“I te fenua nei, mai tei te raˈi atoa na”

“Te faataa ra te faaroo Katolika e maha ohipa hopea: te pohe, te haavaraa, te po auahi, te raˈi.”—Le catholicisme, piahia e George Brantl.

A TAPAO e i roto i teie tapura ravea no te huitaata, aita ra te fenua. E ere roa ˈtu i te mea maere no te mea te tiaturi ra te Ekalesia Katolika, mai te tahi atu mau haapaoraa, e e haamouhia te fenua i te hoê mahana. Te faataa maitai ra te Dictionnaire de théologie catholique i te reira i raro aˈe i te tumu parau “Hopea o te ao” e: “Te tiaturi ra e te haapii ra te Ekalesia Katolika e eita teie nei ao, mai ta te Atua i poiete na e mai ta ˈna e vai nei, e vai noa e a muri noa ˈtu.” Te faaite atoa ra te hoê haapiiraa ui Katolika apî i teie manaˈo: ‘Ua faataa-ê-na-hia e e mou to tatou ao.’ Mai te peu râ e e mou to tatou paraneta, eaha ˈtura ïa no te mau parau fafau bibilia o te hoê paradaiso fenua?

Te faahiti maitai ra te Bibilia i te hoê paradaiso no a muri aˈe i te fenua nei. A hiˈo na i te faataaraa a te peropheta Isaia i te fenua e te feia e parahi i reira: “E patu ratou i te fare, e na ratou iho e parahi; e na ratou e tanu i te ô  vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu; mai te mau mahana o te raau nei te mau mahana o to ˈu ra mau taata, e vai taiata te aho o to ˈu ra feia i maitihia i to te mau mea ta ratou i hamani.” (Isaia 65:21, 22) Ua papu i te mau ati Iuda, ta te Atua i fafau atu i teie mau parau, e e riro to ratou fenua—oia mau te fenua taatoa—ei paradaiso i te hoê mahana no te maitai mure ore o te huitaata.

Te haapapu ra te Salamo 37 i teie tiaturiraa. “Te feia mǎrû ra, e parahi ïa i te fenua.” (Salamo 37:11) Aita teie irava e faahiti ra i te tahi noa faahoˈiraa taime poto o te nunaa Iseraela i te Fenua tǎpǔhia. Te faataa ra tera noa salamo e: “E parahi te feia parau-tia i nia i te fenua, e parahi tamau â ratou i reira.” (Salamo 37:29) * A tapao e ia au i teie salamo, e riro te ora mure ore i te fenua nei ei haamauruururaa na “te feia mǎrû.” I roto i te hoê Bibilia Farani, te parau ra te hoê tatararaa o teie irava e “e auraa aano atu â” to te taˈo “feia mǎrû” “aita i roto i te mau huriraa; te vai ra tei ati, te feia e mauiui ra aore ra hamani-ino-hia no Yahweh [Iehova], te feia aau haehaa e auraro ra i te Atua.”

I nia i te fenua aore ra i nia i te raˈi?

I roto i ta ˈna Aˈoraa i nia i te mouˈa, ua fafau Iesu i te hoê mea o te haamanaˈo maira i te mau irava i faahitihia i nia nei: “E ao to tei mǎrû; e riro hoi ia ratou te fenua.” (Mataio 5:5) I ǒ nei â, e haamauruururaa mure ore te fenua na te feia haapao maitai. Ua faataa maitai râ Iesu i ta ˈna mau aposetolo e e haere oia e faaineine i te tahi parahiraa no ratou “i te fare o [to ˈna] Metua” e e ora ratou i nia i te raˈi e o ˈna. (Ioane 14:1, 2; Luka 12:32; Petero 1, 1:3, 4) E nafea ïa ia taa i te mau parau fafau o te mau haamaitairaa i nia i te fenua? Te tano noa ra anei te reira i teie tau, e no vai ma te reira?

Ia au e rave rau aivanaa bibilia, e auraa taipe noa to “te fenua” o ta Iesu Aˈoraa i nia i te mouˈa e o te Salamo 37. I roto i ta ˈna tatararaa i roto i te Bible de Glaire, ua tapao o Fulcran Vigouroux i roto i teie nau irava i “te hoê taipe no te raˈi e no te Ekalesia.” No Marie-Joseph Lagrange, te hoê taata maimi bibilia Farani, “e ere [teie haamaitairaa] i te hoê parau fafau e e riro iho â i te feia mǎrû te fenua i reira ratou e ora ˈi, i roto anei i teie nei faanahoraa aore ra i roto i te hoê faanahoraa maitai atu â, tera râ i te vahi, noa ˈtu teihea roa, oia hoi te basileia o te raˈi.” No te tahi atu, e “faaohiparaa taipe [te reira] i te mau faufaa o te fenua no te faataa i te raˈi.” No te tahi atu â, “e auraa taipe to te fenua tǎpǔhia o Kanaana e te faahohoˈa ra te reira i te nohoraa no nia, te basileia o te Atua, ta te feia mǎrû e fanaˈo mau â. Tera atoa te auraa o taua hohoˈa ra i roto i te Salamo 37 e i te tahi atu vahi.” E mea tia anei râ ia faaoti tatou e aita te mau parau fafau a te Atua e faahiti ra i te fenua materia?

