Te mau melo apî o te Tino aratai

I TE poipoi Mahana toru 24 no Atete 2005, ua faaroo na utuafare o te mau Betela no te Hau Amui e no Kanada, tei taaihia na roto i te video, i te hoê parau faaite oaoa. I te 1 no Tetepa 2005, e piti melo apî—o Geoffrey Jackson e o Anthony Morris III—tei amui atu i te Tino aratai a te mau Ite no Iehova.

Ua haamata o Taeae Jackson i te taviniraa pionie i Fepuare 1971 i Tasmanie, te motu no Auteralia. I Tiunu 1974, ua faaipoipo oia ia Jeanette (Jenny). I muri rii noa ˈˈe, ua maitihia raua no te tavini ei pionie taa ê. Mai 1979 e tae atu i 2003, ua tavini raua ei mitionare i Tuvalu, Hamoa, e Fiti—e motu no Patitifa Apatoa. I tera mau motu, ua tauturu rahi atoa o Taeae e Tuahine Jackson i te ohipa huriraa i te mau buka bibilia. Ma te haamata i 1992, ua tavini o Taeae Jackson i roto i te Tomite amaa i Hamoa, e mai 1996 atu, i te Tomite amaa i Fiti. I Eperera 2003, ua riro mai o ˈna e o Jenny ei melo no te utuafare o te Betela no te Hau Amui e ua haamata i te ohipa i roto i te Tuhaa huriraa. I muri rii noa ˈˈe, ua tauturu o Taeae Jackson i te Tomite haapiiraa a te Tino aratai.

Ua ô o Taeae Morris i roto i te taviniraa pionie i 1971 i te Hau Amui. I Titema o tera matahiti, ua faaipoipo oia ia Susan, e ua tamau raua i roto i te taviniraa pionie fatata e maha matahiti e tae roa ˈtu i te fanauraa o ta raua tamaiti matamua, o Jesse. E fatata 20 avaˈe i muri aˈe, ua noaa ta raua te tahi atu tamaiti, o Paul. Ua ô faahou o Taeae Morris i roto i te taviniraa taime taatoa i 1979 ei pionie tamau. Ua amui atu ta ˈna vahine ia ˈna i to te mau tamaroa ôraa i te haapiiraa. Ua tavini te utuafare i te mau vahi e mea hinaaro-rahi-hia te tauturu i Rhode Island e i Caroline Apatoerau, i te Hau Amui. I Caroline Apatoerau, ua tavini o Taeae Morris ei tiaau haaati mono, e ua rave te mau tamaroa i te taviniraa pionie tamau. Ua titau-manihini-hia o Jesse raua o Paul i te amaa no te Hau Amui i te 19raa o to raua matahiti. I te reira taime, ua haamata o Taeae Morris i te ohipa haaati. E, i 2002 ua titau-manihini-hia raua Susan i te Betela, no te haamata i ta raua ohipa apî i te 1 no Atete. Ua ohipa o Taeae Morris i roto i te Tuhaa taviniraa i Patterson e i muri aˈe, ei tauturu i roto i te Tomite taviniraa a te Tino aratai.

Hau atu i teie na melo apî e piti, teie te mau taeae o te Tino aratai: C. Barber; J. Barr; S. Herd; M. Lett; G. Lösch; T. Jaracz; G. Pierce; A. Schroeder; D. Splane; e D. Sydlik. E Kerisetiano faatavaihia anaˈe te mau melo o te Tino aratai.