Te anetimesia i faaitehia

E NAFEA oe e paruru ai ia oe iho ua ite anaˈe oe e te tairi ra te hoê maˈi pohe parare i to oe vahi? E haapuai atoa oe i to oe ravea parururaa e eita oe e tapiri i te feia e maˈi pee to ratou. E mea tia ia na reira atoa tatou i te auraa pae varua. Te na ô maira te mau Papai e “tei te ao mai nei â” te anetimesia. (Ioane 1, 4:3) Ia hinaaro tatou e ape i te “haapê,” e mea tia ia ite tatou i te “feia maˈi” e ia ape atu. Auaa râ, te haamaramarama ra te Bibilia i tera tumu parau.

Te auraa o te parau “anetimesia” oia hoi “patoi (aore ra mono) i te Mesia.” I roto i to ˈna auraa rahi, te faahiti ra tera parau i te feia atoa o te patoi aore ra o te parau ra ma te haavare e o ratou te Mesia aore ra to ˈna mau tia. Ua parau o Iesu iho e: “E ere oia i to ˈu ra, o to ˈu ïa enemi [aore ra anetimesia]; e o tei ore i haaputu atoa i ǒ nei ia ˈu nei, ua haapurara ïa.”—Luka 11:23.

Oia mau, ua papai o Ioane no nia i te anetimesia hau atu i te 60 matahiti i muri aˈe i te poheraa o Iesu e te faatiaraahia no te ora i nia i te raˈi. No reira, e mea tia ia taahia te mau ohipa a te anetimesia na roto i te faahopearaa o te reira i nia i te mau pǐpǐ taiva ore a Iesu i nia i te fenua.—Mataio 25:40, 45.

E patoi te anetimesia i te mau pǐpǐ a te Mesia

Ua faaara o Iesu i ta ˈna mau pǐpǐ e e riri te rahiraa o te ao ia ratou. Ua parau oia e: “E pûpû . . . ratou ia outou no te pohe, e taparahi pohe roa . . . ia outou, e e ririhia outou e te mau fenua atoa i to ˈu nei iˈoa. E tupu hoi te peropheta haavare e rave rahi, e rave rahi te haavarehia e ratou.”—Mataio 24:9, 11.

I te mea e e hamani-ino-hia te mau pǐpǐ a Iesu “i to [Iesu] nei iˈoa,” e anetimesia mau te feia hamani ino, oia  hoi e patoi ratou i te Mesia. E anetimesia atoa te mau “peropheta haavare,” e Kerisetiano hoi vetahi o ratou na mua ˈˈe. (Ioane 2, 7) ‘Ua haere atura teie anetimesia e rave rahi,’ ta Ioane ïa i papai, “mai roto atu ia tatou nei, e ere râ ratou i to tatou; ahiri hoi ratou no tatou ra, e tia â ïa i ǒ tatou nei.”—Ioane 1, 2:18, 19.

Te faaite maitai ra te mau parau a Iesu e a Ioane e e ere te anetimesia i te hoê anaˈe taata mea rahi râ te anetimesia. Hau atu â, i te mea e e peropheta haavare ratou, hoê o ta ratou mau fa matamua o te haavareraa ïa i te pae faaroo. Eaha vetahi o ta ratou mau ravea?

Te haaparareraa i te haavare i te pae faaroo

Ua faaara te aposetolo Paulo i to ˈna hoa ohipa ia Timoteo ia ara i te mau haapiiraa a te mau apotata, mai ia Humenaio e o Phileto, e ‘aamu ta ratou parau mai te maˈi aamu ra.’ Ua parau faahou o Paulo e: “O tei ohipa ê aˈenei i te parau mau, i te mârôraa e, ua oti te tia-faahou-ra; e ua faatiopa roa i te faaroo o te tahi pae ra.” (Timoteo 2, 2:16-18) E au ra e ua haapii o Humenaio e o Phileto e e parau taipe te tia-faahou-raa e ua faatia-aˈena-hia te mau Kerisetiano i te auraa pae varua. Parau mau, e ora mai te hoê taata ia riro mai oia ei pǐpǐ mau a Iesu i te hiˈoraa a te Atua, mai ta Paulo iho i parau maitai. (Ephesia 2:1-5) Tera râ, ua haavahavaha te haapiiraa a Humenaio e a Phileto i te parau fafau a Iesu o te tia-faahou-raa mau mai te pohe mai i raro aˈe i te faatereraa a te Basileia o te Atua.—Ioane 5:28, 29.

