Tutau i nia i te mau faufaa morare no te mau tau atoa

E FARII te mau totaiete taata atoa i te tahi huru ture morare. Aita anei oe e manaˈo atoa ra e mea poiherehia na to te ao e mea au atoa na te rahiraa te mau huru maitatai mai te haerea tia, te hamani maitai, te aumihi, e te miimii ore?

Ta vai faufaa morare?

I te senekele matamua T.T., ua ora te hoê taata haapii-maitai-hia o Saulo te iˈoa i rotopu e toru faanahoraa mana o te mau faufaa morare—ta te ati Iuda, ta te Heleni, e ta te  Roma. Hau atu i te mau tutuu e te mau ture fifi roa titauhia e taua mau taˈere ra, ua haroaroa Saulo e e pinepine te taata i te arataihia e te hoê huru aau morare i roto ia ratou. To tatou ïa manaˈo haava. I muri aˈe i to Saulo riroraa ei aposetolo Kerisetiano Paulo, ua papai oia e: “Te Etene . . . aita a ratou ture ra, ia rave noa ratou i ta te ture ra [“te ture natura,” V.C.J.S.], ore noa ˈtu â ta ratou ture, o ratou iho â ta ratou ture: ua faaite hua hoi ratou i ta te ture i papaihia i roto i to ratou ra aau, te faaite ra hoi to ratou [“manaˈo haava,” MN].”—Roma 2:14, 15.

E navai anei râ ia arataihia tatou e “te ture natura” noa ia tamata tatou i te faaoti eaha te mea maitai e eaha te mea ino? Ua ite paha oe e i roto i te tuatapaparaa, mea rahi te taata e te pǔpǔ tei patore. No reira e rave rahi i tiaturi roa ˈi e e hinaaro tatou i te hoê aratairaa a te hoê tumu teitei aˈe o te haamau i te mau faufaa morare maitai roa ˈˈe e haapao. Mea rahi te farii e o Tei hamani i te huitaata te tano roa ˈˈe ia pûpû mai i tera mau ture aveia no te mau tau atoa. I roto i ta ˈna buka The Undiscovered Self, teie ta Taote Carl Jung i tapao: “Eita e noaa i te taata aita i tutau i nia i te Atua ia patoi o ˈna anaˈe i te mau faahemaraa pae tino e morare a te ao.”

Te tuati ra teie manaˈo i ta te hoê peropheta no tahito i papai: “E ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.” (Ieremia 10:23) Te na ô ra to tatou Atua Poiete e: “O vau . . . tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra.”—Isaia 48:17.

Te hoê tumu papu o te mau faufaa morare e nehenehe e tiaturi

No roto mai te mau parau i faahitihia aˈenei i te tumu o te mau faufaa morare opere-roa ˈˈe-hia—te mau Papai Moˈa. E mirioni taata i te ao nei, te feia Kerisetiano ore atoa e te feia aita e haapaoraa ta ratou, tei imi i roto i te mau Papai i te haroaroaraa e te paari. Teie ta te rohipehe Heremani o Johann Wolfgang von Goethe, i papai: “No ˈu nei, mea au na ˈu e mea faatura roa vau i [te Bibilia], no te mea ua ohipa te Bibilia i nia fatata i te taatoaraa o ta ˈu haereraa i mua i te pae morare.” Ua faahitihia ta te faatere Hindou o Mohandas Gandhi i parau: “A inu roa ino i te pape i horoahia ˈtu i roto i te Aˈoraa i nia i te mouˈa [tuhaa o te mau haapiiraa a Iesu Mesia i roto i te Bibilia] . . . No tatou taitahi e no tatou pauroa hoi te haapiiraa o te Aˈoraa.”

Ua faataa te aposetolo Paulo, i faahitihia aˈenei, i te tuhaa faufaa a te mau Papai Moˈa i roto i te horoaraa i te mau faufaa morare papu: “Te mau Papai atoa, e mea faaurua ïa e te Atua e e mea faufaa ei haapiiraa.” (Timoteo 2, 3:16, MN) Tera iho â anei?

