Mea ora te parau a Iehova

Manaˈo faufaa o te buka piti o te Salamo

EI TAVINI a Iehova, ua ite tatou e e fifihia e e tamatahia tatou. Ua papai te aposetolo Paulo e: “Te feia atoa e opua e haapao i te paieti ei roto â i te Mesia ra ia Iesu, e hamani-ino-atoa-hia ïa.” (Timoteo 2, 3:12) Na te aha e tauturu ia tatou ia faaoromai i te mau fifi e hamani-ino-raa, o te haapapu i to tatou hapa ore i te Atua?

Na te piti o na haapueraa e pae o te mau salamo e tauturu mai. E faaite mai te Salamo 42 e tae atu i te 72 e mai te peu e e hinaaro tatou e faaoromai i te mau fifi, e mea tia ia tiaturi taatoa tatou ia Iehova e ia haapii i te tiai maite ia ˈna ia faaora mai. Auê ïa haapiiraa faufaa roa no tatou e! Oia mau, e “mea ora” te poroi o te buka piti o te Salamo, mai te toea o te Parau a te Atua, “e te puai rahi” i teie mahana atoa.—Hebera 4:12.

O IEHOVA TO TATOU ‘HAAPURAA E ETAETA’

(Salamo 42:1–50:23)

Ua hopoi-tîtî-hia te hoê ati Levi. No to ˈna peapea e eita ta ˈna e nehenehe e haere e haamori i te hiero o Iehova, e tamahanahana oia ia ˈna iho ma te parau e: “Eaha oe i taiâ ˈi, e tau [nephe]? eaha oe i tiarepu ai i roto ia ˈu nei? e tiaturi i te Atua.” (Salamo 42:5, 11; MN; 43:5) E tuati teie irava e hoˈi tamau mai i na haapueraa irava e toru o te Salamo 42 e te 43 i roto i te hoê noa pehepehe. E taparuparuraa te Salamo 44 no Iuda—te hoê nunaa e ahoaho ra no te haamǎtaˈuraa paha o te aroraa a Asura i te tau o te arii Hezekia.

E parau tohu te Salamo 45, te hoê himene o te faaipoiporaa arii, no nia i te Basileia Mesia. E faahohoˈa na salamo e toru i muri iho ia Iehova mai ‘te hoê haapuraa e etaeta,’ ‘te hoê [A]rii rahi i nia i te fenua atoa nei,’ e ‘te hoê haapuraa itea.’ (Salamo 46:1; 47:2; MN; 48:3) E faaite te Salamo 49 ma te nehenehe roa e “e ore roa e tia” i te taata “ia faaora i tana taeae”! (Salamo 49:7) Na te mau tamarii a Kora i papai i na salamo matamua e vau o te haapueraa piti. Te iva, te Salamo 50, na Asapha ïa.

Uiraa bibilia pahonohia:

44:19—Eaha “te vahi teni ra”? Te faataa ra paha te fatu salamo i te hoê vahi aroraa, i reira te feia i taparahihia i riro ai ei maa na te teni.

45:13, 14a—O vai ‘te tamahine a te arii ra o te arataihia i te arii ra’? O te tamahine ïa a te “Arii hau mure ore,” te Atua ra o Iehova. (Apokalupo 15:3, MN) Te faahohoˈa ra oia i te amuiraa faahanahanahia o na Kerisetiano 144 000 ta Iehova e farii ei tamarii na ˈna ma te faatavai ia ratou i to ˈna varua. (Roma 8:16) E arataihia teie “tamahine” a Iehova, “faanehenehehia mai te vahine i faanehenehehia no te faaipoiporaa i tana tane ra,” te tane faaipoipo—te Arii Mesia.—Apokalupo 21:2.

45:14b, 15—Te faahohoˈa ra ‘te mau paretenia’ ia vai? I te “feia rahi roa” haamori mau, o te amui ra e o te paturu ra i te toea faatavaihia. I te mea e ‘e haere ora mai ratou mai roto  mai i te ati rahi ra,’ tei nia ïa ratou i te fenua a faatupuhia ˈi te faaipoiporaa o te Arii Mesia i nia i te raˈi. (Apokalupo 7:9, 13, 14) I taua taime ra, e î ratou i “te popou e te oaoa.”

