“No te hoê tamaroa e iva matahiti”

I TE mau taime atoa a haere atu ai te mau Ite no Iehova i te uputa o Wiesława, e ora ra i Poronia apatoa, e haamauruuru e e patoi o ˈna i te tauaparau ia ratou ma te faatura. I te hoê mahana, ua haere atu o Samuel e iva matahiti e to ˈna metua vahine i to ˈna uputa. I taua taime ra ua faaoti o Wiesława e faaroo i te poroi e ua farii i te hoê vea no nia i te hoê paradaiso i te fenua nei.

I te mea e te piri maira te Oroa haamanaˈoraa i te poheraa o Iesu Mesia, ua hinaaro o Samuel e titau manihini ia Wiesława i taua taime taa ê ra. No reira, ma te apeehia e to ˈna metua vahine, ua hoˈi faahou te tamaroa e farerei ia ˈna e te hoê parau titau-manihini-raa. I te iteraa o Wiesława i te faaahuraa maitai o te tamaroa, ua ani oia maa taime no te haere e oomo i te tahi ahu tano aˈe. I to ˈna hoˈiraa ˈtu, ua faaroo o ˈna ia Samuel, ua farii i te titau-manihini-raa, e ua ui: “O vau anaˈe te haere atu aore ra mâua ta ˈu tane?” Ua na ô faahou oia e: “Noa ˈtu e eita ta ˈu tane e haere, e haere atu vau. E na reira vau no oe, e Samuel.” Ua oaoa o Samuel, ua tapea hoi o ˈna i ta ˈna parau.

I te oreroraa parau o te Oroa haamanaˈoraa, ua parahi o Samuel i pihai iho ia Wiesława e ua faaite ia ˈna i te mau irava e tauaparauhia ra. Ua haaputapû te reira ia ˈna. Ua au o ˈna i te Oroa haamanaˈoraa e ua mauruuru no te mau manaˈo hohonu i faataa-ohie-hia. Ua putapû atoa oia i te fariiraa mahanahana e te maitai o te amuiraa. Mai reira mai, ua anaanatae atu â o Wiesława i te mau ohipa pae varua e ua haamata i te apiti tamau atu i te mau Ite no Iehova. Aita i maoro aˈenei, ua parau oia e: “Te haama ra vau e aita vau i faaroo ia outou na mua ˈˈe a haere mai ai outou i to ˈu uputa. E ia ite mai outou, ua faaroo vau i ta outou poroi no te hoê tamaroa e iva matahiti, no Samuel.”

Mai ia Samuel i Poronia, e rave rahi Ite apî no Iehova e arue nei i te Atua na roto i te parau e te haerea maitai. Mai te peu e e taurearea outou, e nehenehe atoa outou e tauturu i te mau taata haavare ore ia faaite i te anaanatae no te mau faufaa pae varua papu.