Mea ora te parau a Iehova

Manaˈo faufaa o te buka a Hosea

MAI mou roa te haamoriraa mau i roto i te basileia apatoerau o na opu hoê ahuru o Iseraela. I raro aˈe i te faatereraa a Ieroboama II, mea ruperupe Iseraela i te pae materia, e iti oioi mai râ te reira i muri aˈe i to ˈna poheraa. E tau arepurepu e te papu ore i te pae poritita to muri iho. E maha o na arii e ono no muri mai tei taparahi-pohe-hia. (Te mau arii 2, 14:29; 15:8-30; 17:1-6) I te roaraa o teie tau arepurepu i tavini ai Hosea ei peropheta e 59 matahiti i te maoro, o tei haamata i 804 H.T.T.

Te faataa-maitai-hia ra to Iehova huru aau no te nunaa orure hau o Iseraela e te ohipa e tupu i roto i te faaipoiporaa o Hosea. Te heheuraa i te hapa a Iseraela e te mau haavaraa tohu i nia ia ˈna e te basileia o Iuda, o te tumu parau ïa o te poroi a Hosea. Ua papai Hosea i te reira i roto i te buka i mairihia i to ˈna iˈoa, ma te mau taˈo mǎrû, te putapû, te puai e te oraora. Ei tuhaa o te Parau faaurua a te Atua, mea ora te poroi i roto e te puai rahi.—Hebera 4:12.

“E RAVE I TE HOÊ VAHINE I MATARO I TE TAIATA”

(Hosea 1:1–3:5)

E parau Iehova ia Hosea e: “A haere e rave i te hoê vahine i mataro i te taiata.” (Hosea 1:2) E faaroo Hosea e e tamaiti ta raua Gomera e fanau mai. Mea tiamâ ore na tamarii e piti ta Gomera e fanau i muri iho. Te faaite ra te auraa o to raua iˈoa, o Lo-ruhama e o Lo-ami, i to Iehova oreraa e aroha ia Iseraela e faarueraa i to ˈna nunaa taiva.

Eaha mau â to Iehova huru aau no to ˈna nunaa orure hau? E na ô oia ia Hosea: “E haere â, a aroha ˈtu i te tahi vahine hinaarohia e to ˈna ra taua e te faaturi, mai te aroha o Iehova i te mau tamarii a Iseraela, o tei hiˈo i te mau atua ěê ra.”—Hosea 3:1.

Uiraa bibilia pahonohia:

1:1—No te aha Hosea e faahiti ai i na arii atoa e maha i faatere ia Iuda i te roaraa o ta ˈna taviniraa e hoê noa arii o Iseraela? No te mea ïa o te mau arii anaˈe o te opu fetii o Davida tei fariihia ei arii tia o te nunaa maitihia o te Atua. E ere te mau arii o te basileia apatoerau no te opu fetii o Davida, area to Iuda ra, oia ïa.

1:2-9—Ua rave iho â anei Hosea i te hoê vahine i mataro i te taiata? E, ua faaipoipo iho â Hosea i te hoê vahine o te faaturi i muri aˈe. Aita te peropheta e parau ra e e moemoeâ aore ra e orama ta ˈna e faatia ra no nia i to ˈna oraraa i te fare.

1:7—Inafea te utuafare o Iuda i te aroharaahia e faaoraraahia? I 732 H.T.T. ïa, i te tau o te arii Hezekia. I taua tau ra to Iehova faaoreraa i te haamǎtaˈuraa a Asura ia Ierusalema ma te tono mai i te hoê melahi e tairi pohe 185 000 faehau enemi i te hoê noa rui. (Te mau arii 2, 19:34, 35) Ua faaora ïa Iehova ia Iuda eiaha ma “te fana e te ˈoˈe, e te tamaˈi, e te puaahorofenua, e te faahoro puaahorofenua,” ma te melahi râ.

1:10, 11—I te mea e ua topa te basileia apatoerau o Iseraela i 740 H.T.T., mea nafea te mau tamarii a Iseraela i te ‘haaputuputuraahia’ e te mau tamarii a Iuda? Mea rahi o te basileia apatoerau tei haere i Iuda hou to te feia o te fenua o Iuda hopoi-tîtî-raahia i Babulonia i 607 H.T.T. (Paraleipomeno 2, 11:13-17; 30:6-12, 18-20, 25) I to te mau tîtî ati Iuda hoˈiraa i ǒ ratou i 537 H.T.T., tei rotopu atoa te huaai o te feia o te basileia apatoerau o Iseraela ia ratou.—Ezera 2:70.

