E pee anaˈe i te Tavini Rahi tei faariro i te taata ei pǐpǐ
E pee anaˈe i te Tavini Rahi tei faariro i te taata ei pǐpǐ
“E ara i to outou faarooraa.”—LUKA 8:18.
1, 2. No te aha oe e haapao ai i te huru o Iesu i nia i te taata i te roaraa o ta ˈna taviniraa?
TE AMO ra Iesu Mesia i to ˈna tiaraa ei Orometua e Tavini Rahi tei faariro i te taata ei pǐpǐ a parau ai oia i ta ˈna mau pǐpǐ e: “E ara i to outou faarooraa.” (Luka 8:16-18) E tano tera faaueraa tumu i ta oe taviniraa ei Kerisetiano. Ia haapao oe i te mau faaueraa pae varua, e faaohipa ïa oe i te reira e e riro mai oe ei taata poro manuïa. Parau mau, eita oe e faaroo i to Iesu reo i teie mahana, e nehenehe râ oe e taio i te mea o ta ˈna i parau e i rave, mai tei faaitehia i roto i te mau Papai. Eaha ta te reira e faaite ra no nia i to Iesu huru i nia i te taata i te roaraa o ta ˈna taviniraa?
2 Ua riro Iesu ei taata poro maitai roa o te parau apî maitai e ei orometua faahiahia roa o te parau mau bibilia. (Luka 8:1; Ioane 8:28) To roto i te faariroraa i te taata ei pǐpǐ te pororaa e te haapiiraa, e mea fifi râ no te tahi mau Kerisetiano poro aravihi ia haapii i te taata ma te manuïa. I te mea e ua riro te pororaa ei faaiteraa i te hoê poroi, te titau nei te haapiiraa i te taata no nia ia Iehova e ta ˈna opuaraa ia faatupu te orometua haapii i te hoê taairaa e te pǐpǐ. (Mataio 28:19, 20) E nehenehe e na reira ma te pee ia Iesu Mesia, te Orometua e te Tavini Rahi tei faariro i te taata ei pǐpǐ.—Ioane 13:13.
3. Ma te pee ia Iesu eaha te tupu mai i ta oe mau tutavaraa no te faariro i te taata ei pǐpǐ?
3 Ia pee outou i ta Iesu mau ravea haapiiraa, e pee ïa outou i te aˈoraa a te aposetolo Paulo: “Ei haerea haapao maitai to outou ia ratou i to rapae au ra, ma te faaherehere hoi i te taime. Ei parau mǎrû maitai anaˈe â ta outou, ia rapaauhia i te miti ra i te ite, ia ite outou i te mea tia ia parau atu i te taata atoa ra.” (Kolosa 4:5, 6) E titau te peeraa ia Iesu no te faariro i te taata ei pǐpǐ i te mau tutavaraa, e manuïa râ ta oe haapiiraa no te mea e tauturu te reira ia oe ia ite i te mea e tia “ia parau atu i te taata” taitahi ia au i tei hinaarohia e ana.
Ua faaitoito Iesu i te taata ia paraparau
4. No te aha i parauhia ˈi e e taata ite maitai Iesu i te faaroo?
4 Mai te tamarii-rii-raa mai â, ua matau Iesu i te faaroo i te taata e te faaitoito ia ratou ia faaite mai i to ratou mau manaˈo. I te 12raa o to ˈna matahiti, ei hiˈoraa, ua ite to ˈna na metua ia ˈna i roto i te hiero i rotopu i te mau orometua, “te faaroo atura e te ui atura ia ratou.” (Luka 2:46) Aita Iesu i haere i te hiero no te haapeapea i te mau orometua i to ˈna ite. Ua haere oia i reira no te faaroo, noa ˈtu e ua ui atoa oia i te mau uiraa. I te mea e e taata ite maitai o ˈna i te faaroo no taua huru ra paha te Atua e te taata i here ai ia ˈna.—Luka 2:52.
5, 6. Mea nafea tatou i ite ai e ua faaroo Iesu i te mau parau a te feia ta ˈna i haapii atu?
