Te mau ruhiruhia—e haamaitairaa no te feia apî
Te mau ruhiruhia—e haamaitairaa no te feia apî
“Ia ruhiruhia vau e ia hinahinahia tau upoo, e te Atua e, eiaha oe e faarue mai ia ˈu, ia faaite râ vau i to mana i teie nei ui; e to puai, i te taata atoa ia haere mai.”—SALAMO 71:18.
1, 2. E mea tia ia taa i te mau tavini ruhiruhia a te Atua i te aha, e eaha ta tatou e hiˈopoa i teie nei?
UA HAERE te hoê matahiapo no Afirika tooa o te râ e hiˈo i te hoê taeae ruhiruhia faatavaihia e ua ui atu, “Eaha to oe huru?” Ua pahono te taeae, “E nehenehe au e horo, e ouˈauˈa, e e ouˈa,” ma te tamata i te hauti i ta ˈna e parau ra a paraparau ai raua. “Teie râ,” ta ˈna i na ô faahou, “eita ta ˈu e nehenehe e maurere.” Ua taa i te matahiapo ta ˈna i parau. ‘Te mea ta ˈu e nehenehe e rave, te oaoa ra vau i te rave, area râ ta ˈu e ore e nehenehe e rave, eita ïa vau e rave.’ Te matahiapo o tei haere atu e hiˈo, e 80 tiahapa matahiti ïa to ˈna i teie nei, e te haamanaˈo ra oia ma te oaoa i te huru arearea o te taeae e to ˈna taiva ore.
2 E nehenehe te mau huru maitatai paieti ta te hoê ruhiruhia e faaite e haaputapû maoro roa ia vetahi ê. Oia mau, e ere na te matahiti noa e faatupu mai i te paari e te mau huru maitatai e au i te Mesia. (Koheleta 4:13) Te na ô ra te Bibilia e: “E korona hanahana te upoo hinahina, ia roohia ˈtu tei te eˈa parau-tia ra.” (Maseli 16:31) Mai te peu e e ruhiruhia oe, te taa ra anei ia oe e nafea ta oe mau parau e haaraa e nehenehe ai e ohipa maitai i nia ia vetahi ê? A hiˈopoa i te tahi mau hiˈoraa bibilia e faaite ra e nafea te mau ruhiruhia e riro ai ei haamaitairaa mau no te feia apî aˈe.
Faaroo ma te mau faahopearaa iti rahi
3. Mea nafea te haapao maitai o Noa i te ohiparaa i nia i te taata atoa e ora nei i teie nei?
3 Ua faatupu te faaroo e te aueue ore o Noa i te mau maitai o te itehia ra i teie tau atoa. Ua fatata to Noa e 600 matahiti i to ˈna hamaniraa i te araka, haaputuputuraa i te mau animara, e pororaa i to ˈna mau taata-tupu. (Genese 7:6; Petero 2, 2:5) No to ˈna mǎtaˈu paieti, ua ora mai Noa, oia atoa to ˈna utuafare, i te diluvi rahi e ua riro mai ei tupuna no te taata atoa e ora nei i te fenua i teie mahana. Parau mau, ua ora Noa i te hoê tau e mea roa ˈtu â te oraraa. Noa ˈtu râ e mea ruhiruhia roa oia, ua faaea o Noa ma te haapao maitai, e e mea rahi te haamaitairaa i noaa mai. Mea nafea ïa?
4. E nafea te mau tavini a te Atua i teie mahana e faufaahia ˈi i te aueue ore o Noa?
4 Ua fatata roa to Noa e 800 matahiti i to Nimeroda haamataraa i te patu i te Pare o Babela ei aaraa i ta Iehova faaueraa e ‘faaî i te fenua.’ (Genese 9:1; 11:1-9) Aita râ Noa i apiti atu i te orureraa hau a Nimeroda. Aita paha ïa to ˈna reo i taui i te faahuru-ê-raahia te reo o te mau orure hau. E au mau ia peehia to Noa faaroo e aueue ore, e itehia ra eiaha noa i to ˈna ruhiruhiaraa i te roaraa atoa râ o to ˈna oraraa, e te mau tavini a te Atua o te mau faito matahiti atoa.—Hebera 11:7.
Mana i nia i te utuafare
5, 6. (a) I te 75raa o to Aberahama matahiti, ua parau Iehova ia ˈna ia aha? (b) Mea nafea to Aberahama pahonoraa i ta te Atua faaueraa?
