Te ao aroha ore o teie mahana

E 64 matahiti to María e o ˈna anaˈe to ˈna faaearaa. Ua pohe oia i te iteraahia mai i ǒ o ˈna, ua taparahihia e ua uumihia o ˈna e te niuniu.

Ua taparahi te hoê nahoa tei riri e toru mutoi ma te pari ia ratou i te haruraa e piti tamaroa. Ua pîpî te nahoa i te mori pereoo i nia e piti mutoi e ua tutui ia raua i te auahi a papaa roa ˈtu ai raua. Ua nehenehe te toru o te mutoi e horo ê.

E ohipa riaria tei itehia maoti te niuniu a te hoê taata tei ore i faaite i to ˈna iˈoa i te hoê itearaa riaria. Ua iritihia te mau tino pohe o na feia ratere e maha i roto i te hoê aua tiare. Ua taamuhia to ratou mata e to ratou rima. Ua faaite te hoê tâpûraa no te hoê hiˈopoaraa i te tino pohe e ua huna-oraora-hia ratou.

E ere teie mau mea riaria i te mau hautiraa o te mau hohoˈa teatea riaria aroha ore e te haavî uˈana. E aamu mau atoa teie mau faatiaraa o tei faahitihia aita i maoro aˈenei i roto i te vea o te hoê fenua no Marite Latino. Papu maitai râ e e ere i taua noa fenua ra o te ao o teie mahana tera mau ohipa riaria.

Ua riro te mau ohipa aroha ore ei mea matauhia. Te mau topitaraa, totoaraa, taparahiraa taata, aroraa, pupuhiraa e te mau maferaraa, o te tahi noa ïa o taua mau tupuraa aroha ore ra. E rave rahi taime, te faaite nei te mau vea i te mau hohoˈa faataaraa o te mau ohipa riaria, e aita faahou te taata e rave rahi e maere nei i te ite aore ra i te faaroo i taua mau ohipa aroha ore ra.

E uiui paha oe: ‘Eaha te tupu ra i te ao nei o teie mahana? Ua ore anei te haapaoraa atoa i te huru aau o te tahi atu e te faaturaraa i te ora?’ No te aha e mea tia ˈi ia ora tatou i roto i te hoê ao mai teie?

I teie nei a hiˈo na ia Harry, te hoê taata e 69 matahiti e e mariri ai taata to ˈna. E maˈi sclérose en plaques to ta ˈna vahine, tera râ ua ineine to ˈna mau taata tapiri e to ˈna mau hoa i te tauturu ia ˈna. “Aita vau i ite eaha ta mâua e rave aita anaˈe tera mau taata i tauturu ia mâua,” ta Harry ïa e parau ra. I Kanada, i reira oia e ora ˈi, te faaite ra te hoê tuatapaparaa e e hau atu i te 50 % o te taata utuutu i te feia paari o te tauturu nei i te hoê taata e ere i te fetii no ratou. Ma te feaa ore, te ite ra oe i te taata au noa o te faaite pinepine nei i te maitai e te aroha i te taata-tupu. Oia, e nehenehe ta te taata e faaite i te aumauiui e te maitai eiaha râ te aroha ore.

No te aha hoi teie mau ohipa riaria? Na te aha e turai i te taata ia ohipa ma te aroha ore? E nehenehe anei te huru aroha ore o te feia i nia i te tahi atu e taui? E ore anei te aroha ore? Mai te peu e e, e nafea ïa e afea?

[Faaiteraa i te fatu o te hohoˈa i te api 3]

Pereoo auahi: CORDON PRESS