Te hoê aratai papu i te oaoa ra

E TIARAA no te taata atoa “te tapiraa i te oaoa.” Te manaˈo ïa o te feia papai i te Faˈiraa o te tiamâraa o te Hau Amui no Marite. E ere râ hoê â huru te tapiraa i te hoê fa e te naearaa te reira. A tapi ai e rave rahi taata api no te haa i roto i te faaanaanataeraa e te tuaro, ehia rahiraa ta oe i ite o tei manuïa i teie nei mai ta ratou i hinaaro roa? “Eita paha oe e manuïa,” ta te hoê tane himene tuiroo ïa i parau o tei matau i te tutava no te riro ei taata faataˈi upaupa manuïa.

Mai te peu e ua manaˈo oe i tera ravea ia itea mai te oaoa, mea tano roa ïa ia faaitoito oe. Ia tapi oe i te oaoa ma te tano, e naea ia oe te reira. No te aha e nehenehe ai e parau i te reira? Ua faahiti te tumu parau na mua ˈtu i “te Atua no ˈna te ao [aore ra oaoa],” o Iehova. (Timoteo 1, 1:11) I roto i te Bibilia, te horoa ra te Atua i te aratairaa e eita ta oe tapiraa i te oaoa e faatupu i te inoino. E nehenehe Iehova e tauturu ia oe ia faaû i te mau tumu matauhia o te peapea. Ei hiˈoraa, a rave na i te tamahanahanaraa ta ˈna e pûpû na oe ia pohe tei herehia e oe.

Ia pohe te hoê taata herehia

E nehenehe anei te tahi mea maitai e parauhia no nia i te pohe? E faataa ê te pohe i te mau metua i te mau tamarii e te tamarii i te mau metua. E faataa ê te reira i te mau hoa piri e e hopoi i te panoonoo i roto i te pǔpǔ taata tahoê roa. Ia tairi te pohe, e nehenehe te peapea e faateimaha i te hoê utuafare oaoa.

Papu maitai, e ati te pohe. Te patoi ra râ te tahi mau taata i taua tupuraa mau ra e te faahohoˈa ra i te pohe i te hoê haamaitairaa. A tapao na i tei tupu i muri aˈe i te tairiraa te mataˈi  rorofai Katrina i te Ooˈa o Mehiko i Atete 2005. I te hunaraahia te hoê taata pohe, ua parau te ekalesiatiko e: “Aita o Katrina i taparahi pohe ia ˈna. Ua pii te Atua ia ˈna i nia te raˈi.” I te tahi atu taime, ua parau te hoê vahine farii i te fare maˈi ma te manaˈo maitai i te hoê tamahine eiaha e tapitapi, no te mea ua rave te Atua i to ˈna mama i nia i te raˈi. Ua auê te tamahine e: “No te aha, no te aha o ˈna i faaatea ê ai ia mâua.”

Papu maitai, eita taua mau manaˈo hape ra no nia i te pohe e tamahanahana i te feia oto. No te aha? No te mea aita tera mau manaˈo e faataa ra i te parau mau no nia i te pohe. Te mea ino roa ˈtu â, te faahohoˈa ra ratou i te Atua mai tei haru i te feia herehia mai roto mai i te utuafare e te mau hoa ma te huru riaria e te mauiui. Ua faahohoˈahia te Atua i te hoê taata ohipa ino i roto i te ati o te pohe, eiaha râ i te tumu o te tamahanahanaraa. E parau mau râ ta te Parau a te Atua no nia i te pohe.

Te parau ra te Bibilia i te pohe e enemi. Ua faaauhia te pohe i te hoê arii o te faatere ra i te huitaata. (Roma 5:17; Korinetia 1, 15:26) E enemi puai te pohe e aore e taata e nehenehe e patoi i te reira, e to roto noa te feia herehia atoa i pohe i te mau ati pohe eita e pau ia taio. Te faataa maitai ra teie parau mau bibilia i te oto e te ravea ore ta tatou e ite ia pohe te hoê taata herehia. Te haapapu ra te reira e mea natura tera mau huru aau. Tera râ, te faaohipa ra anei te Atua i te enemi ra te pohe no te afai tei herehia e tatou i nia i te raˈi? A vaiiho i te Bibilia ia pahono i tera uiraa.

Te parau ra te Koheleta 9:5, 10: “Aita . . . a te feia i pohe ra e parau itea . . . Aore hoi e ohipa, aore e imiraa, aore hoi e ite, aore hoi e paari, i te apoo [aore ra shéol] ta oe e haere na.” Eaha te shéol? O te menema ïa o te huitaata i reira te mau taata e haere ai ua pohe anaˈe. I roto i te menema e vai ohipa ore te taata pohe, ma te hauti ore, te huru aau ore, aore ra ma te manaˈo ore roa i te tahi mea. Tei roto ratou i tei nehenehe e faaauhia i te taoto hohonu. * Te haamaramarama ra te Bibilia e aita te Atua e rave ra i te feia herehia e tatou i pohe no te haere ia ˈna ra i nia i te raˈi. E vaiiho te pohe ia ratou i roto i te menema ma te ora ore.

