Mea ora te parau a Iehova

Manaˈo faufaa o te buka a Isaia—II

TE HAAPAO maitai ra o Isaia i ta ˈna ohipa ei peropheta. Ua tupu aˈena te mau haavaraa ta ˈna i faahiti i nia i te basileia o na opu hoê ahuru o Iseraela. I teie nei e parau faahou ta ˈna no nia i te tau no a muri aˈe o Ierusalema.

E haamouhia te oire o Ierusalema, e e tapea-tîtî-hia to ˈna mau taata. Eita râ te anoraa e tamau. Ia maoro rii aˈe, e haamau-faahou-hia te haamoriraa mau. O te poroi tumu ïa o te Isaia 36:1–66:24. * E nehenehe tatou e maitaihia ia hiˈopoa i tei parauhia i roto i teie mau pene no te mea e rave rahi parau tohu i roto i teie tuhaa e tupuraa faufaa to ratou i to tatou tau aore ra e fatata i te tupu. Te vai atoa ra i roto i teie tuhaa o te buka a Isaia te mau parau tohu anaanatae no nia i te Mesia.

“INAHA, TE FATATA MAIRA TE MAHANA”

(Isaia 36:1–39:8)

I te 14raa o te matahiti a faatere ai te arii Hezekia (732 H.T.T), ua haru o Asura ia Iuda. E fafau o Iehova e paruru ia Ierusalema. E hope te haamǎtaˈuraa o te haruraa i to te melahi a Iehova haapoheraa o ˈna anaˈe 185 000 faehau Asura.

E maˈihia o Hezekia. E pahono o Iehova i ta ˈna pure e e faaora ia ˈna, ma te faatia ia ora oia 15 matahiti hau. I to te arii no Babulonia tonoraa ˈtu i to ˈna mau taata no te haapopou ia ˈna, e faaite o Hezekia ia ratou i ta ˈna mau taoˈa atoa. E faaite o Isaia i te poroi a Iehova ia Hezekia, ma te parau e: “Inaha, te fatata maira te mahana e pau ai te mau mea atoa i roto i to fare na, e tei haaputuhia e to mau metua ra e tae roa aˈenei i teie nei mahana, i te hopoihia i Babulonia.” (Isaia 39:5, 6) Hau rii atu i te 100 matahiti i muri aˈe, e tupu te parau tohu.

Uiraa bibilia pahonohia:

38:8, MN—Eaha “te mau taahiraa” i reira te maru i te faahoˈiraahia? I te mea e e faaohipahia te taioraa hora ia te mahana i Aiphiti e i Babulonia atoa i te senekele vau H.T.T, e tano teie mau taahiraa i te faito o te hoê taioraa hora ia te mahana ta te metua tane o Hezekia o Ahaza i taa paha. Aore ra te vai ra paha te hoê eˈa paiumaraa i roto mai i te aorai. E pou to pihai iho i te eˈa, e hiti riirii paha te hoê maru i nia i te mau taahiraa, a nehenehe atu ai e faito i te hora.

Haapiiraa no tatou:

36:2, 3, 22. Noa ˈtu e ua tatarahia o Sebena i to ˈna tiaraa ei taata mau taoˈa, ua fariihia  ia tamau oia i te tavini i te arii ma te mono atu i tei mono ia ˈna. (Isaia 22:15, 19) Mai te peu e ua tatarahia ta tatou hopoia i roto i te faanahonahoraa a Iehova no te tahi mau tumu, eiaha anei tatou e tamau i te tavini i te Atua noa ˈtu eaha te aravihi ta ˈna e farii?

37:1, 14, 15; 38:1, 2. I te mau taime ahoaho, e haerea paari ia fariu atu tatou ia Iehova i roto i te pure e ia tiaturi roa ia ˈna.

37:15-20; 38:2, 3. I te haamǎtaˈuraahia o Ierusalema e to Asura, ta Hezekia haapeapearaa matamua o te faainoraahia ïa te iˈoa o Iehova no te faatahuriraahia o Ierusalema. Ia itehia e mea ino roa to ˈna maˈi, aita o Hezekia i tapitapi roa no ˈna iho. Ua manaˈonaˈo roa oia i ta to ˈna pohe ma te huaai ore e nehenehe e ohipa i nia i te opu hui arii o Davida. Ua tapitapi atoa oia i te ite o vai te aratai i te aroraa i to Asura. Mai ia Hezekia, e mea faufaa roa no tatou ia haapao i te faaraaraa i te iˈoa o Iehova e i te tupuraa o ta ˈna opuaraa i to tatou iho ora.

