Eiaha roa outou e faaea i te faarahi atu i to outou mauruuru
Eiaha roa outou e faaea i te faarahi atu i to outou mauruuru
“O te maitai o to mau manaˈo ia ˈu nei, e te Atua e! e te rahi-roa-raa o to mau manaˈo ia taiohia e!”—SALAMO 139:17.
1, 2. No te aha ïa tatou e au roa ˈi i te Parau a te Atua e mea nafea te fatu salamo i faaite ai i to ˈna mauruuru?
E TAOˈA faahiahia roa tei itehia. A tataîhia ˈi te hiero o Iehova i Ierusalema, ua itea ia Hilikia tahuˈa rahi “te buka ture a Iehova i papaihia e Mose ra,” papu o te papai tumu i oti fatata e 800 matahiti aˈenei! Mai te aha paha te huru o te arii Iosia tei mǎtaˈu i te Atua a tuuhia ˈi taua buka ra i mua ia ˈna? Inaha, ua poihere oia i te reira e i muri iho mau ua faataio ia Saphana, te papai parau ma te reo puai.—Paraleipomeno 2, 34:14-18.
2 I teie mahana, e nehenehe te mau miria taata e taio i te taatoaraa aore ra hoê noa tuhaa o te Parau a te Atua. Tera râ, e iti anei te maitai e te faufaa o te mau Papai? Eita roa ˈtu! Te vai nei râ i roto te mau manaˈo hoê roa o te Atua Mana hope, o tei papaihia no to tatou maitai. (Timoteo 2, 3:16) Ma te faaite i to ˈna huru aau no nia i te Parau a te Atua, ua papai Davida fatu salamo e: “O te maitai o to mau manaˈo ia ˈu nei, e te Atua e! e te rahi-roa-raa o to mau manaˈo ia taiohia e!”—Salamo 139:17.
3. Eaha te faaite ra e ua taa maitai ia Davida te mau mea pae varua?
3 Aore roa i maheahea to Davida au rahi ia Iehova, i ta ˈna Parau, e faanahoraa o te haamoriraa mau. Te faaite ra e rave rahi salamo ta Davida i fatu i to ˈna huru. Ei hiˈoraa, ua papai oia i roto i te Salamo 27:4 e: “Hoê a ˈu mea hinaaro ia Iehova ra, e o ta ˈu ïa e titau hua nei; ia parahi â vau i roto i te fare o Iehova e hope roa ˈˈe o ˈu pue mahana, ia ite vau i te maitai o Iehova, e ia ui maite au i roto i to ˈna nao.” I roto i te reo Hebera tumu, te auraa o te parau e “ui maite” e manaˈonaˈo ïa, e hiˈopoa maite, e hiˈo ma te mauruuru, te oaoa, te popou. Papu roa, ua taa maitai ia Davida te mau mea pae varua, ua au mau roa oia i te mau faanahoraa pae varua a Iehova e mea momona hoi na ˈna te tahi noa ˈˈe tâpû maa pae varua o te parau mau ta te Atua i faaite. Ia peehia to ˈna hiˈoraa î i te mauruuru e tia ˈi.—Salamo 19:7-11.
E mauruuru anaˈe i te ravea no te ite i te parau mau bibilia
4. Eaha te tumu Iesu i ‘oaoa ˈi i te varua moˈa’?
4 Aita i taaihia te maramaramaraa i te Parau a te Atua i te ite hau ê aore ra i te haapiiraa o te ao nei o tei faatupu hoi i te teoteo. Ua taaihia râ te reira i to Iehova maitai rahi, ta ˈna e horoa ˈtu i te feia haehaa, aau haavare ore e ite ra i to ratou veve i te pae varua. (Mataio 5:3, MN; Ioane 1, 5:20) Ia Iesu i feruri maite i te mea e ua papaihia te iˈoa o te tahi mau taata tia ore i te raˈi ra, “oaoa ˈtura . . . Iesu [i te varua moˈa] . . . , na ô atura, E haamaitai au ia oe, e tau Metua, e te Fatu o te raˈi e te fenua, i te mea, huna ê noâ oe i teie nei mau parau i te feia paari e te ite ra, ua faaite mai oe i te tamarii nei.”—Luka 10:17-21; MN.