45:16—E nafea te mau metua o te arii e monohia ˈi e te mau tamarii? I to Iesu fanauraahia i te fenua nei, e metua to ˈna i te fenua nei. E riro ratou ei tamarii na ˈna ia faatia mai oia ia ratou mai te pohe mai i te roaraa o ta ˈna Faatereraa tausani matahiti. Tei rotopu vetahi o ratou i te feia e ‘faaariihia i te mau fenua atoa nei.’

50:2—No te aha Ierusalema e parauhia ˈi “te vahi nehenehe e te maitai”? E ere ïa no te huru rapaeau o te oire. No to Iehova râ faaohiparaa e faahanahanaraa i te reira ma te faariro atu ei vahi no to ˈna hiero e ei oire pu o ta ˈna mau arii faatavaihia.

Haapiiraa no tatou:

42:1-3. Mai te hoê aili i te hoê fenua mǎrô e hiaai i te pape, oia atoa te ati Levi ia Iehova. Ua uˈana te peapea o te taata ra no te mea aita oia i nehenehe e haamori ia Iehova i to ˈNa hiero ‘i riro ai to ˈna roimata ei maa na ˈna i te rui e te ao’—aore oia i poia. Eiaha anei tatou e atuatu i te mauruuru hohonu no te haamoriraa ia Iehova e te mau hoa i roto i te faaroo?

42:4, 5, 11; 43:3-5. Mai te peu e no te tahi tumu eita e vî ia tatou e taa ê tatou maa taime i te amuiraa Kerisetiano, e nehenehe te haamanaˈoraa i te mau oaoa o tera amuimuiraa i mutaa iho e tauturu ia tatou. Noa ˈtu e e nehenehe te moemoe e uˈana i te omuaraa, e haamanaˈo atoa mai te reira e o te Atua to tatou haapuraa e e mea tia ia tiai maite tatou ia ˈna ia tamǎrû mai.

46:1-3. Noa ˈtu eaha te ati ta tatou e nehenehe e faaû, e mea tia ia tiaturi taatoa tatou e ‘o te Atua to tatou haapuraa e etaeta.’

50:16-19. Aita to te taata e haavare ra e e rave ra i te mau ohipa iino e tiaraa e tia ˈtu no te Atua.

50:20. Eiaha e ru i te paraparau i te mau hapa a vetahi ê, a tapoˈi atu râ.—Kolosa 3:13.

“E TAU NEPHE, O TE ATUA ANAˈE RA TA OE E TIAI”

(Salamo 51:1–71:24)

E haamata teie tuhaa o te mau salamo e te pure haavare ore a Davida i muri aˈe i ta ˈna hara e o Bate-seba. E faaite te Salamo 52 e tae atu i te 57 e e faaora Iehova i te feia e tuu i ta ratou hopoia ia ˈna ra e e tiai maite ia ˈna ia faaora mai. Mai tei faahitihia i roto i te Salamo 58-64, i te roaraa o to ˈna hepohepo taatoa, e faariro Davida ia Iehova ei haapuraa no ˈna. E himene oia e: “E tau [nephe], o te Atua anaˈe ra ta oe e tiai: tei ia ˈna hoi tau manaˈoraa.”—Salamo 62:5; MN.

Ia turai te auhoaraa piri roa e to tatou Faaora ia tatou ia “himene ei haamaitai i to ˈna iˈoa” e tia ˈi. (Salamo 66:2) Te aruehia ra Iehova ei aupuru horoa noa i roto i te Salamo 65, ei Atua e ora ˈi i roto i te Salamo 67 e te 68, e ei ora i roto i te Salamo 70 e te 71.

Uiraa bibilia pahonohia:

51:12—To vai “aau tiamâ” ta Davida i ani ia tauturuhia o ˈna? E ere ïa to te Atua ineineraa i te tauturu ia Davida, e ere atoa te varua moˈa o Iehova, o te aau iho râ o Davida—to ˈna huru feruriraa. Te ani nei oia i te Atua ia horoa na ˈna i te hinaaro e rave i te mea maitai.

53:1—E nafea te taata e patoi ra i te vai-mau-raa o te Atua ‘e maamaa ˈi’? Te maamaa i ǒ nei, e ere ïa i te paruparu i te pae feruriraa. E nehenehe e taahia e mea maamaa tera taata i  te pae morare ia hiˈohia te toparaa morare i faataahia i roto i te Salamo 53:1-4.

