Te amuiraa i to te raˈi mau mea e to te fenua nei
Te amuiraa i to te raˈi mau mea e to te fenua nei
“To ˈna ra manaˈo hamani maitai . . . , e amui [faahou] . . . i te mau mea atoa i te Mesia ra, to te raˈi, e to te [fenua] nei.”—EPHESIA 1:9, 10; MN.
1. Eaha to Iehova “manaˈo hamani maitai” no te raˈi e no te fenua?
HAU I TE AO TAATOA! Tera te opuaraa hanahana a Iehova, “te Atua hau.” (Hebera 13:20) Ua faauru oia i te aposetolo Paulo no te papai e to ˈNa “manaˈo hamani maitai,” e ‘amui [faahou] ïa i te mau mea atoa i te Mesia ra, to te raˈi, e to te [fenua] nei.’ (Ephesia 1:9, 10; MN) Eaha mau â ta te ihoparau i hurihia ei “amui faahou” i roto i teie irava e faaite ra? Te na ô ra te aivanaa bibilia o John Lightfoot e: “Te faataa ra tera parau i te au-maite-raa hope roa o te ao taatoa, aita faahou e tuhaa ê roa e te tuati ore, e niuhia râ te mau tuhaa atoa i nia i te Mesia e e tahoêhia ia ˈna ra. E ore roa te hara e te pohe, te oto e te manuïa ore e te mauiui.”
‘To te raˈi mau mea’
2. O vai ma ‘to te raˈi mau mea’ e mea tia ia amuihia?
2 Ua haapoto te aposetolo Petero i te tiaturiraa faahiahia o te mau Kerisetiano mau ia ˈna i papai e: “Te tatari nei . . . tatou i te raˈi apî e te fenua apî ta ˈna i parau maira, i te vai-mau-raa o te parau-tia ra.” (Petero 2, 3:13) “Te raˈi apî” i parauhia mai i ǒ nei, o te faatereraa apî ïa, te Basileia Mesia. E amuihia ‘to te raˈi mau mea’ ta Paulo i faahiti i roto i ta ˈna rata i to Ephesia “i te Mesia ra.” O ratou te pǔpǔ taata iti i maitihia no te arii e te Mesia i nia i te raˈi. (Petero 1, 1:3, 4) Mea “tauihia” teie 144 000 Kerisetiano faatavaihia “no roto i teie nei ao,” mea “tauihia . . . no roto i te taata nei,” no te riro ei feia aiˈa apiti e te Mesia i roto i to ˈna Basileia i te raˈi.—Apokalupo 5:9, 10; 14:3, 4; Korinetia 2, 1:21; Ephesia 1:11; 3:6.
3. No te aha e tia ˈi ia parau e ‘te parahi ra’ te feia faatavaihia “i te raˈi,” a vai noâ ˈi ratou i te fenua nei?
3 Mea fanauhia, aore fanau-faahou-hia, te mau Kerisetiano faatavaihia i te varua moˈa no te riro ei tamarii varua na Iehova. (Ioane 1:12, 13; 3:5-7) Faatavaihia e Iehova ei “tamarii” na ˈna, e riro ratou ei taeae no Iesu. (Roma 8:15; Ephesia 1:5) No reira, a vai noâ ˈi ratou i te fenua nei, te parauhia ra e ua ‘faatiahia ratou atoa i nia e ua haaparahihia i te [raˈi] i te Mesia ra ia Iesu.’ (Ephesia 1:3; 2:6; MN) Te mau nei ratou i teie tiaraa varua teitei no te mea ua ‘tapaohia ratou i te [varua moˈa] i parauhia maira, o te faaite ïa i ta ratou tufaa’ i vaiihohia no ratou i nia i te raˈi. (Ephesia 1:13, 14; MN; Kolosa 1:5) O teie mau taata ïa ‘to te raˈi mau mea,’ e mea tia ia amuihia ia tia te numera i haapao-atea-hia e Iehova.
E haamata te amuiraa
4. Inafea e mea nafea te haamataraa te amuiraa o ‘to te raˈi mau mea’?
4 Ia au i ta Iehova “tiaauraa,” aore ra huru haapaoraa i te mau mea, e mea tia ia haamata te amuiraa o ‘to te raˈi mau mea’ “i te hoperaa mau o te mau tau ra.” (Ephesia 1:10; MN) Ua tae mai taua tau faataahia ra i te Penetekose 33 T.T. I taua mahana ra, ua niniihia te varua moˈa i nia i te mau aposetolo e te hoê pǔpǔ pǐpǐ, tane e vahine. (Ohipa 1:13-15; 2:1-4; MN) Te haapapu ra te reira e ua haamata te faufaa apî i te mana, a fa mai ai te amuiraa Kerisetiano e te nunaa apî o te Iseraela pae varua, ‘te Iseraela o te Atua.’—Galatia 6:16; Hebera 9:15; 12:23, 24.
