Manaˈo faufaa o te Sire a Solomona
Mea ora te parau a Iehova
Manaˈo faufaa o te Sire a Solomona
“MAI te lili i roto i te mau raau taratara ra, oia atoa tau here i roto i te mau vahine atoa ra.” “Mai te lemoni i ropu i te mau raau atoa i te vahi uru raau ra, oia atoa tau here nei i roto i te mau taata apî atoa ra.” “O vai teie [vahine] e hiˈo nei mai te poipoi ra, mai te marama te teatea, mai te mahana te anaana?” (Sire a Solomona 2:2, 3; 6:10) Auê teie mau irava o te buka bibilia te Sire a Solomona i te faahiahia roa e! E pehepehe tei î roa i te auraa e te mau parau pehepehe nehenehe te buka taatoa i parauhia ˈi te reira “te sire hau ê,” aore ra maitai roa ˈˈe.—Sire a Solomona 1:1.
Papaihia e Solomona, arii o Iseraela i tahito ra, peneiaˈe i te area 1020 H.T.T., i te tuhaa matamua o ta ˈna na matahiti ariiraa e 40, e aamu teie himene o te here o te hoê taurearea tiai mamoe raua te hoê potii no te mataeinaa, te hoê Sulami. I rotopu i te tahi atu mau taata i faahitihia i roto i te pehepehe, te vai ra te metua vahine e te mau taeae o te potii, “te mau tamahine i Ierusalema [te mau vahine o te aorai],” e “te mau tamahine i Ziona [te mau vahine no Ierusalema].” (Sire a Solomona 1:5; 3:11) E tautooraa no te hoê taata taio i te Bibilia ia ite o vai ma te mau taata atoa e paraparau ra i roto i te Sire a Solomona, e nehenehe râ na roto i te hiˈopoaraa eaha ta ratou e parau aore ra eaha te parauhia no ratou.
Ei tuhaa o te Parau a te Atua, e faufaaraa rahi to te poroi o te Sire a Solomona no e piti tumu. (Hebera 4:12) A tahi, e haapii mai te reira eaha te here mau i rotopu i te hoê tane e te hoê vahine. A piti, e faahohoˈa te himene i te huru here e vai ra i rotopu ia Iesu Mesia e te amuiraa o te mau Kerisetiano faatavaihia.—Korinetia 2, 11:2; Ephesia 5:25-31.
EIAHA E TAMATA I TE “FAAARA I TAU HERE NEI”
“Ia hôˈi mai oia i te hôˈi o tana vaha: o to hinaaro tei maitai rahi i to te uaina ra.” (Sire a Solomona 1:2) E haamata te aparauraa i roto i te Sire a Solomona na roto i teie mau parau a te potii haehaa no te mataeinaa o tei arataihia i te tiahapa o te arii Solomona. Mea nafea to ˈna taeraa i reira?
“Ua faahape mai te mau tamarii a tau metua vahine ia ˈu,” ta ˈna ïa e parau ra. “Ua tuu maira i te tiai i te mau ô vine ra ia ˈu.” Ua faahape to ˈna mau taeae ia ˈna no te mea ua ani te taurearea tiai mamoe ta ˈna e here ra ia haere na muri ia ˈna i te hoê mahana maitai i te tau uaaraa tiare. Ia ore oia e haere, e faaue ratou ia ˈna ia ara i ‘te mau alope rii e tuino ra i te mau vine.’ E aratai teie ohipa ia ˈna ia haafatata ˈtu i te tiahapa o Solomona. E itehia to ˈna haviti a haere ai oia i raro “i roto i te ô aguna” e ia ˈna i arataihia i roto i te puhapa.—Sire a Solomona 1:6; 2:10-15; 6:11.
A mihi ai te potii i ta ˈna tiai mamoe here, e parau te mau vahine o te aorai ia ˈna ia ‘haere na te eˈa o te nǎnǎ’ e hiˈo ia ˈna. Eita râ Solomona e faatia ia ˈna ia haere. Ei faaiteraa i to ˈna umere no to ˈna haviti, e fafau oia ia ˈna i ‘te hei auro e te mau poe ario atoa ra.’ Aita râ te potii i putapû. E tomo mai te taurearea tiai mamoe i roto i te puhapa o Solomona, e imi ia ˈna, a na ô atu ai oia e: “Inaha, e nehenehe to oe, e au here e. Inaha, e nehenehe to oe.” E aˈo te potii i te mau vahine o te aorai e: “Eiaha outou e faahitimaue, eiaha e faaara i tau here nei, e ia hinaaro noa oia ihora.”—Sire a Solomona 1:8-11, 15; 2:7; 3:5.
