Oia, e nehenehe oe e ite i te oaoa

I TE tahi taime, mea fifi ia ite i te oaoa, te oaoa mau e te vai maoro. Te hoê tumu rahi, oia ïa mea rahi te taata e imi tuutuu ore nei i te oaoa i te mau vahi tano ore. Ahani hoi e e hoa papu e te aravihi to ratou o te nehenehe e faaite atu i te aveia tano!

O te Bibilia te hoê tumu o taua aveia hinaarohia ra. E hiˈo anaˈe hoê noa o to ˈna mau buka—te Salamo. E haapueraa 150 himene moˈa i te Atua ra o Iehova taua buka ra, na Davida arii o Iseraela i tahito ra i papai i te afaraa. Mea faufaa ia ite o vai ma te feia papai, mea faufaa roa ˈtu â râ ia ite e ua papaihia taua buka ra i raro aˈe i te faauruaraa a Iehova, te Hoa rahi roa ˈˈe o te huitaata. E nehenehe ïa e papu ia tatou e to roto te aratairaa a Iehova no to tatou maitai e te faaite maira i te ravea e oaoa ˈi tatou.

Ua papu i te feia papai i te Salamo e e hopoi mai te taairaa maitai o te hoê taata e te Atua i te oaoa. “E ao to te taata i mǎtaˈu ia Iehova ra,” ta te fatu salamo ïa i papai. (Salamo 112:1) Aita e taairaa i rotopu i te taata, aita e taoˈa materia, e aita e manuïaraa a te taata e tia ia hopoi mai i te oaoa no ǒ mai i te apitiraa ˈtu i ‘te feia o Iehova to ratou Atua.’ (Salamo 144:15) Na te oraraa o te tavini a te Atua e rave rahi no teie tau e haapapu ra i te reira.

O Susanne, e 40 tiahapa matahiti, te hoê hiˈoraa. * Teie ta ˈna i parau: “I teie mahana, mea rahi o te faaô atu i roto i te tahi mau pǔpǔ no te titau i te hoê â mau fa aore ra no te tufa i te hoê â mau anaanataeraa. Mea varavara râ ratou i te hiˈo i te melo atoa o te pǔpǔ ei hoa. Mea taa ê te nunaa o Iehova. No to tatou here ia Iehova e here ai tatou te tahi i te tahi. I rotopu i te nunaa o te Atua, aita e huru-ê-raa noa ˈtu teihea tatou i teie taime. Te haamaitai  rahi roa ra teie auhoêraa i to tatou oraraa. O vai te nehenehe e parau e e hoa to ratou no te pǔpǔ totiare, huru oraraa, e nunaa rau taa ê roa? Ma to ˈu aau atoa, e tia ia ˈu ia parau e e hopoi mai te apitiraa ˈtu i te nunaa o Iehova i te oaoa.”

Ua haapii atoa o Maree, fanauhia i Ekosia, e mea faufaa roa te hoê taairaa piri roa e o Iehova no te ite i te oaoa. “Hou to ˈu iteraa i te parau mau bibilia,” ta ˈna ïa i faatia, “mea au na ˈu e mataitai i te mau hohoˈa teata riaria. Ia po râ, eita to ˈu taoto e topa ia ore au e tapea i te hoê satauro no te ape i te mau tupapau e te mau aiharu, patahia i roto e rave rahi hohoˈa teata. I to ˈu râ iteraa i te parau mau e to ˈu faaearaa i te mataitai i tera mau hohoˈa, ua tia ia ˈu maoti to ˈu taairaa e o Iehova ia haere e taoto ma te riaria ore, ma te oaoa i te tavini i te hoê Atua puai aˈe i te mau demoni aore ra i te mau aiharu feruri-noa-hia.”

E hopoi mai te tiaturiraa ia Iehova i te oaoa

Aita e tumu e feaa ˈi tatou i te mana hope e te paari otia ore o te Atua Poiete. Ua ite Davida e e nehenehe ta ˈna e tiaturi roa e e haapu ia Iehova ra, no reira oia i papai ai e: “E ao to te taata e tiaturi ia Iehova.”—Salamo 40:4.

Ua parau Maria e: “I roto i ta ˈu i farerei i Paniora e i te tahi atu vahi, ua ite au e ia rave tatou i te mau mea mai ta Iehova i faanaho, noa ˈtu e e turai paha to tatou manaˈo e huru aau ia tatou ia haa mai ta tatou e hinaaro, e ite iho â tatou i te mau faahopearaa maitai roa ˈˈe. E hopoi mai te reira i te oaoa no te mea o ta Iehova i faanaho te mea maitai roa ˈˈe.”