38:9-20. Te haapii maira teie himene a Hezekia ia tatou e aita e mea faufaa roa i roto i te oraraa i te neheneheraa e arue ia Iehova.

“E PATU-FAAHOU-HIA OIA”

(Isaia 40:1–59:21)

I muri iti noa ˈˈe i te tohuraa i te haamouraa o Ierusalema e te faahopearaa o te faatîtîraa i Babulonia, e tohu o Isaia i te faaapîraa. (Isaia 40:1, 2) “E patu-faahou-hia oia [Ierusalema],” ta Isaia 44:28, (MN) ïa e parau ra. E hopoi-ê-hia te mau atua idolo o Babulonia mai “te mau mea e hopoihia.” (Isaia 46:1) E haamouhia o Babulonia. E tupu teie mau mea atoa e piti senekele i muri aˈe.

E horoa o Iehova i ta ˈna tavini ei “tiarama no te etene.” (Isaia 49:6) E “pee” o Babulonia “te raˈi,” aore ra pǔpǔ faatere, “mai te au auahi” e “e pohe mai te naonao ra” to ˈna mau taata; tera râ ‘e tatara te tamahine tîtî o Ziona i te taamu i nia i to ˈna aˈî ra.’ (Isaia 51:6; 52:2, MN) Te parau ra Iehova i te feia o te haere mai e faaroo ia ˈna e: “E na ˈu e fafau i te faufaa tamauhia ia outou; i te mau maitai i faaitehia ia Davida ra.” (Isaia 55:3) E aratai te oraraa ia au i te mau titauraa a te Atua parau-tia ra ia itea mai ‘te oaoa ia Iehova.’ (Isaia 58:14) I te tahi atu pae, na te mau hape a te nunaa ‘e faataa ia ratou e to ratou Atua.’—Isaia 59:2.

Uiraa bibilia pahonohia:

40:27, 28—No te aha o Iseraela i parau ai: “Ua moe to ˈu nei haerea ia Iehova: e ua haapaehia ta ˈu nei parau e tau Atua”? E manaˈo paha te tahi mau ati Iuda i Babulonia e ua hunahia te mau ohipa tia ore ta ratou i faaruru e Iehova aore ra aita o ˈna e ite mai ra. Ua haamanaˈo te reira ia ratou e ua naea o Babulonia i te Atua Poiete ra o te fenua, e e ore oia e matapouri aore ra e ore e rohirohi.

43:18-21—No te aha te feia i faatîtîhia e hoˈi ra i parauhia ˈi “eiaha e manaˈohia tei a mutaaihora mau parau”? E ere ïa te auraa e mea tia ia haamoe ratou i te mau ohipa faaoraraa tahito a Iehova. Tera râ, ua hinaaro Iehova ia arue ratou ia ˈna i nia i te niu o “te mea apî” o ta ratou iho e ite ra, mai to ratou tere maitai i Ierusalema, peneiaˈe na te eˈa o te medebara roa. E mea apî atoa e e tumu ta “te hoê nahoa rahi” o te haere mai roto mai i “te ati rahi” e faahanahana ia Iehova.—Apokalupo 7:9, 14.

49:6—E nafea te Mesia e riro ai “ei tiarama no te etene,” noa ˈtu e ua taotiahia ta ˈna taviniraa i nia i te fenua i te mau tamarii Iseraela? No te ohipa ïa i tupu i muri aˈe i te poheraa o Iesu. Te faaohipa ra te Bibilia i te Isaia 49:6 i ta ˈna mau pǐpǐ. (Ohipa 13:46, 47) I teie mahana, te tavini nei te mau Kerisetiano faatavaihia, tauturuhia e te nahoa rahi o te feia haamori, ei “tiarama no te etene,” ma te haamaramarama i te mau taata “e  tae noa ˈtu i te hopea o te fenua nei.”—Mataio 24:14; 28:19, 20.