Uiraa bibilia pahonohia:
1:2, 3—No te aha te haamanaˈoraa i te mau tapao o te here a te taurearea tiai mamoe e au ai i te uaina e to ˈna iˈoa i te monoˈi maitai? Mai te uaina o te faaoaoa i te aau o te hoê taata e te niniiraa o te monoˈi i nia i te upoo o te tamǎrû, e haapuai e e tamahanahana te here o te taurearea e to ˈna iˈoa i te potii. (Salamo 23:5; 104:15) Oia atoa, e ite te mau Kerisetiano mau, te feia faatavaihia iho â râ, i te puai e te faaitoitoraa i te faaiteraa i te here ta Iesu Mesia i faaite i nia ia ratou.
1:5—No te aha e faaauhia ˈi te iri ravarava o te potii no te mataeinaa i “te mau tiahapa i Kedara”? Mea rahi te faaohiparaa o te huruhuru puaaniho, o tei ravehia hoi no te hamani i te ahu. (Numera 31:20) Ei hiˈoraa, ua faaohipahia no te hamani i “te ahu pu huruhuru puaaniho ra, ei tapoi i nia iho i te sekene.” (Exodo 26:7) Mai te mau fare ie atoa o te mau Bédouins i teie mahana, ua hamanihia paha te mau tiahapa i Kedara i te huruhuru ereere o te puaaniho.
1:15—Eaha te auraa o ta te taurearea tiai mamoe parau: “E mata uuairao hoi to oe ra”? Te parau nei te taurearea tiai mamoe e e mata mǎrû e te aiai to to ˈna hoa potii ia hiˈohia, mai to te uuairao ra.
2:7; 3:5—No te aha te mau vahine o te aorai i aˈohia ˈi na roto i “te mau zabi e te mau aili o te aru ra”? Ua tapaohia te mau zabi e te mau aili no to ratou ieie e te nehenehe. Oia mau, te aˈo nei te Sulami na roto i te mau mea atoa oia hoi te ieie e te haviti eiaha e tamata i te faaara i to ˈna here.
Haapiiraa no tatou:
1:2; 2:6. Mea tano paha te mau tapao viivii ore o te here i te roaraa o te haamatauraa. E mea tia râ ia ara na hoa e e faaiteraa o te here mau te reira e e ere i te hinaaro uˈana viivii o te aratai i te taatiraa morare ore.—Galatia 5:19.
1:6; 2:10-15. Aita te mau taeae o te Sulami i tuu i to ratou tuahine ia haere na muri i ta ˈna here i te hoê vahi moemoe i nia i te mau mouˈa e ere râ no te mea e potii morare ore oia aore ra aita to ˈna e manaˈo turai tano. Ua rave râ ratou i te hoê ravea arairaa ia ore oia e topa i roto i te hoê tupuraa o te nehenehe e faahema ia ˈna. Te haapiiraa no te mau tane e vahine e haamatau ra, oia ïa ia ape ratou i te mau vahi moemoe e tia ˈi.
2:1-3, 8, 9. Noa ˈtu te haviti, ua hiˈo te potii Sulami ia ˈna iho ei mea haapeu ore mai te hoê “tiare . . . no Sarona [e tiare matauhia]” o te fenua papu i te pae tahatai. No to ˈna haviti e to ˈna haapao maitai ia Iehova, ua manaˈonaˈo te taurearea tiai mamoe ia ˈna mai “te lili i roto i te mau raau taratara ra.” E eaha te nehenehe e parau no ˈna? No te mea mea haviti te taurearea tiai mamoe, no te potii Sulami, e au ïa oia i “te zabi.” E taurearea mǎtaˈu e te taiva ore atoa paha ia Iehova. Te na ô ra te Sulami e: “Mai te lemoni [o te horoa i te mǎrûmǎrû e te maa] i ropu i te mau raau atoa i te vahi uru raau ra, oia atoa tau here nei i roto i te mau taata apî atoa ra.” E ere anei te faaroo e te taiva ore i te Atua te mau huru maitatai e au ia imi i ǒ te hoê hoa e opuahia ra e faaipoipo?
