Te mau demoni—e nafea ia patoi atu?

“Te mau melahi atoa o tei ore i haapao i to ratou iho toroa ra, faarue ihora râ i to ratou parahiraa, o tei tapeahia ïa e [te Atua] i te fifi matara ore i raro aˈe i te pouri, e tae noa ˈtu i te haavaraa i te mahana rahi ra.”—IUDA 6.

1, 2. Eaha te mau uiraa e hiti mai no nia ia Satani te Diabolo e te mau demoni?

 “E HAAPAO maitai, e faaitoito,” ta te aposetolo Petero ïa e faaara ra. “Te hahaere nei hoi to outou enemi o te [D]iabolo, mai te liona uuru ra, i te imiraa i te taata e pau ia ˈna ra.” (Petero 1, 5:8) No nia i te mau demoni, te na ô ra te aposetolo Paulo e: “Aore . . . au i hinaaro e ia amui atoa outou i te haamori demoni ra. Eita e tia ia outou ia inu i te auˈa a te Fatu ra [o Iehova], e te auˈa a te mau demoni: eita e tia ia outou ia amu i te amuraa a te Fatu ra [o Iehova] e te amuraa a te mau demoni.”—Korinetia 1, 10:20, 21.

² O vai râ o Satani te Diabolo e te mau demoni? Mea nafea e inafea to ratou faraa mai? Ua poiete anei te Atua ia ratou? Mai te aha te puai o to ratou mana i nia i te taata? Eaha ta tatou parururaa, mai te peu e te vai ra, i mua ia ratou?

Mea nafea to Satani e te mau demoni faraa mai?

3. Mea nafea to te hoê melahi a te Atua riroraa mai ei Satani te Diabolo?

³ I te omuaraa o te tuatapaparaa o te taata, a haamata ˈi te huitaata i roto i te ô i Edene, ua riro mai te hoê melahi a te Atua ei orure hau. No te aha? No te mea aita oia i mauruuru i ta ˈna tuhaa i roto i te faanahonahoraa a Iehova i te raˈi. I te poieteraahia Adamu raua Eva, ua itea mai ia ˈna te hoê ravea no te fariu ê i to raua auraroraa e ta raua haamoriraa i te Atua mau i nia ia ˈna iho. Ma te orure hau i te Atua e ma te turai i na taata faaipoipo matamua ia tapi i te hoê haerea hara, ua faariro teie melahi ia ˈna iho ei Satani te Diabolo. I muri aˈe, ua apiti atu te tahi atu mau melahi i ta ˈna orureraa hau. Mea nafea?—Genese 3:1-6; Roma 5:12; Apokalupo 12:9.

4. Ua aha vetahi mau melahi orure hau hou te diluvi i te anotau o Noa?

⁴ Te faaite maira te mau Papai faaurua e tau taime hou te diluvi rahi i te anotau o Noa, ua haamata vetahi mau melahi i te anaanatae taa ê i te mau vahine i te fenua nei. No te hoê opuaraa ino, “ua hiˈo aˈera te tamarii [i te raˈi]  a te Atua ra i te mau tamahine a te taata nei, e te maitai ra,” ta te Bibilia ïa e parau ra, e “ua rave ihora ratou i ta ratou i hinaaro ra ei vahine.” E taatiraa natura ore teie, e ua fanau maira ratou i te mau huaai huru ê tei matauhia ei Nephilim. (Genese 6:2-4) Ua apiti te mau mea ora varua o tei faaroo ore hoi i te Atua i ta Satani orureraa hau ia Iehova.

5. Eaha tei tupu i nia i te mau orure hau i te haamouraa Iehova na roto i te diluvi rahi?

⁵ I to Iehova hopoiraa mai i te diluvi i nia i te huitaata, ua pohe te mau Nephilim e to ratou mau metua vahine. Ua faahepohia te mau melahi orure hau ia faarue i to ratou tino taata e ia hoˈi i te ao varua. Aita râ i tia ia ratou ia rave faahou i “to ratou iho toroa” matamua i pihai iho i te Atua. Ua tapeahia râ ratou i roto i “te pouri” pae varua tei parauhia te po, aore ra Tartare.—Iuda 6; Petero 2, 2:4.

