“Eaha te parau mau?”

UA TUUHIA tera uiraa ia Iesu ma te hoê huru haavahavaha e te tavana Roma o Ponotio Pilato. Aita oia i tiai i te hoê pahonoraa, e aita o Iesu i horoa ˈtu. Peneiaˈe ua hiˈo o Pilato i te parau mau mai te hoê mea fifi ia aapo.—Ioane 18:38.

E rave rahi taata, tae roa ˈtu i te mau aratai haapaoraa, te mau orometua, e te feia poritita, i teie mahana o te faaite ra i tera huru haavahavaha i te parau mau. Te tiaturi ra ratou e e ere te parau mau—te parau mau morare e pae varua iho â râ—i te mea tia roa e mea taotiahia râ e e taui noa. Te auraa ïa e e nehenehe te taata e faaoti no ratou iho eaha te mea tia e eaha te mea hape. (Isaia 5:20, 21) Te auraa atoa e e nehenehe ratou e patoi i te mau faufaa e ture aveia morare pee-maite-hia e te mau ui no mutaa iho, ei mea tahito.

E mea anaanatae ia tapao i te faaiteraa tei turai ia Pilato ia ui. Ua parau Iesu e: “I fanau mai ai au, e i haere mai ai hoi au i te ao nei, e faaite i te parau mau.” (Ioane 18:37) Te parau mau i te hiˈoraa o Iesu, e ere ïa i te hoê manaˈo papu ore, e te taa ore. Ua fafau oia i ta ˈna mau pǐpǐ: “E ite ïa outou i te parau mau, e na te parau mau outou e faatiamâ.”—Ioane 8:32.

Ihea tera huru parau mau e itehia ˈi? I te hoê taime, ua na ô Iesu i te pure i te Atua: “O to parau na te parau mau.” (Ioane 17:17) Te faaite ra te Bibilia, tei faauruhia e te Atua, i te parau mau o te horoa i te hoê aratairaa e tiaturiraa papu atoa no te tau no a muri aˈe—te ora mure ore.—Timoteo 2, 3:15-17.

Ma te tâuˈa ore ua patoi Pilato i te ravea no te haapii mai i tera parau mau. E o oe? No te aha e ore ai e ui i te hoê Ite no Iehova eaha “te parau mau” ta Iesu i haapii? E oaoa ratou i te faaite atu i taua parau mau ra.