5. No te aha Iehova i poiete ai i te hoê “nunaa” apî no te mono i te Iseraela pae tino?
5 Aita te faufaa o te Ture tei faaauhia i te Iseraela pae tino i faatupu i ‘te hoê basileia tahuˈa e te hoê nunaa moˈa’ o te ohipa e a muri noa ˈtu i nia i te raˈi. (Exodo 19:5, 6) Teie ta Iesu i parau i te mau aratai haapaoraa ati Iuda: “E hopoi-ê-hia te basileia o te Atua nei ia outou, e e tuuhia ˈtu i te nunaa e faahotu mai i te huero ra.” (Mataio 21:43) Taua nunaa ra, te Iseraela pae varua, o te mau Kerisetiano faatavaihia ïa tei faaôhia i roto i te faufaa apî. Ua papai te aposetolo Petero ia ratou e: “E ui maitihia . . . outou, e autahuˈaraa arii, e nunaa moˈa, e feia hoohia; ia faaite hua outou i to ˈna maitai, tei parau ia outou i to roto i te pouri, ia tae i to ˈna ra maramarama umerehia. O outou, e ere i te taata no te Atua i mutaa ihora, i teie nei râ, e taata ïa no te Atua.” (Petero 1, 2:9, 10) E ere faahou te Iseraela pae tino i te nunaa o te faufaa o Iehova. (Hebera 8:7-13) Mai ta Iesu i tohu, ua hopoi-ê-hia ia ratou te fanaˈoraa taa ê e riro ei melo o te Basileia Mesia e ua horoahia ˈtu i na melo 144 000 o te Iseraela pae varua.—Apokalupo 7:4-8.
Ua faaôhia i roto i te faufaa no te Basileia
6, 7. Eaha te faufaa taa ê ta Iesu i faaau i to ˈna mau taeae faatavaihia i te varua, e eaha te auraa o te reira no ratou?
6 I te po a haamau ai Iesu i te Oroa haamanaˈoraa i to ˈna poheraa, ua parau oia i ta ˈna mau aposetolo haapao maitai e: “O outou te feia e tia i pihai iho ia ˈu i tau mau atiraa nei. [E faaau vau i te hoê faufaa ia outou, mai ta to ˈu Metua i faaau i te hoê faufaa ia ˈu, no te hoê basileia]; ia amu atoa outou e ia inu hoi i ta ˈu ra amuraa maa i to ˈu ra basileia, e ia parahi i nia i te terono i te haavaraa i na opu tino ahuru ma piti o Iseraela ra.” (Luka 22:28-30; MN) Te faahiti ra Iesu i ǒ nei i te hoê faufaa taa ê ta ˈna i faaau i to ˈna na taeae faatavaihia i te varua 144 000, o te ‘mau papu e tae noa ˈtu i te pohe,’ a ‘riro atu ai te re’ ia ratou.—Apokalupo 2:10; 3:21.
7 Te haapae nei te feia o teie pǔpǔ iti i te mau tiaturiraa atoa o te ora mure ore i te fenua nei ei taata tino iˈo e te toto. E arii ratou e te Mesia i nia i te raˈi, e parahi hoi ratou i nia i te mau terono no te haava i te huitaata. (Apokalupo 20:4, 6) E hiˈopoa mai tatou i teie nei i te tahi atu mau irava no nia noa i teie mau taata faatavaihia e o te faaite mai no te aha te mau “mamoe ê atu” e ore ai e rave i na taoˈa taipe o te Oroa haamanaˈoraa.—Ioane 10:16.
8. Eaha ta te feia faatavaihia e faaite ra ma te amu i te pane? (A hiˈo i te tumu parau tarenihia.)
8 E apiti te feia faatavaihia i te mau ati o te Mesia e ua ineine ratou i te faaau atu i to ˈna ra pohe. Ua parau Paulo, melo o taua pǔpǔ ra, e ua ineine oia i te rave i te mau haapaeraa atoa ia ‘noaa ia ˈna te Mesia . . . ia ite hoi oia ia ˈna, e te puai o to ˈna tia-faahou-raa, e te apiti-atoa-raa ˈtu i to ˈna mau ati.’ Oia, ua ineine Paulo i te faaau atu ia ˈna iho “i to ˈna ra pohe.” (Philipi 3:8, 10) Mea rahi te Kerisetiano faatavaihia tei faaruru i roto i to ratou tino iˈo i ‘te hopoi-haere-raahia Iesu i te pohe.’—Korinetia 2, 4:10.
