu mau reo. (Luka 11:13) Eita te varua moˈa e horoa semeio mai i te ite i te pae o te reo, e nehenehe râ te reira e haapuai i to tatou hinaaro e paraparau i te taata aita e paraparau ra i to tatou reo. (Salamo 143:10) E nehenehe te pororaa aore ra te haapiiraa i te poroi bibilia i te taata na roto i te hoê reo ta ratou i matau ore e ohipa i nia i to ratou feruriraa. No te haaputapû râ i te aau o te feia e faaroo maira, e pinepine e mea maitai aˈe ia faaohipa i to ratou reo tumu—te reo o te faaite i to ratou mau hinaaro, to ratou mau manaˈo turai, e ta ratou mau tiairaa hohonu roa ˈˈe.—Luka 24:32.

13, 14. (a) Eaha te turai ra ia vetahi ia rave i te taviniraa na roto i te tahi atu â reo? (b) E nafea e itehia ˈi te feruriraa haapae?

 ¹³ Ua farii e rave rahi taata poro i te Basileia i te tavini i roto i te hoê tuhaa fenua reo ê a ite ai ratou i te huru maitai roa o te taata i mua i te parau mau bibilia. Ua itoitohia vetahi ê ia puai i te taime e mea fifi e mea anaanatae atu â ˈi ta ratou taviniraa. Te na ô ra te hoê amaa a te mau Ite no Iehova i Europa Apatoa e: “Mea rahi te taata no Europa Hiti o te râ o te poihâ nei i te parau mau.” Auê te oaoa ia tauturu i tera mau taata aau farii!—Isaia 55:1, 2.

¹⁴ Teie râ, ia hotu i roto i teie ohipa, e mea tia ia faaoti papu tatou e ia haapae tatou ia tatou iho. (Salamo 110:3) Ei hiˈoraa, ua faarue e rave rahi utuafare Ite Tapone i to ratou fare naho maitai i roto i te mau oire rarahi e ua haere atu i te mau vahi atea no te tauturu i te mau pǔpǔ taata no Taina mai o tei faarue i to ratou iho fenua ia taa i te Bibilia. I te pae tooa o te râ o te Hau Amui, e tere pinepine te feia poro na nia i te pereoo hoê e tae atu e piti hora i te maoro no te faatere i te mau haapiiraa bibilia e te mau taata i roto i te tuhaa fenua reo Philipino. I Norevetia, te haapii ra na hoa faaipoipo e te hoê utuafare no Afghanistan mai. E faaohipa na hoa faaipoipo Ite i te mau neneiraa Beretane e Norevetia o te buka rairai Eaha ta te Atua e titau ra ia tatou? * E taio te utuafare i te mau paratarafa na roto i te reo Peresia, te hoê reo piri roa i to ratou reo tumu ra te Dari. E aparau ratou na roto i te reo Beretane e Norevetia. Ua haamaitai-rahi-roa-hia teie feruriraa haapae e te faaau ohie ia farii te feia ěê i te parau apî maitai. *

15. E nafea tatou paatoa e nehenehe ai e apiti i te tutavaraa i te poro na roto i te reo rau?

¹⁵ E nehenehe anei outou e apiti i teie ohipa reo rau? No te aha e ore ai e haamata ma te imi i te mau reo ěê e paraparau-rahi-hia ra i roto i ta  outou tuhaa fenua? I muri iho, e nehenehe outou e rave vetahi api parau aore ra buka rairai na roto i taua mau reo ra. Ua riro aˈena te buka iti Une bonne nouvelle pour des gens de toutes nations, i matara mai i te matahiti 2004 ra, ei mauhaa i roto i te haaparareraa i te tiaturiraa o te Basileia maoti to ˈna poroi ohie e te faaitoito na roto e rave rahi reo.—A hiˈo i te tumu parau “Une bonne nouvelle pour des gens de toutes nations” i te api 32.

‘Te aroha i te taata ê’

16. E nafea te mau taeae amo hopoia e nehenehe ai e faaite i te anaanatae miimii ore i roto i te tautururaa i te mau taata e paraparau ra i te reo ê?

