Teie te taime no te haa ma te faaoti papu
Teie te taime no te haa ma te faaoti papu
“Mai te aha te maoro o tena na feaa-piti-raa?”—TE MAU ARII 1, 18:21.
1. E nafea to tatou tau e taa ê roa ˈi i to mutaa iho?
TE TIATURI ra anei oe e o Iehova te Atua mau hoê roa? Te tiaturi atoa ra anei oe e te faataa ra te mau parau tohu bibilia i to tatou tau mai te “anotau hopea” o te faanahoraa ino a Satani? (Timoteo 2, 3:1) Mai te peu e e, e farii iho â ïa oe e i roto i te mau tau atoa, i teie nei e titauhia ˈi ia haa ma te faaoti papu. I roto i te tuatapaparaa o te taata, aita roa ˈtu te taata e rave rahi roa i fifihia aˈenei mai i teie mahana.
2. Eaha tei tupu i roto i te basileia o na opu fetii 10 o Iseraela a arii ai o Ahaba?
2 I te senekele 10 H.T.T., ua titauhia ia rave te nunaa Iseraela i te hoê faaotiraa faufaa roa. O vai ta ratou e tavini? Ua paturu te arii Ahaba, tei hema i te mana o ta ˈna vahine etene ra o Iezebela, i te haamoriraa a Baala i roto i te basileia o na opu fetii 10 o Iseraela. E atua o Baala no te ruperuperaa, tei manaˈohia e na ˈna e horoa mai i te ûa e te maa hotu rahi. Eita e ore e mea rahi to Baala taata haamori tei aroha aore ra tei tipapa i mua i te hoê idolo o to ratou atua. No te turai ia Baala ia haamaitai i ta ratou mau faaapu e nǎnǎ, i rave na to ˈna feia haamori i te mau peu taatiraa e te mau taiata moˈa. I matau atoa na ratou i te otioti ia ratou iho ia tahe te toto.—Te mau arii 1, 18:28.
3. Eaha te faahopearaa o te haamoriraa a Baala i nia i te nunaa o te Atua?
3 Ua patoi te hoê toea e 7 000 Iseraela i te apiti i tera huru haamoriraa idolo, te morare ore, e te haavî uˈana. (Te mau arii 1, 19:18) Ua haapao ratou ma te taiva ore i te faufaa ta ratou i faaau i te Atua ra o Iehova, e ua hamani-ino-hia ratou no te reira. Ei hiˈoraa, ua taparahi pohe te arii vahine Iezebela e rave rahi peropheta a Iehova. (Te mau arii 1, 18:4, 13) No taua mau huru tupuraa fifi mau ra, ua rave te rahiraa o Iseraela i te tahoêraa faaroo, a tamata ˈi i te faaoaoa ia Iehova e ia Baala atoa. E ohipa apotata râ ia faarue te hoê Iseraela ia Iehova no te haamori i te hoê atua hape. Ua fafau Iehova i te haamaitai i te mau Iseraela mai te peu e e here ratou ia ˈna e e auraro i ta ˈna mau faaueraa. Ua faaara râ oia ia ratou e mai te peu e eita ratou e ‘haamori ia ˈna anaˈe ra,’ e haamouhia ïa ratou.—Deuteronomi 5:6-10, MN; 28:15, 63.
4. Ia au i ta Iesu e ta ta ˈna mau aposetolo i faaite atea, eaha te itehia i rotopu i te mau Kerisetiano, e mea nafea te reira i te tupuraa?