2:7; 3:5. Aita te potii no te mataeinaa i faahinaaro ia Solomona. E aˈo atoa oia i te mau vahine o te aorai eiaha e tamata i te faaara i to ˈna here no te tahi atu taata i te taurearea tiai mamoe. E ore e tia e eita atoa e tano ia faahinaaro i te tahi iho taata. E mea titauhia ia hiˈo noa te hoê Kerisetiano taa noa e hinaaro ra e faaipoipo i te hoê tavini taiva ore ia Iehova.—Korinetia 1, 7:39.
“E HIˈO OUTOU I TE VAHINE SULAMI I TE AHA?”
Te haere mai nei “mai te medebara mai” te tahi mea “mai te mau pou au auahi.” (Sire a Solomona 3:6) Eaha ta te mau vahine o Ierusalema e ite ra a haere ai ratou e hiˈo? Te hoˈi nei Solomona e to ˈna mau tavini i te oire! E te afai ra te arii i te potii Sulami na muri ia ˈna.
Te apee ra te taurearea tiai mamoe i te potii e e itea oioi ia ˈna te hoê ravea no te farerei ia ˈna. A haapapu ai oia i to ˈna here ia ˈna, e faaite te potii i to ˈna hinaaro e faarue i te oire ma te parau e: “Ia ao ra ia pee ê atu te maru, ei nia vau i teie nei mouˈa mura, i teie nei aivi libano.” E ani oia i te tiai mamoe ‘ia tomo mai i roto i ta ˈna nei ô, e ia amu i te maa maitatai no reira.’ E pahono oia e: ‘E tae mai au i roto i tau ô nei, e tau tuahine, e tau hoa e.’ E parau te mau vahine o Ierusalema ia raua e: “E amu, e [te] mau hoa e, e inu hoi; oia â ïa, e inu hua [i te mau tapao o te] here e!”—Sire a Solomona 4:6, 16; 5:1; MN.
I muri aˈe i te faatiaraa i te hoê moemoeâ i te mau vahine o te aorai, e na ô te potii Sulami ia ratou e: “Te pohe nei au i te [here].” E ui ratou: “Eaha te vahi iti hau i taua here no oe ra i to te tahi ê ra?” Teie ta ˈna e pahono: “E teatea to taua here no ˈu nei e te uteute hoi, oia tei hau ê i te taata atoa e hoê ahuru i te tausani.” (Sire a Solomona 5:2-10; MN) No to Solomona faaea ore i te umere ia ˈna, e pahono oia ma te haehaa e: “E hiˈo outou i te vahine Sulami i te aha?” (Sire a Solomona 6:4-13) Ma te hiˈo i te reira ei ravea e noaa ˈi to ˈna here ia ˈna, e ore te arii e faaea i te haapopou atu â ia ˈna. E vai aueue ore râ te potii i roto i to ˈna here i te taurearea tiai mamoe. E tuu Solomona ia ˈna ia hoˈi i te fare i te pae hopea.
Uiraa bibilia pahonohia:
4:1; 6:5—No te aha i faaauhia ˈi te rouru o te potii i “te nǎnǎ puaaniho”? Te horoa ra te faaauraa i te manaˈo e mea anaana e mea meumeu to ˈna rouru mai te huruhuru ereere o te puaaniho.
4:11—Eaha te nehenehe e parau no nia i ‘te vaha’ o te Sulami ‘o te topata noa mai te meli’ e ‘tei raro aˈe te meli e te û i to ˈna arero’? E mea au roa e mea monamona aˈe te pata meli i te meli i tuuhia i rapae. Te haamahitihiti ra teie faaauraa, oia atoa te manaˈo e tei raro aˈe te meli e te û i te arero o te potii, i te maitai e te au o te mau parau e faahitihia ra e te Sulami.
5:12—Eaha te manaˈo i roto i te mau parau “o na mata ra mai to te uuairao ïa ia horoihia i te û ra”? Te faahiti nei te potii i te mata nehenehe o ta ˈna here. Peneiaˈe te faaau nei oia ma te pehepehe i te orio mata ereere e haaatihia ra e te orio uouo o to ˈna mata i te ninamu marehurehu o te uuairao e horoihia ra i te û.
5:14, 15—No te aha e faataahia ˈi te rima e te avae o te tiai mamoe mai teie? E au ra e te faahiti nei te potii i te manimani rima o te tiai mamoe mai te tapea auro e to ˈna maiuu mai te tarisisa ïa. Te faaau ra oia i to ˈna avae i “te pou sisa” no te mea mea puai e mea nehenehe hoi.