58:3-5—E nafea te paieti ore e au ai i te ophi? E au te haavare ta ratou e parau haere ra no nia ia vetahi ê i te heme, aore ra taero ophi. E faaino ratou i te roo maitai o te taata ta ratou e haafifi ra. “Mai to te asepi turi e opani i to ˈna tariˈa,” eita te paieti ore e faaroo i te aratairaa aore ra te aˈoraa.

58:7—E nafea te paieti ore ‘e roroma ˈi mai te pape e roma nei’? Te manaˈo ra paha Davida i vetahi anavai o te mau peho i te Fenua tǎpǔhia. E maraa noa te faito pape o te hoê vai pue i roto i teie peho, e oioi roa râ teie mau pape i te tahe e pau atu ai. Te pure ra Davida e ia moe oioi roa te paieti ore.

68:13—Mea nafea ‘te pererau uupa i tapoˈihia ˈi i te ario, e i faairavarava-haere-hia ˈi i te auro’? E mea anaana roa ino te ǔ o te tahi mau huruhuru o vetahi uupa ninamu marehurehu. E au to ratou huruhuru i te ǔ o te metara i raro aˈe i te mau hihi marearea o te mahana. Te faaau ra paha Davida i te feia tamaˈi Iseraela i upootia i te hoê aroraa mai teie uupa—puai ia maurere e te anaana ia hiˈohia. Mai ta te tahi mau aivanaa Bibilia e parau ra, e tano atoa paha te faataaraa i te hoê ohipa a te rimaî, te hoê re, i tufahia ei taoˈa haruhia. Noa ˈtu eaha te tupuraa, te faahitihiti ra Davida i te mau faaupootiaraa a Iehova i to ˈna nunaa i nia i to ratou mau enemi.

68:18—O vai ma “te taoˈa na te taata ra”? No roto mai teie mau tane i te feia i tapea-tîtî-hia i te haruraahia te Fenua tǎpǔhia. Ua maitihia teie mau tane i muri aˈe no te tauturu i te ati Levi i roto i ta ratou ohipa.—Ezera 8:20.

68:30—Eaha te auraa o te aniraa ‘e aˈo atu i te taehae o te uruaeho’? Ma te faahiti taipe i te mau enemi o te nunaa o Iehova ei taehae, ua ani Davida i te Atua ia aˈo ia ratou, aore ra ia tapea i to ratou puai no te hamani ino.

69:23—Eaha te auraa ‘e roohia i te rûrû to te enemi tauupu’? E mea faufaa roa te mau uaua o te tauupu no te rave i te mau ohipa rohirohi, mai te amoraa e te utaraa i te mau tauihaa teiaha. Te horoa ra te tauupu paruparu i te manaˈo o te ereraa i te puai. Ua pure Davida e ia ere to ˈna mau enemi i to ratou puai.

Haapiiraa no tatou:

51:1-4, 17. Eita te raveraa i te hara e fariu ê ia tatou i te Atua ra o Iehova. Mai te peu e e tatarahapa tatou, e nehenehe tatou e tiaturi i to ˈna aroha hamani maitai.

51:5, 7-10. Mai te peu e ua hara tatou, e nehenehe tatou e taparu ia Iehova ia faaore mai i ta tatou hara no to tatou huru taata hara. E mea tia ia pure atoa tatou ia ˈna ia tamâ mai,  ia faatia mai, ia tauturu mai ia iriti i to tatou mau hinaaro hara o to tatou aau, e ia horoa mai i te hoê aau manaˈo tia.

51:18. Ua haamǎtaˈu ta Davida mau hara i te maitai o te nunaa taatoa. No reira, ua pure oia ia hamani maitai te Atua ia Ziona. Ia rave tatou i te hoê hara rahi, e faaino pinepine te reira i to Iehova iˈoa e te amuiraa. E mea tia ia pure tatou i te Atua no te faaafaro i te fifi ta tatou i faatupu.

52:8. E nehenehe tatou e riro “mai te olive heeuri i te fare o te Atua”—e haafatata ˈtu ia Iehova e ia hotu i roto i ta ˈna taviniraa—ma te faaroo ia ˈna e te farii ma te aau tae i ta ˈna aˈoraa.—Hebera 12:5, 6.

55:4, 5, 12-14, 16-18. Ua horuhoru roa Davida no te opuaraa ino a ta ˈna iho tamaiti ra o Abasaloma e te haavare a te taata aˈo tiaturihia ra o Ahitophela. Aita râ te reira i faaiti i to Davida tiaturi ia Iehova. Eiaha tatou e vaiiho i te horuhoru o te aau ia haaparuparu i to tatou tiaturi i te Atua.