Te hoê opuaraa mure ore no te fenua

I te omuaraa, ua taai-roa-hia te paraneta fenua i te opuaraa a te Atua no te taata. “Te mau raˈi ra, na Iehova ïa mau raˈi; area te fenua nei, ua horoa mai oia i te reira na te tamarii a te taata nei,” ta te fatu salamo ïa i papai. (Salamo 115:16) No reira, ua taaihia te opuaraa matamua a te Atua no te huitaata i te fenua, eiaha i te raˈi. Ua faaue na mua Iehova i na taata faaipoipo matamua e faaaano i te ô i Edene e ati aˈe te fenua. (Genese  1:28) E ere i te hoê opuaraa taime poto. Te haapapu ra Iehova i roto i ta ˈna Parau e e vai te fenua e a muri noa ˈtu: “Te ore nei te tahi ui, e te itea maira te tahi; area te fenua nei te vai noa nei â ïa.”—Koheleta 1:4; Paraleipomeno 1, 16:30; Isaia 45:18.

Aita roa ˈtu te mau parau fafau a te Atua i moe, o ˈna hoi Tei Teitei, e te haapapu ra oia e e tupu te reira. Ma te faaohipa i te ohuraa natura o te pape ei faahohoˈaraa, te faataa ra te Bibilia e e tupu iho â te mau parau fafau a te Atua: “Mai te ûa mau e topa nei, e mai te hiona, no nia mai i te raˈi ra, e aore i hoˈi faahou i reira; ua faararirari râ i te fenua ra, e ua faatupu ra, e ua faahotu mai hoi i ta ˈna, . . . oia atoa te parau [a te Atua] no roto i to ˈu nei vaha; e ore e hoˈi faufaa ore noa mai ia ˈu nei, e tupu râ tei opuahia e au ra; e noaa hoi te mea i faaue atu ai au ra.” (Isaia 55:10, 11) E fafau te Atua i te tahi mau mea i te taata. E nehenehe te tahi area tau e mairi hou taua mau parau fafau ra e tupu ai, eita râ te reira e moe. E “hoˈi” te reira ia ˈna ra a tupu atu ai tei parauhia anaˈe.

Ua “opuahia” mau â e Iehova e poiete i te fenua no te huitaata. I te hopea o te ono o te mahana poieteraa, ua parau oia e “mea maitai roa” te mau mea atoa. (Genese 1:31) E tuhaa te tauiraa i te fenua ei paradaiso mure ore o te opuaraa a te Atua aitâ i tupu atura. “E ore” râ te mau parau fafau a te Atua ‘e hoˈi faufaa ore noa mai ia ˈna ra.’ E tupu te mau parau fafau atoa o te hoê oraraa tia roa i nia i te fenua, i reira te taata e ora ˈi e a muri noa ˈtu ma te hau e te panoonoo ore.—Salamo 135:6; Isaia 46:10.

E tupu iho â te opuaraa a te Atua

I te hararaa to tatou na metua matamua o Adamu raua o Eva, ua fifihia maa taime te opuaraa matamua a te Atua e faariro i te fenua ei paradaiso. I muri aˈe i to raua faaroo-ore-raa, ua tiavaruhia raua i rapae au i te ô. Ua ere atura raua i te fanaˈoraa taa ê e apiti i te tupuraa o te opuaraa a te Atua ia parahi te taata tia roa i nia i te hoê fenua paradaiso. Ua faanaho râ te Atua i te mau mea ia tupu ta ˈna opuaraa. Mea nafea?—Genese 3:17-19, 23.

Ua tuea te tupuraa i Edene i to te hoê taata o te haamata i te patu i te hoê fare i nia i te hoê tâpû fenua maitai roa. A haamata ˈi oia i te tuu i te niu, e haere atu te hoê taata e vavahi i te niu. Eita te taata e faarue i ta ˈna opuaraa, e rave râ oia i te mau taahiraa ia oti roa te fare. Noa ˈtu e e haamâuˈaraa hau tei ravehia no taua ohipa hau ra, aita e feaaraa no nia i te papuraa o te opuaraa matamua.