I muri aˈe, ua faatupuhia te mau manaˈo o te hoê tia-faahou-raa taipe noa e te hoê pǔpǔ tei parauhia te mau gnostiques. Ma te tiaturi e no roto mai paha tera ite (gnoʹsis na roto i te reo Heleni) i te huru miterio, ua amui te mau gnostiques i te Kerisetianoraa apotata, te philosophia Heleni e te miterio no Hitia o te râ. Ei hiˈoraa, ua tiaturi ratou e mea ino te mau mea  pae tino atoa, e no tera tumu, aita o Iesu i rave i te tino iˈo tera râ e hohoˈa tino taata noa to ˈna—te hoê tiaturiraa ïa o te parauhia docétisme. Mai ta tatou i ite mai, tera mau â ta te aposetolo Ioane i faaara e ara.—Ioane 1, 4:2, 3; Ioane 2, 7.

Te tahi atu haavare tei hamanihia tau senekele i muri aˈe, o te haapiiraa ïa o tei parauhia te Toru tahi moˈa, o te parau ra e e Atua Manahope o Iesu e e Tamaiti a te Atua atoa. Te parau ra te orometua haapii o Alvan Lamson i roto i ta ˈna buka The Church of the First Three Centuries no nia i te haapiiraa o te Toru tahi e “e ere roa ˈtu no roto mai i te mau Papai ati Iuda e Kerisetiano; ua fa mai e ua amuihia ˈtu i te Kerisetianoraa, maoti te mau Metua i turu ia Platon.” O vai ma teie mau “Metua i turu ia Platon”? O te mau ekalesiatiko apotata ïa o tei au roa i te mau haapiiraa a te philosopho Heleni etene o Platon.

O te amuiraahia ˈtu te Toru tahi te ohipa rahi roa a te anetimesia, ua faariro hoi teie haapiiraa i te Atua ei miterio e ua haapouri i to ˈna taairaa e te Tamaiti. (Ioane 14:28; 15:10; Kolosa 1:15) A feruri noa na, e nafea te hoê taata ‘e haafatata ˈtu ai i te Atua,’ mai tei faaitoitohia e te mau Papai, mai te peu e e miterio te Atua?—Iakobo 4:8.

Apitihia mai e te taa ore, e rave rahi taata huri i te Bibilia o tei iriti i te iˈoa o te Atua ra o Iehova i roto i ta ratou huriraa, noa ˈtu e te vai ra te reira hau atu i te 7 000 taime i roto i te papai tumu! Papu maitai e e faatura ore rahi i to tatou Atua Poiete e i ta ˈna Parau faaurua te tamataraa i te faariro i te Atua Manahope eiaha noa ei mea miterio, tera atoa râ ei mea miterio iˈoa ore. (Apokalupo 22:18, 19) Hau atu â, e ofati te monoraa i te iˈoa o te Atua ma te mau iˈoa toroa mai te Fatu e te Atua i te hohoˈa pure a Iesu, o te na ô ra e: “Ia raa to oe iˈoa.”—Mataio 6:9.

Te patoi ra te mau anetimesia i te Basileia o te Atua

Te ohipa ra iho â te mau anetimesia i te roaraa o te “anotau hopea,” te tau ta tatou e ora nei. (Timoteo 2, 3:1) Te hoê fa matamua a teie mau haavare o teie tau o te haavareraa ïa i te mau taata no nia i te tuhaa a Iesu ei Arii o te Basileia o te Atua, te hoê faatereraa i nia i te raˈi o te fatata i te faatere i nia i te fenua taatoa.—Daniela 7:13, 14; Apokalupo 11:15.

