Te tauaparau maitai nei anei orua?

“RATA here a te hoê taata e 60 matahiti.” Te tumu haa ïa o te hoê tataˈuraa taviriraa a te hoê fare moni i te fenua Tapone a tau matahiti aˈenei. Ua faaitoito te reira i te mau Tapone, i te 50raa e 60raa o to ratou matahiti, ia faaite i to ratou “mau manaˈo haavare ore” i to ratou mau hoa faaipoipo. Ua papai te hoê taata tataˈu i ta ˈna vahine: “E ata paha oe, tera râ e tatarahapa vau ia ore au e faaite i te reira, teie ïa, mea maramarama roa: Mauruuru i te faaipoiporaa mai ia ˈu.”

I roto e rave rau taˈere, e vetahi atoa i te pae Hitia o te râ ma, ua faataiâhia na ia faaite roa ˈtu i to ˈna iho mau manaˈo. Tera râ, ua pahono hau atu i te 15 000 taata i taua tataˈuraa rata-here ra. I te mea e ua au roa te taata i te reira, ua faatupuhia te tahi atu tataˈuraa, e e buka tei neneihia no nia i te mau rata. E au ra e i roto ia ratou iho, mea rahi o te hinaaro puai ra e faaite i to ratou mau manaˈo no to ratou hoa faaipoipo poiherehia. Area râ te tahi atu, aita ïa e hinaaro ra. Eaha te tumu? Peneiaˈe te titau ra te reira ia ratou i te tutavaraa e te aravihi no te faataa ia vetahi ê—mai te hoê hoa faaipoipo—eaha to ratou manaˈo.

Te na ô ra o Hitoshi Kato, o tei papai i te hoê buka no nia i te faatuhaaraa, e i rotopu i te mau hoa faaipoipo paari roa i te fenua Tapone, e rave rahi faataaraa e anihia nei e te mau vahine faaipoipo no to ratou inoino iti rahi i pue i te roaraa o te mau matahiti. “Te tumu atoa râ,” te na ô ra oia, “ua û anaˈe raua i te fifi, eita na hoa faaipoipo e tauaparau i to raua mau manaˈo te tahi i te tahi.”

A faatuhaahia ˈi oia, e maere paha te hoê tane ia ani atu ta ˈna vahine ia faataa. E rave rahi matahiti i te maoro, aita paha na hoa faaipoipo i tauaparau i to raua iho manaˈo no te tahi. Ua tamata paha te tane e te vahine i te faaite i to raua manaˈo, aita râ raua i nehenehe e tapea i te hoê aparauraa au maitai. Aita raua i patu i te hoê taairaa piri atu â, e pinepine râ raua i te tatamaˈi.

 E nafea te tane e te vahine e nehenehe ai e faaafaro i to raua mau peapea ma te hau e e tauaparau ma te au i to raua mau manaˈo? E anaanatae paha oe i te ite e te vai ra te mau manaˈo tauturu maitai roa ˈˈe e au ia faaohipa, eiaha i roto i te hoê buka apî a te hoê taata aˈo i te pae faaipoiporaa, i roto râ i te hoê buka tahito tei faaherehere-maitai-hia i te roaraa o te mau senekele—te Bibilia.