Mea ora te parau a Iehova

Manaˈo faufaa o te buka o te Paraleipomeno Piti

A HAAMATA ˈI te buka bibilia o te Paraleipomeno Piti, te faatere ra o Solomona ei arii i nia ia Iseraela. E hope te buka na roto i teie mau parau a te arii Peresia o Kuro i te mau ati Iuda hopoi-ê-hia i Babulonia: “Ua poroi mai [Iehova] ia ˈu e faatia i te tahi hiero no ˈna i Ierusalema, i Iuda ra. O vai to outou i to ˈna atoa ra taata? ei ia ˈna to ˈna ra Atua o Iehova, a haere ai oia i nia ra [i Ierusalema].” (Paraleipomeno 2, 36:23) Faaotihia na te tahuˈa Ezera i 460 H.T.T., e puohu te buka i te mau tupuraa o na 500 matahiti—mai 1037 H.T.T. i 537 H.T.T.

E tauturu ta Kuro ture i te mau ati Iuda ia hoˈi i Ierusalema e ia haamau faahou i te haamoriraa a Iehova i reira. Tera râ, ua ohipa roa te rahiraa matahiti tîtîraa i Babulonia i nia ia ratou. Aita te feia hopoi-ê-hia e hoˈi ra i te fenua i ite papu i te aamu o to ratou fenua aiˈa. E pûpû te Paraleipomeno Piti na ratou i te hoê haapotoraa oraora o te mau mea i tupu i raro aˈe i te mau arii o te opu huiarii o Davida. E anaanatae atoa tatou i te faatiaraa no te mea e haamahitihiti oia i te mau haamaitairaa e noaa mai i te auraroraa i te Atua mau e te mau faahopearaa i te auraro-ore-raa ia ˈna.

E PATU TE HOÊ ARII I TE HOÊ FARE NO IEHOVA

(Paraleipomeno 2, 1:1–9:31)

E horoa Iehova na te arii Solomona i ta ˈna i hinaaro ma te aau tae—te paari e te ite—e te taoˈa rahi e te tura. E patu te arii i te hoê fare haviti no Iehova i Ierusalema, e tei roto te nunaa i te “oaoa, e te rearea o te aau.” (Paraleipomeno 2, 7:10) E “hau atura . . . o Solomona i te taoˈa e te paari i te mau arii atoa i te ao nei.”—Paraleipomeno 2, 9:22.

I muri aˈe e 40 matahiti faatereraa i nia ia Iseraela, ‘taoto atura Solomona i ǒ to ˈna ra mau metua, e mono aˈera Rehoboama ta ˈna tamaiti ia ˈna i nia i te faatereraa.’ (Paraleipomeno 2, 9:31) Aita o Ezera i faatia i to Solomona fariu-ê-raa i te haamoriraa mau. Te mau hape noa i faahitihia no nia i te arii, o to ˈna ïa hooraa mai ma te paari ore e  rave rahi puaahorofenua no Aiphiti mai e to ˈna faaipoiporaa i te tamahine a Pharao. No reira e faatia te taata papai i te aamu ma te hoê manaˈo o te patu.

Uiraa bibilia pahonohia:

2:14—No te aha te opu o te taata rimaî ra faataahia i ǒ nei i taa ê ai i tei itehia i roto i Te mau arii 1, 7:14? Te faahiti ra Te mau arii Hoê i te metua vahine o te tamaiti mai “te hoê vahine ivi, no te opu o Naphatali” i te mea e ua faaipoipohia oia i te hoê taata o tera opu. O ˈna iho râ, no te opu o Dana ïa. I muri aˈe i te poheraa o ta ˈna tane, ua faaipoipo oia i te hoê taata no Turia, e e huaai te taata rimaî ra no tera faaipoiporaa.

2:18; 8:10—Te faaite ra tera mau irava e e 3 600 e 250 te numera o te feia toroa e tavini ra ei taata faaite i te ohipa ra, area ia au i Te mau arii 1, 5:16; 9:23, ua numerahia ïa e 3 300 e 550. No te aha tera mau numera i taa ê ai? E au ra e te taa-ê-raa tei te huru ïa o te haapǔpǔ-raahia te feia toroa, aore ra feia faaitoito. Te faataa ê ra paha te Paraleipomeno Piti i na feia toroa e ere i te Iseraela e 3 600 e na feia toroa Iseraela e 250, area Te mau arii Hoê, te faataa ê ra ïa i na taata faaitoito o te faaite ra i te ohipa e 3 300 e na taata rarahi e faatere ra e tiaraa teitei to ratou e 550. Atira noa ˈtu, e 3 850 rahiraa e tavini ra ei feia faaitoito.