2:21-23—Eaha ta te mau parau a Iehova e faaite atea ra: “E ueue au ia [Iezereela] i te fenua nei na ˈu iho; e aroha ˈtu hoi au ia ˈna”? O Iezereela te iˈoa o te tamaiti matahiapo a Hosea ia Gomera. (Hosea 1:2-4) E parau tohu te auraa o  taua iˈoa ra, “E ueue te Atua i te huero,” i te haaputuputuraa Iehova i te hoê toea haapao maitai i 537 H.T.T. e te ueueraa ia ratou mai te huero i Iuda. I teie nei, e ueuehia te huero i te fenua tei vai ano na e 70 matahiti i te maoro, ia hotu mai te sitona, te uaina, e te hinu. Ma te pehepehe, te na ô ra te parau tohu e e ani teie mau mea maitatai i te fenua ia horoa mai i to ˈna mau mea maitatai, e e ani te fenua i te raˈi i te ûa. Area te raˈi ra, e ani ïa i te Atua ia horoa mai i te ata ûa. Te tumu, no te haapao rahi ïa i te mau hinaaro o te toea e hoˈi ra. Te faatano ra na aposetolo Paulo e Petero i te Hosea 2:23 i nia i te haaputuputuraa o te hoê toea o te Iseraela pae varua.—Roma 9:25, 26; Petero 1, 2:10.

Haapiiraa no tatou:

1:2-9; 3:1, 2. A feruri na i te mau haapaeraa ta Hosea i rave no te faaea faaipoipo noa ia au i te hinaaro o te Atua! No te rave i te hinaaro o te Atua, ua ineine mau anei tatou i te haapae i ta tatou iho mau mea e au aˈe?

1:6-9. Mea riri roa na Iehova te faaturi pae varua, mai ta ˈna atoa e riri roa i te faaturi pae tino.

1:7, 10, 11; 2:14-23. Ua tupu ta Iehova i faaite atea no nia ia Iseraela e ia Iuda. E tupu noa iho â ta Iehova parau.

2:16, 19, 21-23; 3:1-4. Ua ineine Iehova i te faaore i te hara a te feia e faaite i te tatarahapa haavare ore. (Nehemia 9:17) Mai ia Iehova, ia aumihi e ia aroha tatou i roto i ta tatou mau haaraa e vetahi ê e tia ˈi.

‘E MÂRÔRAA TA IEHOVA’

(Hosea 4:1–13:16)

‘E mârôraa ta Iehova i te mau taata o te fenua.’ No te aha? No te mea ‘aita e parau mau, aore e aroha, aore e ite i te Atua i te fenua.’ (Hosea 4:1) Ua eiâ te feia taiva o Iseraela, ua haamanii i te toto, e ua faaturi i te pae varua e te pae tino. Ua ‘tiaoro ratou ia Aiphiti, ua haere i Asura,’ aita râ i ani i te tauturu a te Atua.—Hosea 7:11.

E faahiti Iehova i ta ˈna haavaraa: “Ua horomiihia Iseraela.” (Hosea 8:8) Ua hara atoa te basileia o Iuda. Te na ô ra te Hosea 12:2 e: “E mârôraa ta Iehova ia Iuda, e faautua ˈtu oia ia Iakoba i tei au i ta ˈna ra mau parau; e tahoo atu oia ia ˈna i ta ˈna i rave ra.” Mea papu râ te hoˈiraa, e fafau hoi te Atua e: “E faaora vau ia ˈna i te apoo ra; e hoo faahou atu vau ia ratou mai te pohe mai.”—Hosea 13:14.

Uiraa bibilia pahonohia:

6:1-3—O vai te parau ra: “E haere mai, tatou e hoˈi ia Iehova ra”? O te mau Iseraela taiva paha teie e faaitoito nei te tahi i te tahi ia hoˈi ia Iehova ra. Mai te peu e tera iho â, te haavarevare tatarahapa noa ra ïa ratou. E aau maitai taime poto noa to ratou mai ‘te ata poipoi e te hau e pee vave.’ (Hosea 6:4) Te parau atoa ra paha te taata e paraparau ra e o Hosea teie e taparuparu ra i te nunaa ia hoˈi ia Iehova ra. Noa ˈtu eaha te tupuraa, ua titauhia ia faaite te feia orure hau o te basileia o na opu hoê ahuru o Iseraela i te tatarahapa mau e ia hoˈi mau â ia Iehova ra.

7:4—Mea nafea te mau Iseraela faaturi i au ai i ‘te umu e tahuhia’? Te faataa ra teie faaauraa i te uˈana o te mau hinaaro iino i roto i to ratou aau.

 Haapiiraa no tatou:

4:1, 6. Ia hinaaro tatou ia farii maitai noa Iehova ia tatou, e titauhia ia tamau tatou i te haapii no nia ia ˈna e i te faaohipa i ta tatou e haapii mai.

4:9-13. E faautua Iehova i te feia o te rave noa i te taatiraa morare ore e te haamoriraa viivii.—Hosea 1:4.

5:1. E mea tia ia patoi roa te feia e aratai ra i rotopu i te nunaa o te Atua i te ohipa apotata. Aita anaˈe, e nehenehe ratou e faahema i te tahi pae ia rave i te haamoriraa hape, a riro atu ai ratou ei ‘marei e ei upeˈa’ no ratou.