4 Mai tera atoa te tupuraa i roto i te Amuiraa faaroo Kerisetiano i teie tau. Te faahua parau nei te mau melo ekalesia e e Kerisetiano ratou, aita râ ta ratou mau oroa, to ratou haerea, e ta ratou mau tiaturiraa e tuati ra i te mau haapiiraa bibilia. Mai ia Iezebela, o te pǔpǔ ekalesiatiko a te Amuiraa faaroo Kerisetiano te aratai i roto i te hamani-ino-raa i te mau Ite no Iehova. Mea roa atoa to ratou aamu no nia i te tururaa i te mau tamaˈi e o ratou ïa te tumu o te poheraa atoa o te mau mirioni melo ekalesia. Te faataa ra te Bibilia i tera turu a te haapaoraa i te mau faatereraa a teie nei ao ei faaturi pae varua. (Apokalupo 18:2, 3) Hau atu â, te farii noa ˈtura te Amuiraa faaroo Kerisetiano i te faaturi, i rotopu atoa i te pǔpǔ ekalesiatiko. Ua faaite atea Iesu Mesia e ta ˈna mau aposetolo i tera ohipa apotata rahi. (Mataio 13:36-43; Ohipa 20:29, 30; Petero 2, 2:1, 2) Eaha ïa te faahopearaa no na melo hoê miria tiahapa o te Amuiraa faaroo Kerisetiano? E eaha te hopoia a te feia haamori mau o Iehova i nia i taua feia ra e te toea tei vare i te haapaoraa hape? E ite tatou i te pahonoraa maramarama ma te hiˈopoa i te mau mea maere i tupu a ‘pau roa ˈtu ai Baala i Iseraela.’—Te mau arii 2, 10:28.
Te aroha o te Atua i to ˈna nunaa orure hau
5. Mea nafea to Iehova faaiteraa i to ˈna tapitapi î i te here no to ˈna nunaa orure hau?
5 Eita te Atua ra o Iehova e au e faautua i te feia e taiva ia ˈna. Ei Metua î i te here, e hinaaro oia ia tatarahapa te feia paieti ore e ia hoˈi mai ratou ia ˈna. (Ezekiela 18:32; Petero 2, 3:9) Ei haapapuraa o te reira, ua faaohipa Iehova e rave rahi peropheta i te tau o Ahaba e o Iezebela no te faaara i to ˈNa nunaa i te mau faahopearaa o te haamoriraa a Baala. O Elia te hoê o ratou. I muri aˈe i te paˈurâ rahi, tei faaara-ê-na-hia, ua parau Elia i te arii Ahaba e haaputuputu i te mau Iseraela e te mau peropheta a Baala i nia i te mouˈa Karemela.—Te mau arii 1, 18:1, 19.
6, 7. (a) Mea nafea to Elia faaiteraa i te tumu mau i taiva ˈi Iseraela? (b) Eaha ta te mau peropheta a Baala i rave? (c) Eaha ta Elia i rave?
6 Ua tupu te putuputuraa i te vahi ‘i vavahihia ˈi’ te fata a Iehova peneiaˈe no te faaoaoa ia Iezebela. (Te mau arii 1, 18:30, MN) Tera noa râ, aita i papu i te mau Iseraela i putuputu mai o vai mau â te nehenehe e haamairi mai i te ûa hinaaro-rahi-hia, o Iehova anei aore ra o Baala. E 450 peropheta tei tia ˈtu no Baala, area Elia ra, o ˈna anaˈe ïa te peropheta i tia ˈtu no Iehova. Ma te faaite i te tumu o to ratou fifi, ua ui Elia i te nunaa: “Mai te aha te maoro o tena na feaa-piti-raa?” E ma te faaohie noa ˈtu, ua faataa ˈtu oia i te tupuraa: “O Iehova te Atua [mau] ra, a pee ia ˈna; o Baala, a pee ia ˈna.” No te turai i te mau Iseraela feaapiti ia haamori ia Iehova anaˈe ra, ua pûpû Elia i te hoê tamataraa i te Atuaraa. E piti puaatoro oni tei taparahihia ei tusia, hoê na Iehova e hoê na Baala. E tanina te Atua mau i ta ˈna tusia i te auahi. Ua ineine te tusia a te mau peropheta a Baala, e ua pii noa ˈtura ratou tau hora i te maoro: “E Baala, e faaroo mai ia matou.” A haamata ˈi râ Elia i te tâhitohito ia ratou, ua otioti ihora ratou ia ratou iho a tahe atu ai te toto, e ua pii hua ˈtura. Aita râ e pahonoraa.—Te mau arii 1, 18:21, 26-29; MN.