5. No te aha te mau pǐpǐ a Iesu i ore ai i haafaufaa ore i te pue parau mau o te Basileia i faaitehia ia ratou?
5 I muri aˈe i to ˈna pureraa ma te aau tae, ua fariu Iesu i ta ˈna mau pǐpǐ e ua na ô e: “E ao to te mata i hiˈo i te mau mea ta outou e hiˈo nei: e faaite atu hoi au ia outou, e rave rahi te peropheta e te hui arii i hinaaro i te hiˈo i te mau mea ta outou e hiˈo nei, e aore aˈenei i hiˈo; e i hinaaro hoi i te faaroo i te mau parau ta outou e faaroo nei, e aore aˈenei i faaroo.” Oia, ua faaitoito Iesu i ta ˈna mau pǐpǐ haapao maitai eiaha e haafaufaa ore i te pue parau mau taoˈa rahi o te Basileia i faaitehia ia ratou. Aita taua pue parau mau ra i faaitehia i to mutaa ihora ui o te mau tavini a te Atua, e aita roa te reira i faaitehia i te “feia paari e te ite” o to Iesu tau!—Luka 10:23, 24.
6, 7. (a) Eaha te mau tumu e mauruuru ai tatou i te parau mau a te Atua? (b) Eaha te taa-ê-raa e itehia ra i teie tau i rotopu i te haapaoraa mau e te mea hape?
6 I to tatou tau, ua hau atu â te mau tumu ia mauruuru tatou i te parau mau a te Atua, no te mea ua haamaramarama roa Iehova i to ˈna nunaa no nia i ta ˈna Parau maoti “te tavini haapao maitai e te paari.” (Mataio 24:45; Daniela 12:10) No nia i te tau hopea, ua papai te peropheta ra o Daniela e: “E rave rahi hoi te horo i nia e i raro, e tupu atura te ite i te rahiraa.” (Daniela 12:4) I teie mahana, te “tupu” nei te ite i te Atua “i te rahiraa” e ua navai maitai te maa pae varua a te mau tavini a Iehova, e ere anei?
7 Te ite mau nei tatou i te hoê taa-ê-raa i rotopu i te ruperupe pae varua o te nunaa o te Atua e te taa ore i te pae faaroo o Babulonia rahi! Ei faahopearaa, te taata o tei inoino aore ra tei ravai roa i te haapaoraa hape, te fariu nei ïa i te haamoriraa mau. E au ratou i te mamoe aore e hinaaro ra “ia riro ei rave atoa i ta [Babulonia rahi] ra mau hara” aore ra “ia pohe atoa i to ˈna ra mau pohe.” Te titau manihini nei Iehova e ta ˈna mau tavini ia ratou taatoa i roto i te amuiraa Kerisetiano mau.—Apokalupo 18:2-4; 22:17.
Te haere ra tei î i te mauruuru i te Atua ra
8, 9. Mea nafea te tupuraa te mau parau a Hagai 2:7 i teie mahana?
8 No nia i to ˈna fare haamoriraa pae varua, ua faaite atea Iehova e: “Na ˈu e faaaueue i te mau fenua atoa, e e tae mai tei hinaarohia e te mau fenua atoa ra: e faaî hoi au i teie nei fare i te hanahana.” (Hagai 2:7) Ua tupu teie parau tohu maere i te tau o Hagai a patu faahou ai te toea i faahoˈihia o te nunaa o te Atua i te hiero i Ierusalema. I teie mahana, e tupu â te mau parau a Hagai no nia i te hiero rahi pae varua o Iehova.
