Te haereraa mai o te Mesia—e riaria anei ïa tatou?

EAHA te mau hohoˈa o te haereraa mai o Iesu Mesia e puta mai i roto i to oe feruriraa? I to oe manaˈo, e tupuraa anei o te faatupu i te pohe, o te faaano, e o te faautua i te huitaata? Aore ra te tiai ra anei oe ia faaore te reira i to tatou mau fifi atoa? Mea riaria anei te haereraa mai o te Mesia? Aore ra mea maitai anei ia tiai ru atu tatou?

No nia i te haereraa mai o te Mesia, te na ô ra te Bibilia e: “Inaha, te haere mai na oia i roto i te ata; e ite te mau mata atoa ia ˈna, . . . e e auê te mau opu atoa o te ao nei ia ˈna.” (Apokalupo 1:7) Teie haereraa mai, o to Iesu ïa faraa mai a muri aˈe no te haamauruuru i te feia parau-tia e no te faautua i te feia paieti ore.

Aita te aposetolo Ioane i riaria i te haereraa mai o te Mesia, ua tiai ru atu râ oia. I muri aˈe i te fanaˈoraa i te faaiteraa no nia i teie haereraa mai e te auraa o te reira no te fenua, ua pure maite Ioane e: “A haere mai, e te Fatu, e Iesu e!” (Apokalupo 22:20) No te aha râ ‘te mau opu atoa o te ao nei e auê ai ia ˈna’? E nafea “te mau mata atoa” e ite ai ia ˈna? Eaha ta te haereraa mai o te Mesia e faatupu? E nafea tatou e faufaahia ˈi i teie nei i te tiaturiraa i te reira? Na te tumu parau i muri nei ïa e pahono mai.