E vî anei te ino?

Ua rave te hoê tamaiti iti hiˈopoa i te hoê taoˈa i roto i te hoê aua—te hoê tupita i nia ê noa i te repo—e ua matapohia oia e ua mutu haere no to ˈna oraraa atoa. Ua faarue te hoê metua vahine i ta ˈna aiû fanau apî, ma te huna ˈtu i roto i te farii pehu i te pae purumu. Ua hoˈi te hoê taata i tihatihia i ta ˈna vahi raveraa ohipa matamua, pupuhi ihora i te taata atoa ta ˈna i ite, e haapohe atura ia ˈna iho. Ua mafera te hoê taata faaturahia i te mau tamarii paruru-ore-hia.

MA TE peapea, ua riro te mau faatiaraa o tera mau huru ohipa iino ei mea matau-roa-hia i to tatou nei tau. Ma te ino atu â, e pinepine teie mau faatiaraa i te tapoˈi-riirii-hia e te mau faatiaraa o te tamâraa nunaa, te haapoheraa taata, e te ohipa totoaraa. “I roto i to ˈna tuhaa ino roa ˈˈe, o te senekele teie a Satani,” ta te hoê ïa vea neneihia i 1995 i parau. “Aita i itehia aˈenei i te mau tau tahito to te taata faaite-uˈana-raa i te aravihi e te hinaaro e haapohe tau mirioni taata no te mau tumu o te iri, o te faaroo aore ra o te tiaraa totiare.”

I te hoê â taime, te haaviivii ra te taata i te reva, te faaino ra i te fenua, te faaiti mai ra i ta ˈna mau faufaa, e te haapohe ra ehia rahiraa huru animara tei fatata hoi i te mou roa. E nehenehe anei te taata e haavî i teie mau mea iino atoa e e faariro i te ao ei vahi maitai aˈe e te atâta ore? Aore ra te tamataraa i te na reira, e ere anei ïa i te tamataraa i te tapea i te nanuraa miti e te purumu? Ua parau te hoê orometua haapii o tei papai rahi i nia i te tumu parau o te ino e: “Ua hinaaro roa ino vau e faatupu i te hoê tauiraa faufaa i roto i te ao, e haamaitai i te ao. Aita râ te ao e maitai mai ra ia hiˈohia.” Peneiaˈe tera atoa to oe manaˈo.

Te huru e arataihia ˈi te ao, e au ïa i te hoê pahi e fano ra na te mau miti o te hautiuti e o te riro ei mea atâta noa ˈtu â i te mau mahana atoa. Noa ˈtu e aita e taata e hinaaro e haere na tera aveia, eita te mau tutavaraa atoa no te taui i te tereraa e manuïa. E tere noa te pahi na roto i te vero haapohe, o te ore e nehenehe e tapea.

I nia i te tahi faito, e nehenehe teie tupuraa o te ino noa ˈtu ra e tuuhia i nia i te huru tia ore o te taata. (Roma 3:23) Ia hiˈohia râ te faito o te ino, to ˈna aanoraa, e to ˈna tuutuu ore, ua rahi aˈe ïa i te manaˈo ino, eita e nehenehe e parau e o te taata noa te tumu. Te faaterehia ra anei te huitaata e te hoê puai itea ore, mana rahi râ e te ino? Mai te peu e e, eaha ïa, e e nafea tatou e nehenehe ai e paruru ia tatou iho? E pahono to muri nei tumu parau i tera mau uiraa.

[Faaiteraa i te fatu o te hohoˈa i te api 3]

© Heldur Netocny/Panos Pictures