5 E nehenehe te mana o te mau ruhiruhia i nia i te faaroo o to ratou mau melo utuafare e itehia i roto i te oraraa o te mau patereareha i muri aˈe ia Noa. Ua fatata e 75 matahiti to Aberahama i to te Atua parauraa ia ˈna e: “E haere ê mai oe i to fenua na, e to fetii, e te utuafare o to metua na, i te fenua na ˈu e faaite atu ia oe na: e faariro hoi au ia oe ei nunaa rahi; e e haamaitai au ia oe.”—Genese 12:1, 2.
6 A feruri na e ua parauhia mai oe e e faarue i to oe nohoraa, to oe mau hoa, te fenua i fanauhia ˈi oe, e te panoonoo ore o to oe fetii rahi, no te haere i te hoê fenua ta oe i ore i ite. Ua parauhia Aberahama e na reira. Ua “haere atura [oia], i ta Iehova i parau mai ia ˈna ra,” e no te toea o to ˈna oraraa, ua ora oia i raro aˈe i te mau fare ie ei purutia e ei taata e taui noa i te vahi i te fenua Kanaana. (Genese 12:4; Hebera 11:8, 9) Noa ˈtu e ua parau Iehova e e riro mai Aberahama “ei nunaa rahi,” ua pohe oia na mua roa ˈˈe a rahi roa mai ai to ˈna huaai. Ua fanau Sara, ta ˈna vahine, na ˈna hoê anaˈe tamaiti o Isaaka, i muri aˈe noa i to Aberahama parahiraa i te Fenua tǎpǔhia e 25 matahiti i te maoro. (Genese 21:2, 5) Aita râ Aberahama i rohirohi e i hoˈi i te oire no reira mai oia. Auê ïa hiˈoraa o te faaroo e te faaoromai e!
7. Eaha te faahopearaa o te faaoromai o Aberahama i nia i ta ˈna tamaiti o Isaaka, e eaha te itehia i nia i te huitaata?
7 E faahopearaa puai to to Aberahama faaoromai i nia i ta ˈna tamaiti o Isaaka, o tei parahi i to ˈna oraraa taatoa—180 matahiti—ei purutia i te fenua Kanaana. Ua niuhia to Isaaka faaoromai i nia i te faaroo i ta te Atua parau fafau, faaroo i faahotuhia i roto ia ˈna e to ˈna na metua ruhiruhia, e i muri aˈe i haapaarihia e ta Iehova iho i parau ia ˈna. (Genese 26:2-5) E tuhaa faufaa roa to te aueue ore o Isaaka i roto i te tupuraa o ta Iehova parau fafau e e haere mai te hoê “huero” no te haamaitai i te huitaata atoa na roto i te utuafare o Aberahama. Tau hanere matahiti i muri aˈe, ua iriti Iesu Mesia, te tuhaa matamua o tera “huero,” i te ravea e nehenehe ai te taatoaraa o te faaohipa ra i te faaroo ia ˈna e faahauhia i te Atua e e fanaˈo i te ora mure ore.—Galatia 3:16, MN; Ioane 3:16.
8. Mea nafea to Iakoba faaiteraa i te faaroo puai, e eaha te faahopearaa?
8 Area o Isaaka, ua tauturu ïa oia i ta ˈna tamaiti o Iakoba ia atuatu i te faaroo puai o tei turu ia ˈna i to ˈna ruhiruhiaraa. E 97 matahiti to Iakoba ia ˈna i taputô e te hoê melahi ua po te ao no te hoê haamaitairaa. (Genese 32:24-28) Hou to ˈna poheraa i te 147raa o to ˈna matahiti, ua navai to Iakoba puai i te haaputuputuraa no te haamaitai i ta ˈna na tamaiti taitahi 12. (Genese 47:28) Ua haapapu te mau parau tohu ta ˈna i faahiti, i papaihia i teie nei i roto i te Genese 49:1-28, e ua tupu mau te reira e te tupu noa nei.
9. Eaha te nehenehe e parauhia no nia i te mana o te mau ruhiruhia paari i te pae varua i nia i to ratou utuafare?
9 Mea maramarama maitai, e nehenehe te mau tavini ruhiruhia taiva ore a te Atua e mana maitai i nia i to ratou mau melo utuafare. E nehenehe te haapiiraa bibilia amuihia e te reo o te aˈoraa paari e te hoê hiˈoraa o te faaroo e tauturu rahi i te hoê taata apî ia paari mai ma te faaroo puai. (Maseli 22:6) Eiaha roa te mau ruhiruhia e haafaufaa ore i to ratou mana maitai i nia i to ratou utuafare.