6. E nafea te mau demoni e haavare ai i te taata?

⁶ Mai to te mau melahi iino ereraa i “to ratou iho toroa,” ua riro mai ratou ei hoa demoni no Satani e ua paturu i ta ˈna mau opuaraa iino. Mai reira mai, aita to te mau demoni e mana no te rave faahou i te mau tino taata. E nehenehe râ ta ratou e turai i te mau tane e vahine ia rave i te mau taatiraa hairiiri rau. Te haa roa atoa ra te mau demoni i te haavare i te huitaata na roto i te peu tahutahu, mai te imiraa i te varua ino, te vaudou, e te taura. (Deuteronomi 18:10-13; Paraleipomeno 2, 33:6) Hoê â faahopearaa to te mau melahi iino e to te Diabolo—te haamouraa mure ore. (Mataio 25:41; Apokalupo 20:10) A tiai ai râ, e mea tia ia mau papu tatou e ia patoi ia ratou. E mea paari ia hiˈopoa maite tatou mai te aha to Satani puai e e nafea tatou e nehenehe ai e patoi ia ˈna e ta ˈna mau demoni ma te manuïa.

Mai te aha to Satani puai?

7. Mai te aha to Satani puai i nia i te ao?

⁷ Ua pari haavare Satani ia Iehova i te roaraa o te tuatapaparaa. (Maseli 27:11) E ua mana oia i nia i te hoê tuhaa rahi o te huitaata. “Te vai noa nei to te ao atoa i raro aˈe i taua varua ino ra,” ta te Ioane 1, 5:19 ïa e parau ra. No reira te Diabolo i nehenehe ai e faahema ia Iesu ma te pûpû ia ˈna i te hau e te hinuhinu o “te mau basileia atoa o te ao nei.” (Luka 4:5-7) No nia ia Satani, te na ô ra te aposetolo Paulo e: “E teie nei, te paruru-atoa-hia nei ta matou evanelia, i paruruhia ïa i te feia e pohe ra; oia te feia i haapourihia to ratou aau faaroo ore e te atua o teie nei ao ra, ia ore te maramarama o te evanelia hanahana o te Mesia, o te hohoˈa o te Atua ra, ia anaana mai i roto ia ratou.” (Korinetia 2, 4:3, 4) ‘E haavare o Satani e e metua no te haavare,’ tera râ te faataa ra oia ia ˈna iho mai te hoê ‘melahi no te maramarama.’ (Ioane 8:44; Korinetia 2, 11:14) E puai to ˈna e e ravea ta ˈna i hinaarohia no te haapoiri i te feruriraa o te mau tia faatere o te ao e to ratou huiraatira. Na roto i te mau haaparareraa parau hape e te mau aai faaroo e parau haavare, ua haavare oia i te huitaata.

8. Eaha ta te Bibilia e faaite ra no nia i to Satani mana?

⁸ Ua ite-papu-hia to Satani puai e to ˈna mana i te tau o te peropheta Daniela, fatata e pae senekele hou to tatou tau. I to Iehova tonoraa i te hoê melahi no te horoa i te hoê poroi faaitoito ia Daniela, ua farerei te melahi i te patoiraa a ‘te arii varua o te basileia o Peresia.’ Ua tapeahia te melahi haapao maitai e 21 mahana e tae roa ˈtu ai i te haereraa mai o “Mikaela, te hoê arii rahi” e tauturu ia ˈna. Te faahiti atoa ra taua noa ra aamu i “te arii [demoni] no Iavana.” (Daniela 10:12, 13, 20) E i roto i te Apokalupo 13:1, 2, te faataahia ra Satani mai “te teni” o te horoa ra i “to ˈna iho puai, e to ˈna iho terono, e te mana rahi no ˈna” i te puaa taehae poritita.