Ei hiˈoraa, te haapii nei te tahi mau aratai haapaoraa e e huru i roto i te aau o te taata te Basileia o te Atua, aita te reira i roto i te mau Papai. (Daniela 2:44) Te parau ra te tahi atu e te ohipa ra te Mesia na roto i te mau faatereraa e faanahoraa a te taata. Ua parau râ o Iesu e: “E ere i to teie nei ao to ˈu basileia.” (Ioane 18:36) Oia mau, o Satani eiaha râ te Mesia “te arii o teie nei ao” e “te atua o teie nei ao.” (Ioane 14:30; Korinetia 2, 4:4) Te faataa ra te reira no te aha Iesu e fatata roa ˈi i te faaore i te mau faatereraa atoa a te taata atoa e no te aha o ˈna anaˈe te riro ei Faatere i te fenua. (Salamo 2:2, 6-9; Apokalupo 19:11-21) Te pure ra te mau taata no te reira ia faahiti aau ratou i te Pure a te Fatu, o te na ô ra e: “Ia tae to oe ra hau. Ia haapaohia to oe hinaaro i te fenua nei.”—Mataio 6:10.

No te mea te turu ra ratou i te mau faanahoraa poritita o teie ao, e rave rahi aratai haapaoraa o tei patoi, o tei hamani ino atoa i te feia o te faaite ra i te parau mau no nia i te Basileia o te Atua. Ma te anaanatae, te faahiti ra te buka bibilia o te Apokalupo i te hoê vahine faaturi taipe—o “Babulonia Rahi”—i te “taeroraa i te toto o te feia moˈa ra, e te toto o te mau ite no Iesu.” (Apokalupo 17:4-6) Te rave atoa ra o ˈna i te faaturi i te pae varua ma te turu i “te mau arii,” aore ra te mau faatere poritita, o te fenua a fanaˈo atu ai i te haamaitairaa ei faahoˈiraa. O te mau haapaoraa hape o teie ao anaˈe ïa tera vahine taipe. E tuhaa rahi o ˈna o te anetimesia.—Apokalupo 18:2, 3; Iakobo 4:4.

‘E faaanoenoe te anetimesia i te tariˈa’

Hau atu â i te patoiraa i te parau mau bibilia, e rave rahi o tei parauhia Kerisetiano o tei patoi i te mau ture aveia bibilia o te haerea no te morare matauhia. Ua tohu te Parau a te Atua i teie  tupuraa ma te parau e: “Te vai atura . . . te tau e ore ai ratou [te mau taata e faahua tavini nei i te Atua] e farii ai i te parau mau, no te anoenoe ra o to ratou tariˈa, e haaputu ïa ratou i te orometua i au i to ratou iho hinaaro.” (Timoteo 2, 4:3) Ua faataa-atoa-hia tera feia taviri a te haapaoraa ei ‘aposetolo haavare, rave ohipa haavare, i te faahua aposetoloraa na te Mesia.’ Te na ô faahou ra te Bibilia e: “E faaauhia to ratou hopea i ta ratou ohipa.”—Korinetia 2, 11:13-15.

Te vai ra i roto i ta ratou mau ohipa te “haerea taiata,” o te haavahavaha roa i te mau faaueraa tumu morare teitei. (Petero 2, 2:1-3, 12-14, MN) Aita anei tatou e ite ra i te maraaraa rahi o te mau aratai haapaoraa e ta ratou mau pǐpǐ o te farii ra—aore ra o te faatia ra—i te mau peu Kerisetiano ore, mai te peu mahu e te taatiraa pae tino i rapaeau i te faaipoiporaa? A rave na maa taime no te faaau i tera mau manaˈo e huru oraraa fariihia o tei parare i ta te Bibilia e parau ra i roto i te Levitiko 18:22; Roma 1:26, 27; Korinetia 1, 6:9, 10; Hebera 13:4; e Iuda 7.

‘E tamata i te mau parau faaurua ra’

Ia au i tei faahitihia mai nei, e mea titauhia ia pee tatou i te mau parau a te aposetolo Ioane eiaha ia tâuˈa ore aore ra ia haafaufaa ore i ta tatou mau tiaturiraa faaroo. Te faaara ra o ˈna e: “Eiaha e faaroo atoa ˈtu i te mau [parau faaurua] atoa e tamata râ i taua mau [parau faaurua] ra, i te itearaa e, no ǒ i te Atua ra, no te mea e rave rahi te peropheta haavare i reva ˈtu na na te ao nei.”—Ioane 1, 4:1.