Ua rave atoa te Atua i te mau faanahoraa ia tupu iho â ta ˈna opuaraa. I muri iti aˈe i te hararaa to tatou na metua matamua, ua faaite oia i te hoê tiaturiraa no to raua huaai—te hoê “huero” o te faaore i te ino i ravehia. Te tuhaa matamua o te huero ia au i taua parau tohu ra, o te Tamaiti a te Atua ïa, o Iesu, tei haere mai i te fenua e tei pûpû i to ˈna ora ei tusia no te hoo faahou mai i te huitaata. (Galatia 3:16, MN; Mataio 20:28) I to ˈna faatiaraahia mai no te haere i nia i te raˈi, ua riro Iesu ei Arii o te Basileia. Na mua, o Iesu te taata mǎrû e riro ia ˈna te fenua e oia atoa te feia haapao maitai maitihia o te faatiahia mai no te haere i nia i te raˈi e faatere atoa i roto i taua Basileia ra. (Salamo 2:6-9) I muri aˈe, e haapao mai taua faatereraa ra i te mau ohipa o te fenua ia tupu te opuaraa matamua a te Atua e taui i te fenua ei paradaiso. ‘E riro te fenua’ i te mau mirioni taata mǎrû i roto i te auraa e e haamaitaihia ratou i raro aˈe i te faatereraa a taua Basileia ra o Iesu Mesia e to ˈna mau hoa arii.—Genese 3:15; Daniela 2:44; Ohipa 2:32, 33; Apokalupo 20:5, 6.

“I te fenua nei, mai tei te raˈi atoa na”

Ua faahitihia taua faaoraraa ra e piti huru, i te raˈi e i te fenua, i roto i te hoê orama a te aposetolo Ioane. Ua ite oia i te mau arii i nia i  te mau terono i te raˈi, tei maitihia i rotopu i te mau pǐpǐ haapao maitai a te Mesia. Te parau maitai ra te Bibilia e “e faatere” taua mau hoa ra o te Mesia “ei arii i te fenua nei.” (Apokalupo 5:9, 10, MN) A tapao na i te tuhaa e piti huru o te tupuraa o te opuaraa a te Atua—te hoê fenua i haamau-faahou-hia i raro aˈe i te faatereraa a te hoê Basileia i te raˈi o Iesu Mesia e to ˈna mau taata aiˈa apiti. Maoti taua mau faanahoraa atoa ra a te Atua e haamau-faahou-roa-hia ˈi te Paradaiso i te fenua nei ia au i te opuaraa matamua a te Atua.

I roto i ta ˈna hohoˈa pure, ua parau Iesu i ta ˈna mau pǐpǐ ia pure ia tupu te hinaaro o te Atua “i te fenua nei, mai tei te [raˈi] atoa na.” (Mataio 6:9, 10; MN) E auraa anei ïa to teie parau mai te peu e e mou te fenua aore ra e taipe noa te fenua no te raˈi? E auraa atoa anei to te reira mai te peu e e haere pauroa te taata parau-tia i nia i te raˈi? I roto i te mau Papai, mai te faatiaraa o te poieteraa e tae roa ˈtu i te mau orama o te buka Apokalupo, mea maramarama maitai te hinaaro o te Atua no te fenua. Ia riro te fenua mai ta te Atua i opua na—te hoê paradaiso. Tera te hinaaro ta te Atua e fafau ra i te faatupu. Te pure nei te feia haapao maitai i nia i te fenua ia tupu taua hinaaro ra.

Te ora mure ore i nia i te fenua, tera ta te Atua Poiete ‘aore o ˈna e huru ê’ i opua na. (Malaki 3:6; Ioane 17:3; Iakobo 1:17) Hau atu i te hoê senekele i te maoro to teie vea Te Pare Tiairaa faataaraa i teie na huru e piti o te tupuraa o te opuaraa a te Atua. E nehenehe ïa tatou e taa i te mau parau fafau o te haamau-faahou-raa o te fenua faahitihia i roto i te mau Papai. Te ani nei matou ia oe ia hiˈopoa ˈtu â i tera tumu parau, ma te aparau atu i te hoê Ite no Iehova aore ra ma te farerei i te feia i nenei i teie vea.

[Nota i raro i te api]

[Hohoˈa i te api 4]

Te faahiti maitai ra te Bibilia i te haamauraa o te Paradaiso i te fenua a muri aˈe

[Hohoˈa i te api 7]

E auraa anei to te hohoˈa pure a Iesu mai te peu e e mou te fenua?