¹⁶ Noa ˈtu e te haapii ra tatou i te tahi atu â reo aore ra aita, e nehenehe noa tatou paatoa e tauturu i roto i te haapiiraa pae varua o te feia ěê i roto i ta tatou tuhaa fenua. Ua haapii Iehova i to ˈna nunaa ia ‘aroha i te taata ê.’ (Deuteronomi 10:18, 19) Ei hiˈoraa, i roto i te hoê oire rahi i Marite Apatoerau, e putuputu mai e pae amuiraa i roto i te hoê â Piha a te Basileia. Mai i roto e rave rahi piha, te vai ra te hoê faaohuraa tamatahiti o te mau taime putuputuraa o tei faanuu atu â i te mau putuputuraa reo Tinito no reira i te Tapati. Teie râ, eita ˈtura e rave rahi taata ěê o te ohipa ra i te mau fare tamaaraa e nehenehe e haere atu. Ua rave te mau matahiapo i roto i te tahi atu mau amuiraa ma te aroha i te mau faatanoraa ia nehenehe te mau putuputuraa reo Tinito e faatupu-oioi-aˈe-hia i te Tapati.

17. Eaha to tatou manaˈo ia faaoti vetahi i te haere e tauturu i te hoê pǔpǔ reo ê?

¹⁷ Te haapopou ra te mau tiaau î i te here i te mau taeae e tuahine aravihi e te ite o te hinaaro ra e haere e tauturu i te tahi atu mau pǔpǔ reo ê. Te ere ra paha teie mau amuiraa i te mau orometua haapii bibilia aravihi i roto i ta ratou iho amuiraa, teie râ, hoê â manaˈo to te mau tiaau e to te mau matahiapo i Lusetera e i Ikonio. Aita tera mau matahiapo i tapea ia Timoteo i te tere atu na muri ia Paulo, noa ˈtu e e tauturu maitai roa o Timoteo no ta ratou iho mau amuiraa. (Ohipa 16:1-4) Hau atu â, aita te feia o te tiaau ra i te ohipa pororaa i haaparuparuhia e te huru feruriraa, te mau tutuu, aore ra peu taa ê a te feia ěê. Te farii ra râ ratou i te mau taa-ê-raa e te imi ra i te mau ravea no te atuatu i te mau taairaa maitatai no te evanelia.—Korinetia 1, 9:22, 23.

18. Eaha te opani rahi o te ohipa i iritihia no te taatoaraa?

¹⁸ Mai tei tohuhia, te porohia ra te evanelia na roto i “te mau parau atoa o te mau fenua ra.” Te vai â ra te ravea faahiahia o te maraaraa i roto i te mau tuhaa fenua reo ěê. Ua tomo tau tausani taata poro itoito na teie “opani rahi . . . [o te aratai atu i te ohipa ra].” (Korinetia 1, 16:9; MN) E hinaarohia ˈtu â râ no te atuatu i tera mau tuhaa fenua, mai ta te tumu parau i muri nei e faaite.

[Nota i raro i te api]

E nehenehe anei outou e faataa?

• E nafea tatou e nehenehe ai e pee ia Iehova i roto i te faaiteraa i te pae tahi ore i te taata atoa?

• E nafea tatou ia hiˈo i te taata o ta tatou tuhaa fenua aita e paraparau ra i to tatou reo e tia ˈi?

• No te aha mea faufaa ˈi te pororaa i te mau taata na roto i to ratou reo tumu?

• E nafea tatou e nehenehe ai e faaite i te tapitapi i te feia ěê i rotopu ia tatou?

[Uiraa haapiiraa]

[Hohoˈa fenua/Hohoˈa i te api 23]

(Hiˈo i te papai)

Roma

KERETA

ASIA

PHERUGIA

PAMAPHULIA

PONOTO

KAPADOKIA

MESOPOTAMIA

MEDAI

PARETIA

ELAMA

ARABIA

LUBI

AIPHITI

IUDEA

Ierusalema

[Vahi pape]

Mediteranea

Miti Ereere

Miti Uteute

Ooa no Peresia

[Hohoˈa]

I te Penetekose 33 T.T., ua faaroo te mau taata no 15 tuhaa fenua mai o te Hau emepera Roma e no te tahi atu vahi, i te parau apî maitai na roto i to ratou mau reo tumu

[Hohoˈa i te api 24]

Ua farii maitai e rave rahi taata ěê i te parau mau bibilia

[Hohoˈa i te api 25]

Te hoê papai a te hoê Piha a te Basileia na roto e pae reo