Ua haapapu Iesu i teie parau mau i te poheraa to ˈna hoa o Lazaro. Ua faaau o Iesu i te pohe i te taoto. Ahiri e ua haere o Lazaro i nia i te raˈi i te Atua Mana hope ra, ua faahoˈi mai ïa Iesu ia ˈna i te fenua nei e i te pae hopea e pohe faahou oia, e ere atura ïa te reira i te ohipa maitai. Te faatia ra te parau faaurua e i te vahi hunaraa, ua parau Iesu ma te reo puai e: “E Lazaro, a haere mai i rapae.” Te parau faahou ra te Bibilia e: “Ua haere maira taua taata i pohe ra i rapae.” Ua haamata aˈera o Lazaro i te ora faahou. Ua ite Iesu e aita o Lazaro i faarue noa ˈˈe i te fenua. Ua tarava oia ma te ora ore i roto i te menema.—Ioane 11:11-14, 34, 38-44.

 Te tauturu ra teie ohipa i tupu tei papaihia i roto i te Bibilia ia taa tatou e e ere te pohe te ravea ta te Atua e faaohipa no te tono i te taata mai te fenua e tae atu i te raˈi. No reira, e nehenehe tatou e haafatata i te Atua, ma te ite e e ere o ˈna i te tumu o to tatou peapea. E nehenehe atoa tatou e tiaturi e te taa roa ra ia ˈna te peapea e te ino ta te enemi ra te pohe e faatupu mai. E te haapapu ra te parau mau bibilia no nia i te tupuraa o te pohe e eita te feia pohe e mauiui i roto i te po auahi aore ra vahi tamâraa hara tera râ e vai ora ore ratou i roto i te apoo. No reira, eiaha to tatou mehara i te feia herehia i pohe ia faainohia e te au-ore-raa i te Atua aore ra i te mǎtaˈuraa i te taa ore. Hau atu â, i roto i te Bibilia, te pûpû maira Iehova i te tamahanahanaraa hau.

E aratai te tiaturiraa i te oaoa

Te faataa ra te mau papai ta tatou i hiˈo ihora e e tuhaa faufaa roa te tiaturiraa o te oaoa mau. E titau te taˈo “tiaturi” i faaohipahia i roto i te Bibilia i te tiairaa ma te papu i te mea maitai. No te ite e nafea te tiaturiraa e nehenehe ai e aratai i te oaoa i teie nei, e rave faahou anaˈe na i te faatiaraa a Iesu o te tia-faahou-raa o Lazaro.

E piti aˈe tumu i rave ai Iesu i tera semeio. A tahi no te faaore ïa i te peapea o Mareta, Maria, e o te mau hoa e oto ra. Ua nehenehe faahou ratou e fanaˈo i te auhoaraa e to ratou hoa herehia. Ua faahiti râ o Iesu ia Mareta i te piti o te tumu faufaa ˈtu â: “Aore au i parau atu ia oe e, i faaroo oe ra e ite oe i te mana o te Atua?” (Ioane 11:40) Teie te huriraa i roto i The New Testament in Modern English a J. Phillips o te tuhaa hopea o te irava “te mea maitai ta te Atua e nehenehe e rave.” I to ˈna faatia-faahou-raa ia Lazaro, ua horoa Iesu i te hoê hiˈo-atea-raa o ta Iehova e nehenehe e e hinaaro e rave a muri aˈe. Mea rahi haamaramaramaraa hau no nia i teie “mea maitai ta te Atua e nehenehe e rave” i ǒ nei.

I roto i te Ioane 5:28, 29, ua parau Iesu e: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.” Te auraa ïa e ora faahou mai te feia atoa i pohe i roto i te shéol, e te feia herehia atoa e tatou. Te faataa faahou ra te Ohipa 24:15 no nia i teie tupuraa faahiahia roa, ma te parau e: “E tia-faahou-raa to tei pohe, te feia parau-tia e te feia parau-tia ore.” Noa ˈtu e e “feia parau-tia ore,” e rave rahi taata o tei ore i ite e i tavini ia Iehova, o te fanaˈo i te farii maitai a te Atua i te tau no a muri aˈe.

Ihea teie tia-faahou-raa e tupu ai? Te na ô ra te Salamo 37:29 e: “E parahi te feia parau-tia i nia i te fenua, e parahi tamau â ratou i reira.” A feruri na eaha te auraa! E farerei faahou te mau utuafare e hoa o tei faataa-ê-hia e te pohe i nia i te fenua nei. A feruri na, e fanaˈo oe i te mau taime maitatai na muri i te feia i herehia, mea tano ia î to oe aau i te oaoa.

