Te faaohipa ra anei oe i te mau taime maitatai no te faaite i ta oe mau tiaturiraa?

“TE VAI mau ra anei te parau mau tia roa?” Tera te manaˈo tumu o te hoê tataˈuraa vauvauraa aiˈa i Poronia. Teie te mau titauraa no te vauvauraa: “Eita tatou e hinaaro i te parau mau tia roa. Aita e taata e hinaaro i te reira. Aita roa ˈtu e parau mau tia roa.” Ua faaoti Agata, piahi tuarua 15 matahiti e Ite no Iehova, i te faaohipa i teie taime maitai no te faaite i ta ˈna mau tiaturiraa faaroo ia vetahi ê.

No te faaineine i ta ˈna vauvauraa, ua ani na mua Agata i te aratairaa a Iehova e ua haamata ˈtura i te haaputu i te mau manaˈo no te reira. Ua ite oia i te mau haamaramaramaraa i roto i Te Pare Tiairaa o te 1 no Tiurai 1995. Ua faahiti oia i te uiraa ta Ponotio Pilato i ui ia Iesu: “Eaha te parau mau?” (Ioane 18:38) Te faaite ra tera uiraa, ta ˈna ïa i tapao, i te hoê huru tâhitohito, mai te mea ra e te na ô ra oia e: ‘Parau mau? Eaha tena mea? Aita e parau mau!’ Ua papai Agata e: “Te haamanaˈo maira te uiraa a Pilato ia ˈna i te mau titauraa o te vauvauraa.”

I muri iho, ua faataa oia i te tupuraa o te manaˈo e te hoê mea mau no te hoê taata, e ere paha ïa i te mea mau no te tahi atu e ua “tano” paha raua e piti. Ua ui oia i teie mau uiraa, “O vai i rotopu ia tatou o te tere na nia i te hoê manureva mai te peu e aita tatou e manaˈo ra e e mea papu roa te mau ture o te puai i rotopu i te reva e te taoˈa?” Ua faaite atura oia i te Bibilia, ma te parau e: “Ua niu-maitai-hia te papuraa o te Parau a te Atua i nia i te mau mea e nehenehe e hiˈopoahia.” Ua faahiti oia i to ˈna tiaturiraa e ia faaoromai â te feia o te imi mau ra i te parau mau tia roa no te ite i te reira.

Ua noaa ta Agata parau tuite taa ê e ua nehenehe atoa oia e horoa i te hoê faaiteraa i mua i te piha taatoa. Mea rahi o to ˈna mau hoa haapiiraa tei farii i ta ˈna pûpûraa e haapii i te Bibilia e o ratou. Te mauruuru nei Agata no to ˈna faaohiparaa i teie taime maitai no te faaite i ta ˈna mau tiaturiraa i te tahi atu e rave rahi. Oia, e nehenehe te moemoeraa i te hoê taime maitai no te faaite i to oe faaroo e horoa mai i te faahopearaa maitai. Eaha te mau taime maitatai ta oe e nehenehe e faaohipa?