6:4—No te aha te potii i faaauhia ˈi ia Tireza? Ua haruhia teie oire Kanaana e Iosua e i muri aˈe i te tau o Solomona ua riro mai ei oire pu matamua o na opu hoê ahuru o te basileia no apatoerau o Iseraela. (Iosua 12:7, 24; Te mau arii 1, 16:5, 6, 8, 15) “E au ra e e oire nehenehe roa paha,” ta te hoê ïa buka e parau ra “no reira e faahitihia ˈi te reira i ǒ nei.”
6:13, MN—Eaha “te ori o na pǔpǔ e piti ra”? E nehenehe atoa teie parau e hurihia ei “ori a Mahanaima.” Tei te pae hitia o te râ o te pape ra Ioridana te oire i mairihia tera iˈoa, tapiri atu i te anavai o te peho o Iaboka. (Genese 32:2, 22; Samuela 2, 2:29) “Te ori o na pǔpǔ e piti ra,” o te tahi ïa ori e orihia i taua oire ra o tei taaihia i te hoê oroa.
7:4—No te aha Solomona e faaau ai i te aˈî o te potii Sulami i “te pare sena”? I na mua ˈtu, ua umerehia te potii ra e: “E au to aˈî i te pare o Davida.” (Sire a Solomona 4:4) E mea roa te hoê pare, e mea manina te sena. Ua maere Solomona i te roa e te manina o te aˈî o te potii ra.
Haapiiraa no tatou:
4:1-7. Na roto i te patoiraa i te mau ravea umeraa i te aau a Solomona, ua haapapu te Sulami, noa ˈtu te huru tia ore, i to ˈna taiva ore. Na to ˈna puai morare ïa i faariro ia ˈna ei mea haviti atu â i te pae tino. E parau mau atoa tera no te mau vahine Kerisetiano e tia ˈi.
4:12. Mai te hoê ô nehenehe haaatihia e te hoê aua aore ra te hoê patu mea na roto noa i te hoê uputa i ponaohia e nehenehe ai e tomo atu, ua faaite te potii Sulami i to ˈna here rahi i te tane anaˈe ta ˈna e faaipoipo. Auê ïa hiˈoraa maitai roa no te mau vahine e tane Kerisetiano faaipoipo ore e!
‘TE AUAHI RAHI URA A IA RA’
“O vai teie [vahine] e haere mai mai te medebara, tiaturi noa ˈi i nia i tei herehia e ana ra?” ta te mau taeae o te Sulami ïa e ui a ite ai ratou ia ˈna i te hoˈiraa mai i te fare. Tau taime i na mua ˈtu, ua parau te hoê o ratou e: “Ia faaauhia oia i te aua ra, e patu tatou i te tahi pare ario i nia iho; e ia faaauhia oia i te uputa, e opani tatou i te raau ra i te arezi.” No te mea ua tamatahia te here e te taiva ore o te Sulami, e na ô oia e: “O vau iho nei te aua, e tau pue û nei, e pare ïa; i itehia mai ai au i mua i tana mata.”—Sire a Solomona 8:5, 9, 10.
O “te auahi rahi ura [a Ia] ra” te here mau. No te aha? No ǒ mai teie here ia Iehova ra. O oia Tei tuu i roto ia tatou i te ravea no te here. E auahi rahi ura te reira eita te ura e pohe. E faahohoˈa te Sire a Solomona ma te nehenehe roa e e nehenehe te here i rotopu i te hoê tane e te hoê vahine e ‘uˈana rahi ma te aueue ore mai to te pohe ra.’—Sire a Solomona 8:6.
E haamaramarama atoa te sire hau ê a Solomona i te taairaa e vai ra i rotopu ia Iesu Mesia e te mau melo o ta ˈna “vahine” i nia i te raˈi. (Apokalupo 21:2, 9) E hemo to Iesu here i te mau Kerisetiano faatavaihia i te here atoa i rotopu i te hoê tane e te hoê vahine. E vai aueue ore noa te mau melo o te pǔpǔ o te vahine i roto i to ratou paieti. Ua horoa Iesu ma te here i to ˈna ora no te mau “mamoe ê atu” atoa. (Ioane 10:16) E nehenehe ïa te taatoaraa o te mau taata haamori mau e pee i te hiˈoraa o te here e te paieti aueue ore o te Sulami.