53:10; MN—I teihea auraa i oaoa ˈi Iehova ia haaparuparuhia ta ˈna tamaiti? Ua oto paha o Iehova, te Atua aumihi e te aumauiui, i te iteraa i ta ˈna Tamaiti here ia mauiui. Noa ˈtu râ, ua oaoa Oia i te ineineraa o Iesu i te auraro e te mau mea atoa ta to ˈna mauiui e pohe e faatupu.—Maseli 27:11; Isaia 63:9.

53:11—Eaha te ite na roto i te Mesia ‘e tiahia mai ai te taata’? O te ite ïa ta Iesu i fanaˈo ia ˈna i tae mai i nia i te fenua, ia ˈna i riro mai ei taata, e ia ˈna i mauiui ma te tia ore e tae atu i te pohe. (Hebera 4:15) E horoa ïa oia i te hoê tusia taraehara, o tei hinaarohia no te tauturu i te mau Kerisetiano faatavaihia e te nahoa rahi ia fanaˈo i te hoê tiaraa tia i mua i te Atua.—Roma 5:19; Iakobo 2:23, 25.

56:6—O vai ma “te taata ê,” e e nafea ratou ‘e haapao tamau maite ai i ta Iehova faufaa’? O te mau “mamoe ê atu” a Iesu te “taata ê.” (Ioane 10:16) E haapao tamau maite ratou i te faufaa apî i roto i te auraa e e auraro ratou i te ture i taaihia i tera faufaa, e turu roa e te mau faanahonahoraa i ravehia no te reira, e rave i te hoê â maa pae varua e ta te mau Kerisetiano faatavaihia e rave ra, e e turu ia ratou i roto i te pororaa i te Basileia e te ohipa faariroraa i te taata ei pǐpǐ.

Haapiiraa no tatou:

40:10-14, 26, 28. Mea puai e mea mǎrû o Iehova, e Atua mana hope e te î i te paari e mea rahi roa to ˈna maramarama i ta tatou e nehenehe e taa.

40:17, 23; 41:29; 44:9; 59:4. “E mea faufaa ore” te mau faaauraa poritita e te mau idolo. Aita e faufaa ia tiaturi i te reira.

42:18, 19; 43:8. E riro ïa tatou ei feia turi e ei matapo i te pae varua ia ore tatou e haapao i te Parau papaihia a te Atua e ia patoi tatou i te faaroo i ta ˈna faaueraa na roto i “te tavini haapao maitai e te paari.”—Mataio 24:45.

43:25; MN. E faaore o Iehova i te mau hara no ˈna iho. To muri iho noa mai ïa i te faaraaraa i te iˈoa o Iehova te tiamâraa mai tatou i te tîtîraa o te hara e te pohe e te noaaraa te ora.

44:8. Te vai ra ia tatou te turu a Iehova, e mea papu e te aueue ore mai te mato. Eiaha roa tatou e mǎtaˈu i te faaite i to ˈna Atuaraa!—Samuela 2, 22:31, 32.

44:18-20. E tapao o te ohipa piˈo o te aau te haamoriraa idolo. Eiaha te tahi mea ia rave i te parahiraa o Iehova i roto i to tatou aau.

46:10, 11. E haapapuraa o te Atuaraa o Iehova te aravihi e rave ‘i ta ˈna iho parau ia tupu’ oia hoi te faatupuraa i ta ˈna opuaraa.

48:17, 18; 57:19-21. Ia huri atu tatou ia Iehova ra no te faaora, ia haafatata tatou ia ˈna, e ia haapao tatou i ta ˈna mau faaueraa, e rahi to tatou maitai mai te pape pue ra e rahi ta tatou ohipa maitai mai te are moana ra. E au te feia o te ore e haapao i te Parau a te Atua i “te miti faaea ore nei.” Aita to ratou e hau.

52:5, 6. Ua faaoti to Babulonia ma te hape e mea paruparu te Atua mau. Aita ratou i ite i te mauruuru ore o Iehova i to ˈna nunaa ei tumu e faatîtîhia ˈi o Iseraela. Ia tairi te ati i te tahi atu, e haerea paari to tatou eiaha tatou e faaoti oioi i to ˈna mau tumu.

52:7-9; 55:12, 13. E toru aˈe tumu ta tatou no te apiti ma te oaoa i te pororaa i te Basileia e te ohipa faariroraa i te taata ei pǐpǐ. E mea nehenehe to tatou avae no te feia haehaa o te poia i te pae varua. Te ite nei tatou ia Iehova “te mata e te mata,” aore ra e taairaa piri roa to tatou e o ˈna. Te fanaˈo atoa nei tatou i te ruperupe pae varua.

