Tei nia anei to te Atua mata ia outou?

E ARAVIHI anei to Iehova, te Atua Poiete Rahi ra no te ite? Te ite nei oia! Te turu roa nei te Bibilia: “E ore anei tei hamani i te mata nei e hiˈo?” (Salamo 94:9) E mea teitei roa ˈˈe ta Iehova huru hiˈoraa i ta te taata. Eita noa oia e ite i to tatou huru rapaeau, e ‘tamata atoa râ oia i te aau’ e e nehenehe oia e ‘imi maite i te mau aau.’ (Maseli 17:3; 21:2) Oia, e aravihi to ˈna no te faito i to tatou feruriraa, manaˈo turai, e to tatou mau hinaaro hohonu roa ˈˈe.

Te ite ra Iehova i te mau fifi ta tatou e farerei ra paha i roto i te oraraa, e te pahono nei i ta tatou mau taparuparuraa. Ua papai te fatu salamo e: “Tei te feia parau-tia ra to Iehova mata; e tei ta ratou pure to ˈna tariˈa. Te fatata nei Iehova i te feia aau paruparu ra; e te faaora nei oia i te taata aau taiâ.” (Salamo 34:15, 18) E mea tamahanahana mau ia ite e te taa maira Iehova i to tatou mau tupuraa e te haapao maitai maira i ta tatou mau taparuparuraa haavare ore!

Te ite ra Iehova i te mau ohipa rave-atoa-hia i roto i te poiri. Oia, “te vai noa nei . . . te mau mea atoa ma te maheu roa i mua i to ˈna mata, to tei haava mai ia tatou nei.” (Hebera 4:13) No reira, noa ˈtu e e mea maitai aore ra mea ino ta tatou mau ohipa, te hiˈohia maira te taatoaraa e te Atua. (Maseli 15:3) Ei hiˈoraa, te na ô ra te Genese 6:8, 9 e “i arohahia mai [Noa] e Iehova ra” e “ua au to Noa haerea i te Atua.” Oia, ua noaa ia Noa te farii maitai e te haamaitairaa a Iehova no te mea ua auraro e ua turu oia i te mau faaueraa tumu parau-tia a te Atua. (Genese 6:22) I te tahi aˈe pae, e mea haavî uˈana e e mea hairiiri te taata o to Noa tau. Aita te Atua i tapiri i to ˈna mata i mua i taua tupuraa ra. Ua “ite aˈera Iehova, e ino rahi to te taata o te ao nei, e ua ino anaˈe te mau manaˈo atoa, e te mau opuaraa atoa o te aau i te mau mahana atoa ra.” I te pae hopea, ua hopoi mai Iehova i te haamouraa i nia i te feia ino, ua faaherehere râ ia Noa e to ˈna utuafare.—Genese 6:5; 7:23.

E hiˈo maitai mai anei Iehova ia outou? Oia mau, “te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.” (Paraleipomeno 2, 16:9) E fatata oia i te hopoi ê faahou atu i te feia ino i te fenua nei e i te faaora i te feia mǎrû.—Salamo 37:10, 11.