6:1-4; 7:14, 16. Mea haavarevare e mea faufaa ore ia parau noa e tatarahapa. No te fanaˈo i te aroha o te Atua, e titauhia ia faaite te taata rave hara i te tatarahapa haavare ore, ma te hoˈi i te hoê mea “teitei aˈe,” oia hoi te hoê huru haamoriraa teitei. Ia tuati ta ˈna mau ohipa i te mau ture aveia teitei a te Atua e tia ˈi.—Hosea 7:16, MN, nota i raro i te api.

6:6. E faaiteraa te rave-noa-raa i te hara i te ereraa i te here taiva ore i te Atua. E pau te tusia pae varua, e vai noa teie fifi.

8:7, 13; 10:13. Ua tupu te faaueraa tumu e “o ta te taata e ueue ra, o ta ˈna â ïa e ooti mai” i nia i te mau Iseraela haamori idolo.—Galatia 6:7.

8:8; 9:17; 13:16. Ua tupu te mau parau tohu no nia i te basileia apatoerau i to to ˈna oire pu o Samaria haruraahia e Asura. (Te mau arii 2, 17:3-6) E nehenehe tatou e tiaturi e e rave te Atua i ta ˈna i parau e e faatupu oia i ta ˈna i faahiti.—Numera 23:19.

8:14. Ua hopoi Iehova i “te auahi i nia i te mau oire no [Iuda]” i 607 H.T.T. na roto i to Babulonia, ma te faatae i te anoraa i tohuhia i nia ia Ierusalema e i te fenua o Iuda. (Paraleipomeno 2, 36:19) E tupu iho â te parau a te Atua.—Iosua 23:14.

9:10. Noa ˈtu e mea pûpûhia ratou i te Atua mau, ua ‘haere te mau Iseraela ia Baala-peora e ua faataa ia ratou no te parau haama.’ E haerea paari ia rave tatou i to ratou hiˈoraa ino ei faaararaa e ia ore e taiva i ta tatou pûpûraa ia Iehova.—Korinetia 1, 10:11.

10:1, 2, 12. E mea tia ia haamori tatou i te Atua ma te hoê aau haavarevare ore. Ia ‘ueue tatou i ta tatou iho ma te parau-tia, e ooti tatou i tei tupu i te aroha o te Atua.’

10:5. E iˈoa faaino o Bete-avena (“Fare o te mauiui” te auraa) i horoahia no Betela (“Fare o te Atua” te auraa). I te hopoi-ê-raahia te idolo kafa o Bete-avena, ua oto to Samaria i te moeraa ta ratou taoˈa haamoriraa. Mea maamaa mau â ia tiaturi i te hoê idolo ora ore eita hoi e tia ia paruru ia ˈna iho!—Salamo 135:15-18; Ieremia 10:3-5.

11:1-4. E haa noa Iehova ma te here e to ˈna nunaa. E ere roa ˈtu te auraroraa i te Atua i te mea faahepo.

11:8-11; 13:14. ‘Aore’ te parau a Iehova no nia i te hoˈiraa to ˈna nunaa i te haamoriraa mau ra ‘i hoˈi faufaa ore noa ia ˈna ra.’ (Isaia 55:11) I 537 H.T.T., ua hope te tîtîraa i Babulonia e ua hoˈi te hoê toea i Ierusalema. (Ezera 2:1; 3:1-3) E tupu iho â ta Iehova i parau na roto i ta ˈna mau peropheta.

12:6. Ia faaoti papu tatou i te faaite i te hamani maitai, i te faatupu i te parau-tia, e i te ati tamau maite ia Iehova.

13:6. Ua “î aˈera [te mau Iseraela] e teitei atura to ratou aau; i haamoe ai ratou ia [Iehova].” E mea tia ia ara tatou i te hinaaro e faateitei ia tatou.

“UA TIA TE MAU HAEREA O IEHOVA”

(Hosea 14:1-9)

E taparuparu Hosea e: “E Iseraela e, e fariu mai oe i to Atua ra ia Iehova; no te mea ua hiˈa oe i to oe ra ino.” E faaitoito oia i te nunaa ia parau ia Iehova e: “E faaore mai i te mau hara atoa, a farii mai ai ia matou ma te aroha; a horoa ˈtu ai matou i te tusia o to matou vaha.”—Hosea 14:1, 2.

E titauhia ia fariu te hoê taata rave hara tatarahapa ia Iehova ra, ia farii i to ˈna mau eˈa, e ia pûpû na ˈna i te mau tusia arueraa. No te aha? No te mea “ua tia te mau haerea o Iehova, e te feia parau-tia e na reira ïa i te haere.” (Hosea 14:9) Te oaoa roa nei tatou e mea rahi â te ‘roohia i te mǎtaˈu ia Iehova e te maitai no ˈna i te mau mahana hopea ra’!—Hosea 3:5.

[Hohoˈa i te api 13]

Te faahohoˈa ra te oraraa utuafare o Hosea i ta Iehova haaraa e o Iseraela