Mana i nia i te mau hoa haamori
10. Eaha ta Iosepha “parau i te pera no ˈna,” e eaha te faahopearaa o te reira?
10 E nehenehe atoa te mau ruhiruhia e mana maitai i nia i te mau hoa Kerisetiano. I to ˈna ruhiruhiaraa, ua rave te tamaiti a Iakoba o Iosepha i te hoê ohipa noa o te faaroo o tei ohipa roa i nia i te mau mirioni taata haamori mau o tei ora i muri aˈe ia ˈna. Ua 110 matahiti to ˈna i ‘to ˈna tuuraa mai i te parau i te pera no ˈna,’ oia hoi i to te mau Iseraela faarueraa i te pae hopea ia Aiphiti, ua rave ratou i to ˈna pera na muri ia ratou. (Hebera 11:22; Genese 50:25) E faaiteraa tera e te vai ra te tumu no te tiaturiraa no Iseraela i te roaraa o te matahiti faatîtîraa teimaha e rave rahi i muri aˈe i te poheraa o Iosepha, ma te horoa i te hoê haapapuraa e e faaorahia iho â ratou.
11. Mea nafea paha o Mose ruhiruhia i mana ˈi i nia ia Iosua?
11 O Mose atoa tei rotopu i te feia i faaitoitohia e te faaiteraa i te faaroo o Iosepha. I te 80raa o to Mose matahiti, ua fanaˈo oia i te haamaitairaa taa ê e afai i te pera o Iosepha i rapaeau i te fenua Aiphiti. (Exodo 13:19) I taua area taime ra, ua farerei oia ia Iosua e mea apî roa ˈˈe ia ˈna. I te roaraa o na matahiti e 40 i muri mai, ua riro Iosua ei tavini iho no Mose. (Numera 11:28) Ua apee oia ia Mose i nia i te mouˈa Sinai e to reira oia i to ˈna farereiraa ia Mose i te pouraa mai mai te mouˈa e te mau pǎpǎ ture. (Exodo 24:12-18; 32:15-17) Ua riro mai paha o Mose ruhiruhia ei tumu o te aˈoraa paari e te paari no Iosua!
12. Mea nafea to Iosua haapapuraa e e mana maitai to ˈna i nia i te nunaa Iseraela a ora maoro â ˈi oia?
12 Area o Iosua râ, ua faaitoito ïa i te nunaa Iseraela a ora maoro â ˈi oia. Te faaite maira Te mau tavana 2:7 e: “Ua haamori hoi te taata ia Iehova e hope roa aˈera to Iosua ra anotau, e hope roa aˈera hoi te anotau o te feia paari i toe i te ao nei i muri aˈe ia Iosua ra, o tei ite i te mau ohipa rarahi a Iehova i rave ia Iseraela ra.” I te mea râ e ua pohe o Iosua e te tahi atu mau taata ruhiruhia, ua haamata te hoê tau feaapitiraa e 300 matahiti i te maoro i rotopu i te haamoriraa mau e te mea hape, o te aratai ia tatou e tae noa ˈtu i te tau o Samuela te peropheta.
‘Ua rave Samuela i te parau-tia’
13. Ua aha Samuela no te “rave i te parau-tia”?
13 Aita te Bibilia e parau ra ehia matahiti to Samuela i to ˈna poheraa, teie râ te puohu ra te mau tupuraa i roto i te buka hoê a Samuela fatata 102 matahiti, e ua ite mata Samuela i te rahiraa o te reira. I roto i te Hebera 11:32, 33, te taio ra tatou e “ua rave [te mau tavana e peropheta piˈo ore] i te parau-tia ra.” Oia, ua mana Samuela i nia i te tahi mau taata o to ˈna tau ia ape aore ra ia faarue ratou i te ohipa ino. (Samuela 1, 7:2-4) Mea nafea ïa? Ua faaea taiva ore oia ia Iehova i te roaraa o to ˈna oraraa. (Samuela 1, 12:2-5) Aita oia i mǎtaˈu i te aˈo etaeta i te arii atoa. (Samuela 1, 15:16-29) Hau atu â, ua faaite Samuela, ‘ua ruhiruhia hoi e ua hinahina te upoo,’ i te hiˈoraa maitai roa i te pureraa no vetahi ê. Ua faahiti oia e ‘eiaha roa e faarue i te pure’ no to ˈna mau hoa Iseraela ‘a hara ˈi ia Iehova.’—Samuela 1, 12:2, 23.