4:2-4—No te aha te hohoˈa o te puaatoro oni i faaohipahia ˈi i roto i te paturaa o te niu o te farii-vai faatôhia? I roto i te mau Papai, e taipe te puaatoro no te puai. (Ezekiela 1:10; Apokalupo 4:6, 7) E mea tano te maitiraa o te puaatoro ei hohoˈa no te mea e turu na 12 puaatoro oni i te “farii-vai” rahi, fatata e 30 tǎne i te teiaha. Aita te hamaniraa o te mau puaatoro oni no taua fa ra i ofati noa ˈˈe i te piti o te ture, tei opani i te hamaniraa o te mau mea no te haamoriraa.—Exodo 20:4, 5.

4:5—Eaha te faito taatoa o te pape e ô i roto i te farii-vai faatôhia? Ia î anaˈe, e toru tausani bato ïa te ô i roto ra, fatata e 66 000 litera. Te faito matauhia râ o te pape, o te piti tuhaa paha ïa i nia i te toru o to ˈna faito mau. Te faaite ra Te mau arii 1, 7:26 e: “E piti tausani bato [44 000 litera] e î ai.”

5:4, 5, 10—Eaha te taihaa no roto mai i te sekene tahito tei tuuhia i roto i te hiero a Solomona? Te taihaa noa no roto mai i te tiahapa amuiraa tahito tei tuuhia ˈtu i roto i ta Solomona hiero, o te Araka ïa. I muri aˈe i te paturaa o te hiero, ua hopoihia mai te sekene mai Gibeona mai i Ierusalema e e au ra e ua vaiihohia oia i reira.—Paraleipomeno 2, 1:3, 4.

Haapiiraa no tatou:

1:11, 12. Ua faaite ta Solomona aniraa ia Iehova e o te noaaraa te paari e te ite to te arii hinaaro mau. Oia mau, e faaite ta tatou mau pure i te Atua i te hinaaro o to tatou aau. E mea paari ia hiˈopoa tatou i te mea e vai ra i roto i ta tatou mau pure.

6:4. E mea tia ia turai te mauruuru haavare ore no to Iehova aau aroha e maitai ia haamaitai tatou ia Iehova—oia hoi, ia arue ia ˈna ma te here e te mauruuru.

6:18-21. Noa ˈtu e eita te Atua e ô i roto i te tahi noa ˈˈe fare rahi, ua riro te hiero ei pu no te haamoriraa ia Iehova. I teie mahana, e pu te mau piha a te Basileia a te mau Ite no Iehova no te haamoriraa mau i rotopu i te totaiete taata.

6:19, 22, 32. E faaroo Iehova i te pure a te taatoa—ta te arii e tae roa i ta te taata atoa o te nunaa—oia atoa ta te taata ěê e haere mai ra ia ˈna ma te haavare ore. *—Salamo 65:2.

ANAIRAA O TE MAU ARII NO TE OPU O DAVIDA

(Paraleipomeno 2, 10:1–36:23)

Ua vahihia te basileia tahoê o Iseraela na roto e piti tuhaa—te basileia apatoerau o na opu hoê ahuru e te basileia apatoa o na opu e piti, Iuda e Beniamina. E tuu te mau tahuˈa e te  mau ati Levi o Iseraela taatoa i te haapao maitai i te faufaa o te Basileia na mua ˈˈe i te here aiˈa e e turu ratou i ta Solomona tamaiti o Rehoboama. Hau rii atu i te 30 matahiti i muri aˈe i to ˈna paturaahia, e haruhia te mau faufaa o te hiero.

I rotopu i na arii 19 i muri mai ia Rehoboama, e 5 mea haapao maitai, e haamata maitai e 3 e e taiva râ ratou, e e fariu mai hoê i ta ˈna raveraa hape. E rave te toea o te mau faatere i te mea ino i te aro o Iehova. * E haamahitihitihia te mau ohipa a na arii e pae tei tuu i to ratou tiaturi i nia ia Iehova. No te mau ati Iuda tei anaanatae i te haamau-faahou-raa i ta Iehova haamoriraa i Ierusalema, e faaitoitoraa rahi mau â te mau faatiaraa a Hezekia tei faaoraora faahou i te mau ohipa i te hiero e to Iosia faanahoraa i te Pasa rahi.