9. Teihea tino tei faahohoˈahia e te pane o te Oroa haamanaˈoraa?
9 Ia ˈna i haamau i te Amuraa maa ahiahi a te Fatu, ua parau Iesu e: “O tau tino teie.” (Mareko 14:22) Te faahiti ra oia i to ˈna tino iˈo tei fatata i te pǎpǎihia e te haamaniihia te toto. E taipe tano te pane hopue ore o taua tino ra. No te aha? No te mea i roto i te Bibilia, e nehenehe te hopue e faataa i te hara aore ra te ino. (Mataio 16:4, 11, 12; Korinetia 1, 5:6-8) Mea tia roa Iesu, e mea hara ore to ˈna tino taata. E pûpû oia i taua tino tia roa ra ei tusia taraehara. (Hebera 7:26; Ioane 1, 2:2) O te mau Kerisetiano haapao maitai atoa, o te tiaturi ra anei e ora i nia i te raˈi aore ra e ora e a muri noa ˈtu i nia i te hoê fenua paradaiso, te faufaahia i te reira.—Ioane 6:51.
10. E nafea te feia o te inu i te uaina o te Oroa haamanaˈoraa ‘e amui atoa ˈi i te toto o te Mesia’?
10 No nia i te uaina ta te mau Kerisetiano faatavaihia e inu i te Oroa haamanaˈoraa, ua papai Paulo e: “Te auˈa no te maitai ta tatou e haamaitai nei, e ere anei i te amui-atoa-raa i te toto o te Mesia ra?” (Korinetia 1, 10:16) E nafea te feia o te inu i te uaina ‘e amui atoa ˈi i te toto o te Mesia’? Eita iho â ïa ratou e amui atoa ˈtu ma te horoa i te tusia taraehara, i te mea e e hinaaro ratou iho i te taraehara. Na roto i to ratou faaroo i te mana taraehara o te toto o te Mesia e faaorehia ˈi ta ratou mau hara e e tiahia ˈi ratou no te ora i nia i te raˈi. (Roma 5:8, 9; Tito 3:4-7) Maoti te faufaa o te toto i manii o te Mesia i “moˈa ˈi,” i faataahia ˈi, i tamâhia ˈi te hara a na feia aiˈa apiti 144 000 e te Mesia, no te riro ei “feia moˈa.” (Hebera 10:29; Daniela 7:18, 27; Ephesia 2:19) Oia mau, maoti to ˈna toto i manii i “hoo” ai te Mesia i te ‘taata no te Atua no roto i te mau opu atoa, e te mau reo atoa, e te mau nunaa atoa e te mau fenua atoa; e i faariro ai ia ratou ei hui arii, e ei tahuˈa na to tatou Atua, e e riro ia ratou te hau i teie nei ao.’—Apokalupo 5:9, 10.
11. Eaha ta te feia faatavaihia e faaite ra ma te inu i te uaina o te Oroa haamanaˈoraa?
11 I to Iesu avariraa i te Oroa haamanaˈoraa i to ˈna poheraa, ua tuu atu oia i te auˈa uaina i ta ˈna mau aposetolo haapao maitai ra e ua na ô atu e: “A inu outou atoa; o to ˈu ïa toto, e toto no te faufaa apî, i haamaniihia no te taata e rave rahi ia matara te hara.” (Mataio 26:27, 28) Mai te toto puaatoro e te toto puaaniho i haamana i te faufaa o te Ture i rotopu i te Atua e te nunaa Iseraela, ua haamana te toto o Iesu i te faufaa apî ta Iehova e faaau i te Iseraela pae varua, mai te Penetekose 33 T.T. atu. (Exodo 24:5-8; Luka 22:20; Hebera 9:14, 15) Ma te inu i te uaina e faataipe ra i “te toto o te faufaa,” te faaite ra te feia faatavaihia e ua faaôhia ratou i roto i te faufaa apî e te fanaˈo ra ratou i te mau maitai o te reira.