14, 15. E nafea te mau ruhiruhia i teie mahana e nehenehe ai e pee ia Samuela no nia i te pure?
14 Te haamahitihiti ra te reira atoa i te hoê ravea faufaa roa e nehenehe ai te mau ruhiruhia e mana maitai i nia i te mau hoa tavini a Iehova. Noa ˈtu te mau taotiaraa o te ea aore ra te tahi atu mau tupuraa, e nehenehe te feia ruhiruhia e pure no vetahi ê. E te mau ruhiruhia, te taa ra anei ia outou e e faufaa-rahi-hia te amuiraa i ta outou mau pure? No to outou faaroo i te toto haamaniihia o te Mesia, te fanaˈo ra outou i te hoê tiaraa fariihia i mua ia Iehova, e no to outou hiˈoraa o te faaoromai, ua noaa to outou faaroo i ‘te tamatahia.’ (Iakobo 1:3; Petero 1, 1:7) Eiaha roa e haamoe: “Te pure faauˈana a te taata parau-tia ra, e mea tia-rahi-hia mai ïa.”—Iakobo 5:16.
15 E mea hinaarohia ta outou mau pure no te turu i te ohipa a te Basileia o Iehova. Tei te fare tapearaa vetahi o to tatou mau taeae no to ratou tiaraa amui ore Kerisetiano. Ua faaruru vetahi ê i te mau ati natura, te tamaˈi e te aroraa tivira. Te faaû noa nei te tahi atu, i roto i ta tatou iho mau amuiraa, i te mau faahemaraa aore ra patoiraa. (Mataio 10:35, 36) E hinaaro atoa te feia e aratai ra i te ohipa pororaa e e tiaau ra i te mau amuiraa ia pure tamau outou no ratou. (Ephesia 6:18, 19; Kolosa 4:2, 3) Auê te maitai ia faahiti outou i to outou mau hoa Kerisetiano i roto i ta outou mau pure, mai ia Epaphera i na reira e!—Kolosa 4:12.
Haapiiraa i te ui e haere mai
16, 17. Eaha tei faaite-atea-hia i roto i te Salamo 71:18, e e nafea te reira e tupu ai?
16 Ua horoa te mau taata haapao maitai o te “nǎnǎ iti,” te feia e tiaturi ra e ora i nia i te raˈi, i te hoê haamataroraa faufaa roa no te feia o te mau “mamoe ê atu,” e tiaturi ra e ora e a muri noa ˈtu i te fenua nei. (Luka 12:32; Ioane 10:16) Ua faaite-atea-hia te reira i roto i te Salamo 71:18, o te na ô ra e: “Ia ruhiruhia vau e ia hinahinahia tau upoo, e te Atua e, eiaha oe e faarue mai ia ˈu, ia faaite râ vau i to mana i teie nei ui; e to puai, i te taata atoa ia haere mai.” Ua ineine noa te feia faatavaihia i te varua i te haamataro i te tahi atu o to ratou mau hoa o te mau mamoe ê atu no te amo i te mau hopoia rahi atu â hou ratou e faahanahanahia ˈi i pihai iho ia Iesu Mesia.
17 E nehenehe atoa e faaohipahia ta te Salamo 71:18 e parau ra no nia i te haapiiraa i ‘te taata e haere mai’ no te mau mamoe ê atu, o tei haapiihia e te feia faatavaihia a te Atua. Ua horoa Iehova na te mau ruhiruhia i te fanaˈoraa taa ê e faaite ia ˈna i te feia e farii ra i teie nei i te haamoriraa mau. (Ioela 1:2, 3) Te haamaitaihia ra te mau mamoe ê atu no ta ratou i haapii no ǒ mai i te feia faatavaihia e te faaitoitohia ra ratou ia faaite i ta ratou i haapii i roto i te Bibilia ia vetahi ê atoa o te hinaaro ra e tavini ia Iehova.—Apokalupo 7:9, 10.