9. Te aro nei te mau Kerisetiano ia vai?

⁹ E ere ïa i te mea maere e ua papai te aposetolo Paulo: “E ere . . . i te taata anaˈe ra ta tatou e to nei o te feia hau atoa râ, e te mana, e te mau tavana o teie nei ao pouri, e te mau varua iino i te reva nei.” (Ephesia 6:12) I teie mahana  atoa, e mea itea ore te mau varua iino i raro aˈe i te faatereraa a Satani te Diabolo, o te faaohipa ra i to ratou mana i nia i te rahiraa o te mau tia faatere taata e te huitaata, ma te turai ia ratou ia rave i te mau ohipa haamouraa nunaa, totoaraa, e te taparahiraa taata aita e faaauraa. E hiˈopoa anaˈe i teie nei e nafea ia patoi ma te manuïa i teie mau varua puai.

Eaha ta tatou parururaa?

10, 11. E nafea tatou e nehenehe ai e patoi ia Satani e ta ˈna mau melahi iino?

¹⁰ Eita ta tatou e nehenehe e patoi ia Satani e ta ˈna mau melahi iino ma to tatou iho puai pae tino aore ra pae feruriraa. Te aˈo maira Paulo e: “Ia itoito outou i te Fatu, e i to ˈna ra puai rahi.” E mea titauhia ia fariu tatou i te Atua no te paruru ia tatou. Te na ô faahou ra Paulo e: “A ahu na i te haana tamaˈi atoa a te Atua ra, ia tia ia outou ia patoi atu i te mau ravea paari a te [D]iabolo ra. . . . A rave hoi outou i te haana tamaˈi atoa a te Atua ra, ia tia ia outou ia patoi atu i te enemi i te mahana ino ra, e tia roa aˈera ïa, ia mau â.”—Ephesia 6:10, 11, 13.

¹¹ Te aˈo ra Paulo e piti taime i to ˈna mau hoa Kerisetiano ia ahu i “te haana tamaˈi atoa a te Atua.” Te auraa o te taˈo “atoa” oia ïa eita e navai te aau feaapiti no te patoi i te mau aroraa demoni. Eaha ïa te mau tuhaa faufaa roa o te haana tamaˈi pae varua ta te mau Kerisetiano i teie mahana e titau ru roa ra no te patoi i te mau demoni?

“Ia mau”—e nafea?

12. E nafea te mau Kerisetiano e nehenehe ai e tatua i to ratou tauupu i te parau mau?

¹² Te faataa ra Paulo e: “Ia mau, ma te tatuahia to outou tauupu i te parau mau, e ma te tapoˈi ouma ra o te parau-tia i te ahuraa.” (Ephesia 6:14) Na tuhaa e piti o te haana tamaˈi e faahitihia ra i ǒ nei, o te hoê ïa tatua e te hoê tapoˈi ouma. E mea tia ia taamu haavî te hoê faehau i to ˈna tatua no te paruru i to ˈna tauupu (to ˈna tia) e no te tapea i ta ˈna ˈoˈe teiaha. Oia atoa, e mea tia ia tatua maitai tatou i te parau mau bibilia, ei auraa parau, ia ora tatou ia au i te reira. E porotarama taioraa bibilia anei ta tatou i te mau mahana atoa? E te taatoaraa o to tatou utuafare ïa? Te hiˈopoa tamau ra anei tatou i te irava mahana ei utuafare? Hau atu â, te pee noa ra anei tatou i te mau faataaraa i roto i te mau papai e horoahia ra e “te tavini haapao maitai e te paari”? (Mataio 24:45) Mai peu e e, te tutava nei ïa tatou i te faaohipa i ta Paulo aˈoraa. E ripene video e e DVD atoa ta tatou o te nehenehe e horoa mai i te aratairaa bibilia. E nehenehe te ati-maite-raa i te parau mau e tauturu ia tatou ia rave i te mau faaotiraa paari e e paruru ia tatou ia pee i te hoê haerea tano ore.

13. E nafea tatou e nehenehe ai e paruru i to tatou mafatu taipe?

¹³ Ua riro te tapoˈi ouma mau ei parururaa i te ouma, te mafatu, e te tahi atu mau mero faufaa roa o te faehau. E nehenehe te Kerisetiano e paruru i to ˈna mafatu taipe—to ˈna huru i roto—ma te atuatu i te hinaaro i te parau-tia a te Atua e te pee i te mau ture aveia tia a Iehova. E paruru te tapoˈi ouma taipe ia tatou ia taviri i te Parau a te Atua. A ‘riaria ˈi tatou i te ino e a hinaaro ai i te maitai,’ te tapea ra tatou i to tatou avae “i te mau eˈa iino atoa.”—Amosa 5:15; Salamo 119:101.