A rave na i te hiˈoraa maitai o te tahi mau taata “maitai mau” o tei ora i te oire o Berea i te senekele matamua. “Ua farii noa” ratou “i te parau ma te aau mahora, e te imiraa i te parau i papaihia ra i te mau mahana atoa hoi i taua parau ra [ta Paulo e o Sila i parau atu].” (Ohipa 17:10, 11) Oia, a hinaaro ru ai ratou e haapii, ua hiˈopoa maite to Berea e to roto mau anei ta ratou i faaroo e i farii i te mau Papai.

I teie mahana atoa, aita te mau Kerisetiano mau e pee ra i te manaˈo matauhia e tauiui noa, tera râ te ati maite ra ratou i te parau mau Bibilia. Ua papai te aposetolo Paulo e: “E te pure nei au ia tupu maite â to outou hinaaro e ia rahi atu â ma te ite [mau] e te haroaroa o te aau ra.”—Philipi 1:9; MN.

Mai te peu e aitâ oe i na reira ˈtura, ia riro te reira ei fa na oe te noaaraa “te ite mau e te haroaroa o te aau” ma te haapii i ta te Bibilia e haapii mau ra. Aita te feia e pee ra i to Berea e vare ra i te mau “parau haavare” a te mau anetimesia. (Petero 2, 2:3) Ua tiamâ mai râ ratou maoti te parau mau pae varua a te Mesia mau e ta ˈna mau pǐpǐ mau.—Ioane 8:32, 36.

[Tumu parau tarenihia/Hohoˈa i te api 4]

TA TE BIBILIA E PARAU RA NO NIA I TE ANETIMESIA

“E au mau tamarii ra, o te hora hopea ra teie [te tuhaa hopea iho â râ o te tau o te mau aposetolo], e ta outou i faaroo ra e, te haere maira taua anetimesia ra, oia atoa i teie nei e rave rahi te anetimesia e vai nei.”—Ioane 1, 2:18.

“O vai te haavare maori râ o tei parau e, e ere Iesu i te Mesia? Oia taua anetimesia ra, o tei huna ïa i te Metua e te Tamaiti atoa hoi.”—Ioane 1, 2:22.

“E te mau [parau faaurua] e ore e parau e ua haere taata mai Iesu Mesia i te ao nei, e ere ïa i to ǒ mai i te Atua ra; o taua varua anetimesia ra te reira, ta outou i faaroo ra e, te haere maira, e tei te ao mai nei â hoi i teie nei â.”—Ioane 1, 4:3; MN.

“E rave rahi . . . te haavare i reva ˈtura na te ao nei, o tei ore e parau e ua haere taata mai Iesu Mesia i te ao nei, o taua haavare ra hoi te reira, e anetimesia ïa.”—Ioane 2, 7.

[Tumu parau tarenihia/Hohoˈa i te api 5]

TE HOÊ HAAVARE MA TE HURU E RAVE RAHI

E tano te taˈo “anetimesia” i te feia atoa o te ore e farii i ta te Bibilia e parau ra no nia ia Iesu Mesia, te feia atoa o te patoi i to ˈna Basileia, e te feia atoa o te hamani ino i ta ˈna mau pǐpǐ. E tano atoa te reira i te feia, te mau faanahonahoraa, e te mau nunaa o te parau hape ra e e tia ratou no te Mesia aore ra e haru no ratou iho ma te tano ore i te tiaraa o te Mesia na roto i te fafauraa ma te teoteo e rave i ta te Mesia anaˈe e nehenehe e rave—te hopoiraa mai i te hau mau e te panoonoo ore.

[Faaiteraa i te tumu]

Augustin: ©SuperStock/age fotostock

[Hohoˈa i te api 7]

Mai to Berea, e mea tia ia ‘imi tatou i te parau i papaihia ra i te mau mahana atoa’