18, 19. (a) Eaha te haamaramaramaraa faufaa roa e nehenehe e rave rahi tavini ruhiruhia a Iehova e horoa? (b) E mea tia ia tiaturi te mau Kerisetiano ruhiruhia i te aha?
18 E taairaa ora te mau tavini ruhiruhia a Iehova, tei faatavaihia e to te mau mamoe ê atu atoa, i te mau tupuraa faufaa o te tuatapaparaa. Ua tae te tahi e ora noa ra i te mau faaiteraa matamua o te “Photo-Drame de la Création.” Ua matau vetahi iho i te mau taeae e tiaau nei i tapeahia i 1918. Ua apiti vetahi ê i te mau haapurororaa i nia i te pu radio a te Watchtower, te WBBR. E nehenehe e rave rahi e faatia i te mau haavaraa no nia i te tiamâraa i te pae haapaoraa a te mau Ite no Iehova i horohia i mua i te mau tiripuna teitei roa ˈˈe. Ua mau papu noa vetahi ê no te haamoriraa mau a ora ˈi ratou i raro aˈe i te mau faatereraa haavî. Oia, e nehenehe te mau ruhiruhia e faatia mea nafea te maramaramaraa o te parau mau i faaite-riirii-hia ˈi. Te faaitoito ra te Bibilia ia tatou ia haafaufaa i teie rahiraa ite.—Deuteronomi 32:7.
19 Te faaitoitohia ra te mau Kerisetiano ruhiruhia ia riro ei hiˈoraa maitai no te feia apî aˈe. (Tito 2:2-4) Peneiaˈe i teie nei aita outou e ite ra i te faahopearaa o to outou faaoromai, ta outou mau pure, e aˈoraa i nia ia vetahi ê. Aita i nehenehe ia Noa, Aberahama, Iosepha, Mose, e te tahi atu ia ite i te ohipa iti rahi o to ratou haapao maitai i nia i te mau ui e haere mai. Teie râ, ua ohipa puai to ratou hiˈoraa o te faaroo e taiva ore; to tatou atoa ïa.
20. Eaha te mau haamaitairaa e tiai maira i te feia o te tapea noa i to ratou tiaturiraa e tae atu i te hopea?
20 Ia paruruhia outou i te “ati rahi,” aore ra ia faatiahia mai outou, auê te au ia fanaˈo i “te ora mau” e! (Mataio 24:21; Timoteo 1, 6:19, MN) A feruri na i te tau o te Faatereraa tausani matahiti a te Mesia a faaore ai Iehova i te mau faahopearaa o te ruhiruhiaraa. Eita to tatou tino e ino faahou, e ara mai râ tatou i te mau mahana atoa ma te maitai-mǎrû-noa-raa mai i te pae tino—mea itoito atu â, mata maitai roa, tariˈa faaroo atu â, huru rapaeau maitai aˈe! (Ioba 33:25; Isaia 35:5, 6) E apî noa te feia e haamaitaihia no te ora i roto i te ao apî a te Atua e a muri noa ˈtu. (Isaia 65:22) No reira, ia tapea noa tatou paatoa i to tatou tiaturiraa e tae atu i te hopea e ia tamau i te tavini ia Iehova ma to tatou nephe atoa. E nehenehe tatou e tiaturi e e faatupu Iehova i te taatoaraa o ta ˈna i fafau e te mea ta ˈna e rave, e hau aˈe ïa i ta tatou e nehenehe e tiai.—Salamo 37:4; 145:16.
Eaha ta oe e pahono?
• Mea nafea te aueue ore o Noa ruhiruhia i haamaitai ai i te huitaata atoa?
• Eaha te faahopearaa o te faaroo o te mau patereareha i nia i to ratou mau huaai?
• I to ratou ruhiruhiaraa, mea nafea to Iosepha, Mose, Iosua e Samuela faaitoitoraa i te mau hoa haamori?
• Eaha te tufaa ta te mau ruhiruhia e nehenehe e horoa mai?
[Uiraa haapiiraa]
[Hohoˈa i te api 27]
Ua ohipa puai te faaoromai o Aberahama i nia ia Isaaka
[Hohoˈa i te api 29]
Ua faaitoito te aˈoraa paari a Mose ia Iosua
[Hohoˈa i te api 30]
E nehenehe ta outou mau pure no vetahi ê e hamani maitai rahi
[Hohoˈa i te api 31]
E faufaahia te feia apî i te faarooraa i te mau ruhiruhia haapao maitai