E nehenehe mau anei tatou e ite i te Atua?

“Teie hoi te ora mure ore, ia ite ratou . . . i te atua mau ra.”—Ioane 17:3.

“AUÊ te rahi hau ê atu o te paari e te ite o te Atua e!” ta te aposetolo Paulo ïa i parau. Ua na ô faahou oia e: “E te imiraa ore o tana faaauraa, e tana mau haerea i te itea ore ia imi e!” (Roma 11:33) E faaoti anei tatou na roto i teie mau parau e eita e noaa i te taata te paari e te ite o te Atua, oia hoi eita e nehenehe e ite ia ˈna e ta ˈna mau opuaraa?

Te tiaturi ra te tahi feia feruri i te pae faaroo e eita e nehenehe e ite i te Atua. Te parau ra The Encyclopedia of Religion no nia i tera manaˈo: “Tei nia ˈˈe te Atua i te mau mea atoa ta ˈna e nehenehe e ite. . . . Eita e nehenehe e mairi i te iˈoa e e faataa i te Atua. Te vai ra te mau taotiaraa o te mau iˈoa aore ra auraa atoa, e to nia ˈˈe te Atua . . . i te reira. . . . E ere o ˈna i te hoê tumu o te ite, no te mea to nia ˈˈe o ˈna i te ite.” *

Ia au i te vea Newsweek, e rave rahi taata i roto i te mau totaiete a te ao o te hinaaro i “te hoê huru orthodoxe apî” e inaha te tiaturi ra e “te vai ra hoê noa parau mau, e teie parau mau oia hoi aita e parau mau.”

Mea rahi noâ o tei faaea ma te mau uiraa aita i pahonohia ˈtura no nia i te tumu o te oraraa. Ua hiˈopoa ratou i te mau fifi o te veve, te maˈi, e te haavîraa uˈana o te haamauiui i te aau. No ratou, e nehenehe paha te papu ore o te oraraa e faainoino roa. E hinaaro puai paha ratou e ite i te mau pahonoraa, ia ore râ e itea ia ratou, e faaoti paha ratou e aita e pahonoraa. Ei faahopearaa, e rave rahi o tera mau taata o te faarue i te haapaoraa e o te imi i te haafatata ˈtu ia ratou i te Atua—mai te peu iho â e te tiaturi noa ra ratou e te vai mau ra o ˈna.

Te manaˈo o te Bibilia

E mea tia ia anaanatae te feia e manaˈo maitai to ratou no nia i te Bibilia e o te farii noa ra ia Iesu Mesia ei Auvaha no te Atua, i te ite i te manaˈo o te Bibilia. Te haamanaˈo ra paha oe e ua parau Iesu i te hoê taime no na purumu e piti, “te atea nei . . . te uputa e te aano nei te eˈa e tae atu ai i te pohe” e “te piri  . . . o te eˈa e tae atu ai i te ora.” Ua faataa o ˈna e nafea e itehia ˈi te feia o te haere ra na nia i na purumu taitahi ma te parau e: “E ite outou ia ratou i to ratou hoturaa.” I teihea ïa huru hotu? Eiaha i ta ratou e parau, tera râ i ta ratou e rave mai ta Iesu i faataa: “E ore te feia e parau mai ia ˈu ra e, e te Fatu, e te Fatu, e hope paatoa i te tae i te basileia ra o te ao, o te taata râ i haapao i te hinaaro o tau Metua i te ao ra.” Eita e navai te tiaturiraa i te Atua. E mea tia ia rave tatou i to te Atua hinaaro. Ma te tano roa, e mea tia na mua roa, ia noaa ia tatou te ite mau i to te Atua hinaaro.—Mataio 7:13-23.

Ua faaite maitai o Iesu e e nehenehe e noaa i te taata te ite i te Atua. Ua parau oia e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Papu maitai, e nehenehe e noaa ia tatou te paari e te ite ta te Atua e faaite ra—mai te peu noa râ e faaitoito hua tatou i te imi i taua mau mea ra. Tera râ, te ô a te Atua na te feia o te na reira o te ora mure ore ïa, e mea hoona mau ïa teie imiraa.

[Nota i raro i te api]

[Hohoˈa i te api 4]

Ua parau o Iesu e e aratai te hoê eˈa piri i te ora