7 O Elia ˈtura i teie nei. Na mua, ua tataî Elia i te fata a Iehova e ua tuu i te puaatoro oni apî i tâpûpûhia i nia iho. I muri iho ua faaue oia ia niniihia e maha farii pape rahi i nia i te tusia. E toru taime i te na reiraraahia e î roa aˈera te apoo i heruhia e ati aˈe te fata i te pape. E ua pure atura Elia: “E te Atua no Aberahama, e no Isaaka, e no Iseraela, e Iehova, e faaite mai oe i teie nei mahana, o oe te Atua i Iseraela nei, e o vau to oe tavini, e no te mea, ua faauehia mai au e oe ra i rave ai au i taua mau mea atoa nei. E faaroo mai oe, e Iehova, e faaroo mai, ia ite teie nei feia e, o oe te Atua [mau] o Iehova, e faafariu hoi oe i to ratou aau.”—Te mau arii 1, 18:30-37; MN.
8. Mea nafea to te Atua pahonoraa i ta Elia pure, e eaha ta te peropheta i rave?
8 Ua pahono atu te Atua mau ma te tanina i te tusia e te fata atoa i te auahi no te raˈi mai. Ua pau atoa te pape i roto i te vahi poopoo e ati aˈe te fata i te auahi! A feruri na i te huru o te mau Iseraela. ‘Ua tipapa ihora ratou i raro te mata; ua na ô aˈera, O Iehova, oia te Atua [mau]; o Iehova, oia te Atua [mau].’ Ua haa ˈtu â Elia ma te faaoti papu, a faaue ai i te mau Iseraela e: “A rave na i te mau peropheta a Baala, eiaha roa te hoê ia ora.” Ua haapohehia ˈtura na peropheta atoa a Baala e 450 i te pae mouˈa Karemela.—Te mau arii 1, 18:38-40; MN.
9. Mea nafea te feia haamori mau i te tamata-faahou-raahia?
9 I tauâ mahana ra eita e moe, a tahi ra Iehova a haamairi mai ai i te ûa i nia i te fenua i roto e toru matahiti e te afa! (Iakobo 5:17, 18) E nehenehe outou e feruri i te paraparau atoa i rotopu i te mau Iseraela a hoˈi ai ratou i ǒ ratou; ua faatia Iehova i to ˈna Atuaraa. Aita râ te feia haamori o Baala i faaea. Ua tamau Iezebela i ta ˈna ohipa hamani-ino-raa i te mau tavini a Iehova. (Te mau arii 1, 19:1, 2; 21:11-16) Ua tamata-faahou-hia ïa te hapa ore o te nunaa o te Atua. Te haamori ra anei ratou ia Iehova anaˈe ra ia tae mai ta ˈna mahana haavaraa i nia i te feia haamori o Baala?
A haa ma te faaoti papu i teie nei
10. (a) I teie tau, eaha ta te mau Kerisetiano faatavaihia e rave ra? (b) Eaha te auraa e faaroo i te faaueraa i roto i te Apokalupo 18:4?
10 I teie tau, te rave ra te mau Kerisetiano faatavaihia i te hoê ohipa faaora mai ta Elia. Na roto i te parau e te papai, te faaara ra ratou i te taata o te mau nunaa atoa i roto e i rapaeau i te Amuiraa faaroo Kerisetiano no nia i te fifi atâta o te haapaoraa hape. Ei faahopearaa, e mirioni tei faaoti papu e tâpû i to ratou taairaa melo i roto i te haapaoraa hape. Ua pûpû ratou i to ratou ora na Iehova e ua bapetizohia ratou ei pǐpǐ na Iesu Mesia. Oia, ua faaroo ratou i te pii ru a te Atua no nia i te haapaoraa hape: “A haere ê mai na outou i rapae, e au mau taata e, ia ore outou ia riro ei rave atoa i ta ˈna ra mau hara, ia ore outou ia pohe atoa i to ˈna ra mau pohe.”—Apokalupo 18:4.