55:22. E nafea tatou e tuu ai i ta tatou hopoia ia Iehova ra? E na reira tatou (1) ma te pure ia ˈna no nia i te reira, (2) ma te turui i nia i ta ˈna Parau e faanahonahoraa no te aratai e no te tauturu mai, e (3) ma te rave i ta tatou e nehenehe ma te au noa no te tâmǎrû i te tupuraa.—Maseli 3:5, 6; 11:14; 15:22; Philipi 4:6, 7.

56:8. Eita Iehova e taa noa i to tatou tupuraa, i to ˈna faahopearaa atoa râ i nia i to tatou huru aau.

62:11. Aita te Atua i taaihia i te tahi atu ito. O oia te puai iho. ‘No ˈna te mana.’

63:3. “E maitai rahi tei to [te Atua] hamani maitai i tei te ora” no te mea aita anaˈe te reira, mea auraa ore te oraraa. E haerea paari to tatou ia atuatu i te auhoaraa e Iehova.

63:6. E taime maitai roa te po—mea maniania ore e te nevaneva ore—no te feruriruri.

64:2-4. E nehenehe te hoê parau faaino e tuino i te roo maitai o te hoê taata hapa ore. Eiaha roa tatou e faaroo i tera parau faaino eiaha atoa e haaparare atu.

69:4. Ia vai hau noa tatou, e haerea paari to tatou i te tahi mau taime ia “faahoˈi” ma te tatarahapa, noa ˈtu e aita tatou i papu e ua hape tatou.

70:1-5. Te faaroo ra Iehova i ta tatou mau taparuparuraa ru no te ani i te tauturu. (Tesalonia 1, 5:17; Iakobo 1:13; Petero 2, 2:9) E nehenehe te Atua e vaiiho i te hoê tamataraa ia tamau noa, e horoa mai râ oia i te paari no te faaruru i te tupuraa e te puai no te faaoromai atu. E ore oia e vaiiho noa ia tatou ia ati maori râ o te tia ia tatou ia faaoromai.—Korinetia 1, 10:13; Hebera 10:36; Iakobo 1:5-8.

71:5, 17. Ua faahotu Davida i te itoito e te puai na roto i te tiaturiraa ia Iehova i to ˈna apîraa—hou atoa i te faaûraa ˈtu i te tiapai Philiseti ra o Golia. (Samuela 1, 17:34-37) E mea tia ia turui te feia apî i nia ia Iehova i roto i te mau mea atoa ta ratou e rave.

‘Ia faaîhia te mau fenua atoa i to ˈna hanahana’

No nia te himene hopea o te haapueraa piti o te mau salamo, te Salamo 72, i te faatereraa a Solomona, o te faataipe i te mau tupuraa e itehia i raro aˈe i te faatereraa a te Mesia. Auê ïa haamaitairaa faahiahia te faataahia ra i reira—te hau rahi roa, te hoperaa te ino e te haavîraa uˈana, e te maa sitona e rave rahi i te fenua e! Tei rotopu anei tatou i te feia e fanaˈo i te reira e te tahi atu mau haamaitairaa a te Basileia? E nehenehe ta tatou mai te peu e, mai te fatu salamo, e tiai maite tatou ia Iehova, ma te faariro ia ˈna ei haapuraa e ei etaeta no tatou.

‘E hope te mau pure a Davida’ ma teie mau parau: “Ia haamaitaihia te Atua, te Atua o Iseraela, o Iehova, oia anaˈe ra tei rave i te mau mea taa ê ra; ia haamaitaihia hoi to ˈna iˈoa hanahana e a muri noa ˈtu: ia faaîhia hoi te mau fenua atoa i to ˈna hanahana; Amene, e Amene.” (Salamo 72:18-20) E haamaitai anaˈe ïa ma to tatou aau atoa ia Iehova e e arue anaˈe i to ˈna iˈoa hanahana.

[Hohoˈa i te api 9]

Ua ite anei outou o vai te faahohoˈahia ra e “te tamahine a te arii ra”?

[Hohoˈa i te mau api 10, 11]

Te parauhia ra Ierusalema “te vahi nehenehe e te maitai.” Ua ite anei outou no te aha?