9 E mirioni tei haere aˈena mai i te hiero taipe no te haamori i te Atua “ma te varua e te parau mau,” e i te matahiti hoê te tae tamau nei e hanere tausani e tiahapa taata, tei faaauhia i “tei hinaarohia e te mau fenua atoa.” (Ioane 4:23, 24) Ei hiˈoraa, te faaite ra te tapura o te ao atoa i te roaraa o te matahiti taviniraa 2006 e 248 327 tei bapetizohia ei faataiperaa i ta ratou pûpûraa na Iehova. E fatata ïa e 680 taata apî i te mau mahana atoa! Te faaite papu ra to ratou au rahi i te parau mau e to ratou hinaaro e tavini ia Iehova ei feia poro i te Basileia e na te Atua mau â ratou i faatae mai.—Ioane 6:44, 65.
10, 11. A faatia na i te hoê tupuraa o te faaite ra e nafea te taata e haamata ˈi i te poihere i te parau mau o te Bibilia.
10 Mea au na te taata aau tae e rave rahi te parau mau no te mea ua ite ratou “i te huru-ê-raa i te taata parau tia e te taata parau ino, i te taata i haamori i te Atua, e te taata e ore e haamori ia ˈna.” (Malaki 3:18) A hiˈo na i te tupuraa o Wayne e o Virginia, na hoa faaipoipo melo o te hoê ekalesia Porotetani, aita râ i noaa ia raua te mau pahonoraa tano i ta raua uiraa e rave rahi. E mea riri hoi na raua te tamaˈi e aita i taa faahou e ua huru ê roa i te iteraa i te pǔpǔ ekalesiatiko i te haamaitairaa i te mau faehau e te mau mauhaa tamaˈi. A ruhiruhia ˈi na hoa faaipoipo, ua manaˈo raua e aita vetahi o te ekalesia i tâuˈa noa ˈˈe ia raua noa ˈtu e ua haapii hoi Virginia e rave rahi matahiti i te maoro i te haapiiraa Tapati. “Aita roa hoê aˈe i haere mai e hiˈo ia mâua aore ra i haapeapea aˈe no to mâua huru pae varua,” ta raua i parau. “Ta te ekalesia i hinaaro o ta mâua noa ïa moni. Ua inoino ihora mâua.” Ua inoino hau atu â raua a farii ai ta raua ekalesia i te huru faatia noa i te peu mahu.
11 I tera area taime, ua riro ta Wayne e Virginia mootua e ta raua tamahine ei Ite no Iehova. Noa ˈtu e i te haamataraa, aita o Wayne e o Virginia i mauruuru i te reira, i muri aˈe râ ua taui to raua manaˈo e ua farii raua i te hoê haapiiraa bibilia. “I roto e toru avaˈe noa,” ta Wayne i parau, “ua ite hau atu â mâua no nia i te Bibilia i ta mâua i haapii i te roaraa e 70 matahiti i te maoro! Aita roa mâua i ite e o Iehova te iˈoa o te Atua, aita rea ta mâua i ite no nia i te Basileia e te fenua paradaiso.” Aita i maoro, ua haamata teie na hoa faaipoipo aau tae i te haere i te mau putuputuraa Kerisetiano e i te apiti i te taviniraa. “Te hinaaro nei mâua e faaite i te taata atoa i te parau mau,” ta Virginia i parau. E 80 e tiahapa matahiti to raua, ua bapetizohia raua i 2005. “Ua itea ia mâua te hoê autaeaeraa Kerisetiano mau,” ta raua i parau.