11. Eaha te titauhia no te fanaˈo i te farii maitai a Iehova?
11 E mirioni taata ê atu, mea au hoi na ratou te poroi bibilia e haapararehia ra e te mau Ite no Iehova, aitâ i papu atura eaha ta ratou e rave e tia ˈi. I te tahi taime, e haere mai vetahi o ratou i te mau putuputuraa Kerisetiano, mai te oroa o te Amuraa maa ahiahi a te Fatu aore ra i te tahi mau oreroraa parau i te hoê tairururaa mataeinaa. E faaitoito tatou ia ratou paatoa ia feruri maite i ta Elia mau parau: “Mai te aha te maoro o tena na feaa-piti-raa?” (Te mau arii 1, 18:21) Eiaha ratou e haamarirau, ia haa râ ma te faaoti papu i teie nei e tia ˈi e ia tapi ma te itoito rahi i te fa e riro ei feia haamori pûpûhia e te bapetizohia o Iehova. Ua taaihia te reira i to ratou tiaturiraa e ora e a muri noa ˈtu!—Tesalonia 2, 1:6-9.
12. Ua topa te tahi mau Kerisetiano bapetizohia i roto i teihea huru tupuraa atâta, e ia aha ratou e tia ˈi?
12 Te vahi peapea, aita vetahi mau Kerisetiano bapetizohia e ohipa tamau ra aore ra ua faaea i te ohipa i roto i ta ratou haamoriraa. (Hebera 10:23-25; 13:15, 16) Ua ere vetahi i to ratou itoito rahi no to ratou taiâ i te hamani-ino-raa, te mau tapitapi o te tahi imiraa, te mau tutavaraa ia rahi te moni, aore ra te tapiraa i te mau mea navenave miimii. Ua faaara Iesu e e riro vetahi o ta ˈna mau pǐpǐ i te maheaitu, i te hoene e i te vare i teie iho mau mea. (Mataio 10:28-33; 13:20-22; Luka 12:22-31; 21:34-36) Eiaha ratou e ‘feaapiti,’ ei auraa parau, ‘ia faaitoito râ e ia tatarahapa’ ratou na roto i te haaraa ma te faaoti papu i te haapao i ta ratou pûpûraa ia ratou i te Atua e tia ˈi.—Apokalupo 3:15-19.
Te hopea taue o te haapaoraa hape
13. A faataa na i te huru tupuraa i Iseraela a faatahinuhia ˈi Iehu ei arii.
13 Na te ohipa i tupu i nia ia Iseraela fatata 18 matahiti i muri aˈe i te faaafaroraahia te parau o te Atuaraa i nia i te mouˈa Karemela, e faataa no te aha e mea ru ai ia haa te taata ma te faaoti papu i teie nei. Ma te taue e te manaˈo-ore-hia, ua tae mai ta Iehova mahana haavaraa i nia i te haamoriraa a Baala i te roaraa o te taviniraa a Elisaia, tei mono ia Elia. O Iehorama, te tamaiti a te arii Ahaba, te arii ra i nia ia Iseraela, e te ora râ Iezebela ei metua vahine arii. Ma te maniania ore, ua tono Elisaia i ta ˈna tavini e faatahinu ia Iehu, te raatira nuu o Iseraela, ei arii apî. I taua taime ra, tei Ramota-gileada o Iehu i te pae hitia o te râ o Ioridana, te aro ra i te mau enemi o Iseraela. Tei Iezereela te arii Iehorama i te vahi papu i pihai iho ia Megido, te tiai ra ia ora to ˈna pepe tamaˈi.—Te mau arii 2, 8:29–9:4.