Na roto i ta ˈna iho i farerei, ua ite atoa Andreas, te hoê matahiapo tei tavini i te fenua e rave rahi i Europa, e e nehenehe tatou e tiaturi ia Iehova. Ua parau oia e: “Ua mana roa to ˈu tuaana, aita e farii ra i to ˈu faaroo, i nia ia ˈu i to ˈu apîraa, ma te faaitoito ia ˈu ia tapi i te hoê toroa aufau-maitai-hia. Ua inoino roa o ˈna i to ˈu raveraa i te taviniraa taime taatoa e oreraa e tiaturi i te hohoˈa panoonoo ore pûpûhia e te faatuhaaraa. I roto i ta ˈu taviniraa taime taatoa, aita roa ˈtu vau i ere i te tahi mea, e ua ite au i te mau haamaitairaa ta vetahi ê e nehenehe noa e moemoeâ.”

I 1993, ua anihia Felix ia tauturu i te faarahi i te mau fare a te amaa a te mau Ite no Iehova i Selters, i Heremani. I te otiraa te ohipa, ua anihia oia ia riro ei melo tamau o te utuafare o te Betela i reira. Ua aha oia? “Ua farii au i  te aniraa ma te haamarirau rii. I teie nei râ, 10 matahiti to ˈu taviniraa i ǒ nei, ua papu ia ˈu e ua pahono Iehova i ta ˈu mau pure. Ua ite oia eaha te mea maitai roa ˈˈe no ˈu. Ma te tiaturi roa ia ˈna e ma te vaiiho ia ˈna ia aratai ia ˈu, ua horoa ˈtu vau i te ravea ia faaite mai oia eaha ta ˈna e hinaaro ra ia rave au.”

Ua hinaaro Susanne, i faahitihia aˈenei, e tavini ma te taime taatoa ei pionie, mea fifi râ no ˈna ia ite i te hoê ohipa afa mahana. I muri aˈe i to ˈna tiairaa hoê matahiti i te maoro ia vata mai te tahi ohipa, ua haa oia ma te tiaturi ia Iehova. Ua faatia oia e: “Ua horoa vau i ta ˈu parau aniraa no te taviniraa pionie tamau. Ua navai te moni ta ˈu i faaherehere no te aufau i ta ˈu mau haamâuˈaraa matauhia no te hoê avaˈe. Auê ïa avaˈe faahiahia mau e! Ua oaoa roa vau i ta ˈu taviniraa, mea rahi râ te aparauraa no te ohipa tei ore i manuïa. Mai ta Iehova râ i fafau, aita oia i faarue ia ˈu. I te mahana hopea o te avaˈe, ua tia ia ˈu ia tarima i te hoê parau faaau ohipa. I teie nei, ua ite au e e nehenehe mau â ta ˈu e tiaturi ia Iehova! Maoti teie tupuraa matamua i roto i te taviniraa taime taatoa, e oraraa oaoa to ˈu e te mauruuru.”

E rahi atu te oaoa ia farii i te aˈoraa a te Atua

Ua rave te arii Davida i te tahi mau hape rahi. I te tahi taime, ua hinaaro oia i te aˈoraa paari. Ua ineine anei tatou i te farii i te aˈoraa e te haapiiraa mai ia Davida?

I taa na ia Aida, no Farani, e ua rave oia i te hoê hape rahi. Ua faatia oia e: “To ˈu tapitapi matamua, o te faaafaroraa ïa i to ˈu taairaa e o Iehova. Tera noa, aita ˈtu.” Ua ani oia i te tauturu a te hoê matahiapo. Ma te haa 14 tiahapa matahiti i roto i te taviniraa taime taatoa, te na ô nei oia e: “Auê te oaoa ia ite e ua faaore Iehova i ta ˈu hape!”

E nehenehe te fariiraa i te aˈoraa a te Atua e tapea ia tatou eiaha e rave i te tahi hape. Ua faataa Judith e: “I te 20raa o to ˈu matahiti, ua here au i te hoê apiti ohipa Heremani o tei tutava roa i te haamaere ia ˈu. E taata faaturahia oia, e e toroa maitai roa to ˈna, e e taata faaipoipo râ! Ua taa ia ˈu e e mea tia ia maiti au i rotopu i te auraroraa i te mau ture a Iehova e te faarue-roa-raa ia ˈNa. Ua faaite au i to ˈu fifi i to ˈu na metua. Aita to ˈu papa i tapea i te parau i to ˈna haamanaˈoraa mai eaha ta Iehova e titau maira ia ˈu. Ua faaite roa mai o ˈna i to ˈna manaˈo—o ta ˈu iho â i hinaaro mau! Ua imi râ to ˈu aau i te tahi otoheraa. E rave rahi hebedoma to to ˈu mama paraparauraa mai ia ˈu i te po no nia i te faufaaraa o te mau ture a te Atua o te horoa i te ora. No to ˈu mauruuru rahi, ua tae riirii to ˈu aau ia Iehova ra. Ua hopoi mai to ˈu aˈoraahia e haapiiraahia e a ˈna i te oaoa rahi—e rave rahi matahiti hoona i roto i te taviniraa taime taatoa e te hoê hoa faaipoipo Kerisetiano maitai roa mea here ia ˈu e ia Iehova ma to ˈna aau atoa.”