12. E nafea te feia faatavaihia e bapetizohia ˈi i roto i te pohe o te Mesia?
12 Te haamanaˈo-atoa-hia ra te tahi atu mea i te feia faatavaihia. Ua parau Iesu i ta ˈna mau pǐpǐ haapao maitai e: “E inu mau â [outou] i te auˈa ta ˈu e fatata i te inu nei, e e bapetizohia [outou] i te bapetizo e bapetizohia ˈi au nei.” (Mareko 10:38, 39) I muri aˈe, ua faahiti te aposetolo Paulo i te ‘bapetizoraa’ o te mau Kerisetiano “i roto i to [te Mesia] ra pohe.” (Roma 6:3) Te ora nei te feia faatavaihia i te hoê oraraa haapae. E pohe tusia to ratou, oia hoi te haapae ra ratou i te mau tiaturiraa atoa o te ora mure ore i te fenua nei. E hope te bapetizoraa o tera mau Kerisetiano faatavaihia i roto i te pohe o te Mesia i muri aˈe i to ratou poheraa ma te haapao maitai, e faatiahia mai hoi ratou ei varua no te arii i roto i te “basileia” e te Mesia i te raˈi.—Timoteo 2, 2:10-12; Roma 6:5; Korinetia 1, 15:42-44, 50.
Te raveraa i na taoˈa taipe
13. No te aha te feia e tiaturi ra e ora i te fenua nei e ore ai e rave i na taoˈa taipe o te Oroa haamanaˈoraa, no te aha râ ratou e haere ai i te Oroa haamanaˈoraa?
13 I te mea e ua taaihia te raveraa i te pane e te uaina i te Oroa haamanaˈoraa i teie mau mea atoa, papu maitai e eita e tano ia na reira atoa te feia e tiaturi ra e ora i te fenua nei. Te haroaroa ra teie feia e e ere ratou i te mau melo faatavaihia o te tino o te Mesia, e aita atoa ratou i roto i te faufaa apî ta Iehova i faaau i te feia e faatere e o Iesu Mesia. I te mea e te faahohoˈa ra “te auˈa” i te faufaa apî, o te feia noa ïa i roto i te faufaa apî te rave i na taoˈa taipe. Aita te feia e tiai ru ra i te ora mure ore ei taata tia roa i te fenua nei i raro aˈe i te faatereraa a te Basileia, i bapetizohia i roto i te pohe o Iesu, aita atoa i parauhia mai e arii e o ˈna i nia i te raˈi. Mai te peu e e rave ratou i na taoˈa taipe, te vai ra ïa te tahi mea tano ore no nia ia ratou. No reira ïa ratou e ore ai e rave i te reira, e haere noa râ ratou i te Oroa haamanaˈoraa ei feia mataitai faatura. Te mauruuru ra ratou no te mau mea atoa ta Iehova i rave no ratou na roto i ta ˈna Tamaiti, oia atoa te faaoreraa hara maoti te toto i manii o te Mesia.
14. E nafea te feia faatavaihia e faaitoitohia ˈi i te pae varua a rave ai ratou i te pane e te uaina?
14 Ua fatata te oti te tapaoraa hopea o te pǔpǔ Kerisetiano iti i parauhia mai e arii e te Mesia i nia i te raˈi. E tae roa ˈtu i te hopea o to ratou oraraa haapae i te fenua nei, te faaitoitohia ra te feia faatavaihia i te pae varua a rave ai ratou i na taoˈa taipe o te Oroa haamanaˈoraa. Te vai ra te hoê taairaa tahoê i rotopu ia ratou e to ratou mau taeae e tuahine, melo o te tino o te Mesia. Na roto i te raveraa i te pane e te uaina taipe e haamanaˈo ai ratou i ta ratou hopoia e tapea i to ratou haapao maitai e tae noa ˈtu i te pohe.—Petero 2, 1:10, 11.
Te amuiraa o ‘to te fenua nei mau mea’
15. O vai ma tei amuihia ˈtu i te mau Kerisetiano faatavaihia?
15 Mai te ropu o te mau matahiti 1930 mai â, e rave rahi noa ˈtu â “mamoe ê atu,” e ere no te “nǎnǎ iti” e o te tiaturi nei râ e ora e a muri noa ˈtu i te fenua nei, tei apiti atu i te feia faatavaihia. (Ioane 10:16; Luka 12:32; Zekaria 8:23) Ua riro ratou ei hoa taiva ore o te mau taeae o te Mesia, ma te horoa i te tauturu faufaa i roto i te pororaa i “te evanelia o te basileia” ia ite te mau fenua atoa. (Mataio 24:14; 25:40) Ma te na reira, e nehenehe ratou e haava-maitai-hia e te Mesia ei “mamoe” na ˈna tei tuuhia i to ˈna “rima atau” farii maitai, ia haere mai oia e haava i te mau fenua. (Mataio 25:33-36, 46) Maoti te faaroo i te toto o te Mesia e riro ai ratou ei “feia rahi roa” o te ora ˈtu i “te ati rahi.”—Apokalupo 7:9-14.