Ia mauruuru no te ‘ineineraa no te mau ohipa maitatai atoa’
12. Eaha ta Iehova e horoa tamau ra no ta ˈna mau tavini, e eaha te titauhia ia rave tatou no te fanaˈo atu?
12 E tauturu noa Iehova i ta ˈna mau tavini no te rave i to ˈna hinaaro. Ei hiˈoraa, ua horoahia ia Noa ra te mau faaueraa maramarama e te papu no te hamani i te araka—te hoê ohipa e mea tia ia rave-maitai-hia i te taime matamua! E oia mau â. No te aha? No te mea “ua na reira . . . Noa i te mau mea atoa ta te Atua i faaue mai ia ˈna ra, o ta ˈna ïa i rave maite.” (Genese 6:14-22) I teie atoa mahana, te faaineine maitai ra Iehova i ta ˈna mau tavini no te rave i to ˈna hinaaro. Parau mau, ta tatou ohipa matamua o te pororaa ïa i te parau apî maitai o te Basileia o te Atua tei haamauhia e te tautururaa i te feia e au ia riro mai ei pǐpǐ na Iesu Mesia. E mai ia Noa ra, ia auraro tatou e manuïa ˈi tatou. E mea tia ia pee tatou ma te auraro i te aratairaa ta Iehova e horoa maira na roto i ta ˈna Parau e ta ˈna faanahonahoraa.—Mataio 24:14; 28:19, 20.
13. Na roto i teihea ravea e faaineine ai Iehova ia tatou?
13 Ia nehenehe tatou e faatupu i tera ohipa, e mea tia ia haapii tatou i te ‘tufa ma te tia’ i ta tatou mauhaa matamua—te Parau a te Atua—ei “mea faufaa ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia ra, ia aravihi roa te taata no te Atua, ia ineine roa no te mau ohipa maitatai atoa.” (Timoteo 2, 2:15; 3:16, 17, MN) Mai te senekele matamua, te horoa ra Iehova i te haapiiraa faufaa na tatou maoti te amuiraa Kerisetiano. I teie mahana, i roto i na amuiraa e 99 770 o te ao, te tupu ra te Haapiiraa o te taviniraa teotaratia e te Putuputuraa no te taviniraa i te mau hebedoma atoa no te tauturu ia tatou i roto i te taviniraa. Te faaite ra anei outou i to outou mauruuru no teie mau putuputuraa faufaa ma te tae tamau e ma te faaohipa i te mau mea ta outou e haapii ra?—Hebera 10:24, 25.
14. E nafea te mau tavini a Iehova e faaite ai i to ratou mauruuru no te fanaˈoraa taa ê i te taviniraa i te Atua? (A horoa na i te tahi manaˈo no nia i te tapura i te mau api 28-31.)
14 Na roto i te ohiparaa i roto i te taviniraa, te faaite nei te mau mirioni taata o te nunaa o te Atua na te ao nei i to ratou mauruuru no te faaineineraa i noaa ia ratou. Ei hiˈoraa, i te roaraa o te matahiti taviniraa 2006, ua rave e 6 741 444 taata poro i te Basileia 1 333 966 199 hora taatoa no te mau ohipa rau, mai te faatereraa e 6 286 618 haapiiraa bibilia i te fare. O te tahi noa teie o te mau mea faaitoito o te tapura o te ao atoa. Te ani nei matou ia hiˈo maite outou i teie tapura e ia faaitoitohia ˈtu outou, mai to tatou mau taeae o te senekele matamua i faaitoito-atoa-hia e te tapura no nia i te parareraa te ohipa pororaa i to ratou tau.—Ohipa 1:15; 2:5-11, 41, 47; 4:4; 6:7.
15. No te aha eiaha roa ˈi te hoê ia toaruaru no ta ˈna taviniraa ia Iehova ma to ˈna nephe atoa?
15 Te faaite ra te arueraa rahi e tae ra i te Atua i te mau matahiti atoa i te mauruuru hohonu o te mau tavini a Iehova o te fanaˈo taa ê ra i te ite ia Iehova e te riroraa ei ite no ˈna. (Isaia 43:10) Parau mau, e nehenehe e faaauhia te tusia arueraa a vetahi mau taeae e tuahine ruhiruhia, maˈi aore ra tino paruparu, i te ô a te vahine ivi taoˈa ore. Eiaha râ ia moehia e e mauruuru mau o Iehova e ta ˈna Tamaiti i te taatoaraa e tavini ra i te Atua ma to ratou nephe atoa, a rave ai ratou i tei maraa ia ratou.—Luka 21:1-4; Galatia 6:4.