5 I muri aˈe i to ˈna bapetizoraa e faatavairaahia ei Mesia, ua tamau noa Iesu i te faaroo maitai atu i te taata. Aita oia i manaˈo rahi roa i te mea o ta ˈna i haapii atu a ore ai e tâuˈa ˈtu i te feia i haere mai e faaroo i ta ˈna parau. E pinepine o ˈna i te faaea i te parau, i te ui i to ratou manaˈo, e i te faaroo i ta ratou pahonoraa. (Mataio 16:13-15) Ei hiˈoraa, i muri aˈe i te poheraa o Lazaro, to Mareta taeae, ua parau atu Iesu e: “E te taata ora atoa nei e faaroo ia ˈu ra, e ore roa ˈtu ïa e pohe.” E ua parau atura oia ia ˈna e: “Ua [tiaturi] oe i te reira?” E ua faaroo mau Iesu i ta Mareta pahonoraa: “E te Fatu, e, ua [tiaturi] au e o oe te Mesia te Tamaiti a te Atua.” (Ioane 11:26, 27; MN) Auê i te mauruuru rahi e ia faaroo ia Mareta i te faaiteraa mai i to ˈna faaroo mai tera te huru!
6 Ia faarue e rave rahi pǐpǐ ia Iesu, ua hinaaro o ˈna e faaroo i te manaˈo o ta ˈna mau aposetolo. No reira oia i ui ai: “E haere atoa anei outou?” Ua pahono atu Simona Petero e: “E te Fatu, e haere tia matou ia vai ra? tei ia oe hoi te parau o te ora mure ore ra. Ua [tiaturi] aˈenei hoi matou, e ua ite hoi matou e, o oe te Mesia, te Tamaiti a te Atua ora ra.” (Ioane 6:66-69; MN) Ua faaoaoa mau teie mau parau ia Iesu! Papu, e oaoa mau oe ia faaite te hoê taata haapii bibilia i ta ˈna e tiaturi.
Ua faaroo Iesu ma te faatura
7. No te aha e rave rahi taata Samaria i tiaturi ai ia Iesu?
7 Te tahi atu tumu i riro ai Iesu ei tavini tei manuïa i te faariro i te taata ei pǐpǐ no te mea ua tâuˈa oia i te taata e ua faaroo atu oia ma te faatura. I te hoê taime, ei hiˈoraa, ua poro Iesu i te hoê vahine Samaria i te apoo pape a Iakoba i Sikara. Ia raua i tauaparau, e ere o Iesu anaˈe te paraparau, ua faaroo râ oia i ta te vahine parau. A faaroo ai Iesu ia ˈna, ua tapao oia i to ˈna anaanatae i te haamoriraa e ua parau atu oia e te imi ra te Atua i te feia e haamori ia ˈna ma te varua e te parau mau. Ua faatura e ua anaanatae Iesu i teie vahine, no reira ïa i parau ai ia vetahi ê no nia ia Iesu, e “e rave rahi maira i taua oire ra to Samaria i [tiaturi] ia ˈna i te parau a te vahine i parau atura.”—Ioane 4:5-29, 39-42; MN.
8. E nafea te hinaaroraa te taata i te faaite i to ratou mau manaˈo e tauturu ai ia oe ia haamata i te mau tauaparauraa i roto i te taviniraa?
8 Mea au iho â na te taata e faaite i to ratou mau manaˈo. Ei hiˈoraa, mea au roa na to Ateno e horoa i to ratou mau manaˈo e e faaroo i te tahi mea apî. Na te reira i aratai i te aposetolo Paulo ia orero ma te manuïa i te Areopago o taua oire ra. (Ohipa 17:18-34) I teie mahana, ia haamata oe i te paraparau i te hoê fatu fare, e nehenehe oe e parau mai teie, “Te farerei nei au ia oe no te mea te hinaaro nei au e ite i to oe manaˈo [no nia i te tahi tumu parau].” A faaroo i to te taata manaˈo, e a paraparau no nia i te reira aore ra a ui i te hoê uiraa. I reira râ, a faaite ma te mǎrû i ta te Bibilia e parau ra no nia i teie tumu parau.