Uiraa bibilia pahonohia:

13:5—Eaha te auraa o te parau ra “parau faaauhia ma te miti ra”? No to ˈna mau maitai rapaauraa, ua riro te miti ei taipe no te vai-tamau-raa e te tauiui ore. No reira, e faataa te “parau faaauhia ma te miti ra” i te hoê faaauraa papu.

14:2-5; 15:17—Ua hopoi ê anei te arii Asa i te taatoaraa o “te mau vahi teitei”? E au ra e aita. Ua hopoi ê noa paha o Asa i te mau vahi teitei tei taaihia i te haamoriraa i te mau atua hape eiaha râ te mau vahi teitei i reira te nunaa e haamori ai ia Iehova. Ua patu-faahou-hia atoa paha te mau vahi teitei i te pae hopea o te faatereraa a Asa. Na ta ˈna tamaiti Iehosaphata i hopoi ê i te reira. Oia mau, aita te mau vahi teitei i ore roa, i te roaraa atoa o ta Iehosaphata faatereraa.—Paraleipomeno 2, 17:5, 6; 20:31-33.

15:9; 34:6—Eaha na te tiaraa o te opu o Simeona no nia i te vahiraa o te basileia o Iseraela? I to Simeona fanaˈoraa ei tufaa e rave rau vahi i roto i te fenua o Iuda, i te pae teotarafia, tei rotopu te opu o Simeona i te basileia o Iuda e o Beniamina. (Iosua 19:1) I te pae faaroo e poritita râ, tei te pae ïa oia o te basileia apatoerau. (Te mau arii 1, 11:30, 33; 12:20-24) No reira, ua taiohia o Simeona i roto i te basileia o na opu hoê ahuru.

16:13, 14—Ua taninahia anei o Asa? Aita, te “auahi rahi tei ama,” e ere ïa no to Asa taninaraahia, no te amaraa râ te mau raau noˈanoˈa.—Nota i raro i te api (MN).

35:3—Maihea mai to Iosia afairaa mai i te afata moˈa i roto i te hiero? Ua hopoi-ê-hia anei te afata e te hoê o te mau arii iino aore ra ua ravehia ˈtu e Iosia ia ore te reira ia ino a tataîhia ˈi te hiero, aita te Bibilia e faahiti ra. Te faahitiraa noa a te tuatapaparaa no nia i te afata i muri aˈe i te tau o Solomona, o te taime ïa i tuu atu ai o Iosia i te reira i roto i te hiero.

Haapiiraa no tatou:

13:13-18; 14:11, 12; 32:9-23. Auê ïa haapiiraa ta tatou e nehenehe e huti mai no nia i te faufaaraa ia turui i nia ia Iehova!

16:1-5, 7; 18:1-3, 28-32; 21:4-6; 22:10-12; 28:16-22. E faahopearaa ino to te mau faaauraa e te feia ěê aore ra e te feia tiaturi ore. E mea paari ia ape tatou i te mau taairaa faufaa ore atoa e te ao.—Ioane 17:14, 16; Iakobo 4:4.

16:7-12; 26:16-21; 32:25, 26. Ua turai te teoteo i te arii Asa ia ohipa ma te ino mau i te mau matahiti hopea o to ˈna oraraa. Ua aratai te manaˈo teoteo ia Uzia i te haamouraa. Ua ohipa Hezekia ma te paari ore e te teoteo paha i to ˈna faaiteraa i ta ˈna mau vairaa taoˈa i te mau vea no Babulonia. (Isaia 39:1-7) “O te teoteo to te pohe ra na mua,” ta te Bibilia e aˈo ra, “e te aau faateitei to te hiˈa.”—Maseli 16:18.

16:9. E tauturu Iehova i te feia aau taatoa no ˈna, e e hinaaro ru oia i te faaohipa i to ˈna puai no ratou.

18:12, 13, 23, 24, 27. Mai ia Mikaia, mea titauhia ia itoito tatou i te parauraa no nia ia Iehova e ta ˈna mau opuaraa.

19:1-3. E imi Iehova i te mea maitai i roto ia  tatou i te mau taime atoa e faariri ai tatou ia ˈna.