16. Eaha te mau mauhaa haapiiraa ta te Atua i horoa aˈenei?
16 Hau atu â i te faaineineraa ia tatou no te taviniraa, na roto i ta ˈna faanahonahoraa, te horoa maira Iehova i te mau mauhaa haapiiraa maitai roa. I te mau ahuru matahiti i mairi, te vai ra te mau buka mai Te parau mau e aratai i te ora mure ore ra, E nehenehe oe e ora e a muri noa ˈtu i roto i te paradaiso i nia i te fenua nei, Te ite e aratai i te ora mure ore e aita i maoro aˈenei, Eaha ta te Bibilia e haapii mau ra? E faaohipa maitai te feia o te haafaufaa mau ra i teie mau buka i roto i te taviniraa.
A faaohipa maitai i te Bibilia haapii
17, 18. (a) Eaha te mau tuhaa o te Bibilia haapii o ta oe e au i te haafaufaa i roto i ta oe taviniraa? (b) Eaha ta te hoê tiaau mataeinaa i tapao no nia i te Bibilia haapii?
17 E haamaitairaa mau no te taviniraa te buka Eaha ta te Bibilia e haapii mau ra? e to ˈna 19 pene, te tuhaa hau e te parau maramarama e te ohie. Ei hiˈoraa, te hiˈopoa ra te pene 12 i te tumu parau “E ora anaˈe ma te auhia mai e te Atua.” Te faaite nei te reira i te piahi e nafea o ˈna e nehenehe ai e riro ei hoa no te Atua, te tahi mea tei ore aˈenei i ferurihia aore ra i manaˈohia. (Iakobo 2:23) Mai te aha te huru o te taata i mua i teie buka haapiiraa bibilia?
18 Te faatia ra te hoê tiaau mataeinaa i Auteralia i te hoê “anaanatae-vave-raa” i te Bibilia haapii “o te faaô oioi i te fatu fare i roto i te aparauraa.” Te na ô nei â oia e e mea ohie roa ia faaohipa i teie buka “tei horoa i te feia poro i te Basileia i te tahi tiaturiraa e oaoaraa apî i roto i te taviniraa. No reira ïa vetahi i parau ai e e Tâpû Auro teie buka!”
19-21. A faatia na i te tahi mau tupuraa o te haafaufaa ra i te Bibilia haapii.
19 “Na te Atua i tono ia oe,” ta te hoê vahine i Guiana i parau i te hoê pionie i te pae uputa. Aita i maoro aˈenei, ua faarue ta ˈna tane ia ˈna e ta raua toopiti tamarii rii. Ua iriti te pionie i te Bibilia haapii i te pene 1 e ua taio ma te reo puai i te paratarafa 11, i raro aˈe i te tumu parau iti “Eaha to te Atua manaˈo i te mau parau-tia ore ta tatou e faaruru nei?” “Ua putapû roa o ˈna i teie mau manaˈo,” ta te pionie i parau. “Inaha, ua tia o ˈna, haere atura i muri i ta ˈna fare toa, e ua taˈi roa.” Ua farii teie vahine i te hoê haapiiraa bibilia tamau e te hoê tuahine no reira e te haere noa ra oia i mua.