52:11, 12. Ia faataahia no te haapao i “te mau farii a Iehova”—ta ˈna mau faanahoraa no te taviniraa moˈa—e mea tia ia mâ tatou i te pae varua e te pae morare.

 58:1-14. E mea faufaa ore te faaiteraa i te paieti i te Atua e te parau-tia ma te haavarevare. E mea tia ia faaite te feia haamori mau i te mau huru maitatai o te paieti i te Atua e te mau ohipa o te aroha taeae.—Ioane 13:35; Petero 2, 3:11.

59:15b-19. Te hiˈopoa ra Iehova i te mau ohipa a te huitaata e e ohipa mai oia i te taime au.

‘E RIRO OIA EI KORONA UNAUNA’

(Isaia 60:1–66:24)

Ma te faataa i te faaapîraa o te haamoriraa mau i te tau tahito oia atoa i to tatou nei tau, te parau ra te Isaia 60:1: “A tia i nia, [e te vahine ra e, a haaparare i to] maramarama, ua tae mai [hoi] to oe maramarama, e ua hiti mai te hanahana o Iehova i nia ia oe.” “E riro” o Ziona “ei korona unauna i te rima o Iehova.”—Isaia 62:3; MN.

E pure o Isaia ia Iehova no te mau taata o to ˈna fenua o te tatarahapa i te roaraa o to ratou hopoi-ê-raa-hia i Babulonia. (Isaia 63:15–64:12) I muri aˈe i te faataa-ê-raa i te mau tavini mau i te mea haavare, e parau te peropheta e nafea o Iehova e haamaitai ai i te feia e tavini nei ia ˈNa.—Isaia 65:1–66:24.

Uiraa bibilia pahonohia:

61:8, 9—Eaha “te faufaa mure ore,” e o vai ma “te huaai”? O te faufaa apî ïa ta Iehova i faaau i te mau Kerisetiano faatavaihia. O te mau “mamoe ê atu” ïa “te huaai”—te mau mirioni taata o te pahono i ta ratou poroi.—Ioane 10:16.

63:5—E nafea te riri o te Atua e tauturu ai ia ˈna? E huru aau haavîhia te riri o te Atua—e inoino tia to ˈna. E turu e e turai to ˈna riri ia ˈna ia faatupu i te haavaraa tia.

Haapiiraa no tatou:

64:6. Eita te huitaata tia ore e nehenehe e faaora ia ratou iho. No nia i te pûpûraa i te tusia no te hara, e riro noa ta ratou ohipa tia mai te ahu i faaruehia.—Roma 3:23, 24.

65:13, 14. Te haamaitai ra Iehova i ta ˈna mau tavini haapao maitai, ma te haamâha rahi roa i to ratou hinaaro pae varua.

66:3-5. Mea riri na Iehova te feia haavarevare.

‘E oaoa outou’

Auê te parau tohu o te faaapîraa i te mea mahanahana mau no te mau ati Iuda haapao maitai i faatîtîhia i Babulonia! ‘E oaoa outou’ ta Iehova ïa e parau ra, “e ouˈauˈa noa i te oaoa e a muri noa ˈtu, i ta ˈu e rave nei: inaha hoi te faariro nei au ia Ierusalema ei ouˈauˈaraa, e to ˈna ra taata ei oaoaraa.”—Isaia 65:18.

Te ora atoa nei tatou i te taime e poˈi ai te fenua i te poiri e to roto te mau nunaa i te poiri taotao. (Isaia 60:2) Teie “te mau taime ati rahi faaruru atâ.” (Timoteo 2, 3:1, MN) No reira, e faaitoitoraa rahi te poroi faaoraraa a Iehova i horoahia i roto i te buka bibilia a Isaia no tatou.—Hebera 4:12.

[Nota i raro i te api]

[Hohoˈa i te api 4]

Ua ite anei oe te tumu matamua i pure ai Hezekia ia ora mai i to Asura?

[Hohoˈa i te api 7]

“Te nehenehe o te avae o te vea i nia i te mouˈa, o tei hopoi mai i te parau maitai ra!”