Daniel e ta ˈna tareta tairururaa

UA AVAU Iesu i te mau aratai haapaoraa faahua parau-tia tei riri i to ratou iteraa i te mau tamaroa apî i te arueraa i te Atua i mua i te taata. Ma te tano, ua ui atu Iesu: “Aitâ outou i taio, Ua noaa ia oe te haamaitai no roto i te vaha o te tamarii rii e te aiû rii?”—Mataio 21:15, 16.

Na Daniel, e 6 matahiti no te hoê amuiraa reo Rusia i Heremani, e haapapu ra e te arue noa nei te feia apî ia Iehova. Ua haere oia e to ˈna mama e to ˈna tuaana i te hoê tairururaa a te mau Ite no Iehova i Duisburg. A tahi ra ratou a haere ai i te hoê tairururaa rahi mai tera. Mea matau-ore-hia te mau mea atoa: te hotera, te nahoa taata rahi, te parahi-noa-raa e toru mahana, te bapetizoraa, e te darama atoa. E o Daniel? Mea faahiahia to ˈna haerea.

I te Monire i muri aˈe i te tairururaa, i te fare, ua tia oioi o Daniel i nia no te haere i te haapiiraa tamahou. Eaha râ to nia iho i to ˈna pereue? Te tareta ïa e faataa ra ia ˈna ei tia o te tairururaa! Ua parau to ˈna mama ia ˈna e: “Ua oti te tairururaa. I teie mahana, e nehenehe oe e tatara i te tareta.” Ua na ô râ Daniel e: “E hinaaro vau ia ite te taata atoa ua haere au ihea e eaha ta ˈu i haapii mai.” No reira, i te mahana taatoa i te haapiiraa tamahou, ua tamau noa o ˈna i ta ˈna tareta ma te oaoa rahi. I to ta ˈna orometua haapii aniraa ia ˈna no nia i te reira, ua faataa ˈtu oia i te porotarama o te tairururaa.

Ma te na reira, te pee ra Daniel i te hiˈoraa o te mau tausani tamaroa e tamahine o tei arue ia Iehova i mua i te taata i te roaraa o te mau senekele.