20:1-28. E nehenehe tatou e tiaturi e e vaiiho Iehova ia itea oia e tatou a fariu ai tatou ma te haehaa ia ˈna ra no te aratai ia tatou.—Maseli 15:29.

20:17. No te “hiˈo i te ora a Iehova,” mea titauhia ia “haamau [tatou]” i te paturu i te Basileia o te Atua. Eiaha tatou e haa na roto i to tatou iho puai, mea titauhia ia “tia noa” tatou, ma te tuu i to tatou tiaturi taatoa i nia ia Iehova.

24:17-19; 25:14. Ua riro te haamoriraa idolo ei marei no Iehoasa e no ta ˈna tamaiti Amazia. I teie mahana, e nehenehe atoa te haamoriraa idolo e faahema, ia tupu iho â râ mai te huru nounou taoˈa aore ra te here aiˈa.—Kolosa 3:5; Apokalupo 13:4.

32:6, 7. E mea tia atoa ia itoito e ia puai tatou a ‘ahu ai tatou i te haana tamaˈi taatoa a te Atua’ e a aro ai tatou i te pae varua.—Ephesia 6:11-18.

33:2-9, 12, 13, 15, 16. E faaite te hoê taata i te tatarahapa mau ma te faarue i te eˈa hape e ma te tutava papu i te rave i te mea tia. I nia i te niu o te tatarahapa mau, e nehenehe atoa te taata i ohipa na ma te ino mau mai te arii Manase ra, e fanaˈo i to Iehova aroha hamani maitai.

34:1-3. Eita te mau huru tupuraa tano ore atoa o te tamarii-rii-raa e tapea ia tatou eiaha ia ite i te Atua e ia tavini ia ˈna. No roto mai paha te huru feruriraa maitai ta Iosia i fanaˈo na i to ˈna apîraa i to ˈna papa ruau o Manase tei tatarahapa. Noa ˈtu eaha te huru feruriraa maitai ta Iosia i mau, e faahopearaa maitai tei tupu i te pae hopea. Mai tera atoa no tatou.

36:15-17. Mea aumihi e e mea faaoromai o Iehova. Tera râ, e otia to to ˈna aumihi e to to ˈna faaoromai. E mea tia ia farii maitai te taata i te ohipa pororaa i te Basileia ia hinaaro ratou e ora ˈtu a haamou ai Iehova i teie faanahoraa ino.

36:17, 22, 23. E tamau noa iho â ta Iehova parau i te tupu.—Te mau arii 1, 9:7, 8; Ieremia 25:9-11.

Turaihia e te hoê buka ia ohipa

“Ua rave ihora Iosia e ua faarue i te mau mea faufau o te mau fenua no te tamarii a Iseraela,” ta te Paraleipomeno 2, 34:33 e parau ra, “e ua faaitoito atura i to Iseraela e parahi maira ia haamori, ia haamori i to ratou Atua ia Iehova.” Eaha tei turai ia Iosia ia na reira? I to te papai parau Saphana afairaa i te buka ture ite-apî-hia a Iehova i te arii Iosia, ua taio te arii i te reira ma te reo puai. Ua putapû roa o Iosia i ta ˈna i faaroo e ua turu oia ma te itoito rahi i te haamoriraa viivii ore i te roaraa o to ˈna oraraa.

E nehenehe te taioraa i ta te Atua Parau e te feruriruriraa i ta tatou e taio ra e ohipa roa i nia ia tatou. Eita anei te feruriraa i te faatiaraa o te mau arii o te opu o Davida e faaitoito ia tatou ia pee i te hiˈoraa o te feia i tuu i to ratou tiaturi i nia ia Iehova e ia ape i te haerea o tei ore i na reira? E faaitoito te Paraleipomeno Piti ia tatou ia haamori i te Atua mau anaˈe e ia vai taiva ore noa ia ˈna. E mea ora mau â ta ˈna poroi e te puai rahi.—Hebera 4:12.

[Nota i raro i te api]

[Hohoˈa i te api 18]

Ua ite anei outou no te aha e tano ai te hohoˈa o te puaatoro oni i te niu o te farii-vai faatôhia?

[Hohoˈa i te api 21]

Noa ˈtu e e mea iti ta ˈna tauturu i fanaˈo ei tamarii, ua paari Iosia ei taata taiva ore ia Iehova