Ravea faufaa roa no te tauaparau e to oe hoa faaipoipo

‘UA HAPE au i te faahitiraa i tera parau.’ ‘Aita vau i faataa maitai atu.’ Mai tera atoa anei to oe manaˈo i muri aˈe i to oe tamataraa i te tauaparau e to oe hoa faaipoipo? E aravihi te tauaparauraa e titauhia ra ia haamaitaihia. Mai no te tahi atu aravihi, e au ra e mea huru ohie no vetahi ia faatupu i te reira, area râ no te tahi atu, e ohipa iti rahi ïa. Noa ˈtu râ e tei te piti o te pǔpǔ oe, e nehenehe oe e haapii i te horoa i to oe mau manaˈo ma te au, i te tauaparau ma te manuïa.

I te tahi taime, e ohipa te taˈere i nia i te huru o te taata i nia i to ratou hoa faaipoipo. ‘No te faaite e tera te tane mau,’ ua haapiihia na paha te tane, ‘eiaha oe e paraparau rahi roa.’ E nehenehe te mau tane paraparau e hiˈo-ino-hia mai te hoê taata haapao ore. Parau mau, te na ô ra te Bibilia e: “Ia ru te taata atoa i te faaroo, ia haere maine i te parau.” (Iakobo 1:19) Tera râ, no te mau tane e vahine atoa teie aˈoraa, e te faaite ra te reira e i roto i te tauaparauraa, eita e navai noa te paraparauraa. E nehenehe e piti taata e paraparau maoro, teie râ eaha te huru ia ore raua e faaroo te tahi i te tahi? Aita iho â ïa e tauaparauraa mau. Te hoê tuhaa faufaa roa ia manuïa te tauaparauraa, o te iteraa ïa i te faaroo, mai ta te irava i nia nei e faaite ra.

Te tauaparauraa ma te faahiti ore i te parau

I roto i te tahi mau nunaa, e titauhia ia tapea noa te mau vahine i to ratou mau manaˈo no ratou. Eiaha roa ˈtu te mau tane e tâuˈa i te oraraa utuafare. I roto i tera huru tupuraa, aita ïa te tane e te vahine i ite eaha ta te hoa faaipoipo e hinaaro ra i roto i te mau tupuraa. E mea aravihi roa vetahi mau vahine i te haroaroa i te hinaaro o ta ratou tane, e haamâha oioi atu ratou. I roto i taua mau tupuraa ra, e tupu maitai te tauaparauraa ma te faahiti ore i te parau i rotopu i te tane e te vahine. Mea matauhia, na te hoê noa pae e faatupu i tera huru tauaparauraa. A nehenehe ai te vahine e haapii i te haroaroa eaha ta ta ˈna tane e feruri aore ra e manaˈo ra, mea varavara te tane i te faatupu i te hoê â aravihi e te haroaroa i te mau manaˈo o ta ˈna vahine.

Parau mau, i roto i te tahi mau taˈere, e tâuˈa te mau tane i te hinaaro o te aau o ta ratou vahine e e tutava ratou i te haamâha ˈtu i te reira. I roto i tera mau taˈere atoa râ, e maitaihia te faaipoiporaa e rave rahi ia maitai aˈe te tauaparauraa.

Mea faufaa roa te tauaparauraa

E nehenehe te tauaparauraa huna ore e arai i te taa-ore-raa e te mau manaˈo hape. I te omuaraa o te tuatapaparaa o te mau ati Iseraela, ua patu na opu a Reubena, a Gada e te opu vaehaa o Manase i faaea na i te pae hitia o te râ o te pape Ioridana ra, i te tahi “fata rahi, e vaiiho noa mai ia hiˈo ra” i te pae pape ra o Ioridana ra. Aita te tahi atu mau opu i taa i ta ratou mau ohipa. Ma te manaˈo e ua rave to ratou mau taeae i te ohipa apotata i te pae Ioridana ra, ua ineine te mau opu no tooa o te râ i te haere e tamaˈi atu i te mau “orure hau.” Hou râ a faatupu ai i te tamaˈi, ua tono ratou i te hoê  pǔpǔ vea no te tauaparau e te mau opu no hitia o te râ. Auê ïa ohipa paari e! Ua itea mai ia ratou e e ere no te tusia taauahi aore ra te tusia tia ore tera fata. Ua mǎtaˈu râ te mau opu no hitia o te râ ia parau mai na opu ê atu ia ratou a muri aˈe e: “Aita a outou auraa ia Iehova ra.” E riro ïa te fata ei ite e e feia haamori ia Iehova atoa ratou. (Iosua 22:10-29) Ua mairi ratou i te iˈoa o te fata ra o Ite, no te mea ua faaohipahia te reira ei faaiteraa e o Iehova te Atua mau no ratou.—Iosua 22:34.