Eaha oe e ore ai e hiˈo atu? A hiˈopoa i te mau faaueraa tumu i to muri iho api. A hiˈo i te mau faufaa morare maitatai ta te reira e paturu ra. A feruriruri i te mana o te mau manaˈo i roto i tera mau haapiiraa no te haamaitai i to oe oraraa e to oe mau taairaa e vetahi ê.

E faufaahia anei oe?

Tau hiˈoraa noa te mau faaueraa tumu i tapurahia o te mau aˈoraa e au ia faaohipa i roto i te mau Papai Moˈa. I roto atoa i te Parau a te Atua, mea rahi te faaararaa no nia i te mau manaˈo, parau, e ohipa mauiui o te nehenehe e faaino i to tatou oraraa.—Maseli 6:16-19.

Oia, te pûpû ra te mau haapiiraa bibilia i te tahi mea ta te rahiraa o te taata e ere rahi nei—te mau aˈoraa e nehenehe ai te taata e faaohipa i te mau ture aveia morare maitai roa ˈˈe. E ite te feia o te farii e o te faaohipa i tera mau haapiiraa i te hoê tauiraa rahi. E maitai mai to ratou huru feruriraa. (Ephesia 4:23, 24) E maitai mai to ratou mau manaˈo  turai. Maoti te haapiiraa i te mau faufaa morare a te Atua i faaitehia i roto i te Bibilia, mea rahi te taata tei tinai i roto i to ratou aau i te au ore i te nunaa ê, te manaˈo ino oti noa e te riri. (Hebera 4:12) Ua turai te mau Papai e te mau faufaa morare ta te reira e paturu ra, i te taata ia faaea i te rave i te mau huru haavîraa uˈana atoa e te ino e ia riro ei taata maitai aˈe.

Oia, ua tauturu te mau faufaa morare bibilia i te mau mirioni taata ia tinai i te mau peu e ohipa aˈa maitai, o tei faaino hoi i te oraraa o vetahi ê. (Korinetia 1, 6:9-11) Te taui nei te mau haapiiraa bibilia i tera mau taata—eiaha noa ta ratou mau peu, to ratou aau atoa râ, ta  ratou tiairaa, e to ratou utuafare. A ino noa ˈtu ai te ao, te tamau nei te taata e ati aˈe te ao nei i te maitai roa mai. E eita te reira e faaea. “Te maehe nei te aihere, te maheahea nei te tiare; area te parau a to tatou Atua, e tia ïa i te vai-maite-raa.”—Isaia 40:8.

Teie râ, e faufaahia anei oe iho i “te parau a to tatou Atua”? E oaoa te mau Ite no Iehova i te faaite ia oe e nafea ia farii i te mau faufaa morare bibilia no to oe maitai. Te faaohiparaa i tera mau faufaa morare, o te fanaˈoraa ïa i te farii maitai a te Atua i teie nei e te hoê oraraa mure ore a muri aˈe faaterehia e te mau faaueraa tumu no te mau tau atoa a te Atua.

[Tumu parau tarenihia/Hohoˈa i te mau api 6, 7]

FAAUERAA TUMU NO TE MAU TAU ATOA

Te Ture auro. “Te mau mea atoa ta outou i hinaaro ia vetahi ê ra, e na reira atoa ˈtu outou ia ratou; o ta te ture ïa e ta te mau peropheta.”—Mataio 7:12.

A aroha i to taata-tupu. “E aroha ˈtu oe i to taata-tupu, mai to aroha ia oe iho na.” (Mataio 22:39) “E ore roa te aroha e hamani ino i te taata-tupu: te au ra maori te aroha i te ture.”—Roma 13:10.

A faatura ia vetahi ê. “Ei atiraa aroha mau to outou ia outou iho, i te aroha taeae ra; [a faatura outou na mua] te tahi i te tahi.”—Roma 12:10; MN.

