Eaha te opuaraa a te Atua no te fenua?

NO TE aha outou e au ai i te haere na roto i te hoê aua aore ra i te ori na roto i te hoê faaapu tiare noˈanoˈa? No te aha to outou feruriraa e maitai ai ia hiˈo i te hoê roto nehenehe mau aore ra i te mau mouˈa teitei mau e poˈi roa te niaraa i te mau ata? No te aha outou e rave ai i te taime no te faaroo i te mau manu ia hio i ta ratou mau himene oaoa i nia roa i te mau tumu raau? E no te aha e mea au ai ia mataitai i te hoê aili ia ouˈa aore ra i te hoê nǎnǎ mamoe ia amu i te aihere i roto i te hoê aua?

Te vai ra hoê pahonoraa i tera mau uiraa atoa. Ua poietehia tatou no te ora i roto i te Paradaiso! I reira ïa to tatou na metua matamua o Adamu e o Eva i te haamataraa i to raua oraraa. No ǒ mai ïa to tatou hinaaro e ora i roto i te Paradaiso ia raua, e no ǒ mai to raua i to raua Atua Poiete ra o Iehova. Ua ite o ˈna e e oaoa tatou te taata i roto i te Paradaiso no te mea ua poiete o ˈna ia tatou ma te mau huru maitatai hinaarohia no te fanaˈo i te hoê nohoraa faahiahia i te fenua.

No te aha Iehova i poiete ai i te fenua? “Ua hamani” oia “ia taatahia.” (Isaia 45:18) Ua horoa tei “hamani i te fenua” na Adamu e o Eva i te hoê nohoraa paradaiso nehenehe, te ô i Edene. (Ieremia 10:12; Genese 2:7-9, 15, 21, 22) Eaha râ paha raua i te au i te mau anavai, tiare, tumu raau i reira! E nehenehe e itehia te mau manu nehenehe i nia i te raˈi, e te mau animara huru rau ia haere i nia i te fenua—e ere ratou i te mea atâta no te huitaata. E au te mau iˈa e te tahi atu mau mea ora poietehia i roto i te pape maramarama, e te mâ o te fenua. Te mea faufaa roa ˈˈe, te vai ra o Adamu raua o Eva. E nehenehe raua e fanau i to raua huaai e e faarahi i to raua nohoraa paradaiso i roto i te taairaa oaoa e to raua utuafare e rahi noa ˈtura.

Noa ˈtu e e ere te fenua i te hoê paradaiso i teie mahana, e nehenehe te reira e faaauhia i te hoê nohoraa nehenehe roa o te hoê utuafare oaoa. Te vai ra te mea ta tatou e hinaaro—te mori, te mahanahana, te pape, e te maa—i roto i te nohoraa taatoa ta to tatou Atua i horoa mai. Mea au na tatou te maramarama e te mahanahana o te mahana, e te anaana mǎrû o te avaˈe i te po! (Genese 1:14-18) I roto i te fenua te vai ra te mau mori, mai te  arahu e te mori arahu, o ta tatou e nehenehe e faaohipa no te haamahanahana. Maoti te tereraa o te pape e te faanahoraa o te fenua no te mau anavai, roto e te miti, e pape ta tatou. E mai te hoê tapoˈi tahua, e matie te tapoˈi ra i te fenua.

Mai te maa e haaputu i roto i te hoê fare, ua î roa te patere o te fenua. Maoti te mau maa tupu e te mau maa hotu i roto i te mau faaapu, ‘ua horoa mai hoi Iehova i te anotau auhune e ua faaî mai i to tatou aau i te oaoa.’ (Ohipa 14:16, 17) I te mea e e mai te hoê nohoraa nehenehe roa aˈena te fenua, a feruri na ïa eaha te huru o te reira ia faariro o Iehova “te Atua no ˈna te ao” i te reira ei paradaiso!—Timoteo 1, 1:11.

 [Faaiteraa i te fatu o te hohoˈa i te api 2]

API MATAMUA: Fenua: NASA photo; Fetia: NASA, ESA and AURA/Caltech