Te tiaraa e amo i te hoê iˈoa

E TIARAA to te taata atoa e amo i te hoê iˈoa. I Tahiti, e horoa-atoa-hia te hoê iˈoa i te hoê aiû apî faaruehia aita i itehia o vai te papa e te mama. E topa te piha tivira i te hoê iˈoa nainai e te hoê paˈeraa no te tamarii faaruehia.

Te vai nei râ hoê taata o tei, e nehenehe e parauhia, patoihia tera tiaraa tumu, te hoê tiaraa i horoahia fatata i te taatoaraa o te taata. Ma te faahiahia mau, o oia “te Metua . . . , no ˈna hoi te iˈoa i mairihia i te fetii atoa, to te raˈi, e to te ao atoa nei”! (Ephesia 3:14, 15) Oia mau, te haapae nei e rave rahi taata i te faaohipa i te iˈoa o te Atua Poiete mai tei itehia i roto i te Bibilia. Mea au aˈe na ratou e mono i te reira ma te mau iˈoa toroa mai “te Atua,” “te Fatu,” aore ra “te Mure ore.” O vai atura ïa to ˈna iˈoa? Te pahono ra te fatu salamo i tera uiraa: “O Iehova to oe iˈoa, e o oe anaˈe tei Teitei i te fenua atoa nei.”—Salamo 83:18.

I te afaraa matamua o te senekele 19 i to te mau mitionare o te London Missionary Society taeraa mai i Tahiti, te haamori ra te nunaa no Porinetia i te atua e rave rahi. E iˈoa taa ê iho â to te atua taitahi, o Oro e o Taaroa te iˈoa o te mau atua rarahi. No te faataa ê i te Atua o te Bibilia i te tahi atu mau atua, aita taua mau mitionare ra i haamarirau i te faaohipa rahi i te iˈoa o te Atua, tei hurihia Iehova na roto i te reo Tahiti.

Ua haamata ˈtura tera iˈoa i te matau-maitai-hia e te faaohipa-rahi-hia i roto i te mau tauaparauraa e papairaa rata i te mau mahana atoa. Ua faaohipa pinepine te arii Pomare II no Tahiti, tei faatere na i te omuaraa o te senekele 19, i tera iˈoa i roto i ta ˈna iho mau papairaa rata. Te itehia ra te hoê haapapuraa o taua tupuraa ra i roto i te rata i patahia i ǒ nei. Papaihia na roto i te reo Beretane, ua faaiteitehia te reira i te fare manaha no Tahiti e to ˈna mau motu. Te faaite ra tera rata e ua farii oioi te nunaa i te faaohipa i te iˈoa o te Atua i te reira taime. Hau atu â, e tausani rahiraa taime to te iˈoa iho o te Atua iteraahia i roto i te huriraa matamua o te Bibilia na roto i te reo Tahiti, tei oti roa i 1835.

[Hohoˈa i te api 32]

Arii Pomare II

[Faaiteraa i te fatu o te hohoˈa i te api 32]

King and letter: Collection du Musée de Tahiti et de ses Îles, Punaauia, Tahiti