A tapi i te hau. “E tamau . . . i te hau outou outou iho.” (Mareko 9:50) “Peneiaˈe o te tia ra, e parahi hau noa outou i roto i te taata atoa nei.” (Roma 12:18) “E titau tatou i te parau hau.”—Roma 14:19.

A faaore i te hapa. “E faaore mai i ta matou [tarahu], mai ia matou atoa e faaore i tei [amutarahu] ia matou nei.” (Mataio 6:12; MN) “Ia hamani maitai outou ia outou iho, ma te aau mǎrû aroha noa, ma te faaore hoi i te hara te tahi e te tahi.”—Ephesia 4:32.

Ia haapao maitai oe. “A haapao maitai i ta oe iho vahine e a horoa i to oe here ia ˈna anaˈe ra. . . . A oaoa e to vahine e ia oaoa oe e te potii ta oe i faaipoipo . . . Ia oaoa noa oe i to ˈna nehenehe; ia ati o ˈna ia oe i to ˈna here. . . . Eaha hoi oe e horoa ˈi i to here no te tahi atu vahine? Eaha hoi oe e au aˈe ai i te nehenehe o te vahine a te tahi atu tane?” (Maseli 5:15-20, Today’s English Version) “O tei haapao maitai i te mea iti ra, ua haapao maitai atoa i te mea rahi: e o tei ore i haapao i te mea iti ra, aore atoa ïa i haapao i te mea rahi.” (Luka 16:10) “E titauhia . . . te tiaau nei, ei taata haapao [maitai].”—Korinetia 1, 4:2; MN.

Ia tia to haerea. “E parau anei au e maitai to ˈna to tei rave i te faito ino ra, e te pute tapao haavare ra?” (Mika 6:11) “Ua ite mau . . . matou e, te tia nei to matou aau, i te opuaraa e ei haapao maitai ta matou i te mau mea atoa nei.”—Hebera 13:18.

Ei parau mau e ei parau tia ta oe. “Ia riaria outou i te ino, ia hinaaro râ i te maitai, e haapapu i te parau au i te uputa.” (Amosa 5:15) “E faatupu outou i te parau mau e te au i to outou na mau uputa.” (Zekaria 8:16) “E haapae i te haavare, ei parau mau ta te taata atoa ia parau atu i te tahi.”—Ephesia 4:25.

A rave maite i te ohipa. “Te hiˈo ra oe i te taata itoito i te raveraa i to ˈna toroa? ei mua i te aro o te hui arii ra oia e tia ˈi.” (Maseli 22:29) “Eiaha ia toaruaru i te ohipa.” (Roma 12:11) “Ta outou mau mea atoa e rave ra, e rave ma te aau atoa mai te mea e e na te Fatu [ra o Iehova], eiaha na te taata.”—Kolosa 3:23.

Ia mǎrû, ia aumihi, ia hamani maitai oe. “E [ahu i te] aroha noa, e te hamani maitai, e te haehaa, e te mǎrû, e te faaoromai rahi.”—Kolosa 3:12; MN.

Ia pohe te ino i te maitai. ‘E aroha ˈtu i to outou mau enemi e e pure no te feia i hamani ino mai ia outou.’ (Mataio 5:44) “Eiaha ia pohe i te ino, ia pohe râ te ino ia oe i te maitai.”—Roma 12:21.

A horoa i te mea maitai roa ˈˈe na te Atua. “Hinaaro oe i to Atua ia Iehova ma to aau atoa, e ma to [nephe] atoa, e ma to manaˈo atoa. O te ture matamua teie e te hau i te rahi.”—Mataio 22:37, 38; MN.

[Hohoˈa]

Ma te farii i te mau faufaa morare bibilia, e manuïa to tatou faaipoiporaa, e oaoa to tatou utuafare, e mea au roa te mau auhoaraa