14. Eaha te auraa ia ‘faatamaahia to tatou avae i te faaineineraa o te evanelia ra o te hau’?

 ¹⁴ E pinepine ua faatamaa-maitai-hia te avae o te mau faehau Roma no te mau haereraa roa na raro tau hanere kilometera na nia i te mau purumu rarahi Roma o te na roto atu i te hau emepera. Eaha te auraa o te mau parau “ma te faatamaahia to outou avae i te faaineineraa o te evanelia ra o te hau” no te mau Kerisetiano? (Ephesia 6:15) Te auraa, ua faaineinehia ïa tatou no te ohipa mai. Ua ineine tatou no te poro i te parau apî maitai o te Basileia o te Atua i te mau taime atoa e tano ai. (Roma 10:13-15) Ia ohipa noa tatou i roto i te taviniraa Kerisetiano, e paruru ïa te reira ia tatou i ta Satani “mau ravea paari.”—Ephesia 6:11.

15. (a) Eaha te faaite ra e mea faufaa roa te paruru rahi o te faaroo? (b) E nafea “te mau ihe auahi” e tuino roa ˈi i to tatou faaroo?

¹⁵ Te na ô faahou ra Paulo e: “[Hau roa ˈtu â], a rave . . . i te paruru ra o te faaroo, ei nia roa iho ïa, o te mea ïa e pohe ai te mau ihe auahi atoa a taua varua ino ra.” (Ephesia 6:16; MN) Te haamata ra te aˈoraa e rave i te paruru o te faaroo na roto i teie mau parau “hau roa ˈtu â,” e tapao faaite ïa e mea faufaa roa teie tuhaa o te haana tamaˈi. Eiaha roa ˈtu to tatou faaroo ia paruparu. Mai te hoê paruru rahi, e paruru to tatou faaroo ia tatou i ta Satani “mau ihe auahi.” Eaha ta te reira e nehenehe e faahohoˈa i teie mahana? O te mau parau faaino mauiui roa paha ïa, te mau parau haavare, e te mau parau huru ê e haapararehia ra e te mau enemi e apotata o te tamata ra i te haaparuparu i to tatou faaroo. Teie “mau ihe,” o te mau faahemaraa atoa ïa no te riro mai ei taata nounou taoˈa, o te turai ia tatou ia haapeapea rahi na roto i te hooraa mai e  rave rahi mea e ia tataˈu i te feia o tei hema i te hoê huru oraraa faaahaaha. Peneiaˈe ua hoo mai ratou i te fare nehenehe aˈe e te rahi aˈe e te pereoo uira rahi aˈe e te maitai aˈe aore ra te faaiteite ra ratou i ta ratou mau taoˈa faaunauna moni rahi e te huru faito ahu i matara apî mai. Noa ˈtu eaha ta vetahi ê e rave ra, ia navai to tatou faaroo i te puai e tia ˈi no te faatioi i teie “mau ihe auahi.” E nafea tatou e patu ai e e tapea ˈi i te faaroo puai?—Petero 1, 3:3-5; Ioane 1, 2:15-17.

16. Eaha te nehenehe e tauturu ia tatou ia patu i te hoê faaroo puai?

¹⁶ E nehenehe tatou e haafatata ˈtu i te Atua na roto i te haapii-tamau-raa ia tatou iho i te Bibilia e te pureraa ma te aau tae. E nehenehe tatou e taparuparu ia Iehova ia haapaari i to tatou faaroo, a haa ˈtu ai tatou ia au i ta tatou mau pure ma te rave i te mau ohipa e titauhia. Ei hiˈoraa, te faaineine maitai ra anei tatou i te Haapiiraa o Te Pare Tiairaa i te mau hebedoma atoa ma te opua i te pahono? E puai to tatou faaroo mai te peu e e haapii tatou i te Bibilia e te mau papai bibilia.—Hebera 10:38, 39; 11:6.