Te haapapu maitai ra tera mau tupuraa i ta Davida parau: “E ao to ˈna! to tei faaorehia ta ˈna hara, e tei tapoˈihia to ˈna ino. E ao to te taata, aore i parihia e Iehova i te hara.”—Salamo 32:1, 2.

Te oaoa ia haapao ia vetahi ê

“E ao to tei haapao mai i te taata rii aroha ra,” ta Davida ïa i papai. Ua parau â oia e: “E faaorahia oia e Iehova i te taime ahoaho ra: na Iehova oia e tiai e ua faaora hoi ia ˈna, e fanaˈo to ˈna parahiraa.” (Salamo 41:1, 2) To Davida haapaoraa ma te here ia Mephiboseta, te tamaiti pirioi a Ionatana to ˈna hoa here, e hiˈoraa ïa o te haerea maitai i nia i te taata rii.—Samuela 2, 9:1-13.

Ua fanaˈo Marlies, tei tavini ei mitionare e 47 matahiti i te maoro, i te haamaitairaa taa ê e poro i te feia tei faarue i te mau tuhaa fenua atâta i Afirika, Asia, e Europa hitia o te râ. Teie ta ˈna i parau: “Ua rau to ratou fifi e e manaˈo noa ratou e aita ratou e farii-roa-hia ra, inaha mea hiˈo-ino-hia ratou. E hopoi noa mai te tautururaa i tera mau taata i te oaoa.”

 Teie ta Marina, e 40 tiahapa matahiti to ˈna, i papai: “Ei vahine taa noa, ua ite au e mea tamahanahana roa ia tauturu vetahi ê ia oe. E turai te reira ia ˈu ia faaitoito i te taata ma te taniuniu aore ra ma te papai atu i te rata. Mea rahi tei faaite i to ratou mauruuru. E hopoi mai te tautururaa ia vetahi ê i te oaoa.”

Ua parau Dimitar, e 25 matahiti to ˈna, e: “Na to ˈu noa mama i rave ia ˈu. I to ˈu tamariiraa, ua oaoa vau i to te hoê tiaau haapiiraa buka a te amuiraa raveraa ia ˈu na muri ia ˈna i te mau hebedoma atoa no te faaineine ia ˈu i roto i te taviniraa. Te mauruuru noa nei au no to ˈna tuutuu ore. Ua ite au e e ere i te mea ohie noa ia faaitoito ia ˈu.” No to ˈna mauruuru no te tauturu ta ˈna i fanaˈo na, te tauturu nei Dimitar ia vetahi ê: “E tamata vau i te rave i te hoê taata apî e te hoê taata paari atoa na muri ia ˈu i roto i te taviniraa hoê aˈe taime i te avaˈe.”

Te faahiti atoa ra te buka Salamo i te tahi atu â mau mea o te hopoi mai i te oaoa. Te hoê, o te faufaaraa ïa ia turui i nia i te etaeta, aore ra puai, o Iehova eiaha i nia ia tatou iho: “E ao to te feia o [Iehova] to ratou etaeta.”—Salamo 84:5.

E nehenehe ta Corinna e faatia mai. Ua reva oia i te hoê fenua e mea hinaaro-roa-hia te tauturu i roto i te taviniraa. “Ua farerei au i te hoê reo apî, te hoê taˈere apî, e te hoê huru feruriraa apî. E au ra e tei nia iho vau i te hoê paraneta ê roa. Ua taiâ roa vau i te manaˈo e poro i roto i te hoê huru tupuraa matau-ore-hia. Ua ani au ia Iehova i te tauturu, e maoti to ˈna puai i tia ˈi ia ˈu ia poro i te mahana taatoa i roto i te hoê tuhaa fenua atea. I muri aˈe, e au ra e ua riro te na reiraraa ei ohipa natura roa ˈˈe i te ao nei. Ua haamata vau e rave rahi haapiiraa bibilia, e te faufaa-noa-hia nei au i teie tupuraa. Ua haapii au e maoti te puai o Iehova, e nehenehe ta tatou e faaruru i te mau haafifiraa e au ra e eita e matara.”

Oia, ua rau te mea o te hopoi mai i te oaoa, mai te atuaturaa i te auhoaraa e te Atua e to ˈna nunaa, te tiaturi-roa-raa ia Iehova, te fariiraa i ta ˈna mau aˈoraa, e te haapaoraa ia vetahi ê. Ma te haere na te mau eˈa o Iehova e ma te auraro i ta ˈna mau ture, e nehenehe tatou e fanaˈo ma te oaoa i ta ˈna farii maitai.—Salamo 89:15; 106:3; 112:1; 128:1, 2.

[Nota i raro i te api]

[Hohoˈa i te api 8]

Maria

[Hohoˈa i te api 9]

Maree

[Hohoˈa i te api 9]

Susanne e Andreas

[Hohoˈa i te api 11]

Corinna

[Hohoˈa i te api 11]

Dimitar