Uiraa a te feia taio

Mai te peu e te haapeapeahia ra te hoê taata e te mau demoni, e nafea oia ia nehenehe oia e tiamâ mai?

Te faaite ra te Parau a te Atua e e nehenehe te feia e faaruru ra i te aroraa a te mau demoni e tiamâ mai i te reira. Mea faufaa roa te pure i roto i tera faaoraraa. (Mareko 9:25-29) Teie râ, e titauhia paha ia rave te hoê taata e haapeapeahia ra e te mau demoni i te tahi mau taahiraa hau. Te faaite ra te mau tupuraa o te mau Kerisetiano no te senekele matamua eaha ˈtu â te nehenehe e titauhia.

Hou to ratou riroraa mai ei pǐpǐ a te Mesia, i rave na te tahi mau taata i Ephesia i tahito ra i te peu demoni. I muri aˈe râ i to ratou faaotiraa e tavini i te Atua, ‘ua hopoi mai te feia peu huru ê i ta ratou mau buka, ua tutui ihora i te auahi i mua i te aro o te taata atoa.’ (Ohipa 19:19) Ma te faaore i ta ratou mau buka hiˈohiˈo, ua vaiiho mai tera mau melo apî i roto i te faaroo i Ephesia i te hoê hiˈoraa no te feia o te hinaaro e tiamâ mai i te aroraa a te mau demoni i teie mahana. E mea faufaa roa no tera mau taata ia faaore roa i te taatoaraa o te mau tauihaa i taaihia i te peu tahutahu. Oia hoi te mau buka, vea, hohoˈa teata, haamaramaramaraa no roto mai i te mau roro uira, upaupa haruharu e peu tahutahu to roto, tae noa ˈtu te mau taritoa aore ra te tahi atu mau ravea “parururaa” aore ra o tei taaihia i te mau peu tahutahu.—Deuteronomi 7:25, 26; Korinetia 1, 10:21.

Tau matahiti i muri aˈe i to taua mau Kerisetiano ra i Ephesia faaoreraa i ta ratou mau buka tahutahu, ua papai te aposetolo Paulo e: ‘Te to nei tatou i te mau varua iino.’ (Ephesia 6:12) Ua faaitoito Paulo i te mau Kerisetiano: “A ahu na i te haana tamaˈi atoa a te Atua ra, ia tia ia outou ia patoi atu i te mau ravea paari a te [D]iabolo ra.” (Ephesia 6:11) E au noâ teie aˈoraa i teie mahana. E mea tia ia haapaari te mau Kerisetiano i to ratou ea pae varua no te paruru ia ratou iho i te mau varua iino. “A rave hoi,” ta Paulo ïa i onoono “i te paruru ra o te faaroo, ei nia roa iho ïa, o te mea ïa e pohe ai te mau ihe auahi atoa a taua varua ino ra.” (Ephesia 6:16) E haapaari te hoê taata i to ˈna faaroo maoti te haapiiraa bibilia. (Roma 10:17; Kolosa 2:6, 7) No reira, e tauturu mai te haapiiraa bibilia tamau ia faahotu i te faaroo o te riro ei parururaa i mua i te mana o te mau varua iino.—Salamo 91:4; Ioane 1, 5:5.

Ua titauhia râ ia rave tera mau Kerisetiano i Ephesia i te tahi atu â taahiraa faufaa. Ua parau Paulo ia ratou e: “Ma te pure tuutuu ore i te mau pure atoa ra, e te ani a te [v]arua ra.” (Ephesia 6:18; MN) Oia mau, e mea faufaa roa iho â i te pure-uˈana-raa no te ani i ta Iehova parururaa no te feia e hinaaro ia tiamâ mai ratou i te mau aroraa demoni i teie mahana. (Maseli 18:10; Mataio 6:13; Ioane 1, 5:18, 19) Te na ô ra te Bibilia ma te tano e: “E auraro atu outou i te Atua. E patoi atu i te [D]iabolo, e na ˈna e maue ê atu.”—Iakobo 4:7.

A pure uˈana ˈi te hoê taata e arohia ra e te demoni ia tiamâ mai oia, e nehenehe atoa te tahi atu mau Kerisetiano mau e pure no te taata o te hinaaro hua ra e tavini ia Iehova e o te tutava ra ma te aau tae i te patoi i te mau varua iino. E nehenehe ratou e ani i te Atua ia noaa i te taata e haamauiuihia ra e te mau demoni te puai pae varua no te patoi i te mau aroraa demoni. I te mea e te na ô ra te Parau a te Atua e “te pure faauˈana a te taata parau-tia ra, e mea tia-rahi-hia mai ïa,” papu maitai e e maitaihia te feia e haamauiuihia ra e te mau demoni e o te tutava nei i ‘te patoi atu i te Diabolo,’ i te mau pure a te mau tavini a te Atua.—Iakobo 5:16.

[Hohoˈa i te api 7]

Ua faaore te feia i roto i te faaroo i Ephesia i ta ratou mau buka tahutahu