Te afata teata e haapao aiû maitai anei?

I TE tahi taime, mea au roa paha ia vaiiho i ta outou mau tamarii ia mataitai i te afata teata a rave ai outou i te tahi atu mau ohipa. E nafea râ te reira e ohipa ˈi i nia i ta outou mau tamarii?

“E nehenehe atoa te mau poroi i te pae aau o te faataehia na roto i te afata teata e ohipa i nia i te mau aiû apî,” ta The New York Times ïa e faataa ra. Ia au i te hoê maimiraa apî, ua faaitehia te hoê hohoˈa faatianiani poto i te mau aiû hoê matahiti i reira te hoê hauti e ohipa ˈi ma te huru rau i nia i te hoê vahine hauti teata. “Mai te peu e e riaria te vahine hauti teata i te hauti,” ta te Times ïa e parau ra, “eita ïa te mau aiû e hauti i te reira e e haapeapea ˈtu â atoa ratou, e tuˈatuˈa te mata, aore ra e taˈi. Ia anaanatae te vahine hauti teata, e hauti ohie aˈe ïa te mau aiû i te reira.”

Papu maitai, e nehenehe te afata teata e ohipa i nia i te mau aiû. Eaha ïa ia ohipa maoro te reira i nia i te mau tamarii? Ua hiˈopoa te taote Naoki Kataoka, orometua haapii i te pae rapaauraa i te tamarii i te haapiiraa tuatoru i te pae rapaauraa no Kawasaki, i Tapone, e rave rahi tamarii hau roa e mea iti te huru e itehia i nia i to ratou hohoˈa mata. Ua mataitai pauroa ratou i te afata teata aore ra i te mau video i roto i te hoê area taime maoro. Aita te hoê tamaiti e piti matahiti i nehenehe e tauaparau e mea iti roa te mau taˈo ta ˈna i ite. Ua mataitai o ˈna i te mau video mai te poipoi e tae atu i te po i te mau mahana atoa i te naearaa to ˈna hoê matahiti. I muri aˈe noa to to ˈna mama peeraa i te aˈoraa a te taote, faaearaa i te vaiiho i te tamaiti ia mataitai i te mau video e haamataraa i te tapea ia ˈna no te hauti e o ˈna, ua rahi riirii aˈera te mau taˈo a te tamaiti. Oia mau, e mea tia ia aparau te mau metua i ta ratou mau tamarii.

Ua haamahitihiti te Atua ra o Iehova, te Tumu o te utuafare i te faufaaraa o te aparauraa maitai roa ˈˈe. Mea maoro aˈenei ua parau o ˈna i to ˈna nunaa e: “E haapii tamau maite oe i to mau tamarii i taua mau parau [te mau parau a te Atua] nei; o ta oe ïa e parau ia parahi noa oe i roto i te fare, e ia haere noa oe na te eˈatia ra, e ia taoto noa oe ra, e ia tia noa oe i nia ra.” (Deuteronomi 6:7) E nehenehe te mau metua, eiaha te afata teata, e haapii i te mau tamarii ma te ravea maitai roa ˈˈe na roto i te parau e te hiˈoraa, “i tana eˈa ia haere.”—Maseli 22:6.