14, 15. Eaha te ohipa i faauehia ia Iehu e rave, e ua aha oia?
14 Teie ta Iehova i faaue ia Iehu e rave: “E na oe e rave i te utuafare o to fatu ra o Ahaba, e tahoo vau i te toto o to ˈu ra mau tavini, to te mau peropheta, e te toto o te mau tavini atoa o Iehova i te rima o Iezebela. E hope roa hoi te utuafare o Ahaba i te mou; . . . e na te urî e amu ia Iezebela i te ô o Iezereela: e ore e tanuhia.”—Te mau arii 2, 9:7-10.
15 E taata faaoti papu o Iehu. Ma te haamarirau ore, ua paiuma oia i nia i to ˈna pereoo e faahoro vitiviti atura i Iezereela. Ua taa i te hoê tiai i Iezereela i te huru faahoro a Iehu e ua faaara ˈtura i te arii Iehorama, i reira rave atura Iehorama i to ˈna pereoo e haere atura e farerei i to ˈna raatira nuu. I to raua farereiraa, ua ui Iehorama: “Tere hau to oe, e Iehu?” Ua pahono atura Iehu: “Eaha tena hau, te rahi roa ra te faaturi e te mau peu tahutahu o to metua vahine ra?” I muri iho, hou te arii Iehorama a nehenehe ai e horo, ua huti aˈera Iehu i ta ˈna fana e haapohe atura ia Iehorama i te teˈa tei haaputa i to ˈna mafatu.—Te mau arii 2, 9:20-24.
16. (a) Ua titauhia ia aha te mau eunuka a Iezebela ma te taue? (b) Mea nafea ta Iehova parau no nia ia Iezebela i te tupuraa?
16 Ma te haamarirau ore, ua horo aˈera Iehu i te oire na nia i to ˈna pereoo. Na nia mai i te haamaramarama, ua aroha ˈtu Iezebela hope i te unauna ia Iehu ma te haamǎtaˈu faatihaehae. Aita Iehu i tâuˈa ˈtu ia ˈna, ua ani râ i te turu: “O vai, o vai, tei to ˈu nei pae au?” Ua titauhia ia haa ta Iezebela mau tavini ma te faaoti papu. E piti aore ra e toru eunuka tei hiˈo atu na te haamaramarama. I reira noa, ua tamatahia to ratou hapa ore. “A huri mai na i raro nei,” ta Iehu ïa i faaue. Ua huri maira te mau eunuka ia Iezebela i raro, i reira oia i te taataahiraahia e te puaahorofenua e te pereoo o Iehu. Ua mou atura te tumu o te haamoriraa a Baala i Iseraela ma te tano. I te haereraahia ˈtu e tanu ia ˈna, ua amuhia to ˈna tino e te urî, mai tei tohuhia.—Te mau arii 2, 9:30-37.
17. Ia haapaari ta te Atua haavaraa ia Iezebela i to tatou faaroo i teihea ohipa e tupu a muri aˈe e tia ˈi?
17 Hoê â hopea riaria te tupu i nia i te vahine faaturi taipe o “Babulonia Rahi” te iˈoa. Te faahohoˈa ra te vahine faaturi i te mau haapaoraa hape o te ao a Satani, no ǒ mai hoi i te oire o Babulonia i tahito ra. I muri aˈe i te mouraa o te haapaoraa hape, e huri te Atua ra o Iehova i to ˈna ara-maite-raa i nia i te taata atoa o te tuhaa o te ao a Satani. E haamou-atoa-hia ratou, a avarihia ˈtu ai te hoê ao apî parau-tia.—Apokalupo 17:3-6; 19:19-21; 21:1-4.