20 Ua pohe te vahine a José, o te ora nei i Paniora, i roto i te hoê ati purumu. Ua imi oia i te tamahanahanaraa i roto i te raau taero, e ua tauturu-atoa-hia o ˈna e te taote manaˈo. Aita râ te taote manaˈo i nehenehe e pahono i te uiraa e haapeapea rahi ra ia José: “No te aha te Atua i faatia ˈi ia pohe ta ˈu vahine?” I te hoê mahana ua farerei José ia Francesc, o te haa ra i roto i te hoê â taiete. Ua ani Francesc ia hiˈopoa raua i te pene 11 o te Bibilia haapii “No te aha te Atua e faatia ˈi i te mauiui?” Ua putapû roa o José i te faataaraa a te mau Papai e te faahohoˈaraa o te orometua haapii e te hoê piahi. Ua haamata oia i te haapii i te Bibilia ma te haapao maitai, ua tae oia i te hoê tairururaa haaati, e i teie nei te haere nei oia i te mau putuputuraa i te Piha a te Basileia no reira iho.
21 Mea faatura noa iho â o Roman, taata tapihoo e 40 matahiti i Poronia, i te Parau a te Atua. No te mea râ ua haapeapea rahi oia no ta ˈna ohipa, ua haere rii noa oia i mua i roto i ta ˈna haapiiraa bibilia. Noa ˈtu râ ua haere oia i te hoê tairururaa mataeinaa e ua noaa ia ˈna te hoê buka Bibilia haapii. I muri iho, ua taui roa oia. “Na roto i teie buka,” ta ˈna i parau, “ua tuati maitai te taatoaraa o te mau haapiiraa tumu o te Bibilia no te faatupu mai i te hoê hohoˈa oti roa, mai te hauti puzzle te huru.” I teie nei te haapii tamau nei o Roman i te Bibilia e te haere maitai ra i mua.
A tamau i te faarahi atu i te mauruuru
22, 23. E nafea tatou e tamau ai i te faaite i to tatou mauruuru no te tiaturiraa e vai nei i mua ia tatou?
22 Mai tei faataahia i te mau tairururaa mataeinaa anaanatae roa “Faaoraraa fatata!” te tiai ru nei te mau Kerisetiano mau i te ‘faaoraraa mure ore’ i fafauhia e te Atua e i faatupuhia maoti te toto haamaniihia o Iesu Mesia. Te ravea maitai roa ˈˈe no te faaite i to tatou mauruuru aau tae no teie tiaturiraa faufaa roa, o te tamâ-noa-raa ïa ia tatou “i te ohipa pohe, ia haamori [tatou] i te Atua ora ra.”—Hebera 9:12, 14.
23 Oia, ua hau atu i te ono mirioni taata poro haapao maitai i te Basileia e faaoromai ra i te taviniraa i te Atua a rahi roa ˈi te haerea miimii, e semeio mau â teie. E haapapuraa atoa teie e te haafaufaa roa ra te mau tavini a Iehova i te haamaitairaa taa ê e tavini i te Atua, ma te ite e “e ere i te mea faufaa ore te ohipa a te Fatu ta [ratou] e rave na.” Eiaha roa e faaea i te faarahi atu i te mauruuru!—Korinetia 1, 15:58; Salamo 110:3.
E nafea outou e pahono ai?
• Eaha ta te fatu salamo e haapii maira no nia i te mauruuru i te Atua e ta ˈna mau faanahoraa pae varua?
• E nafea te mau parau a Hagai 2:7 e tupu ai i teie mahana?
• Mea nafea Iehova i faaineine ai i ta ˈna mau tavini no te tavini maitai ia ˈna?
• Eaha ta outou e nehenehe e rave no te faaite i to outou mauruuru no to Iehova maitai?
[Uiraa haapiiraa]
[Tapura i te mau api 28-31]
TAPURA NO TE MATAHITI TAVINIRAA 2006 A TE MAU ITE NO IEHOVA O TE AO ATOA
(Hiˈo i te papai)
[Hohoˈa i te api 26]
Te faaineine maitai ra Iehova ia tatou no te rave i to ˈna hinaaro