Ua ite Iesu i te haamata i te hoê tauaparauraa
9. Eaha ta Iesu i rave hou oia i ‘faaite maitai ai i te auraa o te mau Papai’ ia Keleopa e to ˈna hoa?
9 Ua ite iho â Iesu eaha ta ˈna e parau atu. Hau atu i te riroraa ei taata ite maitai i te faaroo atu, pinepine oia i te ite i to te taata manaˈo, e ua ite maitai o ˈna eaha ta ˈna e parau atu. (Mataio 9:4; 12:22-30; Luka 9:46, 47) Ei faahohoˈaraa: I muri iti aˈe i to Iesu tia-faahou-raa, te haere ra e piti na pǐpǐ mai Ierusalema i Emausa. “E te paraparau noa ra raua, e te feruri noa ra raua raua iho,” ta te Evanelia e faatia nei, “ua taati atoa maira Iesu ia raua, haere atoa ˈtura ratou. Ua faaorehia râ te ite i to raua mata, aita ˈtura raua i ite ia ˈna, Ua parau maira oia ia raua, Eaha tena na parau ta orua i paraparau noa na ma te mata huru oto? Ua parau atura te hoê o raua ra ia ˈna, o Keleopa te iˈoa, na ô atura, O oe anaˈe na paha te taata ê i Ierusalema nei aore i ite i te mau mea i tupu i reira i eie nei pue mahana? Ua na ô maira oia ia raua, Eaha ïa mau mea?” Ua faaroo te Orometua Rahi ia raua i te faataaraa e ua haapii Iesu no Nazareta i te taata, ua faatupu oia i te mau semeio e ua faautua-pohe-hia o ˈna. I teie nei, te parau ra vetahi e ua faatiahia o ˈna mai te pohe mai. Ua vaiiho Iesu ia Keleopa e to ˈna hoa ia faaite mai i to raua manaˈo. E ua faataa ˈtura ia raua i tei tia ia raua ia ite, ma te ‘faaite maitai ia raua i te auraa o te mau Papai.’—Luka 24:13-27, 32.
10. E nafea paha oe e ite ai i te manaˈo o te hoê taata ta oe e farerei i roto i te taviniraa no nia i te haapaoraa?
10 Aita paha oe i ite i te manaˈo o te hoê fatu fare no nia i te haapaoraa. No te ite atu i te reira, e nehenehe oe e parau e e oaoa oe i te faaroo i te manaˈo o te taata no nia i te pure. I reira oe e ui ai, “Ia manaˈo oe, te vai ra anei te hoê taata o te faaroo mau i te mau pure?” E faaite mai paha te pahonoraa i to teie taata manaˈo e rave rahi e eaha ta ˈna haapaoraa. Mai te peu e mea au na teie taata te haapaoraa, e nehenehe paha oe e haaparaparau hau atu ia ˈna ma te ui, “Ia manaˈo oe, e faaroo anei te Atua i te mau pure atoa, aore ra te vai ra anei te mau pure o ta ˈna e ore e farii?” E nehenehe teie mau uiraa e faaohie i te tauaparauraa. Ia tano i te faaite atu i te manaˈo o te Bibilia, ia ravehia te reira ma te mǎrû, eiaha e aimârô i ta te taata e tiaturi nei. Ia oaoa te taata i te faaroo ia oe, e hinaaro paha o ˈna ia hoˈi faahou mai oe. Ahiri râ e ui mai o ˈna i te hoê uiraa aita oe i ite i te pahonoraa? E nehenehe oe e faatupu i te tahi mau maimiraa e e hoˈi ineine no te horoa ˈtu ‘i [te tumu o ta oe tiaturiraa] ma te mǎrû e te auraro maite atu.’—Petero 1, 3:15; MN.
Ua haapii Iesu i te taata au
11. Eaha te tauturu ia oe ia imi i te taata e au ia haapiihia?
11 Tei te taata tia roa o Iesu te haroaroaraa, a nehenehe ai oia e ite i te taata e au ia haapiihia. No tatou nei râ, e mea fifi roa ia imi i te feia “[aau farii e tano] no te ora mure ore.” (Ohipa 13:48; MN) Mai te reira atoa no te mau aposetolo o ta Iesu i parau atu e: “E te oire e te oire iti ta outou e tomo ra, e ui atu i to reira taata au.” (Mataio 10:11) Mai no te mau aposetolo a Iesu, e mea tia ia imi oe i te taata o te hinaaro nei e faaroo e ia haapiihia ratou no nia i te parau mau o te Bibilia. E nehenehe oe e imi i te taata au ma te faaroo maitai i te hoê taata i muri iho i te tahi, ma te tapao i te huru o te taata taitahi.