17. E nafea tatou e nehenehe ai ‘e rave i te faaupoo o te ora’?

¹⁷ Te faaoti ra Paulo i ta ˈna faataaraa o te haana tamaˈi pae varua e teie aˈoraa: “A rave . . . i te faaupoo ra [o] te ora; e te ˈoˈe a te [v]arua ra o te parau a te Atua.” (Ephesia 6:17; MN) E paruru te faaupoo i te upoo o te faehau e to ˈna roro, te pu e rave ai i te faaotiraa. Oia atoa, e paruru mai to tatou tiaturiraa Kerisetiano i to tatou puai feruriraa. (Tesalonia 1, 5:8) Ia haamau tatou i to tatou feruriraa i nia i to tatou tiaturiraa no ǒ mai i te Atua ra, mai ia Iesu atoa, e tia ˈi eiaha râ ia faaî i to tatou feruriraa i te mau fa a teie ao e te mau hinaaro materia.—Hebera 12:2.

18. No te aha eiaha ˈi tatou e tâuˈa ore i ta tatou porotarama taioraa tamau i te Bibilia?

¹⁸ O te parau, aore ra poroi, a te Atua i papaihia i roto i te Bibilia ta tatou parururaa hopea i mua i te mana o Satani e ta ˈna mau demoni. Teie te tahi atu â tumu eiaha ˈi tatou e tâuˈa ore i ta tatou porotarama taioraa tamau i te Bibilia. E paruru te hoê ite hohonu i te Parau a te Atua ia tatou i te mau parau haavare a Satani e te mau haaparareraa parau demoni oia atoa i te mau parau mauiui a te mau apotata.

‘A pure ma te tuutuu ore’

19, 20. (a) Eaha te tiai ru maira ia Satani e ta ˈna mau demoni? (b) Eaha te nehenehe e haapuai ia tatou i te pae varua?

¹⁹ Ua fatata te haamouraa o Satani, ta ˈna mau demoni, e te ao ino. Ua ite Satani “e maa taime poto to ˈna e toe nei.” Te riri ra oia e te tamaˈi ra oia i te feia “o tei haapao i te parau a te Atua ra, o tei mau maite i te [ohipa faaiteraa ia] Iesu.” (Apokalupo 12:12, 17; MN) E mea faufaa roa ia patoi tatou ia Satani e ta ˈna mau demoni.

²⁰ E nehenehe mau â tatou e mauruuru no te aˈoraa e ahu i te haana tamaˈi atoa a te Atua! Te faaoti ra Paulo i ta ˈna tauaparauraa no nia i te haana tamaˈi pae varua e teie aˈoraa: “Ma te pure tuutuu ore i te mau pure atoa ra, e te ani a te [v]arua ra, e ma te ara-tamau-maite-raa i te reira, e te aniraa hoi i te maitai no te feia moˈa atoa ra.” (Ephesia 6:18; MN) E nehenehe te pure e haapuai ia tatou i te pae varua e e tauturu ia tatou ia ara noa. E pee anaˈe i te mau parau a Paulo e e pure noa anaˈe, no te mea e tauturu te reira ia tatou ia patoi ia Satani e ta ˈna mau demoni.

Eaha ta outou i haapii?

• Mea nafea to Satani e ta ˈna mau demoni faraa mai?

• Mai te aha to te Diabolo puai?

• Eaha ta tatou parururaa i mua ia Satani e ta ˈna mau demoni?

• E nafea tatou e nehenehe ai e ahu i te haana tamaˈi atoa a te Atua?

[Uiraa haapiiraa]

[Hohoˈa i te api 17]

‘Ua hiˈo te tamarii a te Atua i te mau tamahine a te taata nei’

[Hohoˈa i te api 19]

E nehenehe anei outou e faataa i na tuhaa e ono o to tatou haana tamaˈi pae varua?

[Hohoˈa i te api 20]

E nafea te apitiraa i teie mau ohipa e paruru ai i mua ia Satani e ta ˈna mau demoni?