E hinaaro Iehova ia oaoa oe

Ua hiˈo mai tatou e piti ravea e faarahi ai Iehova i to tatou oaoa noa ˈtu to outou mau fifi. A tahi, na roto i te Bibilia, e horoa mai oia i te ite e te aratairaa no te tauturu ia oe ia faaruru i te mau ati ma te manuïa. Hau atu â i te tauturu ia tatou ia faaruru i te peapea o te pohe, e nehenehe te aˈoraa bibilia e tauturu ia tatou ia faatitiaifaro i te fifi moni e o te ea. E nehenehe te reira e horoa mai i te puai no te faaoromai i te parau-tia ore totiare e te arepurepuraa poritita. E ia faaohipa oe i ta ˈna aratairaa i roto i to oe oraraa, e nehenehe te reira e tauturu ia oe ia faatitiaifaro i te tahi o to oe mau fifi.

A piti, na roto i te haapiiraa i te Bibilia, e naea ia oe te hoê tiaturiraa tei nia ˈˈe i te tahi mea ta te huitaata e nehenehe e pûpû mai. E tuhaa te tia-faahou-raa o te mau hoa e te utuafare o te tiaturiraa ta te Bibilia e faahiti ra. Te horoa ra te Apokalupo 21:3, 4 i te haamaramaramaraa hau: “Ei pihai atoa iho te Atua [i te taata], ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” Te auraa ïa  fatata te tumu atoa o te peapea i roto i to oe oraraa i te ore roa. E tupu mau ta te Bibilia e fafau ra, e e nehenehe oe e oaoa ia tupu te reira. A feruri noa na e taime maitai aˈe to mua o te horoa mai i te tamǎrûraa. E tumu o te oaoa ia ite e eita oe e faaruru e a muri noa ˈtu i te mauiui ia pohe oe.

Ei faahohoˈaraa: Tau matahiti aˈenei, ua ite o Maria i ta ˈna tane i te faarururaa i te hoê pohe mauiui no te mariri ai taata. I muri iti noa ˈˈe a na ˈi ta ˈna taˈi ua faahepo te mau fifi i te pae faufaa ia ˈna e ta ˈna na tamahine e toru ia faarue i to ratou fare. E piti matahiti i muri aˈe, ua ite o Maria e e mariri ai taata to ˈna. E piti tâpû rahi to ˈna e ua mauiui roa o ˈna i te mau mahana atoa. Noa ˈtu tera mau fifi, e feruriraa maitai to ˈna e ua faaitoito o ˈna i te tahi atu mau taata. E nafea oia e oaoa noa ˈi?

Te parau ra o Maria: “Mai te peu e e fifi to ˈu, e tamata vau eiaha e manaˈo rahi roa ia ˈu iho. E ape vau i te ui i teie mau huru uiraa e: ‘No te aha te reira i tupu ai i nia ia ˈu? No te aha vau e mauiui ai mai te reira? No te aha vau i maˈihia ˈi mai te reira?’ E faarohirohi te mau manaˈo iino ia ˈu. E faaohipa râ vau i to ˈu ito no te tavini ia Iehova e no te tauturu i te tahi atu. Na tera e faaoaoa ia ˈu.”

Eaha te tuhaa a te tiaturiraa i roto i to Maria oraraa? Ua tiaturi o ˈna i te tau no a muri aˈe ia faaore roa Iehova i te maˈi e te tahi atu mau fifi o te huitaata. Ia haere o ˈna i te fare maˈi no te rapaau, e tufa o ˈna i taua tiaturiraa ra i te tahi atu feia e mariri ai taata to ratou, aita to ratou e tiaturiraa. Eaha te faufaaraa o te tiaturiraa o Maria? Te parau ra o ˈna e: “E pinepine vau i te haamanaˈo i ta te Bibilia e parau ra i roto i te Hebera 6:19 [MN], i reira to Paulo faataaraa i te tiaturiraa mai te tutau no te nephe. Aita anaˈe tera tutau e painu oe mai te hoê pahi i roto i te hoê vero rahi. Mai te peu râ e ua taamu oe ia oe i nia i te tutau, e paruruhia oe noa ˈtu te vero o te mau fifi ta oe e faaruru.” Te tauturu ra tera “tiaturi i te ora mure ore, i ta te Atua ta te ore e tia ia haavare i parau mai” ia Maria ia oaoa noa. E nehenehe te reira e tupu i nia ia oe.—Tito 1:2.

Na roto i te hoê haapiiraa bibilia, e nehenehe oe e ite i te oaoa mau noa ˈtu to oe mau fifi. E uiraa paha ta oe no nia i te mau tuhaa e au ia faaohipahia. E oaoa te mau Ite no Iehova i te faaite ia oe i te mau pahonoraa a te mau Papai ta oe e hinaaro no te ite mai te peu e te oaoa mau ra oe. A tiai ai oe i te tupuraa o te tiaturiraa ta Iehova e pûpû ra, to rotopu oe i te feia o tei faataahia e: “E noaa ia ratou te rearea e te oaoa; e te oto ra, e te mihi ra, e maue ê atu ïa.”—Isaia 35:10.

[Nota i raro i te api]

[Hohoˈa i te api 5]

Te parau mau o te Bibilia anaˈe te nehenehe e tamǎrû i te oto

[Hohoˈa i te api 7]

E nehenehe te tiaturiraa o te tia-faahou-raa o te Bibilia e faatupu i te oaoa