12. E nafea oe e tauturu noa ˈi i te hoê taata anaanatae?
12 Ia vaiiho oe i te taata tei faaite i te tahi anaanatae i te poroi o te Basileia, e mea maitai ia manaˈo â oe i to ˈna mau hinaaro pae varua. Mai te peu e e tapao oe i ta oe i ite i muri aˈe i te tauaparauraa e te hoê taata no nia i te parau apî maitai, e mea na reira oe e tauturu noa ˈi i teie taata i te pae varua. Ia hoˈi faahou oe e farerei ia ˈna, e titauhia oe ia faaroo maitai mai te peu e e hinaaro oe e haapii hau atu â no nia i te tiaturiraa, te haerea, aore ra te huru oraraa o teie taata.
13. Eaha te tauturu ia oe ia haroaroa i te manaˈo hohonu o te taata no nia i te Bibilia?
13 E nafea oe e faaitoito ai i te taata ia faaite mai i to ˈna manaˈo no nia i te Parau a te Atua? I te tahi mau vahi, e mea tano ia ui, “E mea fifi roa anei no oe ia taa i te Bibilia?” E pinepine te pahonoraa i teie uiraa i te faaite mai i te manaˈo o te taata no nia i te mau mea pae varua. Te tahi atu ravea o te taioraa ˈtu i te hoê irava e te uiraa ˈtu, “Eaha to oe manaˈo?” Mai ia Iesu, e rave rahi te oti ia oe i roto i ta oe taviniraa ma te faaohipa i te mau uiraa tano. A haapao maitai râ.
Ua faaohipa Iesu i te mau uiraa ma te manuïa
14. Ma te ore e uiui haere noa i te taata, e nafea oe e faaite ai e te anaanatae ra oe i to ratou manaˈo?
14 A anaanatae atu i to vetahi ê manaˈo ma te ore e faahuru ê ia ratou. A pee i te huru raveraa a Iesu. E ere oia i te taata ui ma te faatano ore i te parau, ua faaohipa râ oia i te mau uiraa haaferuriraa. E taata faaroo mǎrû atoa o Iesu tei faaitoito i te taata aau rotahi e tei faaohie i te taairaa. (Mataio 11:28) E paraparau ohie noa mai te mau huru taata atoa ia ˈna no nia i to ratou mau fifi. (Mareko 1:40; 5:35, 36; 10:13, 17, 46, 47) Mai te peu e e faaite ohie noa mai te taata i to ratou manaˈo no nia i te Bibilia e ta ˈna mau haapiiraa, eiaha roa oe e uiui haere noa ia ratou.
15, 16. E nafea oe e haaparaparau ai i te taata no nia i te mau ohipa haapaoraa?
15 Hau atu râ i te uiraa ˈtu ma te manuïa, e nehenehe oe e faaitoito i te tauaparauraa ma te parau i te tahi mea anaanatae e a faaroo atu ai i te pahonoraa. Ei hiˈoraa, ua parau Iesu ia Nikodemo e: “Ia ore te taata ia fanau faahou ra, e ore oia e ite i te basileia o te Atua.” (Ioane 3:3) No te maere rahi o teie mau parau aita ˈtura Nikodemo i nehenehe e tapea ia ˈna i te uiraa e te faarooraa ia Iesu. (Ioane 3:4-20) E nehenehe atoa paha oe e haaparaparau i te taata mai te reira te huru.
16 I teie mahana, ua riro te tupuraa mai e rave rahi haapaoraa apî ei tauaparauraa i te mau fenua mai Afirika, Europa Hitia o te râ, e Marite Latino. I teie mau fenua, e haamata ohie noa oe i te tauaparauraa ma te na ô e: “Te peapea ra vau i te mea e ua rahi roa te mau haapaoraa. Te tiaturi nei râ vau e ua fatata roa te taata o te mau fenua atoa i te tahoê i roto i te haamoriraa mau. E hinaaro anei oe e ite atu i te reira?” Ma te parau i te tahi mea maere no nia i ta oe tiaturiraa, e nehenehe paha oe e haaparaparau i te taata no nia i to ratou manaˈo. E mea ohie aˈe ia pahono i te mau uiraa mai te peu e te vai ra e piti ravea pahonoraa. (Mataio 17:25) Ia oti te fatu fare i te faataa i to ˈna manaˈo no nia i ta oe uiraa, a pahono atu ma te rave i te hoê aore ra e piti irava. (Isaia 11:9; Zephania 3:9) Ma te faaroo maitai e ma te tapao i te pahonoraa a te taata, e nehenehe paha oe e faataa eaha te tauaparau ia hoˈi faahou atu oe.
