E hinaaro anei tatou i te hoê Mesia?

E MEA maitai paha ia ui outou i tera uiraa, “E hinaaro anei tatou i te hoê Mesia?” Oia, e mea tano ia uiui mai te peu e e ohipa mau te hoê Mesia i nia ia outou.

E haapapu mai te feia e faatura outou i to ratou manaˈo e e mea maramarama e mea papu maitai te pahonoraa: E hinaaro roa outou i te hoê Mesia, mai ia vetahi ê atoa. Ua papai te hoê taata îite i roto i te ture ati Iuda i te senekele matamua no nia i te Mesia: “Te mau mea atoa a te Atua i parau mai, e oia anaˈe ïa i roto ia ˈna.” Ua haamahitihiti ïa oia i te tuhaa faufaa ta te Mesia e rave i roto i te opuaraa a to tatou Atua Poiete, e haamaitai i te mau nunaa atoa o te fenua. (Korinetia 2, 1:20) No te faufaa rahi mau o te ohipa a te Mesia, ua riro to ˈna taeraa mai e oraraa i te fenua nei ei fa no te mau parau tohu bibilia. I roto i te hoê buka aratai i faaohipahia e te mau mirioni taata i te roaraa o na matahiti e 70 i mairi, ua na ô Henry Halley e: “Ua papaihia te Faufaa Tahito no te faatupu i te hoê tiairaa i, e no te faaineine i te eˈa no, te haereraa mai o [te Mesia].” Mea titauhia anei râ to ˈna haereraa mai? No te aha e mea tia ˈi ia anaanatae outou?

“Tei faatavaihia” te auraa mau o “Mesia.” E mea titauhia ia haere mai Oia, ta te Encyclopædia Britannica, neneiraa 1970, e faahiti ra mai “te taraehara rahi roa ˈˈe,” no te mau ohipa faatura ore a na taata matamua e piti, Adamu raua Eva. E mea tia roa raua i to raua poieteraahia, e tiaturiraa faahiahia to raua e ora e a muri noa ˈtu i roto i te Paradaiso, ua ere râ raua i tera tiaturiraa. Ua parau te hoê melahi orure hau, tei matauhia i muri aˈe mai te Diabolo ra o Satani, e e mea etaeta roa to raua Atua Poiete e e maitai-aˈe-hia raua ia faaoti raua no raua iho eaha te mea maitai e eaha te mea ino.—Genese 3:1-5.

Ua haavarehia Eva e ua tiaturi oia i tera parau haavare. Ua turu Adamu, e au ra o tei haafaufaa aˈe i to ˈna taairaa e ta ˈna vahine i te taiva ore i te Atua, i taua orureraa hau ra faatupuhia e te Diabolo. (Genese 3:6; Timoteo 1, 2:14) Na roto i ta raua mau haaraa, ua haapae raua eiaha noa i to raua iho tiaturiraa o te ora mure ore i roto i te hoê vahi paradaiso. Ua tutuu atoa mai râ raua i te hara e to ˈna faahopearaa, te pohe, na te huaai ta raua e fanau mai.—Roma 5:12.

Ua faanaho oioi to tatou Atua Poiete ra o Iehova i te ravea no te faaore i te mau faahopearaa iino o te nanairaa ohipa faatupuhia e te orureraa hau. E faatupu oia i te hoê faiiteraa na roto i te hoê ravea o te riro mai i muri aˈe ei faaueraa tumu haamanahia i roto i te Ture a Mose—te aifaitoraa. (Deuteronomi 19:21; Ioane 1, 3:8) E mea tia ia faaohipahia taua faaueraa tumu haamanahia ra ia nehenehe te huaai ati atoa o Adamu raua Eva e fanaˈo i te ora mure ore i nia i te fenua paradaiso, mai ta te Atua Poiete i opua no te fetii taata. E aratai te reira ia tatou i te Mesia.

A faautua ˈi oia i te Diabolo, ua parau te Atua ra o Iehova i roto i te parau tohu bibilia matamua e: “E tuu hoi au i te au ore e riri ai ra ia orua o te vahine, e to [huero], e to ˈna ra [huero]; na ˈna e haaparuparu i to afii, e na oe e haaparuparu i to ˈna poro avae.” (Genese 3:15; MN) Ua parau te hoê aivanaa Bibilia e “e haamata te aamu o te mau parau fafau no nia i te Mesia mai ta te mau Papai e faaite ra, na roto i [teie] parau.” Ua parau te tahi atu e o te Mesia ta te Atua mauhaa e “faaore roa ˈi i te taatoaraa o te ati o te hara a na taata matamua,” ma te hopoi atoa mai i te mau haamaitairaa na te huitaata.—Hebera 2:14, 15.