Te puai o te arero

E RAEA roa e 45 tenetimetera i te roa te arero o te girafe e e mea ravai i te peepee e te puai no te huhuti i te mau rauere o te mau amaa raau. Hoê â teiaha to te arero o te tohora ninamu e to te hoê elefani. A feruri na i te puai e titauhia no te faanuu noa i te arero o te tohora ninamu!

Te arero o te taata, mea nainai ïa ia hiˈohia te rahi, te teiaha, e te puai. Tera râ, mea puai roa ˈtu â te reira. “Tei te arero te pohe e te ora i te vairaa,” ta te Bibilia ïa e parau ra no teie melo haihai o te tino taata. (Maseli 18:21) Oia mau, ehia taime to tatou faarooraa i te puai haapohe o te arero o te taata o tei faaohipahia no te hamani i te haavare e te parau taviri o tei faaino e tei haapohe atoa i te feia hapa ore?

Oia atoa, ua mutu te mau auhoaraa maoro i te mau parau mauiui. Ua mamae te aau i te mau parau etaeta. “Mai te aha ra te maoro o tena na faaoooraa mai i to ˈu nei [nephe], e haaparuparu noa mai ai outou ia ˈu i tena na mau parau?” ta Ioba ïa tei faaino-rahi-hia i autâ. (Ioba 19:2; MN) Ua horoa te pǐpǐ Iakobo i te hoê hohoˈa oraora o te puai faaino o te arero tapea-ore-hia: “Te arero nei, e melo iti haihai ïa, e faaahaaha rahi râ ta ˈna. A hiˈo na i te rahi o te vahie e amâ i te auahi iti haihai ra! E auahi atoa te arero nei.”—Iakobo 3:5, 6.

I te tahi aˈe pae, e nehenehe atoa te puai o te orero e horoa i te ora. Maoti te mau parau aumauiui e te tamahanahana i ora mai ai vetahi i te hepohepo e te haapoheraa ia ratou iho. Ua faaora te mau aˈoraa papu, tei peehia, e rave rahi taata rave i te raau taero e te feia ohipa ino haavî uˈana, i te pohe oioi. Oia mau, “e raau ora” ta te arero o te hoê taata parau-tia e faahotu e “mai te lemoni auro i roto i te vairaa ario ra, o te parau ïa ia parauhia i te taime mau ra.”—Maseli 15:4; 25:11.

Te faaohiparaa maitai roa ˈˈe râ i te arero, o te arueraa ïa i te Atua ra o Iehova, te faaiteraa i te parau apî maitai o te Basileia o te Atua, e te haapiiraa ia vetahi ê i te pue parau mau faufaa roa o te Bibilia. No te aha? Ua parau Iesu e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3; Mataio 24:14; 28:19, 20.