Ua navai noa ta ratou faataaraa no te tamǎrû i na opu ê atu, o tei faarue i ta ratou opuaraa e aro i na opu e piti e te opu vaehaa. Oia mau, auaa te hoê tauaparauraa papu e te huna ore i apehia ˈi te hoê tamaˈi na roto i te mau mauhaa tamaˈi. I muri aˈe, i to Iseraela orure-hau-raa i te Atua ra o Iehova, ta ratou tane taipe, ua parau oia ia ratou ma te aroha e e ‘parau maitai atu oia i to ratou [aau].’ (Hosea 2:14; MN) Auê ïa hiˈoraa maitai roa no te feia faaipoipo e! Oia mau, a tutava i te haaputapû i te aau o to oe hoa faaipoipo ia nehenehe o ˈna e taa i to oe mau manaˈo. Mea faufaa te reira, ia ô mai iho â râ te mau manaˈo hohonu. “Mea ohie ia faahiti i te mau taˈo, ta vetahi ïa e parau nei,” o ta Pattie Mihalik ïa, te hoê papai vea i Marite e tapao ra, “e nehenehe atoa râ te reira e riro ei mea faufaa faito ore. E noa ˈtu e mea fifi paha no vetahi ia faaite i to ratou manaˈo, e mea hoona aˈe te faahopearaa i te moni e vai ra i te fare moni.”

A haamaitai i te tauaparauraa

‘Mai te haamataraa iho â to mâua faaipoiporaa i te inoraa,’ ta vetahi paha ïa e faˈi. ‘Eita teie faaipoiporaa e nehenehe e afaro,’ ta te tahi atu paha ïa e faaoti. Te manaˈo ra paha ratou e aita e ravea no te haamaitai i to ratou aravihi i roto i te tauaparauraa i muri aˈe i to ratou faaipoiporaa. Tera râ, a feruri na i te feia e faaea ra i roto i te mau totaiete e na te fetii e faanaho i te mau faaipoiporaa. I roto i te reira mau taˈere, mea rahi o te haamau iho â i te tauaparauraa maitai i roto i to ratou oraraa faaipoipo.

I te hoê fenua i te pae Hitia o te râ ma, ua taatihia e piti taata na roto i te faaipoiporaa faanahohia. Ua anihia te hoê tavini ia reva i te hoê vahi atea e tii i te hoê vahine na te tane ra. Ua faaite maitai râ na hoa faaipoipo, tei ora na fatata e 4 000 matahiti i teie nei, i te aravihi faufaa roa i roto i te tauaparauraa. Ua farerei te taata ra o Isaaka i te tavini e te vahine ta ˈna e faaipoipo atu i muri iho i roto i te hoê aua. “Ua faaite” te taata tei haa ei tavini “ia Isaaka i te mau parau atoa ta ˈna i rave.” Te na ô â ra te faatiaraa bibilia no nia i teie faaipoiporaa: “Ua aratai atura Isaaka ia Rebeka i roto i te fare o tana metua vahine o Sara [e faanahoraa teie no te haamana i te faaipoiporaa], e riro atura oia ei vahine mau na ˈna, e e vahine hinaaro oia na ˈna.”—Genese 24:62-67.