18. I muri aˈe i to Iezebela poheraa, eaha tei tupu i nia i te feia haamori o Baala i Iseraela?
18 I muri aˈe i to Iezebela poheraa, aita te arii Iehu i haamarirau i te taparahi i te huaai atoa o Ahaba e te feia rarahi i turu ia ˈna. (Te mau arii 2, 10:11) Mea rahi râ te Iseraela haamori ia Baala tei toe atu i te fenua. No nia ia ratou, ua haa Iehu ma te faaoti papu no te faaite i to ˈna “itoito ia Iehova.” (Te mau arii 2, 10:16) Ma te haavare haamori ia Baala, ua faanaho Iehu i te hoê oroa rahi i te hiero o Baala ta Ahaba i patu i Samaria. Ua haere pauroa mai te feia haamori ia Baala i Iseraela i te oroa. Tapeahia i roto i te hiero, ua taparahi-pauroa-hia ratou e te mau taata o Iehu. Te faaoti ra te Bibilia i te faatiaraa ma te na ô e: “Pau roa aˈera Baala i Iseraela ia Iehu.”—Te mau arii 2, 10:18-28.
19. Eaha te tiaturiraa faahiahia e tiai maira i te “feia rahi roa” o te haamori ra ia Iehova ma te taiva ore?
19 Ua mou roa te haamoriraa a Baala i Iseraela. Papu maitai, e mou taue te mau haapaoraa hape a teie nei ao ma te hitimahuta. Tei to vai pae au outou i te roaraa o taua mahana haavaraa rahi ra? A haa ma te faaoti papu i teie nei, e e nehenehe outou e fanaˈo i te taiohia i rotopu i te “feia rahi roa” o te ora ˈtu i “te ati rahi.” I reira ïa outou e nehenehe ai e hiˈo i muri ma te oaoa, e e arue outou i te Atua no te haavaraa i te “faaturi rahi ra, o tei haaviivii i to te ao nei i tana faaturiraa.” Ma te tahoê i te tahi atu feia haamori mau, e farii outou i te mau parau oaoa mau himenehia e te mau reo o te raˈi: “Haleluia: tei te Fatu ra Iehova tei te Atua Puai hope ra te hau.”—Apokalupo 7:9, 10, 14; 19:1, 2, 6.
Uiraa ei feruriruriraa
• Mea nafea o Iseraela no tahito ra i te hararaa i te haamoriraa a Baala?
• Eaha te ohipa apotata rahi ta te Bibilia i faaite atea, e mea nafea taua parau tohu ra i te tupuraa?
• Mea nafea o Iehu i te faaore-roa-raa i te haamoriraa a Baala?
• Ia aha tatou e tia ˈi no te ora ˈtu i ta te Atua mahana haavaraa?
[Uiraa haapiiraa]
[Hohoˈa fenua i te api 13]
(Hiˈo i te papai)
Soko
Apheka
Helekata
Iokeneama
Megido
Taanaka
Dotana
SAMARIA
Ene-dora
Sunema
Ophira
Iezereela
Ibeleama (Gata-rimona)
Tireza
Bete-semesa
Bete-seana (Bete-sana)
Iabesa-gileada?
Abele-mehola
Bete-arebela
Ramota-gileada
[Mouˈa]
Mouˈa Karemela
Mouˈa Tabora
More
Mouˈa Gilaboa
[Vahi pape]
Miti Mediteranea
Miti o Galilea
[Anavai]
Ioridana
[Pihaaraa pape e apoo pape]
Apoo pape o Haroda
[Faaiteraa i te tumu]
Based on maps copyrighted by Pictorial Archive (Near Eastern History) Est. and Survey of Israel
[Hohoˈa i te api 14]
E tuhaa faufaa roa te apiti-tamau-raa i te pororaa i te Basileia e te haere-tamau-raa i te mau putuputuraa Kerisetiano o te haamoriraa mau
[Hohoˈa i te api 16]
Mai ia Iehu, e titauhia ia haa te feia atoa o te hinaaro e ora ˈtu i ta Iehova mahana ma te faaoti papu