Ua faaroo Iesu i te mau tamarii
17. Eaha te faaite nei e ua anaanatae Iesu i te mau tamarii?
17 Aita Iesu i anaanatae noa i te mau taata paari i te mau tamarii atoa râ. Ua ite oia i te mau hauti a te tamarii e te mau mea o ta ratou i paraparau. I te tahi mau taime, ua titau oia ia haere mai te mau tamarii ia ˈna ra. (Luka 7:31, 32; 18:15-17) E rave rahi tamarii i rotopu i te nahoa taata tei faaroo ia Iesu. I to te mau tamaroa apî piiraa ma te arue i te Mesia, ua tâuˈa ˈtu Iesu e ua faaite e ua tohuhia te reira e te mau Papai. (Mataio 14:21; 15:38; 21:15, 16) I teie mahana, e rave rahi tamarii te riro mai ei pǐpǐ a Iesu. E nafea ïa oe e tauturu ai ia ratou?
18, 19. E nafea oe e tauturu ai i ta oe tamarii i te pae varua?
18 No te tauturu i ta oe tamarii i te pae varua, e mea tia ia faaroo oe ia ˈna. E mea maitai ia taa oe i to ˈna mau manaˈo aita paha e tuea ra i to Iehova manaˈo. Noa ˈtu eaha ta ta oe tamarii e parau, e mea paari ia haapopou ia ˈna na mua. I muri iho, e nehenehe oe e faaohipa i te mau irava e tano no te tauturu i ta oe tamarii ia taa i to Iehova manaˈo i te mau mea.
19 E mea faufaa te mau uiraa. Eita râ te tamarii e au ia uiuihia ratou mai te taata paari atoa hoi. Eiaha e tuu i nia i ta oe tamarii i te hopoia teimaha e pahono i te tahi mau uiraa fifi, no te aha oe e ore ai e horoa i te tahi parau poto no nia ia oe? Ia au i te tumu parau aparauraa, e parau paha oe e na mua ˈtu tera to oe huru aau e e faataa oe no te aha. E e na ô paha oe, “Tera atoa anei to oe huru?” E nehenehe te pahonoraa a ta oe tamarii e aratai atu i te hoê aparauraa bibilia faufaa e te faaitoito.
E pee noa anaˈe i te Tavini Rahi tei faariro i te taata ei pǐpǐ
20, 21. No te aha e mea tia ˈi ia faaroo maitai i roto i ta oe ohipa ei tavini o te faariro i te taata ei pǐpǐ?
20 Noa ˈtu e te aparau nei oe i nia i te hoê tumu parau e ta oe tamarii aore ra te tahi atu taata, e mea faufaa ia faaroo maitai ia ˈna. Oia mau, e faaiteraa tera o te here. Ma te faaroo atu, te haa nei oe ma te haehaa, e te faatura nei e te tâuˈa nei oe ma te here i te taata e paraparau maira. Parau mau, e titau te faarooraa ia haapao maitai oe i te mau parau a te hoê taata.
21 A haa ˈi oe i roto i te taviniraa Kerisetiano, a tamau i te faaroo maitai i te mau fatu fare. Ia haapao maitai oe i ta ratou parau, e nehenehe oe e ite maite eaha te mau tuhaa o te parau mau bibilia o ta ratou e au rahi. E a tutava i te tauturu ia ratou ma te faaohipa i te mau ravea haapiiraa rau a Iesu. Ia na reira oe, e haamaitaihia oe i te oaoa e te mauruuru no te mea te pee ra oe i te Tavini Rahi tei faariro i te taata ei pǐpǐ.
E nafea oe e pahono ai?
• Mea nafea Iesu i faaitoito ai ia vetahi ê ia faaite mai i to ratou mau manaˈo?
• No te aha Iesu i faaroo ai i te feia o ta ˈna i haapii atu?
• Mea nafea oe e faaohipa ˈi i te mau uiraa i roto i te taviniraa?
• Eaha ta oe e nehenehe e rave no te tauturu i te mau tamarii i te pae varua?
[Uiraa haapiiraa]
[Hohoˈa i te api 28]
I roto i te pororaa, a faaroo maitai
[Hohoˈa i te api 30]
Te pee nei tatou ia Iesu ia tauturu tatou i te tamarii i te pae varua