A tapao na e ua faaroo na mua o Isaaka i te faatiaraa e riro “atura” Rebeka ei vahine mau na ˈna. E taata papu te tavini tei here hohonu i te Atua ra o Iehova, ta Isaaka i haamori. E nehenehe o Isaaka e tiaturi i taua taata ra. I muri iho, e vahine “hinaaro” o Rebeka na Isaaka, ta ˈna i faaipoipo atu.

Ua haamaitai anei Isaaka e Rebeka i te aravihi no te tauaparau maitai? I muri aˈe i to Esau, ta raua tamaiti, faaipoiporaa i e piti tamahine a Heta, ua tupu te hoê fifi rahi i roto i te utuafare. Ua “parau atura” Rebeka ia Isaaka e: “Ua paupau roa tau aho i na tamahine a Heta nei; ia rave Iakoba [ta raua tamaiti apî] i te vahine no te mau tamahine a Heta . . . , eaha ta ˈu faufaa ia parahi i te ao nei i reira?” (Genese 26:34; 27:46) Oia mau, ua faataa papu atu o ˈna i to ˈna peapea ma te papu.

Ua parau Isaaka ia Iakoba, te maehaa o Esau, eiaha e faaipoipo i te vahine no te mau tamahine a Kanaana. (Genese 28:1, 2) Ua horoa Rebeka i to ˈna manaˈo. Ua manuïa te aparauraa a na taata faaipoipo e piti i nia i te hoê tumu parau utuafare fifi roa, e hiˈoraa maitai ïa raua no tatou i teie tau. E nafea râ ia ore te manaˈo o na hoa faaipoipo e tu? Eaha te nehenehe e rave?

Ia tupu te hoê peapea

Ia peapea rahi oe e to oe hoa faaipoipo, eiaha e mamû noa. E poroi maramarama roa ïa te reira ta oe e horoa ˈtu: Aita oe e oaoa ra, e aita atoa oe e hinaaro ra ia oaoa to oe hoa faaipoipo. Teie nei râ, peneiaˈe aita to oe hoa faaipoipo e taa roa ra eaha to oe mau hinaaro e manaˈo.

E titauhia paha ia tauaparau maitai orua. Mai te peu e e peapea fifi roa, e ere paha i te mea ohie  ia vai hau noa. I te hoê taime, ua farerei to Isaaka nau metua, o Aberahama raua Sara, i te hoê tupuraa fifi. No te mea e ui Sara, ua pee oia i te peu o taua tau ra e ua horoa oia na Aberahama i ta ˈna tavini vahine, o Hagara, ei vahine tavini ia fanau i te huaai. Ua fanau Hagara na Aberahama i te hoê tamaiti, o Isemaela. I muri aˈe râ, ua tô o Sara iho, fanau atura na Aberahama i te hoê tamaiti, o Isaaka. I to Isaaka haamairiraahia i te û, ua ite o Sara ia Isemaela i te tâhitohitoraa i ta ˈna tamaiti. Ma te taa e mea atâta no ta ˈna tamaiti, ua faaue atura o Sara ia Aberahama ia tiavaru ê atu i te vahine tavini e ia Isemaela. Oia mau, ua faaite papu atu o Sara i to ˈna manaˈo. Ua mauiui roa râ o Aberahama i ta ˈna parau.

Mea nafea te peapea i te faatitiaifaroraahia? Te na ô ra te faatiaraa bibilia e: “Ua parau maira . . . te Atua ia Aberahama, Eiaha oe e mauiui i te tamaiti na, e i to tavini vahine na; e faaroo oe i te reo o Sara ra, e ta ˈna parau atoa ta ˈna i parau mai ia oe ra, e riro hoi na Isaaka taua huaai no oe ra.” Ua faaroo Aberahama i ta te Atua ra o Iehova aratairaa e ua na reira oia i te rave.—Genese 16:1-4; 21:1-14.