16. O vai ma atoa ‘to te fenua nei mau mea,’ e e nafea ratou paatoa e nehenehe ai e riro ei “tamarii a te Atua”?
16 Ia oti te tapaoraa o na 144 000 e tuuhia ˈi na “mataˈi” o te haamouraa i nia i ta Satani faanahoraa ino o te mau mea i te fenua nei. (Apokalupo 7:1-4) I te roaraa o te Faatereraa tausani matahiti a te Mesia e a to ˈna mau apiti arii e tahuˈa, e amuihia ˈtu i te feia rahi roa ehia rahiraa taata i faatiahia mai. (Apokalupo 20:12, 13) E nehenehe teie mau taata e riro ei tino huiraatira tamau i te fenua nei no te Arii, te Mesia ra o Iesu. Ia hope te Faatereraa tausani matahiti, e û teie ‘mau mea atoa o te fenua’ i te hoê tamataraa hopea. Te feia o te tapea i to ratou haapao maitai, e faatavaihia ïa ei “tamarii a te Atua” i te fenua nei.—Ephesia 1:10; Roma 8:21; Apokalupo 20:7, 8.
17. E nafea ta Iehova opuaraa e tupu ai?
17 No reira, maoti ta ˈna “tiaauraa,” aore ra huru haapaoraa i te mau mea, hope i te paari e faatupu ai Iehova i ta ˈna opuaraa “e amui faahou . . . i te mau mea atoa i te Mesia ra, to te raˈi, e to te fenua nei.” E amuihia te mau mea ora maramarama atoa i te raˈi e i te fenua nei i roto i te hau i te ao taatoa, a auraro ai ratou ma te oaoa i te faatereraa parau-tia a Iehova, te Atua rahi o te faatupu i ta ˈna mau opuaraa.
18. E nafea te feia faatavaihia e to ratou mau hoa atoa e faufaahia ˈi i te haereraa i te Oroa haamanaˈoraa?
18 E puai mau â te faaroo o te pǔpǔ iti o te feia faatavaihia e to ratou mau mirioni hoa o te mau mamoe ê atu ia ruru ratou i te 12 no Eperera 2006! E faatupu ratou i te Oroa haamanaˈoraa i te poheraa o te Mesia, mai ta Iesu i faaue: “E na reira outou ei manaˈoraa ia ˈu.” (Luka 22:19) E mea maitai ia haamanaˈo te feia atoa e tae mai i ta Iehova i rave no ratou na roto i ta ˈna Tamaiti here, te Mesia ra o Iesu.
Ei haamanaˈoraa
• Eaha ta Iehova opuaraa no te mau mea o te raˈi e to te fenua nei?
• O vai ma ‘to te raˈi mau mea,’ e mea nafea ratou i te amuiraahia?
• O vai ma ‘to te fenua nei mau mea,’ e eaha to ratou tiaturiraa?
[Uiraa haapiiraa]
[Tumu parau tarenihia i te api 13]
“Te tino o te Mesia”
I roto i te Korinetia 1, 10:16, 17, a aparau ai oia i te faufaaraa taa maitai o te pane no te mau taeae faatavaihia i te varua o te Mesia, ua faahiti Paulo i “te tino” i roto i te hoê auraa taa ê. Teie ta ˈna i parau: “Te pane ta tatou e ofene nei, e ere anei i te amuiraa i te tino o te Mesia ra? No te mea hoê â pane, tatou atoa e rave rahi nei hoê â ïa tino; te amu atoa nei hoi tatou i taua pane hoê ra.” Ia amu te mau Kerisetiano faatavaihia i te pane o te Oroa haamanaˈoraa, te faaite ra ïa ratou i to ratou auhoêraa i roto i te amuiraa o te feia faatavaihia, e au i te hoê tino o te Mesia te Upoo.—Mataio 23:10; Korinetia 1, 12:12, 13, 18.
[Hohoˈa i te api 13]
No te aha o te feia faatavaihia noa te rave i te pane e te uaina?
[Hohoˈa i te api 15]
Maoti ta Iehova tiaauraa e tahoêhia ˈi te mau mea ora atoa i te raˈi e i te fenua nei