E parau paha oe e, ‘A e, ahiri te Atua e paraparau mai mai te raˈi mai, e afaro ohie noa ïa to mâua peapea!’ Te aratai ra te reira ia tatou i te tahi atu ravea faufaa roa no te faatitiaifaro i te mau aimârôraa i roto i te faaipoiporaa. E nehenehe te mau hoa faaipoipo e faaroo i te Atua. E nafea? Ma te taio amui ïa i te Parau a te Atua e ma te farii i ta te reira e parau ra ei aratairaa a te Atua.—Tesalonia 1, 2:13.

Teie ta te hoê vahine faaipoipo Kerisetiano paari i parau: “E rave rahi taime, ia ani mai te hoê vahine apî i te aˈoraa no to ˈna faaipoiporaa, e ui au ia ˈna e ua taio amui anei raua ta ˈna tane i te Bibilia. E ere i te peu matau tera no te rahiraa o te feia e peapea nei i roto i to ratou faaipoiporaa.” (Tito 2:3-5) E nehenehe tatou paatoa e faufaahia i ta ˈna i tapao mai. A taio tamau i te Parau a te Atua e to oe hoa faaipoipo. E “faaroo” ïa oe i ta te Atua mau parau ia nafea oe i tera mahana i tera mahana. (Isaia 30:21) A ara maitai râ: Eiaha e faaohipa i te Bibilia mai te hoê tâpû raau no te pǎpǎi i to oe hoa faaipoipo, ma te haamahitihiti tamau i te mau irava ta oe e manaˈo ra e aita o ˈna e faaohipa ra. A tutava râ i te hiˈo e nafea orua e nehenehe ai e faaohipa i ta orua i taio.

Ia tamata oe i te faatitiaifaro i te hoê fifi rahi, no te aha e ore ai e hiˈopoa i te Index des publications Watch Tower * no nia i to oe haapeapearaa taa maitai? Te haapao ra paha oe i to mau metua ruhiruhia, e te haafifi ra te reira i to oe faaipoiporaa. Eiaha e tataˈu i te mau mea ta to oe hoa faaipoipo e titauhia ra ia rave aore ra eita, no te aha e ore ai e parahi e e hiˈopoa amui i te Index? A tahi, a imi i te upoo parau matamua “Parents.” E nehenehe orua e maimi i te mau papai aratai i raro aˈe i te mau upoo parau iti, mai “prendre soin de ses parents âgés.” A taio amui i te mau tumu parau tei taaihia i roto i te mau papai a te mau Ite no Iehova. E maere paha oe i te mau maitai rahi ta orua e fanaˈo na roto i te mau haamaramaramaraa niuhia i nia i te Bibilia, o tei tauturu e rave rahi atu Kerisetiano aau rotahi.

E tauturu te hiˈopoaraa i taua mau papai aratai ra e te taio-amui-raa i te mau tumu parau ia oe ia hiˈopoa i to oe fifi ma te pae tahi ore. E ite oe i te mau faahitiraa e te mau faahororaa bibilia no nia i to te Atua manaˈo. A imi i te reira i roto i te Bibilia, e a taio amui. Oia mau, e faaroo oe eaha ta te Atua e parau ra no nia i te fifi ta oe e faaruru ra!

Ia vai matara noa te tauaparauraa

Ua tamata aˈena anei oe i te tatara i te hoê opani tei ore i faaohipahia a tau taime i teie nei? Ma te avîvî, e matara mârû noa mai te opani. Eaha râ mai te peu e e faaohipa-pinepine-hia te opani e e tahinu-maitai-hia te mau hinere? E mea ohie ïa ia tatara. Hoê â huru no te opani o te tauaparauraa. Ia haamatau oe i te tauaparau e i te tahinu i te mau hinere o te opani o te tauaparauraa e te aroha Kerisetiano, e nehenehe oe e faaite ohie aˈe i to oe mau manaˈo, noa ˈtu e e peapea fifi roa to orua.

E titauhia iho â te tutavaraa. Noa ˈtu e i te haamataraa, e titauhia paha te tutavaraa rahi no te tauaparau, a faaitoito. E nehenehe ïa oe e fanaˈo i te hoê taairaa ohie roa e to oe hoa faaipoipo, e i te pae hopea, i te hoê faaauraa tamau.

[Nota i raro i te api]